Wulu kɔ nuhua edwɛkɛ ne azo

Wulu kɔ nuninyɛne ne azo

 EDWƐKƐ TITILE | KƐZI NYAMENLE BU SIGALƐTENLONLƐ LA

Ewiade Amuala Ewulenzane

Ewiade Amuala Ewulenzane

Sigalɛtenlonlɛ ɛngyakyi menli ɛhunlɛ.

  • Ɔhunle menli 100,000,000 wɔ ɛvoyia mɔɔ ɛze ɛhɔ la anu.

  • Ɛvolɛ biala ɔku menli kɛyɛ 6,000,000.

  • Saa bɛkyehyɛ nu a, kɛkɛ nsia biala ɔku sonla ko.

Yɛɛ debie biala ɛngile kɛ ɔbagyakyi.

Menli mɔɔ bu nwolɛ mgbonda la kile kɛ mɔɔ ɛlɛkɔ zo la angyakyi a, ɔkadwu 2030 la, menli mɔɔ sigalɛtenlonlɛ bahu bɛ la bɛadwu 8,000,000. Na bɛkile kɛ ɔkadwu ɛvoya 21 ne awieleɛ la sigalɛtenlonlɛ bahu menli 1,000,000,000.

Tɛ menli mɔɔ no la angomekye a sigalɛte ku bɛ a. Menli mɔɔ nwu nwolɛ amaneɛ la bie mɔ a le abusua ne anu amra mɔɔ bɛgyakyi bɛ wɔ ɔ nzi, mɔɔ di nyane kɛ bɛ awie ɛwu na bɛ nwo kyele bɛ wɔ ezukoa nwo, yɛɛ menli 600,000 ne mɔɔ esike mɔɔ kɔ bɛ nu maa bɛwu ɛvolɛ biala la. Adesoa ne bie ka awie biala ɔluakɛ bɛtua kpɔkɛdelɛ nwo kakɛ kpole.

Ewulenzane ɛhye ɛnle mɔɔ maa dɔketama nriandi kpondɛ nwolɛ ayile la, bɛkola bɛyɛ ewule ɛhye ayile; bɛze ye sɔbelɛ ne kpalɛ. Dkt. Margaret Chan, mɔɔ nea Ewiade Amuala Kpɔkɛdelɛ Fane ne azo la hanle kɛ: “Sigalɛte ewulenzane ne vi sonla, na arane nee maanlema mɔdenlebɔlɛ bamaa yɛahola yɛapɛ zolɛ.”

Bɛlɛbɔ mɔdenle mɔɔ tɛla biala wɔ maanle ngakyile nu bɛaho bɛatia kpɔkɛdelɛ nwo ngyegyelɛ ɛhye. Ɔkadwu August 2012 la, ɛnee maanle kɛyɛ 175 ɛlie ɛdo nu kɛ bɛnea bɛamaa sigalɛtenlonlɛ aha aze. * Noko akee, menli mɔɔ lɛ nwolɛ tumi la ɛlɛmaa ewule ne ahɔ zo. Ɛvolɛ biala, menli mɔɔ yɛ sigalɛte la sɛkye dɔla mgbe mgbe fa bɔ nwolɛ nolo kɛ bɛbanyia menli fofolɛ mɔɔ badɔ bie la, titile mraalɛ nee ngakula mɔɔ bɛwɔ ehyia maanle nu la. Kɛmɔ sigalɛtenlonlɛ ka bɛ nwo la ati, menli mgbe mgbe ko ne mɔɔ no bie dɛba la anu dɔɔnwo bawu. Saa menli mɔɔ no bie kɛkala la angyakyi a, ɛvolɛ abulanla mɔɔ ɛlɛba la anu menli dɔɔnwo bawu.

Nwolɛ nolobɔlɛ nee kɛzi ɔka menli ɛkɛ ne la ɛmaa menli dɔɔnwo ɛva bɛ nwo ɛwula debie mɔɔ bɛ kunlu a anrɛɛ bɛgyakyi la anu. Ɛhye bie a dole Naoko a. Ɔbɔle sigalɛtenlonlɛ bo wɔ ye mbɛlɛra nu. Kɛzi ɛnee bɛka nwolɛ edwɛkɛ wɔ adwelie ninyɛne nu la manle ɔdele nganeɛ kɛ ɔ nye ɛbuke. Ɔnwunle kɛ ɛvovoa kansa hunle ye awovolɛ ɛdeɛ, noko ɔhɔle zo ɔnlonle sigalɛte ne, wɔ mekɛ mɔɔ ɔlɛtete ɔ mra mraalɛ nwiɔ ne la. Ɔhanle kɛ: “Ɛnee medwenle nwo kɛ mebanyia ɛvovoa kansa yɛɛ ɛnee me mra ne mɔ kpɔkɛdelɛ gyegye me, noko ɛnee mengola ye gyakyi. Ɛnee medwenle kɛ menrɛhola ye gyakyi ɛlɛ.”

Noko, Naoko gyakyile. Ɔnwunle debie mɔɔ boale ye manle ɔholale ɔgyakyile sigalɛtenlonlɛ ne la wɔ ɛleka ko ne ala mɔɔ ɛboa menli mgbe dɔɔnwo ɛmaa bɛgyakyi sigalɛtenlonlɛ la. Ɛleka boni ɔ? Yɛsɛlɛ wɔ toa zo kenga.

^ ɛden. 11 Ninyɛne mɔɔ bɛyɛ la bie a le kɛ bɛbamaa menli anwu esiane mɔɔ wɔ sigalɛtenlonlɛ nu la, sigalɛte mɔɔ bɛyɛ a bɛmmaa bɛnnyia adenle bɛndɔne ye, sigalɛte nwo adwule kpole mɔɔ bɛdie, yɛɛ menli mɔɔ bɛboa bɛ bɛmaa bɛgyakyi ye ɛnlonlɛ la.