Tur Bon Hende Ta Bai Shelu?

DESPUES di e último sena ku Hesus tabatin ku su apòstelnan riba e anochi promé ku el a ser ehekutá, el a primintí nan ku lo e rekompensá nan ku un lugá den shelu. Hesus a bisa nan: “Den kas di mi Tata tin hopi lugá di biba; si no tabata asina, lo mi a bisa boso; pasobra mi ta bai pa prepará un lugá pa boso.” (Juan 14:2) Dikon Hesus lo a duna nan un lugá den shelu? Kiko nan lo bai hasi aya?

Hesus tabatin un asignashon spesial na mente pa su disipelnan. Durante e mesun anochi ei, el a bisa nan: “Boso ta esnan ku a keda na mi lado den mi pruebanan; i meskos ku mi Tata a laga un reino pa mi, mi ta laga pa boso.” (Lukas 22:​28, 29) Dios a primintí Hesus ku lo e ta e Rei ku lo perkurá loke humanidat tin mas mester di dje, esta, un bon gobièrnu. Hesus lo salba hende di tur aflikshon i lo kaba ku esnan ku ta oprimí nan. Ounke Hesus lo tin súpditonan “te na e finnan di tera,” su trono lo ta den shelu.​—Salmo 72:​4, 8; Daniel 7:​13, 14.

Sinembargo, Hesus lo no goberná su so. Ta p’esei, el a primintí su apòstelnan un lugá den shelu. Nan tabata e promé personanan skohí pa “reina riba tera.”​—Revelashon 5:10.

Kuantu hende ta bai shelu? Manera ta e kaso den kualke gobièrnu, e gobernantenan den Dios su Reino selestial ta tiki na komparashon ku tur e hendenan ku lo biba bou di su mando. Hesus a bisa esnan ku lo goberná huntu kuné: “No tene miedu, tou chikitu, pasobra a agradá boso Tata pa duna boso e reino.” (Lukas 12:32) Finalmente, e “tou chikitu” ei lo konsistí di 144.000 persona. (Revelashon 14:1) E kantidat ei ta tiki na komparashon ku e miónes di hendenan ku lo disfrutá di bida pa semper riba tera komo súpditonan leal di e Reino.​—Revelashon 21:4.

Pues, no ta tur bon hende ta bai shelu. Relashoná ku e bon Rei David, Pedro a bisa frankamente: ‘David no a subi na shelu.’ (Echonan 2:34) Juan Boutista tambe tabata un bon hende. Apesar di esei, Hesus a indiká ku lo e no haña e privilegio di goberná komo rei den shelu. Hesus a bisa: “Entre esnan ku a nase for di muhé no a lanta ningun otro mas grandi ku Juan Boutista; sinembargo, esun di mas chikitu den e reino di shelu ta mas grandi kuné.”​—Mateo 11:11.

Lo Bo Risibí e Rekompensa pa Bon Hende?

Kiko un hende mester hasi pa risibí e rekompensa di bida eterno riba tera? Hesus a bisa: “Dios a stima mundu asina tantu, ku el a duna su Yu unigénito, pa ken ku kere den dje no bai pèrdí, ma tin bida eterno.” (Juan 3:16) Manera e teksto akí ta indiká, debí na Dios su amor pa humanidat, el a habri kaminda pa tur hende haña bida eterno. Pero, ta solamente esnan ku ta “kere,” òf ehersé fe, lo risibí e rekompensa ei.

Fe mester ta basá riba konosementu eksakto. (Juan 17:3) Bo por demostrá ku bo ta un bon hende, siñando mas tokante Yehova su propósito pa hende. Laga fe den loke bo ta siña motivá bo pa aktua. E ora ei, lo bo por tin tur konfiansa ku e oportunidat di bida sin fin ta realmente na bo alkanse.

 [Kuadro na página 7]

Kiko Beibel Ta Bisa?

Pregunta:

Kiko ta sosodé ku bon hende ora nan muri?

Kontesta:

“E mortonan no sa nada.”​—EKLESIASTÉS 9:5.

Pregunta:

Ki speransa bon hende tin pa futuro?

Kontesta:

“E ora lo yega den kual tur ku ta den graf lo tende [Hesus] su bos, i lo sali.”​—JUAN 5:​28, 29.

Pregunta:

Unda mayoria di bon hende lo biba?

Kontesta:

“E hustunan lo heredá e tera, i lo biba den dje pa semper.”​—SALMO 37:29.