E yeke wara ka afango lege ti bungbi ti Jéhovah na lege ti a-ancien, surveillant ti circonscription, bureau ti filiale wala na lege ti Bebungbi. Afango ye so ayeke ti aidé e ti voro Jéhovah. Me na ambeni ngoi, e peut ti comprendre ape mbeni ye so aita afa na e ti sara. E peut ti bâ gï akpale so apeut ti si na peko ti ye so a fa na e ti sara. E peut même ti komanse ti bâ gï awokongo ti aita-koli so afa ye ni na e. Tongana e yeke tambela na lege ti mabe, e yeke na confiance so Jéhovah la ayeke fa lege na bungbi ti lo nga lo hinga ye so ayeke nzoni mingi ndali ti e. A sara si e yeke nduru ti mä yanga na e yeke sara ni na nzoni bibe (aHéb. 13:17). E hinga so mango yanga ayeke sara si beoko aduti na yâ ti congrégation (aÉph. 4:​2, 3). E yeke nga na confiance so atâa so aita so ayeke mû li ni ayeke mbilimbili-kue ape, tongana e mä yanga ti ala, Jéhovah ayeke sara tufa na ndö ti e (1 Sam. 15:22). Tongana ngoi ni alingbi, lo yeke leke ye kue so a bezoin biani ti leke ni. w25.03 24 par. 13-14

E yeke vivre na mbeni ngoi so ayeke nde mingi. Lango oko oko aprophétie ti Bible ayeke ga tâ tënë na lê ti e. Na tapande, e bâ so “gbia ti nord” na “gbia ti sud” ayeke tiri na mba ti duti na komandema (Dan. 11:​40, kete tënë na gbe ni). E bâ so nzoni tënë ti Royaume ti Nzapa ayeke mû ndo mingi ahon ti kozo na azo kutu mingi asoro ti sara na Jéhovah (És. 60:22; Mat. 24:14). E yeke wara nga gbâ ti akobe ti yingo “na ngoi ni so alingbi”. (Mat. 24:​45-47). Jéhovah angbâ ti aidé e ti comprendre nzoni nda ti akota ye so ayeke si fafadeso (aProv. 4:18). E peut ti duti sûr so na ngoi so kota ye ti vundu ayeke komanse ande, e yeke hinga aye kue so e bezoin ti hinga tongaso si e gbu ngangu nga e ngbâ beoko na ngoi ti ngangu so. Me, e doit ti hinga so ambeni ye ayeke dä so e hinga ape na ndö ti aye so ayeke si fafadeso. w24.05 8 par. 1-2

Zo ti sungo psaume ni asara mbilimbili tënë ti pango zo. Ti pa zo aye ti sara tënë ti nyen? Mingi ni, a ye ti sara tënë ti mbeni tënë ti mvene so apeut ti buba iri ti mbeni zo. Psaume 15:3 adabe ti e so agene ti Jéhovah ayeke sara sioni na amba ti ala ape nga ala yeke buba iri ti aita ti ala ape (Ps. 15:1). Tongana nyen la e peut ti buba iri ti aita ti e? E peut ti buba iri ti mbeni zo sân ti hinga ni na lege so e sara si mbeni tënë so ayeke na lege ni ape so a tene na ndö ti lo amû ndo. Gbu li na ndö ti aye so: 1) mbeni ita-wali azia kua ti pionnier, (2) mbeni couple azia ti sara kua na Béthel, wala (3) mbeni ita-koli azia ti sara kua ti ancien wala ti wakua ti mungo maboko. Eskê a yeke na lege ni ti imaginé araison so ndali ni aye so asi nga ti fa ni na azo? Araison apeut ti duti dä so e hinga ni ape so ndali ni aye so asi. Na ndö ni, zo so ayeke gene na yâ ti tente ti Jéhovah ayeke “sara sioni na mba ti lo pëpe nga lo [yeke] buba iri ti akamarade ti lo pëpe.” w24.06 11 par. 11-13

Ti kpe mbeto ti Jéhovah mingi ahon ti kozo, e doit ti pensé na ye so ayeke zia ngia na bê ti lo na ngoi kue so e yeke mû mbeni desizion. Na ngoi so mo yeke diko Bible, hunda terê ti mo: ‘Tongana mbi la ye tongaso asi na mbi, desizion wa la mbi yeke mû?’ Na tapande, imaginé so mo yeke mä amokonzi bale-oko ti Israël so ayeke tene so azo ti Israël apeut ti mû sese ti Canaan ape na peko ti so ala bembe ndo lani na yâ ti kodro so Jéhovah amû zendo ti mû ni na azo ti Israël. Eskê mo yeke yeda na tënë so ala tene nga mbeto ayeke hon ndö ti mo, wala ndoye ti mo ndali ti Jéhovah nga nzara so mo yeke na ni ti zia ngia na bê ti lo ayeke hon ndö ti mbeto ti zo so asara mo? Azo ti Israël kue ti ngoi ni so ake ti yeda na tâ tënë so Josué na Caleb atene. Ye so asara si Jéhovah amû lege na ala ape ti lï na Sese ti zendo.—Nom. 14:​10, 22, 23. w24.07 10 par. 7

Gomer, wali ti prophète Osée adö Osée lo zia lo gue na peko ti ambeni koli. Eskê a yeke lani ngangu ti tene lo changé bê ti lo? Jéhovah, so apeut ti hinga ye so ayeke na yâ ti bê ti zo, atene na Osée atene: “Kiri mo ye wali ti mo so mbeni koli nde aye lo so, nga so ayeke gi ambeni koli nde. Mo ye lo tongana ti so Jéhovah aye azo ti Israël, atâa so ala gue na mbage ti ambeni nzapa nde.” (Os. 3:1; aProv. 16:2). Bâ so wali ti Osée angbâ lani ti sara mbeni kota siokpari. Me Jéhovah atene na Osée ti pardonné lo nga ti kiri na lo na da. Legeoko nga, Jéhovah adö lani azo ti lo so asara kpengba-li azia ape. Atâa so ala sara aye so ayeke tâ sioni mingi, lo ngbâ ti ye ala nga lo ngbâ ti gi ti aidé ala ti changé bê ti ala nga ti changé asarango ye ti ala. Eskê tapande so afa so Jéhovah, so ayeke “bâ yâ ti bê ti zo”, ayeke gi ti aidé mbeni zo so angbâ ti sara kota siokpari ti changé bê ti lo? w24.08 10 par. 7

A-Juif so aga aChrétien adoit lani ti sara akota changement, na a yeke lani kete ye na ala ape. Ândö, aJuif ayeke awakua ti Jéhovah so lo soro ala. Jérusalem ayeke lani ndo so gbia so akomande na iri ti Jéhovah ayeke duti dä nga azo so aye ti voro Jéhovah ayeke sara ni lani na temple na Jérusalem. A-Juif kue so ayeke be-ta-zo ayeke sara ye lani alingbi na Ndia ti Moïse tongana ti so akota zo ti nzapa ti ala afa na ala. Ala yeke lani na andia na ndö ti kobe, fango ganza nga tongana nyen la ala doit ti sara ye na azo so ayeke aJuif ape. Me na peko ti kuâ ti Jésus, Jéhovah ayeda encore ape na asacrifice so a mû na temple. Ye so ayeke lani kpale na aJuif so ayeke aChrétien so ayeke sara ye alingbi na Ndia (aHéb. 10:​1, 4, 10). Même aChrétien so akpengba, na tapande bazengele Pierre, abâ lani so a yeke ngangu ti sara ye alingbi na achangement so (Kus. 10:​9-14; aGal. 2:​11-14). Akota zo ti nzapa ti aJuif asara lani aye ti ngangu na aChrétien ndali ti afini ye so ala mä na bê na ni. w24.09 9 par. 4

Lakue tongana Jéhovah amû na awakua ti lo mbeni kua, lo ye ti tene ala sara ni na yâ ti wusuwusu ape (1 aCor. 14:33). Na tapande, lo ye ti tene a fa nzoni tënë na ndö ti sese kue so azo ayeke dä (Mat. 24:14). Jéhovah azia Jésus ti mû li ni na ndö ti kua so. Jésus asara kue ti tene a sara ni na yâ ti wusuwusu ape. Na Jérusalem na ngoi ti akozo Chrétien, mbeni bebungbi ayeke lani dä so na yâ ni a yeke wara abazengele nga na a-ancien; aita ti bebungbi ayeke mû lani adesizion so acongrégation kue ayeke sara ye alingbi na ni (Kus. 14:23). Na ngoi so acongrégation abâ gigi na ando nde nde, a-ancien ti congrégation oko oko ayeke fa na aita adesizion so bebungbi ni amû (Kus. 15:2; 16:4). So aita asara ye alingbi na aye so a fa, “acongrégation angbâ ti kpengba na yâ ti mabe na wungo ti aita ni ayeke gue na li ni lâ na lâ.”—Kus. 16:5. w24.04 8 par. 1

Na kota ndapre ti lango 16 ti Nisan, ambeni wali so ayeke be-ta-zo ague na ndo so a lu kuâ ti Jésus dä (Luc 24:​1, 10). Zia e sara tënë na ndö ti ye so asi na mbeni wali ni oko, Marie ti Magdala. Na ngoi so lo si na dû ti kuâ ni, lo bâ so yâ ni ayeke senge. Lo mû loro lo tene na Pierre na Jean; ala mû loro ala gue na yanga ti dû ni na lo tï na peko ti ala. Na peko ti so akoli so abâ so yâ ti dû ni ayeke senge, ala kiri na kodro. Me Marie angbâ ti lo kâ. Lo ngbâ kâ, lo yeke toto. Lo hinga ape so Jésus ayeke bâ lo. Lo bâ lani so wali ni ayeke toto lo na lo ye ti dë bê ti lo. Na pekoni, lo si na Marie na lo sara mbeni ye so akpengba lo mingi. Lo sara tënë na lo nga lo mû na lo mbeni kpengba kua so ayeke ti fa tënë ti zingongo ti lo na kuâ na aita ti lo.—Jean 20:​17, 18. w24.10 13 par. 7

Moïse ayeke lani prophète, juge, zo so akomande nga zo ti sungo mbaï. Lo sigi na azo ti Israël na gbe ti ngbâa na Égypte nga lo bâ gbâ ti amiracle so Jéhovah asara. Jéhovah asara lani kua na lo ti sû akozo mbeti oku ti Bible, Psaume 90 nga peut-être Psaume 91. Peut-être lo nga la lo sû mbeti ti Job. Ngoi kete kozo ti tene Moïse akui na ngu 120, lo iri azo ti Israël kue ti dabe ti ala na aye so ala bâ nga ala vivre ni. Angu mingi kozo, ambeni zo ti Israël abâ amiracle so Jéhovah asara nga ala bâ tongana nyen la lo punir azo ti Égypte (Ex. 7:4). Ala bâ lani Jéhovah akangbi yâ ti Kota Ngu-Bengba use na ala hon na popo ni. Na pekoni, ala bâ Jéhovah afuti Pharaon na aturugu ti lo kue (Ex. 14:​29-31). Jéhovah abata lani ala nga lo bâ lege ti ala na yâ ti benyama (Deut. 8:​3, 4). Azo ti Israël aga nduru ti lï na Sese ti zendo. Tongaso, kozo ti tene Moïse akui, lo ye ti kpengba ala. w24.11 8-9 par. 3-4

Kangbi ayeke na popo ti tënë so Jésus atene na ngoi ti Kobe ti Seigneur na ti so lo tene ni lani kozo na gbâ ti azo na Galilée. Tënë so lo tene na ngoi ti Kobe ti Seigneur abâ gï kete groupe ti azo. Na ngoi so Jésus ayeke lani na Galilée na ngu 32, lo yeke sara lani tënë mbilimbili na aJuif so aye ti tene lo mû na ala kobe. Me lo gboto lani lê ti ala na ndö ti mbeni ye so ayeke nzoni mingi ahon tâ kobe, mbeni ye so na lege ni ala peut ti wara fini ti lakue lakue. Jésus atene même so azo so akui, a peut ti zingo ala na kuâ na ndangba lango ni na ala peut ti ngbâ na fini lakue lakue. Lo yeke sara lani pëpe tënë ti kete wungo ti azo so a soro ala tongana ti so lo tene ni na pekoni na ngoi ti Kobe ti Seigneur. Me na Galilée, lo sara tënë mingi na ndö ti anzoni ye so azo kue apeut ti wara. w24.12 11 par. 10-11

Jéhovah ake zo so ayeke sara ye ti ngangu na zo (Ps. 11:5). Tongana mbeni koli ayeke pika wali ti lo ayeke son bê ti Jéhovah mingi (Mal. 2:16). Tongana mbeni koli asara ye na wali ti lo na lege ni ape ayeke buba songo ti lo na Nzapa. A peut même ti sara si Jéhovah amä asambela ti lo ape (1 Pi. 3:7). Ambeni koli ayeke sara tënë na awali ti ala na lê ti ngonzo nga ala yeke tene atënë so ason bê ti ala mingi. Me Jéhovah ake “ngonzo, dengo kongo na ndö ti zo na zonga”. (aÉph. 4:​31, 32). Mbeni koli so ayeke tene asioni tënë na wali ti lo ayeke buba mariage ti lo nga na songo ti lo ti kamarade na Nzapa (Jacq. 1:26). Mbeni koli so ayeke bâ porno ayeke buba nga songo ti lo na Jéhovah. Lo yeke bi nga nengo ti wali ti lo na sese. Jéhovah aku ti tene mbeni koli angbâ be-ta-zo na wali ti lo. Mbeni koli so ayeke be-ta-zo na wali ti lo ayeke sara lango-sioni ape nga lo yeke pensé même ti sara ni ape. Jésus atene so tongana mbeni koli ayeke bâ mbeni wali nde na nzara ni, andâ lo gi lo na wali “na yâ ti bê ti lo awe.”—Mat. 5:​28, 29. w25.01 9 par. 6-8

Bible atene so Jéhovah adiko awakua ti lo azo ti mbilimbili. Ye so aye ti tene so lo hunda na e ape ti futa mbeni ye ndali ti asiokpari so e sara. So Jéhovah asara tongaso, lo gue nde ape na andia ti lo na ndö ti ye so ayeke mbilimbili. Lo diko e azo ti mbilimbili, pëpe ndali ti so e lingbi na ni na lo kanga nga lê na ndö ti asiokpari ti e ape. Me lo yeke nduru ti pardonné asiokpari ti e ndali ti so e mä na bê na ye so lo na Jésus asara ti mû ye so a futa ti zi azo (aRom. 3:24). Ye so aye ti tene nyen ndali ti e oko oko kue? Ala so a soro ala ti komande legeoko na Jésus na yayu, a diko ala awe azo ti mbilimbili nga ala ga amolenge ti Nzapa (Tite 3:7; 1 Jean 3:1). Nzapa apardonné asiokpari ti ala awe. A yeke mo bâ mo tene ala sara siokpari lâ oko ape, tongaso ala lingbi ti duti na yâ ti Royaume ni (aRom. 8:​1, 2, 30). Azo so ayeke na beku ti duti na fini na ndö ti sese, a diko ala azo ti mbilimbili na ala ga akamarade ti Nzapa nga lo pardonné asiokpari ti ala.—Jacq. 2:​21-23. w25.02 5 par. 17-18

Bâ so na mbeni ngoi bazengele Pierre apensé tongana Jéhovah ape. Jésus atene na abazengele ti lo so lo yeke gue na Jérusalem, kâ akota zo ti bungbi ti Nzapa ti aJuif ayeke gbu lo, ala yeke pika lo nga ala yeke fâ lo (Mat. 16:21). Pierre ahinga so Jésus ayeke Messie so Nzapa atene lo yeke sö azo ti Lo. Ni la peut-être asara si a yeke lani ngangu na Pierre ti yeda so Jéhovah ayeke zia si a fâ Jésus (Mat. 16:16). Tongaso, Pierre amû Jésus, lo gue na lo ayo kete na lo tene na lo: “Bâ mawa ti terê ti mo, Seigneur; ye ni so ayeke si ande na mo oko pëpe.” (Mat. 16:22). Jésus na Pierre amä terê na ndö ti tënë so ape ndali ti so Pierre apensé tongana Jéhovah ape. Peut-être Pierre ayeke lani na nzoni bibe, me Jésus ake wango ti lo ni. So ayeke mbeni ye ti manda ndali ti e. Jéhovah aye lani ti tene Jésus asara ye ti bê ti lo wani ape. Na lege ti ye so asi so Pierre amanda mbeni kpengba ye so ayeke ti pensé tongana Nzapa. w25.03 9 par. 5-6

Eskê mo yeke na vundu ndali ti so mbeni zo ason bê ti mo wala mbeni zo so mo yeke na confiance na lo ayeke be-ta-zo na mo ape? Atâa nyen la mbeni zo asara na mo, Babâ ti mo ti yayu aye mo. Tongana mbeni zo ayeke be-ta-zo na e encore ape, atënë ti David so ayeke na versê ti e ti laso apeut ti dë bê ti e. Mbeni mbeti atene so tënë “azo so bê ti ala awoko kue” aye peut-être ti sara tënë ti “azo so apensé so mbeni nzoni ye ayeke na devant ti ala encore ape.” Tongana nyen la Jéhovah ayeke aidé azo so apensé tongaso? Jéhovah “ayeke nduru” na e. Lo yeke tongana mbeni babâ wala mama so agbu molenge ti lo so ayeke toto nga adë bê ti lo. Tongana e yeke na vundu ndali ti so mbeni zo ayeke be-ta-zo na e ape wala adö e azia, Jéhovah ahinga pasi ti e na lo yeke aidé e hio. Lo ye mingi ti dë bê ti e tongana mbeni ye amû vundu na e nga tongana e pensé so e yeke ye oko ape. Lo mû na e gbâ ti azendo so ayeke aidé e ti gbu ngangu na yâ ti akpale ti e ti laso.—És. 65:17. w24.12 23 par. 13-14

Laso, a-ancien apeut ti hinga biani so Jéhovah abâ apendere kua so ala yeke sara nga lo bâ ni na nene ni. Na ndö ti so a-ancien ayeke sara vizite na aita ti kpengba ala, ala yeke fa ye nga ala yeke fa tënë; a-ancien mingi ayeke mû maboko na yâ ti kua ti lekengo ada so a yeke sara kua ti Jéhovah dä nga ala yeke mû maboko na ngoi so ngangu kpale asi. Ambeni ancien ayeke na yâ ti Bungbi ti aita so ayeke gue na yâ ti ada-nganga ti bâ aita so ayeke na kobela wala ala yeke na yâ ti Komite so abâ lege ti songo na ada-nganga. A-ancien ahinga so congrégation ayeke ti Jéhovah. Ala yeke sara akua ti ala na âme ti ala kue nga ala hinga biani so Nzapa ayeke futa ala ndali ti kua ti ala (aCol. 3:​23, 24). Aita kue apeut ti ga a-ancien ape. Me e kue e yeke na mbeni ye ti mû na Jéhovah. Tongana e sara ye kue so e peut ti sara ndali ti Jéhovah, a yeke nzere na lo mingi. Lo yeke bâ a-offrande so e yeke mû ndali ti kua ti e na yâ ti dunia kue, atâa a yeke kete. Lo yeke na ngia nga na  ngoi so e pardonné azo so ason bê ti e. Hinga na bê ti mo kue so Jéhovah abâ na nene ni ye so mo peut ti sara. Lo ye mo ndali ni nga lo yeke futa ande mo.—Luc 21:​1-4. w24.06 23-24 par. 12-13

Mbaï so afa ye so apeut ti si na mbeni wakua ti Jéhovah. Lo peut ti sara mbeni kota siokpari na pekoni lo pensé so ye ni asi gï “hio tongaso”. Wala lo peut ti tene: “Ye ni asi gï hio tongaso.” Me tongana lo gbu li na ndö ti ye so asi, lo peut ti bâ so lo sara hange ape na yâ ti ambeni ye la ague na lo ti sara siokpari. Aye ni apeut ti duti asioni kamarade, asioni ngia wala lo gue na ambeni vrai ndo so ayeke nzoni ape wala na lege ti Internet. Peut-être lo zia nga ti sambela, ti diko Bible, ti ga na abungbi wala ti fa tënë. Legeoko tongana ti maseka-koli so a sara tënë ti lo na aProverbe, peut-être lo sara siokpari ni “gï hio tongaso” ape. Ye ti manda ni ayeke so wa? E bezoin ti kpe ti sara siokpari nga e bezoin ti kpe aye so ayeke gue na e ti sara ni. A yeke tâ gï ye so Salomon afa na peko ti so lo fa mbaï so.—Mat. 5:​29, 30. w24.07 16 par. 10-11

Mosoro ni so ayeke nyen? A yeke kua ti fango tënë ti Royaume so ayeke sö fini ti azo (2 aCor. 4:1). Ata ti sese ni aye ti sara tënë ti azo wa? A ye ti sara tënë ti awakua ti Nzapa so ayeke fa nzoni tënë na azo. Na ngoi ti Paul, azo ti kango ye ayeke zia lani aye ti ngangu ngere tongana kobe, vin nga na nginza na yâ ti ata ti sese ti gue na ni na ambeni ndo. Legeoko nga, Jéhovah amû na e mbeni ye ti ngangu ngere, so ayeke nzoni tënë, ti fa ni na azo. Grâce na mungo maboko ti Jéhovah, e peut ti wara ngangu so e bezoin ni ti ngbâ ti fa tënë. Na ambeni ngoi, mbeto ti zo apeut ti sara e. E peut ti hon ndö ni tongana nyen? Gbu li na ndö ti sambela so abazengele asara na ngoi so a hunda na ala ti fa tënë encore ape. Ahon ti tene mbeto asara ala, ala hunda lani na Jéhovah ti aidé ala “ti ngbâ ti fa tënë ti [lo] na mbeto oko pëpe”. Jéhovah akiri lani tënë na sambela ti ala na lê ni lê ni (Kus. 4:​18, 29, 31). Tongana mbeto ti zo asara mo na ambeni ngoi, hunda Jéhovah ti aidé mo ti ye azo mingi tongaso si mo sara mbeto ape ti fa nzoni tënë na ala. w24.04 16 par. 8-9

Yengo so e ye na Jéhovah apusu e ti sara si iri ti lo aga nzoni-kue. Ye so aye ti tene so e ye ti fa na azo so asioni tënë so Satan atene na ndö ti Jéhovah ayeke tâ tënë ape (Gen. 3:​1-5; Job 2:4; Jean 8:44). Na fango tënë, e ye mingi ti mû mbage ti Nzapa ti e na fango tâ tënë na ndö ti lo na azo kue so ayeke mä e. E ye ti fa na azo kue so sarango ye ti lo so ayeke kota mingi ayeke ndoye, so fason so lo yeke komande na ni ayeke na lege ni nga so fafadeso Royaume ti lo ayeke hunzi apasi kue nga ayeke ga na siriri nga na ngia na azo kue (Ps. 37:​10, 11, 29; 1 Jean 4:8). Na ngoi so e yeke gbu koko ti iri ti Jéhovah na fango tënë, e yeke sara si iri ti lo aga nzoni-kue. E yeke nga na ngia ti hinga so e yeke sara ye alingbi na iri ti e ti Témoin ti Jéhovah. w24.05 18 par. 12

Aita-koli, ala yeke fa so ala yeke ‘azo ti yambango agene nzoni’ tongana ala yeke sara nzoni na azo, même na azo so ayeke akota kamarade ti ala ape (1 Pi. 4:9). Mbeni mbeti atene so zo so ayeke yamba agene ayeke sara nzoni bê même na azo so lo hinga ala ape nga lo yeke na ngia ti tisa ala na da ti lo. Tongaso, hunda terê ti mo: ‘Eskê a hinga mbi tongana zo so ayeke yamba azo so aga gango na yâ ti congrégation ti mbi?’ (aHéb. 13:​2, 16). Zo so ayeke yamba agene ayeke sara nzoni bê na mara ti azo nde nde so ayeke ga na yâ ti congrégation. Na tapande, awayere, aita so aga ti mû diskur nga na ambeni ita so ayeke sara ngangu ti kpengba aita tongana asurveillant ti circonscription.—Gen. 18:​2-8; aProv. 3:27; Kus. 16:15; aRom. 12:13. w24.11 21 par. 6

Na yâ ti toli ti amaseka-wali so ade ti hinga koli ape, Jésus asara tënë ti amaseka-wali bale-oko so ala gue ti tingbi na mbeni koli so ayeke mû wali fini fini (Mat. 25:​1-4). Ala kue aye ti gue ti zia koli ni na matanga ti mariage ti lo. Jésus afa so oku ayeke azo ti “ndara” nga oku ayeke azo ti “buba”. Amaseka-wali so asara ye na ndara aleke terê ti ala ti ku koli ni aninga même tongana lo si na bê ti bï. Tongaso, ala ga na alampe ti ala so mafuta ayeke dä ti bâ na ndo na bï. Ala ga même na mbeni mafuta hinga ape koli ni asi hio ape. Tongaso, ala leke terê ti ala ti tene lampe ti ala angbâ ti za (Mat. 25:​6-10). Na ngoi so koli ni asi, lo na amaseka-wali so asara ye na ndara ague na matanga ni. Legeoko nga, aChrétien so a soro ala ti gue na yayu afa so ala leke terê ti ala awe na lege so lê ti ala akpengba nga ala ngbâ be-ta-zo juska na ngoi so Christ aga. A yeke bâ so ala lingbi ti duti na terê ti Jésus, so ayeke Koli so amû wali fini fini, na yâ ti Royaume ti lo na yayu.—Apoc. 7:​1-3. w24.09 21 par. 6

Tongana e gbu li na ndö ti fason so kua ti fango tënë ayeke aidé gbâ ti azo na yâ ti dunia laso, a pusu e ti ngbâ ti fa tënë. Ngu oko oko, azo kutu mingi so aye ti hinga ye na ndö ti Nzapa ayeke ga na Mémorial nga ayeke manda Bible. Azo saki ngbangbo mingi ayeke wara batême nga ala yeke fa tënë legeoko na e. E hinga ape azo oke la apeut ti yeda na tënë so e yeke fa, me e hinga so Jéhovah ayeke bungbi azo mingi mingi so ayeke sö kuâ ande na ngoi ti kota ye ti vundu so ayeke ga (Apoc. 7:​9, 14). Jéhovah la ayeke Wa ti kua ni nga lo hinga biani so gbâ ti azo ayeke yeda na nzoni tënë, tongaso e yeke ngbâ ti fa tënë (Luc 10:2). A hinga adisciple ti Jésus lakue na yapungo na kua ti fango tënë. Na tapande, abazengele afa tënë lani sân mbeto na so ala yapu tongaso, azo ‘aga ti hinga so ala yeke azo so ayeke lani na terê ti Jésus.’ (Kus. 4:13). Tongana azo abâ e na fango tënë, ala peut ti bâ so e nga kue e mû tapande ti Jésus so ayapu lani na kua ti fango tënë. w25.03 18 par. 15; 19 par. 17-18

Bible afa so Jéhovah ayeke bâ azo so azo abâ ala tongana ambumbuse zo. Na tapande, Jéhovah atokua lani prophète Samuel na ndo ti Jessé ti tuku mafuta na li ti mbeni molenge ti lo so ayeke ga ande gbia ti Israël. Jessé airi amolenge ti lo mbasambala ti ga ti wara Samuel, me lo iri David ape so ayeke ngambe ti ala. Me a yeke David la Jéhovah asoro lani lo (1 Sam. 16:​6, 7, 10-12). Jéhovah abâ lani zo so David ayeke ni biani. Lo hinga so maseka-koli so aye lo mingi. Gbu li na ndö ti aye so Jéhovah asara awe so afa so lo pensé na mo. Lo mû na mo wango so mo yeke tâ na bezoin ni (Ps. 32:8). Tongana lo hinga mo ape, lo peut ti mû na mo wango ape (Ps. 139:1). Tongana mo sara ye alingbi na wango ti Jéhovah nga mo bâ tongana nyen la a-aidé mo, mo yeke hinga biani so Jéhovah apensé na mo (1 Chron. 28:9; Kus. 17:​26, 27). Jéhovah abâ a-effort so mo yeke sara. Lo bâ apendere sarango ye ti mo nga lo ye ti duti kamarade ti mo.—Jér. 17:10. w24.10 25-26 par. 7-9

Kite ayeke dä ape so mo ye Jéhovah nga mo ye ti sara kua ndali ti amba ti mo. Nyen la apeut ti aidé mo ti ye ti sara kua ndali ti aita ti mo? Gbu li na ndö ti ngia so mo peut ti wara tongana mo sara kua ndali ti ala. Jésus atene: “Mungo ye na zo aga na ngia mingi ahon warango ye na tïtî zo.” (Kus. 20:35). Jésus asara ye lani alingbi na mama-ndia so. Lo yeke na ngia mingi ti sara kua ndali ti azo. Bâ mbeni tapande so ayeke na Marc 6:​31-34. Na ngoi ni so, Jésus na abazengele ti lo afatigué. Ala gue na mbeni ndo so azo ayeke dä ape ti wu terê ti ala. Me gbâ ti azo asi kâ kozo na ala, na ala ye si Jésus afa ye na ala. Lo peut lani ti ke ndali ti so “ala wara même ngoi ti wu terê ti te kobe pëpe.” Wala Jésus apeut lani ti tene na azo ni ti gue na peko ti so lo fa na ala ye gï kete. Me ndali ti so ndoye apusu lo ti sara ye, lo ‘to nda ti fa aye na ala’ juska “l’heure ahon mingi”.—Marc 6:35. w24.11 16 par. 9-10

Ababâ na amama, ala aidé amolenge ti mo ti gi alege ti fa atâ tënë ti Bible na azo (aRom. 10:10). Mo peut ti haka effort so molenge ti mo ayeke sara ti fa tënë ti mabe ti lo na azo na effort so mbeni zo abezoin ti sara ti manda mbeni ye ti pikango na mozoko. Na tongo nda ni, lo yeke pika abia so a yeke ngangu ape. Me tongana ngoi ayeke hon, pikango mozoko ayeke duti ngangu na lo ape. Legeoko nga, mbeni maseka so ayeke Chrétien apeut ti komanse ti fa tënë na mbeni lege so akpengba ape. Na tapande, lo peut ti hunda mbeni mba ti lo ti ekole, lo tene: “Eskê mo hinga so mingi ni awandara abâ aye so ayeke na yâ ti dunia la ala sara mara ni? Zia mbi fa na mo mbeni pendere vidéo.” Na peko ti so lo fa mbeni vidéo ti molongo ti avidéo A créé ni crééngo? lo peut ti tene: “Tongana a gonda mbeni wandara ndali ti so lo bâ mbeni ye na yâ ti dunia si lo sara mara ni, zo wa la a doit ti gonda lo ndali ti avrai ye so ayeke na yâ ti dunia?” Senge hakango ye so apeut ti pusu mba ti lo ni ti gi ti hinga ambeni ye encore. w24.12 19 par. 17-18

Ti zi e na gbe ti siokpari na kuâ, Jéhovah atokua Jésus ti mû ye so a futa ti zi azo. Me tongana nyen la sandaga so zo oko so ayeke mbilimbili-kue amû apeut ti zi azo kutu mingi? Bazengele Paul afa ndani, lo tene: “Gï tongana ti so ndali ti kengo yanga so zo oko [Adam] ake, azo mingi aga awasiokpari, legeoko nga ndali ti mango yanga so zo oko [Jésus] amä, a yeke diko ande azo mingi tongana azo ti mbilimbili.” (aRom. 5:19; 1 Tim. 2:6). Tongaso, Paul aye ti tene so azo kue ayeke awasiokpari nga ala doit ti kui ndali ti so zo oko so ayeke lani mbilimbili-kue ake yanga ti Nzapa. Ni la ti zi e na gbe ti siokpari nga na kuâ, a hunda ti tene mbeni zo so ayeke mbilimbili-kue amä yanga ti Nzapa. Ngbanga ti nyen la Jéhovah azia lege pëpe na amolenge ti Adam so amä yanga ti ngbâ na fini lakue lakue? E peut ti pensé so a yeke nzoni lege ti leke kpale ni. Me tongana Jéhovah asara lani tongaso, a yeke fango ngbanga ti mbilimbili la ape. Tongana lo sara tongaso, a yeke mo bâ mo tene Adam asara kota siokpari ape nga amolenge ti lo ayeke awasiokpari ape. Me a yeke tâ tënë ape. w25.01 20-21 par. 3-4

A si na mbeni ngoi, bazengele Paul abâ so a yeke fâ lo na yâ ti kete ngoi, me tongana lo pensé na fason so lo vivre na ni lani, lo yeke na ngia mingi. Lo tene: “Mbi kpe loro ni ahunzi awe, mbi sara ye alingbi na tënë ti mabe awe.” (2 Tim. 4:​6-8). Paul amû lani nzoni desizion ti mû fini ti lo ti sara na Jéhovah na lo bâ so lo zia ngia na bê ti Jéhovah. E nga kue e ye ti mû anzoni desizion na ti zia ngia na bê ti Jéhovah. E peut ti sara ni tongana nyen? Paul atene tënë so na ndö ti lo wani nga na amba ti lo aChrétien so ayeke be-ta-zo, lo tene: “E yeke tambela na lege ti mabe, me pëpe na lege ti ye so lê abâ.” Na yâ ti Bible, na ambeni ngoi, tënë “tambela” aye ti sara tënë ti fason so mbeni zo asoro ti vivre na ni. Tongana mbeni zo atambela na lege ti mabe lo yeke mû adesizion so afa so lo yeke na confiance na Jéhovah Nzapa. Aye so lo sara afa so lo hinga biani so Nzapa ayeke futa lo nga so lo yeke bâ nzoni tongana lo sara ye alingbi na awango ti Jéhovah so ayeke na yâ ti Bible.—Ps. 119:66; aHéb. 11:6. w25.03 20 par. 1-2

Grâce na mungo maboko ti yingo ti Nzapa, gbâ ti azo so ayeke lani na asioni sarango ye asara akota changement na yâ ti gigi ti ala (És. 65:25). Ala sara ngangu ti zia lege ti asioni sarango ye ti ala (aÉph. 4:​22-24). Ti tâ tënë ni, awakua ti Nzapa ayeke mbilimbili-kue ape, tongaso ala yeke ngbâ ande ti sara afaute. Ye oko, Jéhovah abungbi “mara ti azo nde nde kue” so aye lo nga so aye amba ti ala asara si ala yeke na siriri nga ala yeke beoko (Tite 2:11). So a yeke mbeni miracle so gï Nzapa so ngangu ti lo ahon angangu kue la apeut ti sara ni. Tënë ti lo ayeke ga lakue tâ tënë (És. 55:​10, 11). Paradis ti yingo ayeke dä awe. Jéhovah acréé mbeni sewa ti awakua ti lo so ayeke tâ nde mingi. So e yeke na yâ ti sewa so, e yeke kamême  na siriri nga e bâ so e yeke nzoni na yâ ti dunia so sarango ye ti ngangu na zo ayeke dä so (Ps. 72:7). Ndali ti araison so, e ye ti aidé gbâ ti azo ti ga na yâ ti sewa ti e ti Chrétien. E peut ti sara ni tongana e zia li ti e na ndö ti sarango adisciple.—Mat. 28:​19, 20. w24.04 23 par. 13, 15

Jésus aye lani Jéhovah na bibe ti lo kue. Lo hinga lani ye so Babâ ti lo aye ti tene lo sara na lo leke na bê ti lo ti sara ni atâa so ti sara ni lo doit ti bâ pasi. So Jésus azia li ti lo gï na ndö ti ye so bê ti Babâ ti lo aye, lo zia pëpe si mbeni ye nde aga kota mingi na yâ ti fini ti lo. Pierre na amba ti lo abazengele ayeke lani na pasa ti duti na terê ti Jésus nga ala bâ tongana nyen la lo yeke pensé lani. Na ngoi so Pierre asû kozo lettre ti lo, lo wa aChrétien ti mû oko bibe so Christ ayeke na ni tongana ye ti bira (1 Pi. 4:1). Pierre asara kua na mbeni tënë ti aturugu na ngoi so lo tene: ‘Ala mû tongana ye ti bira.’ Tongaso, tongana aChrétien amanda ti pensé tongana Jésus, ala yeke wara ye so ala bezoin ni ti tiri na asioni nzara kue nga na dunia so Satan akomande ni.—2 aCor. 10:​3-5; aÉph. 6:12. w25.03 8-9 par. 1-3

Aye wa la a yeke nzoni ala hinga na ndö ti mba na ngoi so ala yeke bâ terê? Kozo ti tene mo mû bê ti mo kue na zo ni, peut-être a yeke nzoni ala sara lisoro na ndö ti ambeni ye so ayeke kota, na tapande, aye so ala leke ti sara. Tongana nyen la mo peut ti gi ti hinga zo ni nzoni? Mbeni nzoni lege ni ayeke ti sara tënë polele na zo ni, ti hunda na lo atënë nga ti mä lo nzoni (Jacq. 1:19). Peut-être mo peut ti soro ti tene ala sara ambeni ye ndo oko tongaso si a duti ngangu ape ti tene ala sara lisoro, na tapande ala peut ti te ye ndo oko, ti gue ti fono na ando so azo ayeke gue ka dä nga ti fa tënë ndo oko. Ala peut nga ti hinga ye na ndö ti mba na ngoi so ala na akamarade nga na afami ti ala apassé ngoi ndo oko. Na ndö ni, leke ti tene ala sara ambeni ye so ayeke fa na mo sarango ye ti zo ni na yâ ti aye nde nde nga na terê ti azo nde nde. w24.05 28 par. 6-7

Fafadeso, e yeke tingbi na angangu kpale, na e yeke duti ande na bezoin ti zia bê ti e mingi na Jéhovah ahon ti kozo. E peut ti sara ni tongana e diko ambaï ti Bible nga na aye so asi na awakua ti Jéhovah ti ngoi ti e ayeke aidé e ti bâ tongana nyen la Nzapa a-aidé awakua ti lo. Gbu li nzoni na ndö ti ambaï so. Tongana mo sara ni, a peut ti aidé mo ti sara si Jéhovah aga Kota tênë ti mo. Nga, mo peut ti kpengba aita ti mo. Na tapande, Jésus amû na Simon iri ti Céphas (so a kiri peko ni na “Pierre”), so aye ti tene “Tênë.” (Jean 1:42). Jésus aye ti tene so Pierre ayeke dë bê ti aita ti congrégation nga lo yeke kpengba mabe ti ala. Bible atene so a-ancien ayeke tongana “gbe ti dê ti mbeni kota tênë”. So aye ti tene so ala yeke bata aita ti congrégation (És. 32:2). Me, e kue e peut ti kpengba mba na popo ti e tongana e sara ye tongana Jéhovah. w24.06 28 par. 10-11

Agbia ti Israël so Jéhovah atene ala yeke be-ta-zo angbâ lani ti voro lo na lege ni. Mingi ti agbia so Jéhovah atene ala yeke be-ta-zo ape so azia ti sara ye alingbi na Ndia ti lo na ti voro anzapa ti wataka (1 aGbia 21:​25, 26; 2 Chron. 12:1). Ngbanga ti nyen la tënë ti vorongo Jéhovah ayeke kota ye na lê ti lo? Mbeni raison ni ayeke so kua ti agbia ayeke lani ti aidé azo ti gbe ti ala ti voro Jéhovah na lege ni. Nga, tongana azo avoro anzapa ti wataka ayeke gue na ala ti sara ambeni kota siokpari nde nga ala yeke sara ye na amba ti ala na lege ni ape (Os. 4:​1, 2). Na ndö ni, agbia nga na azo ti gbe ti ala ayeke azo so amû lani terê ti ala na Jéhovah awe. Tongaso, tongana ala duti be-ta-zo na Jéhovah ape nga ala voro anzapa ti wataka, Bible ahaka ni na gingo koli wala wali nde (Jér. 3:​8, 9). Tongana mbeni zo agi koli wala wali nde, lo sara sioni mingi na koli wala wali ti lo. Legeoko nga, mbeni wakua ti Jéhovah so amû terê ti lo na lo awe so avoro nzapa ti wataka ayeke son bê ti lo ngangu.—Deut. 4:23. w24.07 22-23 par. 12-15