Esekielu 4:1-17
4 “O oe foʻi, le atalii e o le tagata, ia e ave se piliki ma tuu i ou luma ma vane ai se ata o le aai o Ierusalema.
2 E ao ona siʻomia le aai,+ ma ati se pā e faasagatau ai i le aai,+ ia tanu foʻi se mea maupuʻepuʻe,+ ia faatutū ni faleʻie mo le taua, ma siʻomia le aai i meatau e lepetia ai.+
3 Ia e ave se falai uʻamea mafolafola, ma tuu ai e fai ma pā uʻamea i le vā o oe ma le aai. Ona e faasaga lea i ai, ma e ao ona siʻomia ai; ia e siʻomiaina lava. O se faailoga lea i le aiga o Isaraelu.+
4 “Ona e taoto faatafa lea i lou itu tauagavale ma tuu i ou luga* mea sesē a le aiga o Isaraelu.+ O le aofaʻi o aso e te taoto faatafa ai, e te tauaveina ai a latou mea sesē.
5 Ou te tuuina atu foʻi iā te oe aso e 390, e tusa ma tausaga o a latou mea sesē,+ ma o le a e tauaveina mea sesē a le aiga o Isaraelu.
6 E ao ona e faaatoaina ia aso.
“Ona e toe taoto faatafa lea i lou itu taumatau i le taimi lona lua, ma o le a e tauaveina mea sesē a le aiga o Iuta+ mo le 40 aso. Ou te tuuina atu iā te oe o le aso mo le tausaga, o le aso mo le tausaga.
7 Ia faasaga foʻi ou foliga i le siʻomiaina o Ierusalema,+ ma lou lima e lē ufiufia, ma e ao ona e faia valoaga e faasaga i le aai.
8 “Faauta! ou te saisaia oe i maea ina ia lē mafai ai ona e feliuaʻi mai i le tasi ou itu i le isi ou itu, seʻia atoa aso o lou siʻomiaina o le aai.
9 “E ao ona e ave saito, o karite,* o pi, o atasema,* o tokana,* ma kaseme* ma tuu na mea i se ipu ma fai ai se falaoa mo oe. E te ʻai i le falaoa e tusa ma le aofaʻiga o aso e te taoto faatafa ai, e 390 aso.+
10 O le a e fuaina lau meaʻai, ma e 20 sekeli* o meaʻai e te ʻai ai i le aso. Ia e ʻai ai i taimi faatulagaina.
11 “E fuaina foʻi vai e te inu ai, o le tasi vaeono o le sinu.* Ia e inu ai i taimi faatulagaina.
12 “Ia ʻai le falaoa e pei ona e ʻai i le falaoa lapotopoto e faia i le karite; ma e te faaaogā otaota mamago o tagata e fai ai le afi, e tao ai lenei falaoa i luma o o latou mata.”
13 Ua toe fetalai mai Ieova: “E faapena lava ona lē mamā le auala e ʻai ai e le fanauga a Isaraelu a latou meaʻai, i nuu o le a ou faataapeapeina ai i latou.”+
14 Ona ou faapea atu lea: “E leai, le Alii Pule Silisili Ese o Ieova! Talu mai loʻu laʻitiiti e oo mai i le taimi lenei, e leʻi faaleagaina lava aʻu e ala i le ʻai i se manu ua mate fua po o se meaola ua saeia,+ e leʻi oo foʻi se aano o se manu e lē mamā* i loʻu gutu.”+
15 Ona ia fetalai mai lea iā te aʻu: “Ua lelei, o le a ou faatagaina oe e faaaogā otaota o povi nai lo o otaota o tagata, ma ia e tao ai lau falaoa i luga o ia mea.”
16 Ua ia toe fetalai mai iā te aʻu: “Le atalii e o le tagata, o le a ou taofia le mauaina o meaʻai* i Ierusalema,+ ma o le a latou aai ma le matuā popole i meaʻai ua fuaina le mamafa,+ ma e latou te feinu ma le matuā fefefe i vai ua fuaina le tele.+
17 E tupu lenei mea ina ia lē lava ai meaʻai ma vai, ma latou vaavaai ai o le tasi i le isi ma le fememeaʻi, ma faasolo ai ina tino vale ona o a latou mea sesē.
Faamatalaga Pito i Lalo
^ E faasino atu i le itu tauagavale o Esekielu.
^ O se ituaiga o pi. O le upu Peretania, o le lentil.
^ O se ituaiga o saito e lē tāua tele. O le upu Peretania, o le spelt.
^ O se tamaʻi laau e iai ona fatu ninii e fai ai falaoa. O le upu Peretania, o le millet.
^ O se isi ituaiga saito. O le upu Peretania, o le barley.
^ Po o le “e leaga.”
^ Epe., “o le a ou gauia tootoo o falaoa.” Atonu e faasino atu i tootoo na faaaogā e tautau ai falaoa lapotopoto.
