Tenne hajo daafira amaalanno manni lowoho. Ikkollana tini baalanti amaale kaaˈlitannote yaa diˈˈikkino. Lawishshaho, mitu manni xissokki wiˈlite woy wole doogonni fushshiˈrattokki gede amaalannoheha ikkara dandaanno. Wolu manni kayinni quwa saˈe xissiisiˈratto gede xixxiiwannoheha ikkara dandaanno. Qullaawu Maxaafi kayinni yannanke xiinxallaano sumuu yitannota mereerima amaale aanno.

Mitu budi garinni labbaa beetti wiˈliro tini labballimma diˈˈikkitino yine hendanni. Ikkollana mannu albaanni wiˈla saallannire afidhinoni? Surrete hikkiminni fullahaano shiiˈne xissiisiˈnanni wote wiˈla noore ikkinota ammantanno. Tuncu yiinohe coyi lowo geeshsha dadillisannoha ikkirono, wiˈlakki tenne dandiite heeˈratto gede kaaˈlitannohe. Xisso fuqqa gawajja agurranna kaaˈlitannori dino. Qullaawu Maxaafi xissiisiˈne wiˈla digaraho woy labballimma diˈˈikkitino diyaanno. Lawishshaho, hanni Yesuusi daafira hedi. Isira reyitinore reyotenni kayisate wolqa noosiha ikkirono, lubbote jaalisi Aliaazaari reyi yannara mannu albaanni wiˈlino!—Yohaannisi 11:33-35.

Shiiˈne xissiisiˈneemmo yannara hakko iso hedeweelcho shiiro amaddannonke wote hifatama nooreeti.  Shiirino manchi hifatamanno gede assannohu babbaxxino korkaati no; lawishshaho, ayirrinseemmo manchi gara garimmo laikki woy sheshifachishate yee nookkire coyiˈranno yannara hifatammeemmoha ikkara dandaanno. Wodiidi Afirikira heeˈrannohu Mayiki togo yiino: “Anniˈya reyinohu ani 14 dirihu heeˈreennaati. Madaarshu yannara Angilikaanete ammaˈno soqqamaanchi Maganu danchuulle manna hasiˈrannohura isiwa adhannota coyiˈrino. * Anninke ledonke heeˈrara hasiˈneemmo daafira hatto yee coyiˈrasi hanqissinoe. Xa 63 diri sainoha ikkirono hatti xaano xissiissannoe.”

Meessaneeto bushiisha garaho? Hakko iso shiiˈnoonnihu hedeweelcho ikkiro, shiirino manchi hige hige ‘Konne coye assoommoro isi reyannokkihu baino’ yee hedannoha ikkara dandaanno. Woy hakkonni manchi ledo godowa baˈine heedhineenna reyinoha ikkara dandaanno. Tini roore gaabbatto gede assitahera dandiitanno.

Atino gaabbattohanna hifatamattoha ikkiro, tenne fuqqa dancha diˈˈikkitino. Hatteentenni, giddokkita seekke macciishshannohehuranna shiiˈnanni yannara togooti alba noonkekki hedo macciishshama noore ikkinota kulannohe jaalikkira hasaaphi. Qullaawu Maxaafi togo yaannonke: “Jaalu woˈmanka wote jaalaholla; roduuno qarru barra iillanno.”—Lawishsha 17:17.

Shiire xissiisiˈrino manchira baalunkunni roore jaala ikkara dandaannohu Kalaqaanchonke Magano Yihowaati. Huuccattotenni giddokkita isira kuˈli; korkaatuno isi atera ‘malannohe’ woy ate daafira hedanno. (1 Pheexiroosi 5:7) Qoleno; isi huuccidhannorira baalaho “mannu hedora aleenni ikkinohu Maganu keeri” widoonni hedonsanna wodanansa agarate qaale eino. (Filiphisiyusi Sokka 4:6, 7) Maganu sheshifachishanno Qaalisi yaano Qullaawu Maxaafi widoonni kaaˈlannohe gede assiˈri. Sheshifachishshanno qummeeshshuwa borreessite amaxxa dandaatto. ( Saaxine lai.) Kuri giddo mite wodanikkinni amada dandaatto. Tenne hiincakki hakko iso hashsha callikki nootto yannaranna goxichu daa giwannohe wote kaaˈlitahera dandiitanno.—Isayaasi 57:15.

Jaaki yinannihu 40 diro ikkannosi manchira muli yanna giddo muxxe galtesi sukkaarete dhibbinni reyitino. Jaaki hatte yannara callimma macciishshantinosita coyiˈrino. Ikkirono, huuccatto assiˈrasi lowo geeshsha kaaˈlitinosi. Isi togo yiino: “Yihowa huucciˈreemmo yannara callatoommoha horo dilawannoe. Duucha wote hashsha goxoommowiinni baqqi yuummoro wirro goxichu didaannoe. Qullaawa Borro giddonni mite sheshifachishshanno hedo nabbawummonna hiincummo gedensaanni hattono, huuccatto assiˈre kaummoro laˈˈanni heeˈreenna malalli yaannoe, hattono salaame afiˈreemmo; hakkiinni surreˈyanna wodaniˈya fooliishsho afiˈrannohura goxichu daannoe.”

Vaneesa yinannite mitte wedellitte beettora amase xiwante reyitino. Iseno huuccatto wolqa afidhinota huwattino. Ise togo yitino: “Duucha wote fonqolannori tuncu yaannoe yannara Maganu suˈma gane wiˈlanni huucciˈreemma. Yihowa ayewoteno huuccattoˈya macciishshe hasiissannoe jawaante aannoe.”

Mitootu xissiisiˈrino manna amaaltannori, shiire dadillino manni uminsa fajjonni manna kaaˈlanno looso loosanni yanna sayisansa dancha ikkitinota kultanno. Tenne assa shiire xissiisiˈrino manni hagiidhannonna xissonsa ajjanno gede assitara dandiitanno. (Soqqamaasinete Looso 20:35) Batinyu shiire xissiisiˈrino Kiristaanino wole manna kaaˈlanno looso loosa lowo geeshsha sheshifachishshannota huwatino.—2 Qorontoosi 1:3, 4.