Wɔgenga Ɛzinzalɛ Arane mɔɔ ɛra kenlensa ye la kpalɛ ɔ? Nea saa ɛbahola wɔabua kpuyia ɛhye mɔ a:

Mekɛ fɔɔnwo ne mɔɔ ɔwɔ kɛ bɛku Akpabɛnwo boane ne wɔ Naesan 14 ne la a le boni?

Baebolo ngilebɛbo bie mɔ ka kɛ ɔwɔ kɛ bɛku boaneralɛ ne “wɔ nɔsolɛ nwiɔ ne avinli,” mɔɔ kile alewɔzo—yemɔti ɔwɔ kɛ bɛku ye mekɛ mɔɔ sɛnzɛne ne ɛhɔdɔ noko maanle nu ɛtɛmuanle la. (Ade. 12:6, NW)—12/15, mukelɛ 18-19.

Baebolo ngyinlazo boni a baboa mgbavolɛ nee mbɛlɛra yeamaa bɛazi kpɔkɛ mɔɔ nrɛlɛbɛ wɔ nu a?

Bɛmɛ ɛne (1) Dumua kpondɛ Nyamenle Belemgbunlililɛ ne nee ye tenleneyɛlɛ. (Mat. 6:19-34) (2) Fa anyelielɛ sonle awie mɔ. (Gyi. 20:35) (3) Fa anyelielɛ sonle Gyihova wɔ wɔ mgbavolɛ nu. (Nolo. 12:1)—1/15, mukelɛ 19-20.

Mrenya nna ne mɔɔ de mgbɔnwɔ zo ɛlɛkɔ bɛ nyunlu ɔvi 1914 mɔɔ ba la gyi ɛkɛ maa duzu?

Gyisɛse, mɔɔ ɔde ɛkpɔnwɔ fufule ne azo la ɛdu Seetan nee ye sunsum ɛtane ne mɔ ɛvi anwuma lɔ. Ɛkpɔnwɔ kɔkɔlɛ ne kavolɛ ne gyi ɛkɛ maa konle ngakyile mɔɔ bɛho bɛzɛkye alesama la. Ɛkpɔnwɔ bile ne kavolɛ ne gyi ɛkɛ maa ɛhɔne. Ɛkpɔnwɔ nzonle ne kavolɛ ne gyi ɛkɛ maa ewulenzane mɔɔ ɛhu menli dɔɔnwo la. (Yek. 6:2-8)—2/1, mukelɛ 6-7.

Mekɛ boni a bɛbalie Boaneralɛ ne atɔfolɛ ne a? (Yek. 19:7)

Bɛbalie boaneralɛ ne atɔfolɛ ne wɔ mekɛ mɔɔ Belemgbunli Gyisɛse Kelaese ɛwie ye konimlilɛ ne bɔkɔɔ, wɔ mekɛ mɔɔ bɛzɛkye Babelɔn Kpole ne bɛwie na Amagɛdɔn konle ne ɛra ye awieleɛ la.—2/15, mukelɛ 10.

Duzu ati a Dwuuma mɔɔ ɛnee wɔ Gyisɛse mekɛ zo la manle bɛ ‘nye lale’ Mɛzaya ne ɛralɛ ne ɛ? (Luku 3:15)

Yɛnrɛhola yɛnrɛha kɛ ɛvoya mɔɔ lumua Dwuuma ne dele Daneɛle ngapezo ne mɔɔ fane Mɛzaya ne anwo la abo kɛmɔ yɛnwu ye ɛnɛ la. (Dan. 9:24-27) Noko, bie a bɛdele edwɛkɛ ne mɔɔ anwumabɔvolɛ ne mɔ hanle hilele mboaneneavolɛma ne la, anzɛɛ mɔɔ Nyamenle kpɔmanvolɛ raalɛ Anna hanle wɔ mekɛ mɔɔ ɔnwunle adɔma Gyisɛse wɔ ɛzonlenlɛ sua ne anu la. Akee, nwɔlɔra kengavoma bie rabizale ɛleka mɔɔ bɛbanwu “Dwuuma belemgbunli ne mɔɔ bɛwo ye la.” (Mat. 2:1, 2) Nzinlii, Dwɔn Sɔnevolɛ ne hanle kɛ ɔnrɛhyɛ Kelaese ne bara.—2/15, mukelɛ 26-27.

Duzu a baboa yɛ na yɛ ɛhɛe angile kyɛkyɛ a? (2 Kɔl. 1:18)

Ɔdwu mekɛ ne bie a tɛnlabelɛ bie mɔɔ yɛngola yɛnyɛ nwolɛ ɛhwee la ati ɛnee ɔhyia kɛ yɛpɛ ngyehyɛleɛ bie anu. Noko saa yɛbɔ ɛwɔkɛ anzɛɛ yɛ nee awie yɛ ngyehyɛleɛ bie a, ɔwɔ kɛ yɛyɛ mɔɔ yɛbahola ye yɛ la kɔsɔɔti yɛfa yɛdi nwolɛ gyima.—3/15, mukelɛ 32.

Kɛ ɔkɛyɛ na yɛahoati nlanwonvoninli ɛnleanlɛ ɛ?

Ndenle nsa mɔɔ bahola aboa la ɛne: (1) Saa ɛ nye bɔ nvoninli mɔɔ maa ɛnyia nla nwo atiakunluwɔzo la azo a, ye ɛ nye fi ɛkɛ ndɛndɛ. (2) Bɔ wɔ adwenle ne anwo bane ɔlua ninyɛne mɔɔ anwo te mɔɔ ɛbadwenledwenle nwolɛ dahuu na wɔayɛ asɔne la azo. (3) Nea boɛ wɔ sini anzɛɛ Intanɛte gyimalilɛleka mɔɔ nlanwonvoninli wɔ zo la anwo.—4/1, mukelɛ 10-12.

Saa Keleseɛnenli bie gyakyi ye abusua ne ɛkɛ kɔ maanle gyɛne zo kɛ ɔkakpondɛ ezukoa a, ngyegyelɛ boni a ɔfa ɔba a?

Saa awovolɛ nee ngakula ɛnde kɛ abusua a, ɔmaa ngakula yia nganeɛdelɛ nu nee ɛbɛla kpalɛ ɛbɔlɛ nwo ngyegyelɛ. Bie a bɛ nye ɛnrɛlie bɛ awovolɛ ne mɔ anwo. Agyalɛma mɔɔ tu adenle gyakyi bɛ bokavolɛ la noko yia ɛbɛlatane ɛbɔlɛ nwo sɔnea.—4/15, mukelɛ 19-20.

Kɛmɔti a ɛnee bɛbubu ɛtanevolɛma mɔɔ bɛkɛhenda bɛ baka zo la agyakɛ ɛ?

Ɛnee Wulomuma kenda ɛtanevolɛma bie mɔ baka zo ku bɛ. Dwuuma zɛlɛle kɛ bɛbubu ɛtanevolɛma nwiɔ ne mɔɔ bɛhendale bɛ nee Gyisɛse wɔ baka ne azo la agyakɛ. Ɛhye maa bɛ ɛbolɛ kpu na bɛwu ndɛndɛ. Yemɔti, ɔmmaa bɛngenda baka ne azo dedee aleɛ ɛngye. (Mɛla 21:22, 23)—5/1, mukelɛ 11.

Kpuyia nna boni a ɔwɔ kɛ tɛnla yɛ adwenle nu wɔ mekɛ mɔɔ yɛwɔ daselɛlilɛ nu la ɛ?

Nwane mɔ a mekɔ bɛ ɛkɛ a? Nienwu a mekɔto bɛ a? Mekɛ boni a le mekɛ kpalɛ mɔɔ ɔwɔ kɛ mekɔ bɛ ɛkɛ a? Kɛzi ɔwɔ kɛ mebikye bɛ ɛ?—5/15, mukelɛ 12-15.

Kɛzi sigalɛte ɛnlonlɛ ɛboda menli ɛ?

Ɔhunle menli 100,000,000 wɔ ɛvoyia mɔɔ ɛze ɛhɔ la anu. Kɛkala, ɔku menli kɛyɛ 6,000,000 ɛvolɛ biala.—6/1, mukelɛ 3.