Bestia Lo Ta un Plaser pa Semper

KI UN inmenso variedat di bestia tin, i kada un aparentemente ku un otro personalidat! Amor i kompashon pa bestia por ta un faktor ku ta hala hende serka di nan Kreadó. Un ehèmpel di esaki tabata e kaso di Maria.

Rònt di tres aña pasá, tempu ku Maria tabata biba na Lisboa, Portugal, su kachó stimá a pèrdè, i el a laga anunsiá esaki na radio. Un señora Testigu di Yehova, ku tabatin sigur ku el a mira un kachó ku ta kuadra ku e deskripshon ku nan a duna, a tuma kontakto ku Maria. Ora nan dos a topa, nan a haña e kachó, i e Testigu a bisa Maria ku komo ku Maria tabata stima bestia asina tantu, sigur lo e disfrutá di biba den e mundu nobo ku Dios a primintí. E Testigu a splika ku e tempu ei hende lo ta na pas ku tur bestia.

 Maria a aseptá e invitashon pa asistí na un reunion di Testigunan di Yehova. Loke el a tende i mira einan a stimulá su interes te ku e tabata ke un studio di Beibel personal. Segun ku e studio a sigui, Maria a keda profundamente konmoví dor di loke el a siña tokante Yehova Dios i su promesa di bida eterno riba tera den un mundu nobo di hustisia. (Salmo 37:29; Juan 17:3) Dia 16 di febrüari 2002, Maria a simbolisá su dedikashon na Yehova mediante boutismo den awa.

Dios Su Propósito Original

Meskos ku Maria, tin hopi hende ku a keda masha emoshoná ku e evidensia den Beibel ku Dios lo kumpli ku su propósito original pa hende biba pa semper riba e tera kombertí den un paradeis i kuida tur e bestianan riba dje. (Génesis 1:28) Beibel ta bisa ku Dios “no a krea [e tera] pa e keda bashí, ma el a form’é pa e wòrdu habitá.” Aparentemente, hende lo mester a disfrutá di e tera i su bestianan pa semper.—Isaias 45:18.

Ademas Beibel ta enfatisá Dios su determinashon pa kumpli ku su propósito original di kombertí e tera den un paradeis. Dios a deklará: “Di bèrdat mi a papia.” Anto el a agregá: “Siguramente lo mi hasié.” Un biaha mas Yehova a dekretá: “Asina mi palabra ku ta sali for di mi boka lo ta; e lo no bolbe bashí serka mi, sin kumpli ku loke mi ta deseá, i sin alkansá e propósito ku kual mi a mand’é.”—Isaias 46:11; 55:11.

Pues ta bisto anto ku Dios su propósito original tabata pa hende disfrutá di un paradeis riba tera pa semper. Nos por ta apsolutamente sigur ku na su debido tempu e propósito ei lo ser realisá. Laga nos analisá algun deskripshon breve ku Beibel ta duna di e manera ku bida lo ta den Dios su mundu nobo. Nos lo mira ku de echo tur bestia, tantu di kas komo salbahe, lo ta na pas ku otro i ku hende.—Isaias 65:17, 21-25; 2 Pedro 3:13.

Bestia di Kas den Dios Su Mundu Nobo

Den Yehova su mundu nobo, hende lo por mishi ku e klina, òf kabeinan largu, di un leon, karisiá e kueru strepiá di un tiger i, sí, drumi pafó den mondi sin miedu ku kualke bestia lo hasié daño. Tuma nota di e promesa aki di Dios: “Lo mi . . . eliminá tur bestia salbahe for di e tera, asina ku nan [hende] por biba trankil den desierto i drumi den e mondinan.”—Ezekiel 34:25; Oseas 2:18.

De echo, e tempu ei bestia salbahe lo ta sumiso, asta na mucha chikí! Beibel ta bisa: “Lobo lo ta huntu ku lamchi di karné, leopardo lo kai drumi banda di lamchi di kabritu, i bisé, leon chikitu i bestia gòrdá lo ta huntu, i un mucha chikitu lo guia nan.”

Pero esei no ta tur kos! E skritura ta sigui bisa: “Baka i ber lo kome yerba huntu; nan chikitunan lo drumi banda di otro, i leon lo kome yerba seku manera bue. Yu na pechu lo hunga banda di buraku di kolebra, i yu kitá for di pechu lo hinka su man den kueba di víbora. Nan lo no kousa daño ni destrukshon den henter mi seru santu, pasobra tera lo ta yen di e konosementu di SEÑOR, manera awa ta tapa laman.”—Isaias 11:6-9.

Den Yehova su mundu nobo, lo no tin e problema di hende ku ta biba riba otro den statnan grandi, ku no ta dushi ni pa hende ni pa nan bestianan biba aden. Ta sierto ku asta awe hopi hende ta disfrutá di nan bestia, i hopi ta balansá den nan aktitut i kuido pa ku bestia. Pero djis pensa un ratu riba e prospekto maravioso di disfrutá di bestia di kas pa semper den un hustu mundu nobo! E kuido amoroso ku nan lo haña lo ta un berdadero onor pa e Magnífiko Kreadó di tur ser bibu.

Si bo no sa ainda kiko ta Dios su propósito maravioso—meskos ku Maria ku ta un amante di bestia no tabata sa sino te ku poko tempu pasá—nos ta invitá bo kalurosamente pa tuma kontakto ku e publikadónan di e revista aki òf ku un Testigu di Yehova, kende gustosamente lo yuda bo siña tokante esei.

[Plachi na página 10]

Den Dios su mundu nobo, nos lo disfrutá di bestia pa semper