O le Tusi Lona Lua i le Faapotopotoga i Korinito 7:1-16
7 O le mea lea le ʻaupele e, ona ua tuuina mai iā i tatou o nei folafolaga,+ o lea seʻi o tatou faamamā ai iā i tatou mai i mea uma e faaleagaina ai le tino ma le agaga,+ ae ia faaatoatoaina le faapaiaina i le mataʻu i le Atua.
2 Ia faaavanoa mai o outou loto iā i matou.+ E matou te leʻi faia se mea sesē i se tasi, e matou te leʻi faia se mea e afāina ai se tasi, e matou te leʻi ʻolegiaina se tasi.+
3 Ou te lē fai atu i lenei mea e taʻusala ai outou. Auā na ou fai atu muamua, pe tatou te feoti faatasi pe feola faatasi, ae ua iai outou i o matou loto.
4 Ua ou matuā saʻoloto e tautala atu iā te outou. Ua ou matuā mitamita e uiga iā te outou. Ua tumu foʻi aʻu i faamāfanafanaga; ua matuā tele loʻu olioli i o matou puapuaga uma.+
5 O le mea moni, ina ua matou taunuu i Maketonia,+ e leʻi mapu o matou tino, ae ua faaauau pea ona puapuagatia i matou i mea uma, o taua i fafo ma popolega i totonu.
6 A o le Atua, o lē e na te faamāfanafanaina ē ua lotomafatia,+ ua ia faamāfanafanaina i matou i le faatasi mai o Tito;
7 e lē na o lona faatasi mai, a o le faamāfanafanaga foʻi ua faamāfanafanaina ai o ia ona o outou, a o ia faamatala mai iā i matou lo outou naunau tele e fia vāai mai iā te aʻu, o lo outou faanoanoa tele, ma lo outou manatu mamafa* mo aʻu; o lea ua atili ai ona ou olioli.
8 Afai ua ou faatigā iā te outou ona o laʻu tusi,+ ou te lē salamō ai. E tusa lava pe na ou salamō muamua (auā ua ou iloa o lenā tusi na outou faanoanoa ai, e ui e na o sina taimi),
9 ae ua ou olioli i le taimi nei, e lē ona ua outou faanoanoa, ae ona ua iʻu lo outou faanoanoa i le salamō. Auā ua outou faanoanoa e tusa ai ma le finagalo o le Atua, ina neʻi afāina outou i se mea ona o i matou.
10 Auā o le faanoanoa e tusa ai ma le finagalo o le Atua, e iʻu ai i le salamō ma oo ai i le faaolataga, lea e lē tatau ona faanoanoa ai;+ ae o le faanoanoa o le lalolagi e iʻu ai i le oti.
11 E manino mai o lo outou faanoanoa e tusa ai ma le finagalo o le Atua, ua outou matuā filigā ai, ua taʻumamāina ai outou, ua outou lototigā ai, ua outou matataʻu ai, ua outou naunau tele ai, ua outou maelega ai e faasaʻo mea sesē!+ Ua outou faaalia ai i mea uma lo outou mamā e tusa ai ma lenei mataupu.
12 E ui lava na ou tusi atu iā te outou, ae na ou tusi atu e lē ona o le tagata na faia le mea sesē,+ po o lē na faia i ai le mea sesē, ae ina ia faaalia ai i luma o le Atua lo outou naunau e faalogo mai iā i matou.
13 O le mea lea ua faamāfanafanaina ai i matou.
Ae e lē na o le faamāfanafanaina o i matou, ua atili ona matou olioli ona o le olioli o Tito, auā ua faamalosia e outou uma lona agaga.
14 Auā afai na ou mitamita iā te ia e uiga iā te outou, ou te lē mā ai; ae e pei ona moni o mea uma na matou fai atu ai iā te outou, ua faapena foʻi ona moni lo matou mitamita iā Tito e uiga iā te outou.
15 Ua atili foʻi ona alofa faapelepele o ia iā te outou, a o ia manatuaina lo outou usiusitaʻi uma,+ ina ua outou taliaina o ia ma le faaaloalo tele.
16 O lea ua ou olioli ai, ona ua ou matuā mautinoa iā te outou* i mea uma.
