NOS BIDA KRISTIAN

“Pablo A Gradisí Dios i A Sinti Su Mes Hopi Animá”

TOKA NA

Ora e kongregashon na Roma a tende ku Pablo tabata biniendo, un grupo di ruman a biaha mas o ménos 64 kilometer pa bai top’é. Nan a demostrá amor sin egoismo. Ki efekto nan amor tabatin riba Pablo? “Ora Pablo a mira nan, el a gradisí Dios i a sinti su mes hopi animá.” (Ech 28:15) Pablo tabatin e kustumber di animá e kongregashonnan ku e tabata bishitá. Pero na e okashon akí, komo ku e tabata un prizonero, ta e tabata esun ku tabatin mester di animashon.—2Ko 13:10.

Awe, e superintendentenan di sirkuito ta bishitá e kongregashonnan pa animá e rumannan. Pero, meskos ku e otro sirbidónan di Dios, nan tambe tin biaha ta sinti nan kansá, preokupá i desanimá. E siguiente biaha ku e superintendente di sirkuito ku su kasá bishitá bo kongregashon, pensa kiko bo por hasi pa animá nan pa asina boso por tin “un interkambio di estímulo.”—Rom 1:11, 12.

Apoyá e reunionnan pa sirbishi di vèlt. E superintendente di sirkuito ta sintié animá ora e mira e publikadónan ta hasi sakrifisio pa benefisiá plenamente di e siman di su bishita. (1Te 1:2, 3; 2:20) Bo por purba di traha pionero ousiliar durante e luna ku e ta bishitá bo kongregashon. Ademas, bo por pone bo mes disponibel pa traha kuné òf ku su esposa den sirbishi òf bai un estudio di Beibel ku ún di nan. Nan ta gusta traha ku diferente publikadó den sirbishi, inkluso publikadó nobo òf esnan ku ta sinti ku nan no ta masha ábil den sirbishi.
Mustra hospitalidat. Bo por ofresé nan alohamentu òf invitá nan bin kome serka bo? Esaki ta un bon manera pa mustra nan ku bo ta stima nan. Ademas, nan no ta ferwagt muchu kos.—Luk 10:38-42.
Skucha su konseho i pon’é na práktika. Ku amor, e superintendente di sirkuito ta purba di yuda nos mira kiko nos por hasi pa sirbi Yehova mihó. I tin biaha, e mester duna nos konseho firme. (1Ko 5:1-5) Ora nos ta obediente i sumiso, e superintendente di sirkuito ta hasi su trabou ku goso.—Heb 13:17.
Mustra apresio. Bisa e superintendente di sirkuito ku su kasá kon nan esfuersonan a benefisiá bo. Bo por hasi esei sea personal, mediante un karta òf un nota.—Kol 3:15.