Un buki di instrukshon pa skol sekundario titulá World Religions in Denmark, publiká na aña 2007, a deskribí Testigunan di Yehova komo un grupo kristian minoritario ku ta sigui kuidadosamente loke Beibel ta siña. De echo, Testigunan di Yehova ta e di tres religion mas grandi na Dinamarka.

Sinembargo, un obispu di Iglesia Nashonal Danes tabatin krítika masha fuerte riba e echo ku e outor a inkluí Testigunan di Yehova den e buki di instrukshon. Dikon? E obispu a bisa: “Mi no konosé ningun teólogo ku ta pensa ku [Testigunan di Yehova] ta [un religion] kristian. Nan no ta kere den Trinidat, e siñansa prinsipal di religion kristian.”

E outor di e buki, Annika Hvithamar, un sosiólogo ku ta spesialisá riba tereno di religion, a indiká ku ora bo puntra hende dikon nan ta konsiderá nan mes kristian, kasi nunka nan no ta bisa ku ta pasobra nan ta kere ku Dios ta un Trinidat. Es mas, e sekshon “Bo Ta un Kristian?” den e buki ta bisa: “E doktrina di Trinidat ta un di e problemanan di mas difísil di teologia kristian.” E ta bisa tambe: “Semper tabata difísil pa splika hende kristian ku no a sigui un estudio di teologia dikon e Dios kristian ta ún Dios i no tres dios.”

Loke Beibel ta siña tokante Dios i Hesus ta kla i simpel. E no ta difísil pa komprondé. Bo no ta haña ni e palabra “Trinidat” ni e idea di Trinidat den e Palabra di Dios. Beibel ta bisa bon kla ku Hesukristu ta e Primogénito di Dios. (Kolosensenan 1:15) Ademas, e ta referí na Hesus komo e ‘mediador entre Dios i hende.’ (1 Timoteo 2:5) Tokante e Tata, Beibel ta bisa: “Abo, kende su nòmber ta Yehova, abo so ta e Haltísimo riba henter tera.”​—Salmo 83:18, NW.

Testigunan di Yehova ta kere ku ta masha importante pa hende tin fe den Hesus. (Juan 3:16) P’esei, nan ta tuma masha na serio e siguiente mandato di Hesus: “Ta pará skirbí: ‘Adorá SEÑOR [“Yehova,” NW] bo Dios, i sirbi e so.’” (Mateo 4:10) No tin ningun duda, un persona ku ta hasi esfuerso pa obedesé Hesus su mandamentunan ta un kristian.