Qullaawu Maxaafi Doodhate Qoosso Daafira Mayyaanno? Maganu Baalankare Illaallisannoni?
Qullaawu Maxaafi mayyaanno?
Maganu doodhate qoosso oye ayirrisinonke; isi heeshshonke giddo ikkannore balaxe murantenni, uminke doorsha doodhineemmo gede assinonke. Hanni Qullaawu Maxaafi tenne daafira mayyaannoro laˈno.
Maganu manna danisinni kalaqino. (Kalaqama 1:26) Maganu kalaqinonkehu heda dandiitannokki saada gede asse diˈˈikkino; hakko daafira Kalaqaanchinke akatta lawishshaho, baxillunna taashshote akati noonke. Qoleno Kalaqaanchinke gede, uminke doorsha doodhate qoosso noonke.
Roore anga, albillittete heeshshonke seekkanno woy bushshanno gede assiˈneemmori ninkeeti. Qullaawu Maxaafi Maganoho ‘hajajamme heeshsho doodhineemmo’ gede koyisannonke. (Marro 30:19, 20) Doodhate qoosso hooggoommenkero, kuni beebbate koyishshaati, isinni tini xagarrote. Maganu isi yiinore assineemmo gede digiddeessannonke; hatteentenni isi togo yiinonke: “Hajajoˈya seekkitine macciishshitinoonniha ikkoommero, keeru moolannokki wayi gede, keeraanchimmano baaru dambali gede ikkite heedhannoˈne.”—Isayaasi 48:18.
Heeshshonke giddo iillannonkehu danchuno ikko bushu coyi balanxe murroonniha diˈˈikkino. Mittu coyi qinaankera hasiˈnummoro jawaante loosa hasiissannonke. Qullaawu Maxaafi “Noohe wolqa baalantenni loosi” yaanno. (Rosiisaancho 9:10) Qoleno “Jawaatu manchi hedo jirotenni xaadissanno” yaanno.—Lawishsha 21:5.
Doodhate qoosso Maganu uyinonkete muxxe eltooti; tini elto uminke doorshinni iso ‘woˈmu wodaninkenni’ banxeemmo gede assitannonke.—Maatewoosi 22:37.
Maganu baalanka coye illaallisa didandaanno?
Qullaawu Maxaafi Maganu Woˈmanka Dandaannota kulanno; iso umosi agurranna wolqasi ittisa dandaannohu dino. (Iyyoobi 37:23; Isayaasi 40:26) Ikkirono, isi wolqasi baalanka coye illaallisate dihoroonsiˈranno. Lawishshaho, Qullaawu Maxaafi Maganu mannisi diinna ikkitinori Baabiloonete daafira coyiˈranni, “Aneneeto ittise sammi yee keeshshoommo” yiinota kulanno. (Isayaasi 42:14) Xaa yannarano Maganu, doodhate qoossonsa woloota gawajjate horoonsidhannore yannate geeshsha cince sammi yee no. Ikkollana isi sammi yee cincino gedee heeˈranno yaa diˈˈikkino.—Faarso 37:10, 11.