Mɔɔ Tɔ Zo Nwiɔ Kɔmaa Kɔlentema 1:1-24

  • Ahyebizalɛ (1, 2)

  • Nyamenle kyekye yɛ rɛle wɔ sɔnea kɔsɔɔti anu (3-11)

  • Pɔɔlo kakyi ye adendulɛ nwo ngyehyɛleɛ (12-24)

1  Medame Pɔɔlo, mɔɔ ɔlua Nyamenle ɛhulolɛ zo meyɛ Kelaese Gyisɛse ɛzoanvolɛ, nee yɛ diema Timote+ a ɛlɛkɛlɛ ahɔmaa Nyamenle asafo ne mɔɔ wɔ Kɔlente nee nwuanzanwuanzama kɔsɔɔti mɔɔ wɔ Akaya+ ɛleka biala la a:  Yɛ Ze Nyamenle nee yɛ Awulae Gyisɛse Kelaese ɛlo bɛ kpole na bɛmaa bɛ anzodwolɛ.  Ayɛlɛyelɛ ɛha yɛ Awulae Gyisɛse Kelaese ɔ Ze nee ye Nyamenle ne,+ anwunvɔnezelɛ Selɛ+ nee arɛlekyekyelɛ muala Nyamenle ne,+  mɔɔ kyekye yɛ rɛle* wɔ yɛ sɔnea* kɔsɔɔti anu+ amaa yɛahola yɛava arɛlekyekyelɛ mɔɔ yɛnyia yɛfi Nyamenle ɛkɛ la+ yɛakyekye bɛdabɛ mɔɔ bɛwɔ sɔnea* biala anu la arɛle la.+  Na kɛ mɔɔ Kelaese ati yɛnwu amaneɛ dɔɔnwo la,+ zɔhane ala a Kelaese ati yɛnyia arɛlekyekyelɛ dɔɔnwo a.  Saa yɛyia sɔnea* a, ɛnee bɛ arɛlekyekyelɛ nee bɛ ngoanelielɛ ti ɔ; yɛɛ saa bɛkyekye yɛ rɛle a, ɔle arɛlekyekyelɛ mɔɔ boa bɛ ɔmaa bɛkola bɛgyinla amaneɛnwunlɛ ko ne ala mɔɔ yɛgyi bie anwo la anloa.  Na bɛ nwo anyelazo mɔɔ yɛlɛ la gyi kpundii, yɛze kɛ kɛ mɔɔ bɛnwu amaneɛ ne bie la, zɔhane ala a bɛbanyia arɛlekyekyelɛ ne noko bie a.+  Mediema, yɛkulo kɛ bɛnwu kɛ yɛnwunle amaneɛ dɔɔnwo wɔ Ehyea maanzinli ne anu.+ Yɛ nwo hyelele yɛ kpole maanle ɔbole yɛ nwo zo mɔɔ ɔhale yɛ nee ewule a.+  Nɔhalɛ nu, yɛdele nganeɛ kɛ bɛbua yɛ ewule fɔlɛ. Ɛhye zile amaa yɛanva yɛ nwo yɛando yɛdayɛ yɛ nwo zo, emomu yɛava yɛ nwo yɛado Nyamenle ne mɔɔ dwazo mowuamra la anwo zo.+ 10  Ɔliele yɛ ɔvile ewule ɛzulolɛ zɛhae anu na ɔbalie yɛ, na yɛ nye la ɔ nwo zo kɛ ɔbahɔ zo yɛalie yɛ.+ 11  Mɔɔ bɛdabɛ noko bɛbahola bɛayɛ bɛaboa yɛ la a le kɛ bɛbayɛ modolɛ nzɛlɛlɛ bɛamaa yɛ,+ amaa menli dɔɔnwo ayɛ Nyamenle mo amaa yɛ wɔ mɔɔ menli dɔɔnwo asɔneyɛlɛ+ ti bɛva bɛlo yɛ la anwo. 12  Ɛhye a le debie mɔɔ yɛfa yɛtu yɛ nwo a, yɛ adwenle* ne di yɛ daselɛ kɛ yɛvale nwuanzanwuanzayɛlɛ nee nɔhalɛlilɛ yɛɛ Nyamenle ɛlolɛ kpole ne a yɛbɔle yɛ ɛbɛla wɔ ewiade ne anu, bɔbɔ wɔ bɛ avinli a, na tɛ ewiade nrɛlɛbɛ ɔ.+ 13  Ɔti yɛlɛkɛlɛ bɛ edwɛkɛ mɔɔ bɛbahola ye kenga* na bɛade ɔ bo la, na me nye la kɛ bɛbahɔ zo bɛade ninyɛne ɛhye mɔ abo kpalɛ,* 14  kɛ mɔɔ bɛ nuhua bie mɔ ɛde ɔ bo kɛ bɛkola bɛfa yɛ bɛtu bɛ nwo la, zɔhane ala a yɛdayɛ noko yɛbava bɛ yɛadu yɛ nwo wɔ yɛ Awulae Gyisɛse kenle ne anu a. 15  Kɛmɔ ɛnee melɛ anwodozo ɛhye la ati, menyɛle kɛ medimoa meara bɛ nwo lɔ, amaa bɛanyia debie mɔɔ tɔ zo nwiɔ mɔɔ bamaa bɛ nye alie a;* 16  ɔluakɛ menyɛle me adwenle kɛ saa mese meahɔ Masidonea a, mebarakpɔla bɛ, na mevi Masidonea melɛse noko a mebara bɛ nwo ɛkɛ amaa bɛaboa me* bɛamaa meahɔ Dwudiya.+ 17  Na mɔɔ menyianle adwenle ɛhye la, menvale edwɛkɛ ne menlile nwɔhoa ɔ? Anzɛɛ meyɛ ninyɛne nwo ngyehyɛleɛ wɔ nwonane nu, amaa meaha “Ɛhɛe, ɛhɛe” na akee meaha kɛ “Kyɛkyɛ, kyɛkyɛ” ɔ? 18  Noko kɛ mɔɔ yɛkola yɛfa yɛ nwo yɛto Nyamenle anwo zo la, edwɛkɛ mɔɔ yɛka yɛkile bɛ la ɛnle “ɛhɛe” yɛɛ akee “kyɛkyɛ.” 19  Ɔluakɛ Nyamenle Ara Gyisɛse Kelaese mɔɔ me nee Seleveenɛse* yɛɛ Timote+ hanle ɔ nwo edwɛkɛ hilele bɛ la, anyɛ “ɛhɛe” yɛɛ akee “kyɛkyɛ,” emomu “ɛhɛe” ɛyɛ “ɛhɛe” wɔ ye afoa nu. 20  Na Nyamenle ɛwɔkɛ ne mɔ amuala ɛlua ɔ nwo zo ɛyɛ “ɛhɛe.”+ Yemɔti, eza yɛdua ɔ nwo zo yɛka “Amen” yɛkile Nyamenle+ yɛfa yɛwula ye anyunlunyia. 21  Noko Nyamenle a si ye pi kɛ yɛ nee bɛdabɛ yɛle Kelaese ɛdeɛ a, na ɔdaye a yekpokpa yɛ a.+ 22  Eza yezɔ yɛ nloa+ na yeva sunsum ne+ yewula yɛ ahonle nu yeva yeyɛ mɔɔ bara la anwo sɛkɛlɛneɛ.* 23  Akee Nyamenle di me* daselɛ kɛ kɛmɔ mengulo kɛ bɛ rɛle bɔ somaa la ati a metɛbale Kɔlente a. 24  Tɛ kɛ asɛɛ yɛlɛ bɛ diedi ne azo tumi ɔ,+ emomu yɛle bɛ gɔnwo mɔ gyimayɛvoma mɔɔ maa bɛ nye die a, ɔluakɛ bɛ diedi ne ati a bɛgyi kpundii a.

Ɔbodwɛkɛ

Anzɛɛ “mɔɔ maa yɛ anwosesebɛ.”
Anzɛɛ “amaneɛnwunlɛ.”
Anzɛɛ “amaneɛnwunlɛ.”
Anzɛɛ “amaneɛnwunlɛ.”
Anzɛɛ “yɛ tiboa.”
Anzɛɛ ɔkola ɔkile, “bɛze ye kpalɛ.”
Giliki aneɛ nu, “bɛahɔdwu awieleɛ.”
Anzɛɛ ɔkola ɔkile, “amaa yeaboa bɛ fane nwiɔ.”
Anzɛɛ “bɛagua me adenle.”
Eza bɛfɛlɛ ye Saelase.
Anzɛɛ “yeva yedo ɔ bo (ezukoa); yeva yezi mɔɔ bara la azo (yeva yeli agyinlanu).”
Anzɛɛ “me ɛkɛla.”