E PALABRA DI DIOS ta garantisá nos: “Esun den nesesidat lo no keda lubidá pa semper.” (Salmo 9:18) Tambe e ta bisa di nos Kreador: “Bo ta habri bo man, i ta satisfasé e deseo di tur ser bibu.” (Salmo 145:16) E speransa bíbliko akí no ta djis un soño. E Dios Todopoderoso por perkurá tur loke ta nesesario pa eliminá pobresa. Pero kiko presis hende pober tin mester?

Un ekonomista afrikano a bisa ku loke paisnan pober realmente mester ta un “diktador bondadoso.” E tabata ke men, un persona ku tin poder pa trese kambio i ku a la bes tin bon kurason. Asta por agregá ku e persona akí mester por goberná mundu kompletu, pasobra hopi biaha pobresa ekstremo ta e resultado di desigualdat ku tin entre paisnan. Ademas, e mester por yega na rais di e problema di pobresa, esta, nos tendensia di ta egoista. Unda nos por haña un gobernante ideal asina?

Dios a manda Hesus ku bon notisia pa hende pober. Ora Hesus a lanta para pa lesa e asignashon ku el risibí di Yehova, el a bisa: “E spiritu di SEÑOR ta riba mi, pasobra el a ungi mi pa prediká evangelio [òf, “bon notisia,” BPK] na e pobernan.”​—Lukas 4:​16-18.

Kiko e Bon Notisia Ta?

Dios a nombra Hesus komo Rei, i esaki sigur ta un bon notisia. Hesus ta e Gobernante ideal ku por eliminá pobresa pasobra (1) e ta bai goberná mundu kompletu i e tin poder pa trese kambio; (2) e tin kompashon di hende pober i ta siña su siguidónan pa yuda nan; i (3) e por eliminá e kousa di pobresa, esta, nos tendensia di ta egoista. Laga nos eksaminá e tres aspektonan akí di e bon notisia.

1. Hesus su outoridat riba tur nashon Dios su Palabra ta bisa di Hesus: “Na dje a wòrdu duná dominio . . . pa tur pueblo, nashon i hende di tur idioma por sirbié.” (Daniel 7:14) Bo por imaginá e benefisionan ku humanidat lo tin ku un solo gobièrnu? Lo no tin e lucha kontinuo mas pa e rekursonan di e planeta, pasobra lo tin un repartishon hustu di tur loke tin riba tera. Hesus mes a garantisá ku lo e tin poder pa trese kambio ora e goberná mundu. El a bisa: “Tur outoridat a wòrdu duná na mi den shelu i riba tera.”​—Mateo 28:18.

2. Hesus su kompashon pa hende pober Durante Hesus su ministerio riba tera, el a trata hende pober ku kompashon. Por ehèmpel, un señora ku a gasta tur loke e tabatin pa paga tratamentu médiko a mishi ku Hesus su mantel ku e speransa di bira bon. Pa diesdos aña largu e señora a sufri di un derame di sanger, i sin duda su sanger lo tabata hopi abou. Segun e Lei, ken ku el a mishi kuné lo a bira impuru. Sinembargo, Hesus tabata bondadoso kuné. El a bis’é: “Mi yu, bo fe a salba bo; bai na pas i sea kurá di bo aflikshon.”​—Marko 5:​25-34.

Hesus su siñansanan tin poder pa kambia aktitut di hende pa asina nan tambe mustra kompashon. Por ehèmpel, wak kon Hesus a kontestá un hòmber ku kier a sa kiko e tin ku hasi pa agradá Dios. E hòmber tabata sa ku e mester a stima su próhimo, ma el a puntra Hesus: “Ta ken ta mi próhimo?”

Pa kontest’é Hesus a usa su famoso ilustrashon di e bon samaritano ku a yuda un hòmber ku ladron a ataká i a laga “mitar morto” riba kaminda di Yerusalèm pa  Jeriko. Ora tantu un saserdote komo un levita a mir’é nan a pasa pa e otro un banda di kaminda i sigui bai. “Ma un samaritano, ku tabata biahando, a yega serka di dje; i ora ku el a mir’é, el a sinti kompashon.” El a limpia su heridanan, hib’é na un posada i paga e doño di e posada pa kuid’é. Hesus a puntra e hòmber: “Kua . . . tabata próhimo di e hòmber ku a kai den man di ladron?” E hòmber a kontest’é: “Esun ku a mustra miserikòrdia.” Anto Hesus a bis’é: “[Abo] hasi meskos.”​—Lukas 10:​25-37.

Un hende ku bira Testigu di Yehova ta studia e siñansanan di Hesus i ta bira mas dispuesto pa yuda hende den nesesidat. Por ehèmpel, un eskritora di Letonia a konta den su buki Women in Soviet Prisons loke a pasa kuné ora el a bira malu den e kampo penitensiario na Potma, meimei di dékada di 1960. “Tur e tempu ku mi tabata malu, [e Testigunan] a kuida mi bon. Mi no por a deseá un mihó kuido.” El a agregá: “Testigunan di Yehova ta sinti ku ta nan deber pa yuda otro hende, sin importá religion òf nashonalidat.”

Ora ku algun Testigu di Yehova na Ancón, Ecuador, a pèrdè trabou i a keda sin entrada debí na un krísis ekonómiko, nan rumannan kristian a pensa un manera pa yuda nan. E rumannan a bende kuminda ku piskadónan ku a bini tera bèk despues di a pasa anochi riba laman (potrèt na man drechi). Tur ruman di e kongregashon a yuda, asta e muchanan. Nan a kuminsá kushiná for di un or di mardugá pa tur kos a keda kla kuat’or ora e botonan a bini bèk. E Testigunan a parti e sèn di benta segun kada ken su nesesidat.

E eksperensianan akí ta demostrá ku Hesus su ehèmpel i siñansanan realmente tin poder pa laga hende bira mas dispuesto pa yuda esnan den nesesidat.

3. Hesus su poder pa kambia nos tendensia pekaminoso Tur hende ta rekonosé ku nos tin tendensia di ta egoista. Beibel ta yam’é piká. Asta apòstel Pablo a skirbi: “Mi ta deskubrí e lei akí: ora mi ta deseá di hasi loke ta bon, maldat ta presente den mi.” El a sigui bisa: “Ken lo libra mi di e kurpa di morto akí? Mi ta duna gradisimentu na Dios dor di Hesukristu.” (Romanonan 7:​21-25) Pablo kier a mustra kon Dios, pa medio di Hesus, lo libra adoradónan berdadero for di tendensianan imperfekto, inkluso egoismo. Kon esaki lo tuma lugá?

Algun tempu despues di Hesus su boutismo, Juan Boutista a introdusí Hesus ku e palabranan: “Ata e Lamchi di Dios ku ta kita piká di mundu!” (Juan 1:29) Pronto tera lo ta yen di hende ku ta liber di piká heredá, inkluso e tendensia di wak nan mes interes. (Isaias 11:9) Asina Hesus lo a eliminá e kousa prinsipal di pobresa.

Ta dushi pa pensa riba e dia ku tur hende lo tin tur loke nan mester! Beibel ta bisa: “Kada un di nan lo sinta bou di su palu di wendrùif i bou di su palu di figu, i ningun hende lo no spanta nan.” (Mikeas 4:4) E palabranan akí poétikamente ta deskribí e tempu ora ku tur hende lo tin trabou plasentero, siguridat i pleno oportunidat di disfrutá di un mundu sin pobresa, i tur pa e alabansa di Yehova.