E Silisili le Malo o le Atua

NA AʻOAʻO e Iesu ona soo: “O lenei, ia faapea outou ona tatalo, Lo matou Tamā e, o i le lagi, Ia paia lou suafa. Ia oo mai lou malo, Ia faia lou finagalo, I le lalolagi e pei ona faia i le lagi.” (Mataio 6:9, 10) O lenei tatalo lea e iloa e le toʻatele, o Lo Matou Tamā po o le Tatalo a le Alii, ua faamatalaina ai le fuafuaga o le Malo o le Atua.

O le a faapaiaina le suafa o le Atua e ala i le Malo. O le a aveesea ai faiga faalumaina ia na iai ona o le fouvalega a Satani ma tagata. E tāua tele lenei mea. E faalagolago le fiafia o agelu atamamai i lo latou manatu i le suafa o le Atua e paia, ma malilie e talia lana aiā e pule ai.—Faaaliga 4:11.

E lē gata i lea, ua faatūina le Malo ina ia ‘faia le finagalo o le Atua i le lalolagi e pei ona faia i le lagi.’ O le ā lenā finagalo? O le toe faafoʻisia o le faiā a le Atua ma tagata lea na leiloa iā Atamu. O le a faataunuu foʻi e le Malo le finagalo o le Pule Silisili ese o Ieova, ia faia se parataiso i le lalolagi lea o le a olioli ai e faavavau tagata lelei. Ioe, o le a aveesea e le Malo o le Atua mea leaga uma ia na māfua i le uluaʻi agasala, ma faataunuu moni ai le fuafuaga alofa a le Atua mo le lalolagi. (1 Ioane 3:8) O le mea moni, o lenei Malo ma le mea o le a ia faataunuu, o le feʻau autū lea o le Tusi Paia.

O ā Mea e Silisili Ai?

O le Malo o le Atua, o se malo moni e malosi tele. Na aumai e Tanielu iā i tatou se vaaiga e iloa ai le malosi. Na ia valoia anamua: “E faatūina ai e le Atua o le lagi o le malo e . . . tuʻimomomoina ma faaumatia ia malo [faaletagata] uma lava.” E lē gata i lea, o le eseesega i malo faaletagata ia e tutū mai ma mou atu, e “lē faaumatia e faavavau” le Malo o le Atua. (Tanielu 2:44) E lē na o le pau lenā o le māfuaaga e silisili ai. E silisili lenei Malo i so o se malo faaletagata i mea uma.

E iai se Tupu sili o le Malo o le Atua. Seʻi iloilo po o ai lenā Tupu. E ala i se ‘miti ma ni faaaliga’ na avatu iā Tanielu, na ia iloa ai le Tupu o le Malo o le Atua o “Lē e pei o le Atalii o le tagata,” na momoli i luma o le Atua e Ona le malosi uma lava ma foaʻiina i ai le “pule, ma le viiga, ma le malo.” (Tanielu 7:1, 13, 14) O lenā Atalii o le tagata, o Iesu Keriso le Mesia. (Mataio 16:13-17) Na tofia e Ieova lona Alo o Iesu e fai ma Tupu o Lona Malo. A o iai Iesu i le lalolagi, na ia fetalai i le ʻau Faresaio amioleaga: “Ua i ai lava iā te outou le malo o le Atua,” o lona uiga, o ia le Tupu i le lumanaʻi o lenā Malo, sa iai faatasi ma i latou.—Luka 17:21.

O ai se tasi e mafai ona faatusatusa atu i agavaa o Iesu i le avea o se Tupu? Ua faamaonia Iesu o se Taʻitaʻi e tonu, maufaatuatuaina ma alofa. Ua faamatalaina o ia e le ʻaufaievagelia o sē e gaoioi, alofa māfana,  ma iai faalogona loloto. (Mataio 4:23; Mareko 1:40, 41; 6:31-34; Luka 7:11-17) E lē gata i lea, o Iesu lē ua faatūina i le lagi, e lē mafai ona toe maliu pe gata mai mea e mafai ona ia fai e pei o tagata.—Isaia 9:6, 7.

E pule mai Iesu ma ana aumea i se tulaga faaeaina. I le faaaliga a Tanielu, na ia vaaia ai “le malo, ma le pule, . . . e tuuina atu ia i le nuu o le ʻau paia.” (Tanielu 7:27) E lē na o Iesu e pule. E iai isi e pule faatasi ma ia o ni tupu ma ositaulaga. (Faaaliga 5:9, 10; 20:6) Na tusi Paulo e tusa ai o i latou: “Na aʻu iloa, faauta foʻi, ua tu mai le Tamaʻi Mamoe i le mauga o Siona, ua faatasi foʻi ma ia tagata e selau afe ma afe e fā sefulu ma le fā o afe, . . . o ē ua faatauina nai le lalolagi.”—Faaaliga 14:1-3.

O Iesu Keriso le Tamaʻi Mamoe ina ua uma ona tofia e fai ma Tupu o le Malo. (Ioane 1:29; Faaaliga 22:3) E faasino atu le mauga o Siona i le lagi. * (Eperu 12:22) O loo pule mai le lagi Iesu ma ana aumea e 144,000. Maʻeu se tofiga mamalu ua pule mai ai! E iai se vaaiga lautele o lo latou iai i le lagi. Talu ai o le lagi o lona nofoaga lea, ua taʻua ai foʻi “le malo o le Atua” o “le malo o le lagi.” (Luka 8:10; Mataio 13:11) E lē mafai e auupega po o ni osofaʻiga faaniukilia ona faamataʻu ma faaleaga lenā malo faalelagi. E lē mafaatoʻilaloina ma o le a faataunuu ai le finagalo o Ieova.—Eperu 12:28.

E iai sui faamaoni o le Malo o le Atua i le lalolagi. E faapefea ona tatou iloa? Ua taʻua i le Salamo 45:16: “E te tofia . . . alii sili i le lalolagi uma.” E faasino atu lenei valoaga i le Alo o le Atua. (Salamo 45:6, 7; Eperu 1:7, 8) O lea la, o le a tofia e Iesu alii sili e fai ma sui. E tatou te mautinoa o le a latou faamaoni e faataunuu lana taʻitaʻiga. I aso foʻi nei, ua aʻoaʻoina tane agavaa o ē o loo auauna o ni toeaina i le faapotopotoga Kerisiano, ina ia aua neʻi “aliitaʻi” i o latou uso talitonu, ae ia puipui, faamalosia, ma faamāfanafana i latou.—Mataio 20:25-28; Isaia 32:2.

E iai tagata nuu amiotonu o le Malo. E sao a latou amio ma amio saʻo i le silafaga a le Atua. (Faataoto 2:21, 22) Ua taʻua i le Tusi Paia: “O ē agamalu, e fai mo latou le nuu; e faafiafia foʻi i latou iā te i latou ona o le manuia e tele.” (Salamo 37:11) O tagata nuu o le Malo e agamalu—aʻoaʻogofie, loto maulalo, ma filemu. E latou te faamuamua o latou manaʻoga faaleagaga. (Mataio 5:3) E latou te mananaʻo e fai le mea tonu ma talia taʻitaʻiga mai le Atua.

E faatautaia le Malo o le Atua i tulafono silisili. O tulafono ma taʻiala e taʻitaʻia ai le Malo e mai iā Ieova. Na i lo le pulea ai ma le lē tonu o i tatou, o le a maua ai aogā. (Salamo 19:7-11) Ua maua e le toʻatele aogā ona o le ola i tapulaa amiotonu a Ieova. O se faaaʻoaʻoga, o le utagia o le fautuaga a le Tusi Paia i tane, avā ma fanau, ua faaleleia ai o tatou olaga faaleaiga. (Efeso 5:33–6:3) Pe a usitai i le faatonuga ia ‘fusia’ i tatou i le alofa, o le a faaleleia a tatou faiā ma isi. (Kolose 3:13, 14) A o tatou ola e tusa ai o mataupu silisili o le Tusi Paia, o le a tatou ati aʻe ni tomai e fai ai galuega ma se vaaiga paleni i tupe. (Faataoto 13:4; 1 Timoteo 6:9, 10) O le a fesoasoani le ʻalofia o le onā, faiga lē mamā, tapaa, ma fualaau faasāina e puipuia ai lo tatou ola mālōlōina.—Faataoto 7:21-23; 23:29, 30; 2 Korinito 7:1.

Na faatūina e le Atua lona Malo. O lona Tupu—le Mesia, o Iesu Keriso—ma ana pule lagolago, e tali atu i le Atua i le sapasapaia o Ana tulafono ma taʻiala alofa. E fiafia tagata  nuu o le Malo e aofia ai ma ona sui i le lalolagi, e ola i tulafono a le Atua. O lea, e faamuamua i olaga o tupu ma tagata nuu o le Malo le Atua. O le Malo la, o se malo moni e pulea e le Atua. E mautinoa e taulau manuia e faataunuu le fuafuaga na faatūina ai. Ae o anafea na amata pule ai le Malo o le Atua lea foʻi e iloa o le Malo o le Mesia?

Amata Pule le Malo

E maua se malamalamaga i le taimi na amata pule ai le Malo i upu a Iesu. Na ia fetalai: “E solia foʻi Ierusalema e nuu ese, seʻia faaiʻuina tausaga o nuu ese.” (Luka 21:24) E na o Ierusalema le aai i le lalolagi sa fesootaʻi tuusaʻo ma le suafa o le Atua. (1 Tupu 11:36; Mataio 5:35) O le aai lea o se malo i le lalolagi sa faamaonia ma lagolagoina e le Atua. Sa solia lenā aai e nuu ese, lea na faalavelavea ai loa e malo o le lalolagi le pule a le Atua i ona tagata. O anafea na amata ai lenei mea?

Na taʻu i le tupu mulimuli na nofoia le nofoālii o Ieova i Ierusalema: “Ave ese ia le pulou ie, to ese ia le palealii; . . . e lē toe i ai lava lea, seʻia afio mai o ia ua i ai le tonu, ona ou avatua ai lea iā te ia.” (Esekielu 21:25-27) Sa tatau ona to ese le palealii mai le ao o lenā tupu, ma sa tatau ona faalavelavea le pulega a le Atua i Ona tagata. Na tupu i le 607 T.L.M. ina ua faaumatia e Papelonia Ierusalema. Sa leai se malo o le Atua i le lalolagi e sui tulaga i lana pulega a o faagasolo “tausaga o nuu ese.” A oo i le iʻuga o na taimi, o le a avatu e Ieova le mana e pule ai i lē “ua i ai le tonu”—o Iesu Keriso. O le ā le umi o lenā taimi?

Ua faapea mai se valoaga i le Tanielu: “Inā tuu i lalo ia le laau, ma faataumaʻoi i ai, a o le tagutugutu o lona pogai, tuu ai pea ia i le eleele, ia mau ai i le fusi uʻamea ma le ʻapa memea . . . seʻia mavae atu ona tausaga e fitu.” (Tanielu 4:23) E pei ona o le a tatou mātauina, o “tausaga e fitu” o taʻua i inei, e tutusa le umi i “tausaga o nuu ese.”

I le Tusi Paia, e iai taimi o loo faaata mai e laau ia tagata, tupu, ma malo. (Salamo 1:3; Ieremia 17:7, 8; Esekielu, mataupu 31) O le laau faafaatusa, sa “iloa mai o ia i le tuluʻiga o le lalolagi uma.” (Tanielu 4:11) O lea la, o le pulega na faaata e le laau lea na tatau ona tuu i lalo ma fusifusia, lea e oo “i le tuluʻiga o le lalolagi” e aofia ai le lalolagi atoa. (Tanielu 4:17, 20, 22) O loo faaata mai la e le laau le pule silisili ese a le Atua, aemaise i lona fesootaʻiga ma le lalolagi. Na faatino lenei pule mo se taimi e ala mai i le malo lea na faatūina e Ieova i le nuu o Isaraelu. Na tuu i lalo le laau faafaatusa, ma na fusia i uʻamea ma ʻapa memea lona pogati e taofi ai le toe tātupu. Na faaalia ai o le a taofia le pulega a le malo lea na faaaogā e le Atua i le lalolagi,  e pei ona tupu i le 607 T.L.M.—ae lē tumau ai. O le a tumau pea ona fusifusia le laau seʻia māeʻa “tausaga e fitu.” I le iʻuga o lenā taimi, o le a avatu e Ieova le pule i le suli aloaʻia, o Iesu Keriso. E manino le faasino atu o “tausaga e fitu” ma “tausaga o nuu ese” i le taimi e tasi.

Ua fesoasoani le Tusi Paia iā i tatou e fua le umi o “tausaga e fitu.” E tutusa le 1,260 aso, ma se “tausaga [tasi le tausaga], ma tausaga [lua tausaga, numera tele], ma lona vaeluagalemu o le tausaga”—o se aofaʻiga e tolu ma le ʻafa “tausaga.” (Faaaliga 12:6, 14) O lona uiga, a faaluaina lenā fuainumera po o tausaga e fitu, e 2,520 aso.

Pe a tatou faitau aso e 2,520 e amata mai i le 607 T.L.M., e atoa i le 600 T.L.M. Peitaʻi, e umi atu tausaga e fitu na i lo lenā taimi. E oo ane i le taimi na fetalai ai Iesu i “tausaga o nuu ese” o faagasolo pea. O lea, e faavaloaga tausaga e fitu. E ao la ona tatou faatatauina le tulafono a le Tusi Paia: “O le aso ma le tausaga.” (Numera 14:34; Esekielu 4:6) O lea la, o tausaga e fitu na pulea ai e malo le lalolagi e aunoa ma le faalaa ane o le Atua, e 2,520 tausaga. E tatou te taunuu i le 1914 T.A., pe a faitau le 2,520 tausaga e amata mai le 607 T.L.M. O le tausaga lea na faaiʻu ai “tausaga o nuu ese” po o tausaga e fitu. O lona uiga, na amata pule Iesu o se Tupu o le Malo o le Atua i le 1914.

“Ia Oo Mai Lou Malo”

Talu ai ua uma ona faavaeina le Malo o le Mesia i le lagi, pe ao la ona tatou tatalo pea ia oo mai, e pei ona aʻoaʻo e Iesu i le tatalo faaaʻoaʻo? (Mataio 6:9, 10) Ioe. E talafeagai lenā tatalo ma e iai sona uiga tāua. Ua toeitiiti faaoo mai e le Malo o le Atua le mana tele i lenei lalolagi.

Maʻeu ni faamanuiaga o le a maua e ē faamaoni pe a tupu lenā mea! Ua taʻua i le Tusi Paia: “E iā te i latou le Atua lava. E sōloiesea foʻi e le Atua loimata uma i o latou mata; e leai foʻi se toe oti, po o se faanoanoa, po o se auē, e leai foʻi se toe puapuaga; auā ua mavae atu mea muamua.” (Faaaliga 21:3, 4) I lenā taimi, “e lē fai mai foʻi se tasi ua mau ai, Ou te maʻi.” (Isaia 33:24) O le a olioli i le ola e faavavau ē faafiafiaina le Atua. (Ioane 17:3) A o tatou tatali i le faataunuuga o nei valoaga ma isi valoaga o le Tusi Paia, seʻi faaauau ona ‘muaʻi saʻili le malo o le Atua ma lana amiotonu.’—Mataio 6:33.

[Faamatalaga pito i lalo]

[Faamatalaga faaopoopo i le itulau 4]

Ua tofia e Ieova Iesu Keriso e fai ma Tupu o Lona Malo

[Ata i le itulau 6]

2,520 tausaga

Oketopa 607 ◂ T.L.M. T.A. ▸ Oketopa 1914

606 1⁄4 tausaga 1,913 3⁄4 tausaga

Na amata “tausaga o nuu ese” i le 607 T.L.M. ma faaiʻuina i le 1914 T.A.

[Ata i le itulau 7]

O le a olioli tagata nuu o le Malo o le Atua i le anoanoaʻi o faamanuiaga