Ti bâ nzoni na lege ti terê ti Jésus nga na mênë ti lo, e doit ti mä na bê na ye so a futa ti zi azo (aÉph. 1:7). Azo so Jésus atene ala yeke “ambeni taba” ayeke te pëpe mapa ni nga ala yeke nyon pëpe vin ni (Jean 10:16). Ye oko, ala yeke bâ nzoni na lege ti terê nga na mênë ti Jésus Christ. Ti bâ nzoni dä, ala doit ti mä na bê na sandaga ti Jésus nga na anzoni ye so aga na lege ti sandaga ni (Jean 6:53). Me, azo so ayeke te ni adoit ti fa so ala yeke na yâ ti fini mbele ni nga ala yeke na beku ti komande na yâ ti Royaume ti yayu. Tongaso, atâa a soro e ti gue na yayu wala e yeke ti ambeni taba, e doit ti duti na kpengba mabe na ye so a futa ti zi azo tongaso si e wara fini ti lakue lakue. w24.12 12-13 par. 14, 16

Na ngoi ti Kobe ti Seigneur, Jésus amû mapa so a sara na levure ape na abazengele ti lo na lo tene na ala so ayeke tapande ti terê ti lo. Na pekoni, lo mû na ala kopo ti vin na lo tene ayeke tapande ti “mênë ti mbele ni”. (Marc 14:​22-25; Luc 22:20; 1 aCor. 11:24). Azo so ayeke na yâ ti fini mbele ni ayeke “azo ti Israël [ti yingo]” so ayeke duti ande “na yâ ti Royaume ti Nzapa.” (aHéb. 8:​6, 10; 9:15). Tënë so Jésus atene na ngoi ti Kobe ti Seigneur abâ “kete kundu ti ataba”. Kete groupe so akomanse na abazengele be-ta-zo so ayeke lani na terê ti lo na ngoi ti Kobe ti Seigneur ni. Ala la ayeke wara place na terê ti Jésus na yayu. w24.12 11 par. 9-10

A kä lani Jésus, a gbu lo, a zonga lo, a fâ ngbanga ti kuâ na li ti lo nga a sara même sioni na lo. Aturugu ague na lo na ndo so a yeke fâ lo dä nga a pika lo na pointe na ndö ti keke. Jésus agbu ngangu na yâ ti apasi so kue, me Jéhovah abâ pasi même ahon lo na ngoi so lo bâ Molenge ti lo ayeke gue ti kui. Jéhovah ayeke lani na ngangu ti zi Molenge ti lo na yâ ti pasi ni me lo sara ni ape. Ngbanga ti nyen? A yeke ngbanga ti so Jéhovah aye e. Sandaga ti Jésus ayeke kota ye so afa tongana nyen la Jéhovah aye mo mingi. Lo mû Molenge ti lo so lo ye lo mingi na sandaga nga Lo kanga bê na yâ ti vundu so asara lo ti zi mo na gbe ti siokpari na kuâ (1 Jean 4:​9, 10). Biani, lo ye ti aidé e oko oko kue ti tiri na siokpari nga ti sö benda na ndö ni. w24.08 6 par. 13-14

Tongana e gbu li ti bâ tongana nyen la a doit lani ti son Jéhovah na ngoi so lo bâ Molenge ti lo ayeke bâ pasi, a peut ti aidé e ti hinga so lo ye e mingi. Satan atene so tongana mbeni wakua ti Nzapa ayeke na yâ ti ye ti ngangu, lo yeke ngbâ be-ta-zo na Lo ape. Ti fa so Satan atene mvene, Jéhovah azia si Jésus abâ pasi kozo ti tene lo kui (Job 2:​1-5). Jéhovah ayeke bâ lani tongana nyen la azo ayeke he Jésus, aturugu ayeke pika lo, na pekoni ala pika lo na pointe na ndö ti keke. Na pekoni, Jéhovah abâ Molenge ti lo akui mbeni sioni kuâ (Mat. 27:​28-31, 39). Jéhovah apeut lani ti kanga lege na aye so kue ti si (Mat. 27:​42, 43). Me tongana Jéhovah asara ni, andâ Jésus apeut lani ti futa ye ti zi azo ape na e yeke duti na beku ape. Tongaso, Jéhovah azia si Molenge ti lo abâ pasi juska lo kui. w25.01 22 par. 7

Na lango 16 ti Nisan ti ngu 33, vundu nga na mbeto ahon ndö ti adisciple ti Jésus. Ambeni use aquitté Jérusalem ala yeke gue na Emmaüs. Mbeni zo so ala hinga lo ape aga na terê ti ala na lo na ala ayeke tambela. Adisciple ni afa na lo ye so asi na Jésus so amû vundu na ala. Koli ni akomanse ti sara lisoro na ala na ndö ti aye so ala yeke girisa ni lâ oko ape. “A komanse na Moïse nga na ambeti ti aProphète kue,” lo fa na ala ndani so Messie adoit ti bâ pasi nga ti kui. Na ngoi so ala si na Emmaüs, ala ga ti bâ so koli ni so ayeke Jésus so Nzapa azingo lo na kuâ (Luc 24:​13-35). Jésus asi na adisciple ti lo fani mingi na yâ ti andangba lango 40 so lo sara na sese. Na ngoi ni so, Jésus akpengba adisciple ti lo so vundu nga na mbeto asara ala lani. Terê ti ala anzere na ala wara ngangu ti gue ti fa nzoni tënë nga ti fa ye na azo na ndö ti Royaume. w24.10 12 par. 1-3

Tongana a dü mbeni molenge, nyen na nyen, lo yeke kono ande, me e doit ti sara effort si e ga biazo. Na tapande, aita na Corinthe ayeda lani na nzoni tënë, ala wara batême, ala wara yingo vulu nga ala bâ nzoni na lege ti aye so bazengele Paul afa na ala (Kus. 18:​8-11). Me ambeni ngoi na peko ti batême ti ala, ala mingi ade aga abiazo ape (1 aCor. 3:2). Ti ga biazo, e doit kozoni ti duti na nzara ni. Azo so ‘aye ti ngbâ gï azo so ahinga ndo pëpe’, so aye ti kpengba na lege ti yingo ape, ayeke ga abiazo ape (aProv. 1:22). E ye pëpe ti duti tongana azo so akono awe me so ababâ na amama ti ala la ayeke mû adesizion na place ti ala. Me e ye ti tene e wani la e sara kue ti tene songo ti e na Jéhovah akpengba nga angbâ ti kpengba. Tongana mo yeke sara ngangu ti ga biazo, hunda Jéhovah ti mû na mo “nzara ti sara ye nga na ngangu ti sara” ni.—aPhil. 2:13. w24.04 4 par. 9-10

Jéhovah afa na e tënë ti bê ti lo na ndö ti fango ngbanga na ndö ti azo (Ézéch. 33:11). Jéhovah ayeke futi mbeni zo teti lakue lakue gï tongana lo yeke na nzoni raison ti sara ni. Nzoni bê ti lo ayeke mingi, na lo yeke fa ni na ngoi so bê ti lo aye. Nyen la e hinga na ndö ti azo so a yeke zingo ande ala ape? Bible afa na e atapande ni mingi ape. Jésus afa lani so a yeke zingo ande Judas Iscariote na kuâ ape. (Marc 14:21; bâ nga Jean 17:12 nga na note ti étude ni na Français.) Judas ahinga lani so ye so lo sara ague nde na ye so Jéhovah Nzapa na Molenge ti lo aye. (Bâ Marc 3:29 nga na note ti étude ni na Français.) Legeoko nga, Jésus atene lani so ambeni kota zo ti nzapa so ake lo ayeke kui me a yeke zingo ala ape. (Mat. 23:33; bâ Jean 19:11 nga na note ti étude ni na Français na ndö ti tënë “koli so.”) Bazengele Paul atene nga lani so a yeke zingo na kuâ ape a-apostat so ake ti changé bê ti ala.—aHéb. 6:​4-8; 10:29. w24.05 4 par.10-11

Tongana e ngbâ nduru na Jéhovah, Satan alingbi pëpe ti sara na e mbeni sioni ye so ayeke ngbâ lakue lakue (1 Jean 3:8). Na yâ ti fini dunia, Jéhovah ayeke ngbâ ande ti bata akamarade ti lo so ayeke be-ta-zo si mbeni ye abuba songo ti lo na ala ape nga si kuâ amû ala ape (Apoc. 21:4). A yeke biani mbeni kota pasa ti duti na yâ ti tente ti Jéhovah. E peut ti duti na kpengba songo ti kamarade na lo so apeut ti ngbâ lakue lakue (Ézéch. 37:27). Tongana e ye ti ngbâ ti duti agene ti lo, a yeke nzoni e sara ye tongana nyen? Tongana mbeni zo atisa mo na ndo ti lo, mo yeke gi ti duti nzoni gene. Legeoko nga, e ye biani ti hinga aye so Jéhovah ahunda na azo so aye ti ngbâ ti duti agene ti lo. Yengo so e ye na Jéhovah apusu e ti sara ye kue so e peut ti sara “ti mû ngia mingi na lo”. (aCol. 1:10). E doit lakue ti ne lo mingi. A yeke nzoni e girisa tënë so lâ oko ape. Tongana e ne lo mingi, a yeke aidé e ti sara pëpe mbeni ye so ayeke son bê ti lo. E ye lakue ti tambela na Nzapa ti e na ‘bango terê ti e kete’.—Mi. 6:8. w24.06 4 par. 8-9

Jéhovah ahunda lani na Abraham ti mû molenge ti lo Isaac na sandaga. A doit lani ti zia vundu mingi na bê ti Abraham. Me lo mä yanga ti Jéhovah. Na ngoi so Abraham aye ti fâ molenge ti lo, Nzapa akanga lege na lo. Tapande ti lo afa ye so Jéhovah ayeke sara ande. Jéhovah ayeke duti nduru ti mû Molenge ti lo so lo ye lo mingi na sandaga. Jéhovah aye azo mingi (Gen. 22:​1-18). Na ngoi so Jéhovah amû Ndia ti lo na azo ti Israël, lo tene na ala ti mû anyama na sandaga ti tene a pardonné asiokpari ti ala (Lév. 4:​27-29; 17:11). Asandaga so aye ti sara tënë ti mbeni sandaga so ayeke kota mingi so ayeke zi azo na gbe ti siokpari biani biani. Nzapa atene na aprophète ti lo ti sû atënë na ndö ti hale so a mû zendo ti lo. Ala tene so lo yeke mbeni Molenge ti Nzapa so ayeke nde, so adoit ti bâ pasi nga a yeke fâ lo ti zi azo, mo nga kue, na gbe ti siokpari na kuâ.—És. 53:​1-12. w24.08 4 par. 7-8

Tongana mo diko Bible, sara kue ti bâ tongana nyen la mo peut ti sara ye alingbi na ye so mo diko. Na ngoi so mo yeke diko mbeni mbage ti Bible, hunda terê ti mo: ‘Tongana nyen la mbi peut ti sara ye alingbi na ni laso wala na yâ ti ngoi so ayeke ga?’ Na tapande, bâ so mo diko 1 aThessalonicien 5:​17, 18. Na peko ti so mo diko aversê use so awe, mo peut ti luti na ti gbu li ti bâ fani oke la mo yeke sambela nga asambela ti mo ayeke tongana nyen. Nga, mo peut ti gbu li na ndö ti aye so mo kiri singila ndali ni. Peut-être mo leke na bê ti mo ti kiri singila na Jéhovah ndali ti ambilimbili ye ota. Même tongana mo mû apenze-ngbonga kete ti gbu li nzoni, a yeke aidé mo ti ga zo so amä tënë ni nga asara ye alingbi ni. Gbu li ti bâ tongana nyen la mo yeke wara ye ti nzoni tongana lâ oko oko mo sara tongaso na ambage ti Bible so mo diko. Biani, mo yeke ga zo so asara ye alingbi na wango ti Bible mingi ahon ti kozo. w24.09 4-5 par. 9-10

Jéhovah acréé e na mbeni fason so ayeke nde mingi. Atâa so a nzere na e ti tene azo amû ye na e, e yeke na ngia mingi tongana e mû ye na azo. Tongana e mû maboko na aita ti e ayeke sara nzoni na e. Na e yeke na ngia tongana ala kiri singila na e. Me tongana azo akiri singila na e wala pëpe, e peut ti duti na ngia ndali ti so e sara nzoni ye. Girisa lâ oko ape so atâa nyen la mo mû na zo, “Jéhovah ayeke na ngangu ti mû na mo ye mingi ahon so.” (2 Chron. 25:9). E peut ti mû ye na azo mingi ahon Jéhovah ape. Nga tongana Jéhovah afuta e ayeke nzoni futa ahon atanga ni kue. Tongaso, zia e leke na bê ti e ti ngbâ ti sara ye tongana Babâ ti e ti yayu so amû ye mingi na azo. w24.09 31 par. 20-21

Jéhovah ayeke sara ye na nzoni bê nga lo bâ mawa ti zo (Ps. 103:13; És. 49:15). Tongana mbeni ye asara e vundu, lo nga kue lo yeke na vundu (Zach. 2:8). Lo aidé e ti hinga lo nga ti ga akamarade ti lo (Ps. 25:14; Kus. 17:27). Lo yeke sara nga terê ti lo kete; “lo kuku ti bâ yayu na sese; lo yô na nduzu azo ti mawa so ayeke na yâ ti fuku ti sese.” (Ps. 113:​6, 7). Ndali ti araison so kue, e ye ti mû gloire na kota Nzapa ti e. E yeke mû gloire na Jéhovah ndali ti so e ye ti tene azo ahinga lo. Azo mingi ahinga tâ tënë na ndö ti Jéhovah ape. Ngbanga ti nyen? Ngbanga ti so Satan asara si bibe ti azo avuko na lege so lo tene asioni mvene na ndö ti Jéhovah (2 aCor. 4:4). Satan ayeke sara si azo ayeda so Jéhovah ayeke Nzapa so aye ngonzo, lo yeke pensé na e ape nga lo sara si azo ayeke bâ pasi mingi na yâ ti dunia. Me e hinga tâ tënë na ndö ti Nzapa ti e. E yeke na kota pasa ti fa na azo mara ti Nzapa wa la lo yeke ni biani nga ti aidé ala ti mû gonda na lo.—És. 43:10. w25.01 3 par. 6-7

Atâa so Jésus, Molenge ti Nzapa, ayeke lani mbilimbili-kue nga lo sara apendere miracle, Satan asara kua na ambeni zo ti tene gbâ ti mvene na iri ti lo. Na tapande, akota zo ti nzapa atene lani na azo so “mokonzi ti asioni yingo” la amû ngangu na Jésus ti tomba asioni yingo (Marc 3:22). Na ngoi so a gue lani na Jésus na gbele ngbanga, ala tene mvene na iri ti lo atene lo zonga Nzapa nga ala pusu gbâ ti azo ti hunda ti tene a fâ lo (Mat. 27:20). Ambeni ngoi na pekoni, na ngoi so adisciple ti Christ ayeke fa nzoni tënë, azo so ayeke kanga lege na ala ‘apusu azo’ ti sara aye ti ngangu na aChrétien so (Kus. 14:​2, 19). Tour ti Ba Ndo ti lango 1 ti décembre, ngu 1998, atene na ndö ti Kusala 14:​2, atene: “Awato so ayeke aJuif ake lani tënë so aChrétien afa, me ala ngbâ gï ge ape. Ala tene asioni mvene na iri ti aChrétien ti pusu azo ti amara nde ti ke ala.” Laso Satan angbâ ti “handa azo na ndö ti sese kue”. w24.04 11 par. 15-16

Ngoi so zo ayeke kui na ni la ayeke sara ande pëpe si lo ngbâ na fini lakue lakue. Jéhovah ayeke Juge so ayeke mbilimbili-kue: adesizion ti lo ayeke lakue na lege ni (Ps. 33:​4, 5). E peut ti duti sûr so “Juge ti sese kue” ayeke sara ande ye so ayeke na lege ni. A yeke nga na lege ni ti tene so a yeke pëpe ndo so zo avivre dä la ayeke sara si lo wara fini ti lakue lakue. Jéhovah ayeke tene lâ oko ape so azo kutu mingi ayeke tongana “angasa” gï ndali ti so ndo so ala vivre dä amû lege na ala lâ oko ape ti mä tënë ti Royaume (Mat. 25:46). Juge ti sese kue so ayeke mbilimbili apensé même mingi na azo so ahon ti so e pensé na ala. E hinga pëpe tongana nyen la Jéhovah ayeke sara ande aye na ngoi ti kota ye ti vundu. Peut-être ambeni zo so ayeke wara ande lege ti manda ye na ndö ti Jéhovah, ti mä na bê na lo nga ti mû mbage ti lo na ngoi so lo yeke sara si iri ti lo aga nzoni-kue na lê ti amara.—Ézéch. 38:16. w24.05 12 par. 14-15

Awakua ti Jéhovah aye mingi ti aidé amba ti ala (2 aCor. 8:4). Me na ambeni ngoi, ala bezoin ti sara ye na mbeto ape si ala sara ni. Na tapande, tongana bira atï na mbeni ndo, a-ancien ti ndo ni ayeke bâ so aita ti ala abezoin ti tene a kpengba ala, a mû maboko na ala nga peut-être a aidé ala ti wara Bible nga na ambeti ti e wala aye so ala bezoin ni na lege ti mitele. So a-ancien andoye aita ti ala, ala yeke zia fini ti ala na lê ti kpale ti mû na ala aye so ala bezoin ni. Na angoi tongaso, a yeke kota ye ti tene e ngbâ beoko. Sara ye alingbi na fango lege so alondo na filiale ti ndo so mo yeke dä (aHéb. 13:17). A yeke nzoni lakue a-ancien akiri abâ aye so a fa na ndö ti lekengo terê ndali ti akota kpale nga aye so a doit ti sara tongana mbeni kota kpale asi (1 aCor. 14:​33, 40). Sara ye na mbeto ape me sara hange (aProv. 22:3). Sara ye na ndara. Zia fini ti mo na lê ti kpale senge senge ape. Zia bê ti mo na Jéhovah. Girisa ape so Jéhovah aye si mo na aita ti mo aduti nzoni. w24.07 4 par. 8; 5 par. 11

Gbia David ahinga lani Jéhovah nga lo zia bê ti lo na ndö ti lo. Na ngoi so Gbia Saül nga na ambeni zo ayeke gi lani ti fâ David, lo sambela Jéhovah ti aidé lo. Na peko ti so Nzapa akiri tënë na sambela ti David nga lo sö lo, David atene: “Jéhovah ayeke na fini!” (Ps. 18:46). So David atene tongaso, lo ye gï pëpe ti tene so Nzapa ayeke dä. Mbeni mbeti atene so David ayeke fa lani so lo yeke na confiance na Jéhovah so ayeke “Nzapa so ayeke na fini so ayeke aidé lakue awakua ti lo.” Biani, aye so asi na David afa na lo so Nzapa ti lo ayeke na fini, ye so asara si lo leke na bê ti lo ti ngbâ ti sara na Jéhovah nga ti sepela lo (Ps. 18:​28, 29, 49). Tongana e hinga na bê ti e kue so Jéhovah ayeke Nzapa so ayeke na fini, a peut ti aidé e ti yapu na sarango kua ti lo. E yeke wara ngangu ti gbu ngangu na yâ ti akpale nga bê ti e ayeke pusu e ti ngbâ ti sara aye mingi na yâ ti kua ti lo. E yeke leke nga na bê ti e ti ngbâ nduru na Jéhovah. w24.06 20-21 par. 3-4

Nyen la e peut ti manda na lege ti tënë so bazengele Paul atene na azo ti Thessalonique? Tongana e mä mbeni tënë so ague nde na aye so e manda na yâ ti Bible wala e mä mbeni mbaï so ahon gbungo li ti zo, e doit ti sara ye na ndara. Na ngbene Union soviétique, awato ti e amû lani na aita mbeni lettre so ala tene alondo na kota ndokua ti e. Na yâ ti lettre ni, a wa lani ambeni ita-koli ti sigi na mbeni bungbi nde. Mbeti ni akpa lettre so alondo na kota ndokua ti e. Me lettre ni ahanda pëpe aita so ayeke be-ta-zo. Ala bâ lani so lettre ni ague oko na aye so a fa na ala ape. Laso, awato ti tâ tënë apeut ti sara kua na aye tongana Internet nga na aréseaux sociaux ti sara si li ti e aga kirikiri nga ti ga na kangbi popo ti e. E yeke zia pëpe si “li ti [e] aga kirikiri hio”, me e peut ti bata terê ti e tongana e gi ti bâ wala tënë so e mä wala e diko ague oko na atâ tënë so e hinga ni awe.—2 aThes. 2:2; 1 Jean 4:1. w24.07 12 par. 14-15

Tâ kota desizion so mbeni zo apeut ti mû ayeke ti mû terê ti lo na Jéhovah na ti ga na yâ ti sewa ti azo so ayeke voro lo. Jéhovah aye ti tene azo kue asara ni. Ngbanga ti nyen? Lo ye ti tene ala ga akamarade ti lo na ala ngbâ na fini lakue lakue (Deut. 30:​19, 20; aGal. 6:​7, 8). Me, Jéhovah ayeke forcé mbeni zo ti sara na lo ape. Lo zia na zo oko oko ti soro ye so lo ye ti sara. Ka tongana mbeni Chrétien so awara batême awe adoro ndia ti Nzapa na lege so lo sara mbeni kota siokpari? Tongana lo changé bê ti lo ape, a doit ti zi lo na yâ ti congrégation (1 aCor. 5:13). Me, même tongana a zi mbeni zo na yâ ti congrégation, Jéhovah aye biani ti tene zo ni akiri na mbage ti Lo. Ti vrai ni, mbeni kota raison so ndali ni lo mû ye so a futa ti zi azo ayeke ti tene lo pardonné asiokpari ti azo so achangé bê ti ala. Nzapa ti e so aye e mingi awa azo so asara akota siokpari ti changé bê ti ala.—Zach. 1:3; aRom. 2:4; Jacq. 4:8. w24.08 14 par. 1-2

Na ngoi so bazengele Jean asû ota lettre ti lo, ambeni zo ayeke fa lani atënë ti mvene nga ala ga na akota kpale na yâ ti congrégation. Me ambeni angbâ ti “tambela na yâ ti tâ tënë.” Ala mä yanga ti Jéhovah nga ala “ngbâ ti tambela alingbi na acommandement ti lo.” (2 Jean 4, 6). A-Chrétien be-ta-zo so azia ngia na bê ti Jean nga na Jéhovah (aProv. 27:11). Nyen la e manda dä? Dutingo be-ta-zo ayeke ga na ngia (1 Jean 5:3). Na tapande, e yeke na ngia ti hinga so e zia ngia na bê ti Jéhovah. Jéhovah ayeke na ngia mingi tongana lo bâ so e ke ti sara asioni ye nga e mä yanga ti lo. A-ange na yayu ayeke nga na ngia (Luc 15:10). E nga kue e peut ti duti na ngia tongana e bâ amba ti e angbâ be-ta-zo, mbilimbili na ngoi so ala tingbi na akpale (2 aThes. 1:4). Tongaso, na ngoi so Nzapa ayeke futi dunia ti Satan, e yeke duti ande na ngia so e ngbâ be-ta-zo na Jéhovah. w24.11 12 par. 17-18

A yeke nzoni mo bâ zo ni ngoi oke kozo si mo tene na lo so mo ye lo? Tongana mo sara tënë na zo ni hio mingi, lo peut ti bâ so mo gbu li ti mo nzoni ape kozo ti mû adesizion (aProv. 29:20). Me tongana zo ni abâ so mo sara nzara ti lo na aninga mingi si mo tene na lo, lo peut ti bâ so mbeto ti mungo adesizion asara mo mingi (Zo-ti. 11:4). Girisa ape so kozo ti sara tënë na mbeni zo, mo bezoin ape ti duti sûr so lo la mo yeke mû ande lo. Me a yeke nzoni mo hinga na bê ti mo kue so mo yeke nduru awe ti sara mariage nga zo ni apeut ti duti nzoni zo ndali ti mo. Me ka tongana mo bâ so mbeni zo asara nzara ti mo? Tongana mo sara nzara ti lo ape, gi ti fa ni polele na lege ti asarango ye ti mo. Tongana mo sara ye mo bâ mo tene mo na zo ni apeut ti komanse ti bâ terê me ti vrai ni mo ye ape, a yeke na lege ni ape.—aÉph. 4:25. w24.05 22-23 par. 9-10

A yeke gï azo so a soro ala biani ti gue na yayu nga so ayeke be-ta-zo la Jésus ayeke “mû” ala ti gue na ala na yâ ti Royaume ti yayu. Azo kue so a soro ala ti gue na yayu so lê ti ala akpengba ape, a yeke bungbi ande ala oko ape na ‘azo so a soro ala’. (Mat. 24:31). Nga azo kue so ayeke na beku ti ngbâ na fini lakue lakue na ndö ti sese, a yeke nzoni lê ti ala akpengba nga ala ngbâ be-ta-zo. E hinga Jéhovah nzoni, tongaso e yeke na confiance so ye kue so lo yeke sara ayeke na lege ni. E yeke gi bê ti e ape tongana Jéhovah asoro ambeni zo so ayeke be-ta-zo ti gue na yayu na ngoi ti e. E dabe ti e na tënë so Jésus atene na ndö ti azo so a mû ala na kua nduru na ngbonga 11 na yâ ti tapande ti lo na ndö ti yaka ti vigne (Mat. 20:​1-16). Azo so a mû ala na kua hio ape na yâ ti lango ni so awara oko futa so azo so a mû ala na kua hio awara. Legeoko nga, azo so a soro ala ti gue na yayu ayeke wara futa ti ala na yayu tongana ala ngbâ be-ta-zo, atâa a soro ala na ngoi wa. w24.09 24 par. 15-17

Jésus azia na e nzoni tapande ti gbungo ngangu na ngoi so a sara ye na e na lege ni ape. Azo mingi asara ye lani na lo na lege ni ape, même azo ti sewa ti lo. Afami ti lo so ayeke aChrétien ape atene so ye asara li ti lo, akota zo ti nzapa ti aJuif atene so lo na asioni yingo ayeke sara kua maboko na maboko nga aturugu ti Rome ahe lo, apika lo na nda ni afâ lo (Marc 3:​21, 22; 14:55; 15:​16-20, 35-37). Me, Jésus agbu ngangu na yâ ti akpale so kue sân ti kiri peko ni na ala. Nyen la e peut ti manda na lege ti tapande ti lo? (1 Pi. 2:​21-23). Jésus azia na e tâ nzoni tapande ti mû peko ni na ngoi so a sara ye na e na lege ni ape. Lo hinga lani ngoi ti duti kpô nga na ngoi ti sara tënë (Mat. 26:​62-64). Na ambeni ngoi, tongana azo atene amvene na ndö ti lo, lo zi yanga oko ape (Mat. 11:19). Me na ngoi so Jésus asara tënë, lo zonga awato ti lo ape wala lo tene na ala ape so lo yeke sara sioni na ala. w24.11 4-5 par. 9-10

Imaginé so mo mû na mbeni zo so mo ye lo mbeni pendere cadeau so lo bezoin ni. Vundu ayeke sara mo tongana zo ni azia cadeau ni na yâ ti mbeni carton na lo girisa na ndö ni. Me tongana lo sara kua na cadeau ni nga lo kiri singila na mo ndali ni, a yeke nzere na mo. Nyen la e manda dä? Jéhovah amû Molenge ti lo ndali ti e. Tongaso, terê ti lo ayeke nzere mingi tongana e kiri singila ndali ti pendere cadeau so nga ndali ti ndoye so apusu lo ti mû na e ye so a futa ti zi azo (Jean 3:16; aRom. 5:​7, 8). Tongana ngoi ayeke hon, e peut ti komanse ti bâ cadeau so, so ayeke ye so a futa ti zi azo, tongana senge ye. Me tongana e kiri singila na Nzapa ndali ti ye so a futa ti zi azo encore ape, a yeke mo bâ mo tene e zia pendere cadeau ti Nzapa so na mbeni ndo so e bâ ni encore ape nga e pensé na ni encore ape. Ti tene mara ti ye tongaso asi ape, e doit ti kiri singila lakue na Nzapa nga na Christ ndali ti aye so ala sara ndali ti e. w25.01 26 par. 1-2

Mbeni ita-koli so alingbi ti ga ancien ayeke mbeni fini zo na yâ ti mabe pëpe. Atâa so mo wara batême ade asara angu mingi ape, mo bezoin ngoi ti ga Chrétien so akpengba. Kozo ti tene mo ga ancien, tongana ti Jésus, mo doit ti sara terê ti mo kete nga ti ku ti tene Jéhovah amû na mo mbeni kua (Mat. 20:23; aPhil. 2:​5-8). Mo yeke fa so mo yeke zo so ayeke be-ta-zo na lege so mo ngbâ nduru na Jéhovah, mo sara aye so lo hunda nga mo mû peko ti afango lege ti bungbi ti lo. Bible afa polele so a-ancien adoit ti hinga ti fa ye nzoni. Eskê so aye ti tene so mo doit ti duti gï zo so amû diskur pendere? Ên-ën. A-ancien kue la ayeke na kode ti mungo diskur pendere ape. Me na ngoi so ala yeke fa tënë nga ala yeke sara avizite na aita ti kpengba ala, ala yeke sara ni nzoni. w24.11 23-24 par. 14-15

Tongana mo diko mbeni ye na yâ ti Bible so mo mä yâ ni nzoni ape, sara recherche na ndö ni. Na pekoni na yâ ti lango ni kue, gbu li na ndö ti ye so mo manda nga na ye so a fa na mo na ndö ti Jéhovah, Molenge ti lo nga na ndoye ti ala na mbage ti mo (Ps. 119:​97, kete tënë na gbe ni). Tongana lakue na ngoi so mo yeke diko Bible wala mo yeke sara recherche mo wara fini ye ape wala mbeni tënë so agbu bê ti mo ape, découragé ape. Mo peut ti imaginé so mo yeke mbeni zo so ayeke gi ti wara lor. Fani mingi, zo so ayeke gi lor ayeke mû al’heure mingi wala alango mingi ti gi ni kozo si lo wara ni. Me lo yeke kanga bê lo yeke ngbâ ti gi ni ndali ti so même akete fuku ti lor so lo wara ayeke ye ti ngangu ngere. Asingana afuku ti lor so ayeke ye ti ngangu ngere, si ngere ti anzoni ye so ayeke na yâ ti Bible ayeke tongana nyen? (aProv. 8:10). Tongaso, kanga bê mo ngbâ ti mû peko ti kapa ti mo ti dikongo Bible.—Ps. 1:2. w25.01 25 par. 14-15

Jéhovah aku ti tene e duti nduru ti pardonné azo so ason bê ti e (Ps. 86:5; Luc 17:4; aÉph. 4:32). Bê ti e apeut ti son mingi ndali ti tënë so mbeni zo atene wala mbeni ye so lo sara, mbilimbili tongana zo ni ayeke kota kamarade ti e wala fami ti e (Ps. 55:​12-14). Na ambeni ngoi, ye ni apeut ti son e mo bâ mo tene a kpo e na zembe (aProv. 12:18). E peut ti gi ti sara sanka ti bê ti e so ason. Me sarango tongaso apeut ti duti tongana ti so a kpo e na zembe na e zia zembe ni angbâ na lê ti kä ni. Legeoko nga, kä so ayeke na bê ti e alingbi pëpe ti mü tongana e sara sanka ni. Tongana mbeni zo ason bê ti e, kozo ye so e yeke sara ka ayeke ti sara ngonzo. Bible atene so e peut ti sara ngonzo. Ye oko, Bible agboto mê ti e ti zia ape si ngonzo ahon ndö ti e (Ps. 4:4; aÉph. 4:26). Ngbanga ti nyen? Ngbanga ti so, a yeke ngangu ti tene ngonzo aga na nzoni ye (Jacq. 1:20). Girisa ape so ngonzo ayeke sara ka zo, me zo la ayeke soro ti ngbâ ti sara ngonzo. w25.02 15 par. 4-6

Jésus afa mbeni toli so afa so a yeke ye ti buba ti bungbi gbâ ti nginza sân ti duti na “mosoro na mbage ti Nzapa.” (Luc 12:​16-21). Zo oko ahinga ape ye so ayeke si kekereke (aProv. 23:​4, 5; Jacq. 4:​13-15). So e yeke adisciple ti Christ, e yeke wara mbeni kpale so ayeke nde. Jésus atene so e doit ti duti nduru ti ‘yeda ti zia aye’ ti e kue ti ga adisciple ti lo (Luc 14:​33, kete tënë na gbe ni). Akozo Chrétien so ayeke na Judée ayeke lani na ngia ti sara tongaso (aHéb. 10:34). Laso, gbâ ti aita aperdre aye ti ala ndali ti so ala ke ti mû mbage ti mbeni bungbi ti poroso (Apoc. 13:​16, 17). Nyen la a-aidé ala ti sara tongaso? Ala yeke na confiance kue na zendo ti Jéhovah so: “Mbi yeke zia ande mo lâ oko pëpe nga mbi yeke girisa mo lâ oko pëpe.” (aHéb. 13:5). E yeke sara ye so e peut ti sara ti wara aye so e yeke na bezoin ni ndali ti kekereke nga tongana mbeni ye so e ku terê ti e na ni ape asi, e yeke na confiance so Jéhovah ayeke aidé e. w25.03 29 par. 13-14

Jéhovah ahunda na e ape ti sara effort gï e wani ti ga abiazo. Lo mû na e aberger nga na awafango ye na yâ ti congrégation ti aidé e ti ga azo “so akpengba kue awe, ti yo ti lingbi na yongo so Christ ayo na ni kue”. (aÉph. 4:​11-13). Jéhovah amû nga na e yingo vulu ti aidé e ti duti na “bibe ti Christ.” (1 aCor. 2:​14-16). Na ndö ni, Nzapa amû na e a-Évangile osio ti fa na e tongana nyen la Jésus ayeke pensé lani, lo yeke sara tënë nga lo yeke sara ye na ngoi so lo yeke na sese. Tongana mo mû tapande ti fason so Jésus ayeke pensé nga lo yeke sara na ye, mo peut ti ga Chrétien so akpengba. Me ti ga aChrétien so akpengba, e doit nga ti “hon akozo fango ye na ndö ti Christ”, so ti tene akozo fango ye ti aChrétien. w24.04 4-5 par. 11-12

Lâ oko oko, e doit ti mû adesizion. A yeke ngangu ti mû ambeni desizion ape, na tapande, ye so e yeke te na ndapre wala l’heure so e ye ti gue ti lango. Me ti ambeni, a yeke kete ye ape. A peut ti ndu seni ti e, ngia ti e, azo so e ye ala wala vorongo Jéhovah. E ye ti tene adesizion so e mû aga na ye ti nzoni na e nga na azo ti sewa ti e. Kota ye ni ayeke so e ye ti tene adesizion ti e anzere na Jéhovah (aRom. 12:​1, 2). Mbeni kota ye so e doit ti sara ti mû mbeni nzoni desizion ayeke ti gi ti hinga ye nzoni na ndö ti tënë ni. Ngbanga ti nyen la a yeke kota ye? Imaginé so mbeni zo ti kobela ague ti bâ mbeni docteur ndali ti mbeni ngangu kpale ti seni. Eskê docteur ni ayeke mû na lo yorö sân ti gi ti hinga kobela ni wala ti hunda na lo atënë? Oko ape. Mo nga kue mo yeke mû anzoni desizion tongana kozoni mo gbu li nzoni na ndö ti aye so mo hinga na ndö ti tënë ni. w25.01 14 par. 1-3

Nyen la e hinga na ndö ti nzoni bê ti Jéhovah? Tongana nyen la lo fa so lo “ye si a futi zo oko pëpe”? (2 Pi. 3:9). Gbu li na ndö ti nzoni bê so lo sara na mbage ti ambeni zo so asara lani akota asiokpari. Gbia David asara lani akota siokpari na peko ti terê, na tapande lo gi wali ti zo nga lo fâ zo. Me, David achangé lani bê ti lo, tongaso na nzoni bê Jéhovah apardonné lo (2 Sam. 12:​1-12). Gbia Manassé asara lani aye so ayeke tâ sioni mingi na yâ ti kota mbage ti gigi ti lo. Atâa so kue, Jéhovah asara nzoni bê na lo nga apardonné lo ndali ti so lo changé bê ti lo (2 Chron. 33:​9-16). Atapande so afa na e so Jéhovah ayeke sara nzoni bê na mbeni zo tongana lo bâ so mbeni raison ti sara ni ayeke dä. Lo yeke zingo ande mara ti azo tongaso ndali ti so ala bâ so ala sara kota siokpari nga ala changé bê ti ala. w24.05 4 par. 12