Keda gele peske tari gradina Eden, o Adam hem i Eva sine len but čhave. Lengoro prvo čhavo, o Kain, ulo zemjodelco, a lengoro dujto čhavo, o Avel, arakhela sine bakhren.

Jekh dive o Kain hem o Avel dengje žrtve e Jehovaske. Džanea li soj adava žrtva? Adava tano poklon so dela pe e Devleske. O Jehova radujngja pe baši žrtva e Aveleskiri, ama na radujngja pe baši žrtva e Kaineskiri. Adaleske o Kain but holjangja. O Jehova vakergja e Kaineske ma te ovel ponadari holjamo soske ka šaj te kerel nešto lošno. Ama, o Kain na šungja le.

Namesto adava, o Kain vakergja e Aveleske: „Ava mancar ko pole“. Keda resle adari, o Kain napadingja ple phrale hem mudargja le. So kergja o Jehova bašo akava? O Jehova  kazningja le agjaar so paldingja le dur tari leskiri familija. O Kain na smejnela sine te iranel pe više palal.

So sikljovaja taro akava? Šaj ka počmina te holjana ako nane sa sar so mangaja amen. Ako dikhaja kaj amari holi ovela pobari, ili nekoj avela te vakerel amenge kaj siem but holjame, tegani valjani odma te poprajna amen, hem te počmina te kontrolirina amare čuvstvija angleder ola te kontrolirinen amen.

Adaleske so o Avel mangela sine e Jehova hem kerela sine šukar bukja, o Jehova na bistergja le. O Jehova ka iranel e Avele ko životo keda i phuv palem ka ovel raj.