Psaume 33:1-22
33 Ala azo ti mbilimbili, ala dekongo na ngia ndali ti Jéhovah.+
A yeke na lege ni ti tene azo ti mbilimbili asepela lo.
2 Ala mû merci na Jéhovah na lege ti harpe;ala he bia* ti sepela lo na lege ti harpe so kamba ni ayeke bale-oko.
3 Ala he na lo fini bia;+na kode, ala pika na lo pendere mozoko na aye ti mozoko so ayeke na kamba, nga ala dekongo na ngia.
4 Tënë ti Jéhovah ayeke mbilimbili,+
nga ye kue so lo sara, zo alingbi ti zia bê ti lo dä.
5 Lo ye mbilimbili nga na fango ngbanga ti mbilimbili.+
Tâ ndoye ti Jéhovah amû ndö ti sese kue.+
6 Na lege ti tënë ti yanga ti Jéhovah, a leke yayu,+nga na lege ti pupu* ti yanga ti lo, a leke aye kue so ayeke na yâ ni.
7 Lo sara si ngu-ingo abungbi ndo oko mo bâ mo tene a zia barrage na terê ni;+lo mû angu so ayeke sua na ngangu lo zia na yâ ti agogoro.
8 Zia si sese kue akpe mbeto ti Jéhovah.+
Zia si azo so asara kodro na ndö ti sese so kobe ayeke sigi dä akpe mbeto ti lo mingi.
9 Lo sara gï tënë, na ye abâ gigi;+lo mû yanga, na ye ni aluti nzoni.+
10 Jéhovah abuba yâ ti aye so amara amä terê ti sara;*+lo sara si aye so azo ti amara aleke ti sara* atï na ngu.+
11 Me adesizion* so Jéhovah amû ayeke ngbâ lakue;+aye so lo bi bê ti lo ti sara ayeke ngbâ na yâ ti angoi nde nde kue.
12 Ngia ayeke na mara so Jéhovah ayeke Nzapa ti lo,+azo so lo soro ala ti ga ye ti lo wani.+
13 Kâ na yayu, Jéhovah abâ ndo na sese;lo bâ amolenge kue ti azo.+
14 Kâ na ndo so lo duti dä,lo ngbâ ti bâ azo ti sese nzoni.
15 Lo la lo sara bê ti azo kue;lo bâ akusala ti ala kue nzoni.+
16 Gbâ ti aturugu alingbi pëpe ti sö mbeni gbia;+kota ngangu ti wangangu la ayeke sö lo pëpe.+
17 Mbarata ayeke pëpe tâ ye ti tene zo azia bê ti lo na ndö ni si asö lo.*+
Kota ngangu ti lo afa pëpe so nyen na nyen lo yeke sö mo.
18 Bâ, lê ti Jéhovah ayeke na ndö ti azo so ayeke kpe mbeto ti lo,+azo so ayeke ku ti tene lo fa tâ ndoye na ala,
19 ti zi ala* na lê ti kuâ,nga ti bata ala na fini na ngoi ti kota nzara.+
20 E yeke* ku Jéhovah.
Lo la lo yeke mû maboko na e, nga lo yeke vala ti e.+
21 Bê ti e asi na ngia ndali ti lo;ndali ti so e zia bê ti e na ndö ti iri ti lo so ayeke nzoni-kue.+
22 Jéhovah, zia si tâ ndoye ti mo aduti na ndö ti e+na ngoi so e ngbâ ti ku mo.+
Kete tënë
^ Wala “pika mozoko.”
^ Na Hébreu: “yingo.”
^ Wala “wango ti amara.”
^ Wala “apensé ti azo ti amara.”
^ Wala “awango.”
^ Wala “si lo sö benda.”
^ Wala “âme ti ala.”
^ Wala “Âme ti e ayeke.”
