Džikote o apostol Jovan sine ko zatvor ko ostrov Patmos, o Isus sikavgja leske 16 vizie, ili slike, bašo adava so ka ovel ki idnina. Ko akala vizie sine sikavdo sar ka slavinel pe e Devleskoro sveto anav, sar ka avel leskoro Carstvo hem sar ka kerel pe leskiri volja hem ko nebo hem ki Phuv.

Ki jekh vizija, o Jovan dikhlja e Jehovaskoro slavno prestol ko nebo, hem okolu leste sine 24 starešine uravde ko parne šeja hem zlatna krune ko šere. Taro prestol svetinena hem šungjona sine gromija. O 24 starešine pokloninena pe sine e Jehovaske hem služinena sine leske. Ki javer vizija o Jovan dikhlja but manuša taro sa o nacie hem čhibja sar služinena e Jehovaske. O bakhro, kova so pretstavinela e Isuse, grižinela pe sine lenge hem ingarela len sine ko panja so dena životo. Pokasno, ki javer vizija o Jovan dikhela e Isuse sar Cari ko nebo hem lea o 24 starešine. Ki javer vizija, o Jovan dikhela sar o Isus borinela pe e ažderea, kova soj o Satana, hem leskere demonencar. O Isus frdingja len taro nebo tele ki Phuv.

 Palo adava, o Jovan dikhlja nešto but šukar, sar o Bakhro hem o 144.000 birime tergjona ki planina Sion. Isto agjaar, dikhlja sar jekh angeli letinela okolu i Phuv hem vakerela e manušenge te šunen e Devle hem te slavinen le.

Javer vizija sine baši i vojna Armagedon. Ki adaja vojna, o Isus ple nebesno vojskaja pobedingja e Satana hem leskere lošno sveto. Ki posledno vizija, o Jovan dikhlja sar ko nebo hem ki Phuv isi sovršeno mir. O Satana hem okola soj tari leskiri strana sine celosno uništime. Ko krajo, sarine ko nebo hem ki Phuv slavinena sine e Devleskoro sveto anav, Jehova, hem služinena sine samo leske.