Wulu kɔ nuhua edwɛkɛ ne azo

Wulu kɔ nuninyɛne ne azo

“Kulo Ɛ Gɔnwo Kɛ Ɛdawɔ Ɛ Nwo”

“Kulo Ɛ Gɔnwo Kɛ Ɛdawɔ Ɛ Nwo”

“[Mɛla ne] mɔɔ tɔ zo nwiɔ la le kɛ ɛhendeɛ ne la, ɔse: Kulo ɛ gɔnwo kɛ ɛdawɔ ɛ nwo.”MAT. 22:39.

1, 2. (a) Gyisɛse hanle kɛ mɛla titile mɔɔ tɔ zo nwiɔ wɔ Mosisi Mɛla ne anu la a le boni? (b) Edwɛkɛmiza boni mɔ a yɛbazuzu nwo a?

FALASINLI bie sɔ Gyisɛse anlea la, ɔbizale ye kɛ: “Kilehilevolɛ, Mɛla ne boni a le titile kpalɛ kpalɛ a?” Kɛmɔ yɛnwunle ye wɔ edwɛkɛ ne mɔɔ lumua anu la, Gyisɛse buale ye kɛ, “mɛla titile kpalɛ mɔɔ hyia” la a le: “Fa wɔ ahonle muala, wɔ ɛkɛla muala, nee wɔ adwenle muala kulo Awulae wɔ Nyamenle ne.” Gyisɛse doale zo kɛ: “Mɔɔ tɔ zo nwiɔ la le kɛ ɛhendeɛ ne la, ɔse: Kulo ɛ gɔnwo kɛ ɛdawɔ ɛ nwo.”Mat. 22:34-39.

2 Gyisɛse hanle kɛ yɛhulo yɛ gɔnwo kɛmɔ yɛkulo yɛ nwo la. Ɛhye ati, ɔhyia kɛ yɛbiza yɛ nwo kɛ: Yɛ gɔnwo a le nwane? Kɛzi yɛda ɛhulolɛ ali yɛkile yɛ gɔnwo ɛ?

YƐ GƆNWO A LE NWANE?

3, 4. (a) Ɛrɛlɛ boni a Gyisɛse vale yele edwɛkɛmiza: “Me gɔnwo a le nwane” anloa a? (b) Kɛzi Samɛleanli ne boale nrenya ne mɔɔ bɛwuale ye, bɛbole ye, na ɛnee ɔwɔ ngoane nee ewule avinli la ɛ? (Nea mɔlebɛbo nvoninli ne.)

3 Bie a yɛbazuzu kɛ awie mɔɔ de bikye yɛ mɔɔ ɔbaboa yɛ la yemɔ yɛɛ ɔle yɛ gɔnwo a. (Mrɛ. 27:10) Noko bɛmaa yɛzuzu mɔɔ Gyisɛse hanle wɔ mekɛ mɔɔ nrenya bie mɔɔ bu ɔ nwo  tenlenenli bizale ye kɛ: “Me gɔnwo a le nwane?” la anwo. Mekɛ mɔɔ Gyisɛse bua ye la, ɔbule ɛrɛlɛ ne mɔɔ fane Samɛleanli agɔnwolɛ kpalɛ ne anwo la. (Bɛgenga Luku 10:29-37.) Yɛ nye la kɛ Yizilayɛnli ɛsɔfo nee Livaenli bala bɛ nwo ali kɛ agɔnwolɛ kpalɛma wɔ mekɛ mɔɔ bɛnwunle nrenya ne mɔɔ bɛwua ye, bɛbo ye, na ɔwɔ ngoane nee ewule avinli la. Noko, bɛbule ahane bɛhɔle, bɛanyɛ ɛhwee bɛammaa ye. Samɛleanli bie—awie mɔɔ vi maanle mɔɔ bɛdi Mosisi Mɛla ne azo anu noko Dwuuma ɛmbu bɛ bie la boale nrenya ne.Dwɔn 4:9.

4 Samɛleanli agɔnwolɛ kpalɛ ne vale nwole nee nwanye guale nrenya ne nganlɛ ne anu kɛ ɔyɛ ye ayile. Dwɛtɛ fufule nwiɔ anzɛɛ etaku mɔtwɛ ne mɔɔ ɔvale ɔgyakyile nyɛvolɛ sua menle ne la le kenle nwiɔ gyima nwo ahatualɛ. (Mat. 20:2) Yemɔti, ɔnyɛ se kɛ ɛbanwu ahenle mɔɔ ɛnee ɔle nrenya ne mɔɔ bɛbodale ye la agɔnwo la. Gyisɛse ɛrɛlɛ ne maa yɛnwu kɛ ɔwɔ kɛ yɛda anwunvɔnezelɛ nee ɛlɔlɛ ali yɛkile yɛ gɔnwo.

Gyihova azonvolɛ da mediema ɛlɔlɛ ali ndɛdnɛ (Nea ɛdendɛkpunli 5)

5. Kɛzi Gyihova azonvolɛ lale ɛlɔlɛ mɔɔ bɛlɛ bɛmaa bɛ gɔnwo mɔ la ali wɔ esiane bie mɔɔ zile kenlensa ye la anu ɛ?

5 Ɔyɛ se kɛ yɛbanyia menli mɔɔ se anwunvɔne kɛ Samɛleanli agɔnwolɛ kpalɛ ne la. Edwɛkɛ ɛhye le nɔhalɛ titile wɔ “awieleɛ mekɛ” ɛhye mɔɔ menli dɔɔnwo ɛnlɛ ɛlɔlɛ, bɛ ti yɛ se, na bɛkyi kpalɛyɛlɛ la anu. (2 Tem. 3:1-3) Kɛ neazo la, saa esiane si a, ɔbahola yeava ngyegyelɛ yeara. Bɛmaa yɛzuzu mɔɔ zile New York City wɔ October 2012 awieleɛ wɔ mekɛ mɔɔ Hurricane Sandy ne zile la anwo. Nwule hɔle sua ne ɛleka bie mɔɔ ninyɛne dɔɔnwo zɛkyele wɔ ɛkɛ mɔɔ ɛnee bɛnlɛ kɛnlaneɛ na wuluwulu nee ninyɛne dɔɔnwo ɛlɛgyegye bɛ la anwo zo. Noko wɔ ɛleka ko ne ala, Gyihova Alasevolɛ yɛle ngyehyɛleɛ boale bɛ nwo ngoko nee awie mɔ. Keleseɛnema yɛ ninyɛne ɛhye mɔ ɔluakɛ bɛkulo bɛ gɔnwo. Ndenle fofolɛ mɔɔ bɛdua zo bɛda agɔnwolɛ ɛlɔlɛ ali la bie mɔ a le boni?

KƐZI YƐDA ƐHULOLƐ ALI YƐKILE YƐ GƆNWO MƆ LA

6. Kɛzi yɛ edwɛkɛhanlɛ gyima ne kola maa yɛyɛ agɔnwolɛ kpalɛ ɛ?

6 Yɛfa sunsum nu moalɛ yɛmaa. Yɛyɛ ɛhye ɔlua “Nyamenle Edwɛkɛ ne” mɔɔ kyekye yɛ rɛle mɔɔ yɛtwe menli adwenle yɛkɔ zo la azo. (Wulo. 15:4) Nɔhalɛ, yɛdua Baebolo ne anu nɔhalɛ ne mɔɔ yɛbɔ ye nolo la azo yɛda yɛ nwo ali kɛ yɛle agɔnwolɛ kpalɛ. (Mat. 24:14) Nea nwolɛ adenle kpole mɔɔ yɛnyia kɛ yɛlɛbɔ Belemgbunlililɛ edwɛkɛ ne mɔɔ vi ‘Nyamenle mɔɔ maa anyelazo’ ɛkɛ la nolo a!Wulo. 15:13.

7. Mɛla Kpalɛ ne a le boni, na saa yɛdi zo a nyilalɛ boni a yɛnyia a?

7 Di Mɛla Kpalɛ ne azo. Gyisɛse hilele mɛla ɛhye anu wɔ edwɛkɛ mɔɔ ɔhanle ye wɔ ye Boka Zo Ɛdendɛlɛ ne anu la anu: “Mɔɔ bɛkpondɛ kɛ menli yɛ maa bɛ la, bɛdabɛ noko bɛyɛ zɔhane ala bɛmaa bɛ. Mosisi mɛla ne nee Nyamenle kpɔmanvolɛma ngilehilelɛ ne kɛ kɔ ye la ɛne.” (Mat. 7:12) Saa yɛ nee menli di ye kɛmɔ Gyisɛse hanle la a, ɛnee yɛlɛdi “Mosisi mɛla ne” (Mɔlebɛbo kɔdwu Mɛla ne) nee “Nyamenle kpɔmanvolɛma ngilehilelɛ” (Hibulu Ngɛlɛlera ne anu ngapezoma mbuluku) ne azo. Mbuluku ɛhye mɔ maa yɛnwu ye wienyi kɛ Nyamenle yila bɛdabɛ mɔɔ bɛkulo bɛ gɔnwo mɔ la. Kɛ neazo la, Gyihova luale Ayezaya anwo zo hanle kɛ: “Bɛli pɛlepɛle na bɛbɔ tenlene ɛbɛla . . . Nyilalɛ ɛha sonla ne mɔɔ yɛ ɛhye la.” (Aye. 56:1, 2) Gyihova ɛyila yɛ ɔluakɛ yɛ nee yɛ gɔnwo mɔ di ye wɔ ɛlɔlɛ nee tenlene adenle zo.

8. Kɛmɔti a ɔwɔ kɛ yɛkulo yɛ agbɔvolɛma ɛ, na saa yɛyɛ zɔ a duzu a kola fi nu ba a?

8 Kulo wɔ kpɔvolɛma. Gyisɛse zele bɛ kɛ, “Bɛde kɛ bɛhanle kɛ, ‘Kulo ɛ gɔnwo mɔ na kpɔ wɔ kpɔvolɛma.’ Noko mame,  mese: Bɛhulo bɛ kpɔvolɛma na bɛzɛlɛ bɛmaa bɛdabɛ mɔɔ bɛyɛ bɛ kpɔdekpɔde la, amaa bɛayɛ bɛ Ze mɔɔ wɔ anwuma la amra.” (Mat. 5:43-45) Ɛzoanvolɛ Pɔɔlo lale adwenle ko ne ala ali ɔhanle kɛ: “Saa ɛhɔne ɛlɛku wɔ kpɔvolɛ a, maa ye aleɛ ɔli; saa nzuhɔne ɛlɛku ye a, maa ye nzule ɔnlo.” (Wulo. 12:20; Mrɛ. 25:21) Ɛnee ɔwɔ Mosisi Mɛla ne anu kɛ saa awie kpɔvolɛ bie ayɛmoa ka adesoa bo a, ɔwɔ kɛ ɔboa ye ɔmaa ɔye ye. (Ade. 23:5) Ɛnee ɛhye ɛyɛlɛ bamaa menli mɔɔ ɛnga la abɔ nu. Ɔlua ɛlɔlɛ mɔɔ Keleseɛnema da ye ali la ati, yɛ agbɔvolɛ dɔɔnwo ɛhakyi adwenle mɔɔ  bɛlɛ ye yɛ nwo la. Saa yɛkulo yɛ agbɔvolɛ—bɔbɔ bɛdabɛ mɔɔ bɛyɛ yɛ kpɔdekpɔde la—na bɛ nuhua bie mɔ ba nɔhalɛ ne anu a, nea kɛzi yɛ nye balie a!

9. Duzu a Gyisɛse hanle ye wɔ anzondwolɛ ɛkpondɛlɛ nwo a?

9 “Bɛbɔ mɔdenle kɛ bɛ nee menli kɔsɔɔti kɛdɛnla anzonudwolɛ nu.” (Hib. 12:14) Yɛ mediema diedima noko boka menli ɛhye mɔ anwo, ɔluakɛ Gyisɛse hanle kɛ: “Saa ɛkɔ kɛ ɛkabɔ azu na ɛkakye ye wɔ azu ɛkponle ne anyunlu ɛkɛ ne kɛ ɛ nee ɛ diema bie lɛ edwɛkɛ a, gyakyi wɔ azubɔdeɛ ne wɔ azukponle ne anyunlu ɛkɛ ne; dumua kɔ ɛ nee ɛ diema ne bɛbɔ bɛ avinli, na akee sia babɔ wɔ azu ne maa Nyamenle.” (Mat. 5:23, 24) Saa yɛkulo yɛ mediema na yɛdumua yɛyɛ debie mɔɔ kile kɛ yɛkpondɛ anzondwolɛ a, Nyamenle bayila yɛ.

10. Duzu ati a ɔnle kɛ yɛtendɛ yɛtia awie mɔ wɔ mekɛ mɔɔ bɛkɛvo la ɛ?

10 Mmakpondɛ awie mɔ anwo nvonleɛ. Gyisɛse hanle kɛ: “Bɛmmabua awie mɔ ndɛne na Nyamenle ambua bɛ ndɛne, ɔboalekɛ ndɛne mɔɔ bɛkɛva bɛkɛbua awie mɔ la yɛɛ Nyamenle bava abua bɛdabɛ noko a, yɛɛ mɔɔ bɛkɛzuzu bɛkɛmaa awie la yɛɛ bɛbanyia ye a. Duzu ati a ɛnwu mumunli mɔɔ la ɛ diema anye zo, na ɛndwenle dubinli ne mɔɔ la ɛ nye zo la anwo ɛ? Anzɛɛ duzu ati yɛɛ ɛse ɛ diema kɛ, ‘Mebodo wɔ, maa menye ɛ nye zo mumunli ne’, wɔ mekɛ mɔɔ dubinli la ɛdawɔ mumua ne ɛ nye zo la ɛ? Wɔmɔ nabalabanli! Dumua ye dubinli ne mɔɔ la ɛ nye zo la na wɔanwu debie kpalɛ, na wɔahola wɔaye mumunli ne mɔɔ la ɛ diema ne anye zo la.” (Mat. 7:1-5) Ezukoalɛdeɛ mɔɔ wɔ edwɛkɛ ɛhye anu la a le kɛ saa awie mɔ  fo a ɔnle kɛ yɛtendɛ yɛtia bɛ ɔluakɛ yɛdayɛ noko yɛfo.

ADENLE TITILE MƆƆ YƐDUA ZO YƐDA AGƆNWOLƐ ƐHULOLƐ ALI LA

11, 12. Adenle titile mɔɔ yɛdua zo yɛkile kɛ yɛkulo yɛ gɔnwo mɔ la a le boni?

11 Yɛkulo kɛ yɛkile yɛ gɔnwo mɔ anwo ɛlɔlɛ wɔ adenle titile bie azo. Yɛka Belemgbunlililɛ ne anwo edwɛkpa ne yɛkile menli kɛmɔ Gyisɛse yɛle la. (Luku 8:1) Gyisɛse manle ye ɛdoavolɛma gyima kɛ “bɛmaa menli ɛrayɛ [ye] ɛdoavolɛma.” (Mat. 28:19, 20) Yɛbɔ mɔdenle yɛboa yɛ gɔnwo yɛmaa ɔfi adenle kpolomgbolo ne mɔɔ kɔ ɛzɛkyelɛ nu la azo na ɔdua anuhɔlɛ ɛdenraa ne mɔɔ kɔ ngoane nu la azo yɛfa yɛdi mɛla ɛhye azo. (Mat. 7:13, 14) Kpolerazulɛ biala ɛnle nwolɛ kɛ Gyihova yila mɔdenlebɔlɛ zɛhae azo.

12 Yɛboa menli yɛmaa bɛnwu bɛ sunsum nu ngyianlɛ kɛmɔ Gyisɛse yɛle la. (Mat. 5:3) Yɛbɔ mɔdenle yɛka ‘Nyamenle Edwɛkpa ne’ yɛkile bɛdabɛ mɔɔ bɛnwu bɛ sunsum nu ngyianlɛ la. (Wulo. 1:1) Menli mɔɔ tie Belemgbunlililɛ edwɛkpa ne la dua Gyisɛse Kelaese anwo zo nee Nyamenle nyia agɔnwolɛvalɛ. (2 Kɔl. 5:18, 19) Yɛdua edwɛkpa ne mɔɔ yɛbɔ ye nolo la azo yɛkile kɛ yɛkulo yɛ gɔnwo mɔ wɔ adenle mɔɔ anwo hyia kpalɛ la azo.

13. Kɛzi ɛte nganeɛ wɔ nwolɛ adenle mɔɔ wɔnyia ye kɛ Belemgbunlililɛ ne nolobɔlɛnli la ɛ?

13 Saa yɛyɛ siakɔkpɔla nee sua nu Baebolo ɛzukoalɛ mɔɔ fɛta na yɛboa menli yɛmaa bɛbɔ ɛbɛla mɔɔ ɔ nee Nyamenle tenlene ngyinlazo ne mɔ yia la a, yɛ nye die. Ɛhye maa yɛnwu nzenzaleɛ wɔ Baebolo sukoavo ne ɛbɛlabɔlɛ nu. (1 Kɔl. 6:9-11) Saa yɛnwu kɛ Nyamenle ɛboa ‘nuhua ne mɔɔ ɔwɔ kɛ bɛmaa bɛ ngoane mɔɔ ɛnlɛ awieleɛ,’ yemaa bɛyɛ nzenzaleɛ mɔɔ fɛta na bɛrayɛ ɔ gɔnwo mɔ a, ɔmaa yɛ nye die kpalɛ. (Gyi. 13:48) Bɛ nuhua dɔɔnwo fa anyelielɛ sie bɛsanudolɛ bo zo, na bɛfa yɛ anwuma Selɛ ne anu anwodozo bɛsie adwenleadwenle bo zo. Nea kɛ ɔsi ɔle kɛnlɛma kɛ yɛbanwu anyuhɔlɛ mɔɔ fofolɛma ɛhye mɔ ɛlɛnyia la ɛ! Asoo ɛnlie ɛndo nu kɛ ɔle nyilalɛ kɛ yɛbala ɛlɔlɛ ali yɛahile yɛ gɔnwo mɔ wɔ adenle titile ɛhye azo kɛ Belemgbunlililɛ ne nolobɔlɛma ɔ?

KƐZI BAEBOLO NE KILE ƐLƆLƐ NU LA

14. Kɛmɔ 1 Kɔlentema 13:4-8 ka la, kɛzi ɛbava wɔ edwɛkɛ wɔahilehile ɛlɔlɛ nu ɛ?

14 Saa yɛfa mɔɔ Pɔɔlo hɛlɛle ye wɔ ɛlɔlɛ nwo la yɛdi gyima dahuu a, ɔbade ngyegyelɛ dɔɔnwo azo, ɔbamaa yɛ nye alie, na Nyamenle ayila yɛ. (Bɛgenga 1 Kɔlentema 13:4-8.) Bɛmaa yɛzuzu mɔɔ Pɔɔlo hanle vanenle ɛlɔlɛ nwo nee kɛzi ɔwɔ kɛ yɛfa yɛdi gyima la anwo sikalɛ.

15. (a) Duzu ati a ɔwɔ kɛ yɛnyia abotane na yɛyɛ atiakunlukɛnlɛma ɛ? (b) Duzu ati a ɔnle kɛ yɛyɛ anyebolo nee anwomemaazo ɛ?

15 “Ɛhulolɛ lɛ abotane, ɔ ti akunlu le kɛnlɛma.” Kɛmɔ yɛnli munli noko Nyamenle nee yɛ di ye wɔ abotane nee atiakunlukɛnlɛma nu la, zɔhane ala a ɔwɔ kɛ yɛdayɛ noko yɛyɛ yɛmaa yɛ mediema mɔɔ bɛkɛvo yɛ, bɛkɛha edwɛkɛ mɔɔ bɛandwenle nwo, anzɛɛ bɛambu yɛ la a. “Ɛhulolɛ ɛnle anyebolo,” yemɔti saa yɛlɛ nɔhalɛ ɛlɔlɛ a, yɛ nye ɛnrɛbolo yɛ mediema ninyɛne anzɛɛ nwolɛ adenle mɔɔ bɛnyia ye wɔ asafo ne anu la. Bieko, saa yɛlɛ ɛlɔlɛ a, yɛnrɛdu yɛ nwo anzɛɛ yɛnrɛmemaa yɛ nwo zo. Yeanyɛ boɛ fee la, “adubɛnwo nee mgbanyizonle ɛyɛlɛ le amumuyɛnli kɛnlaneɛ, yɛɛ bɛle ɛtane.”Mrɛ. 21:4.

16, 17. Kɛ ɔkɛyɛ na yɛali edwɛkɛ ne mɔɔ wɔ 1 Kɔlentema 15:5, 6 la azo ɛ?

16 Ɛlɔlɛ bamaa yɛala subane ngɛnlɛma ali yɛahile yɛ gɔnwo mɔ. Yɛnrɛbɔ adalɛ, yɛnrɛwua, anzɛɛ yɛnrɛyɛ debie biala mɔɔ tia Gyihova mɛla nee ye ngyinlazo la. Ɛlɔlɛ eza ɛnrɛmaa yɛnrɛdwenle yɛ ngomekye yɛ boɛyɛlɛ nwo, emomu, yɛbadwenle yɛ gɔnwo mɔ noko ɛdeɛ nwo.Fel. 2:4.

 17 Nɔhalɛ ɛlɔlɛ ɛmmaa sonla ɛnva ɛya ndɛndɛ yɛɛ “ɔmbu ɛtane nwo mgbonda,” kɛ asɛɛ debie biala mɔɔ menli yɛ tia yɛ la, yɛyɛ nwolɛ kɛlɛtokɛ la. (1 Tɛs. 5:15) Saa yɛfa menli nwo edwɛkɛ yɛsie yɛ nu a, yɛnrɛhola yɛnrɛzɔ Nyamenle anye, emomu, ɔbayɛ kɛ asɛɛ yɛlɛto senle mɔɔ kola yela yɛ nee awie mɔ la. (Sɛlɛ. 19:18) Ɛhulolɛ mɔɔ yɛlɛ la maa yɛdi fɛlɛko wɔ mɔɔ le nɔhalɛ la anwo, noko “ɛhulolɛ anye ɛnlie ninyɛndane nwo” bɔbɔ saa awie mɔɔ kpɔ yɛ la ɛlɛnwu amaneɛ a, yɛ nye ɛnlie nwo.Bɛgenga Mrɛlɛbulɛ 24:17, 18.

18. Duzu a yɛsukoa ye wɔ ɛlɔlɛ nwo wɔ 1 Kɔlentema 13:7, 8 ne anu a?

18 Akee suzu Pɔɔlo ɛlɔlɛ ngilenu ne ndoazo ne anwo nea. Ɔhanle kɛ ɛhulolɛ “ɛmkpo aze ɛlɛ.” Saa awie fo yɛ na ɔsɛlɛ fakyɛ a, ɛlɔlɛ ka yɛ maa yɛfa yɛkyɛ ye. Ɛlɔlɛ lɛ “diedi” wɔ debie biala mɔɔ wɔ Nyamenle Edwɛkɛ ne anu la anu, na ɔmaa yɛkile sunsum nu aleɛ mɔɔ yɛnyia ye dahuu la anwo anyezɔlɛ. Ɛlɔlɛ lɛ edwɛkɛ biala mɔɔ wɔ Baebolo ne anu la anwo “anyelazo” yɛɛ ɔmaa yɛka yɛ anyelazo ne yɛkile awie mɔ. (1 Pita 3:15) Akee saa yɛwɔ tɛnlabelɛ mɔɔ anu yɛ se la anu a, yɛyɛ asɔne na yɛnyia anyelazo kɛ ninyɛne bayɛ boɛ. Ɛhulolɛ “abotane bo ɛndu ɛlɛ” wɔ mekɛ mɔɔ awie mɔ a ɛvo yɛ, bɛlɛyɛ yɛ kpɔdekpɔde, anzɛɛ yɛwɔ sɔnea ngakyile nu bɔbɔ la. Eza noko “ɛhulolɛ ɛmbɔ aze ɛlɛ.” Alesama mɔɔ yɛ tieyɛ la bɛala subane ɛhye ali dahuu.

KƆ ZO KULO Ɛ GƆNWO KƐ ƐDAWƆ Ɛ NWO

19, 20. Baebolo nu folɛdulɛ boni a ɔwɔ kɛ ka yɛ maa yɛkɔ zo yɛkulo yɛ gɔnwo a?

19 Saa yɛfa Baebolo nu folɛdulɛ yɛyɛ gyima a, yɛbahulo yɛ gɔnwo mɔ dahuu. Ɛlɔlɛ ɛhye maa yɛkulo menli kɔsɔɔti, ɔnva nwo ɛleka mɔɔ bɛvi la. Eza ɔwɔ kɛ yɛkakye kɛ Gyisɛse zele yɛ kɛ: “Kulo ɛ gɔnwo kɛ ɛdawɔ ɛ nwo.” (Mat. 22:39) Nyamenle nee  Kelaese kulo kɛ yɛkulo yɛ gɔnwo mɔ. Saa yɛnnwu mɔɔ ɔwɔ kɛ yɛyɛ ye wɔ edwɛkɛ bie mɔɔ kɛra yɛ nee yɛ gɔnwo mɔ avinli la anwo a, bɛmaa yɛlua asɔneyɛlɛ zo yɛzɛlɛ Nyamenle sunsum nwuanzanwuanza ne adehilelɛ. Ɛhye mɔɔ yɛbayɛ la bamaa yɛanyia Gyihova nyilalɛ na yɛayɛ yɛ ninyɛne wɔ ɛlɔlɛ nu.Wulo. 8:26, 27.

20 Eza bɛfɛlɛ mɛla ne mɔɔ bɛva bɛmaa yɛ kɛ yɛhulo yɛ gɔnwo kɛ yɛ nwo la “Belemgbunlililɛ ne anwo mɛla.” (Gye. 2:8) Mɔɔ Pɔɔlo hanle Mosisi Mɛla ne bie mɔ anwo edwɛkɛ wiele la, ɔdoale zo kɛ: “Mɛla ne . . . mɔɔ ɛha la amuala, bɛbɔ ye kpɔkɛ ko kɛ, ‘Kulo ɛ gɔnwo kɛ ɛdawɔ ɛ nwo.’ Saa ɛlɛ ɛhulolɛ a, ɛnrɛyɛ ɛ gɔnwo ɛtane. Yemɔti ɛhulolɛ a sɔ Mosisi mɛla ne amuala anloa a.” (Wulo. 13:8-10) Ɛhye ati, ɔwɔ kɛ yɛkɔ zo yɛkulo yɛ gɔnwo mɔ mekɛ biala.

21, 22. Duzu ati a ɔwɔ kɛ yɛkulo Nyamenle nee yɛ gɔnwo mɔ ɛ?

21 Mekɛ mɔɔ yɛlɛdwenledwenle deɛmɔti ɔwɔ kɛ yɛkulo yɛ gɔnwo mɔ anwo la, ɔbayɛ kpalɛ kɛ yɛbahakye Gyisɛse edwɛkɛ ɛhye mɔɔ ɔhanle ye wɔ ɔ Ze anwo la: “Ɔmaa ye ezule tɔ na ye ewia fi maa ɛtanevolɛma nee kpalɛyɛlɛma amuala.” (Mat. 5:43-45) Saa yɛ gɔnwo mɔ le tenlenema anzɛɛ bɛnle tenlenema bɔbɔ a, ɔwɔ kɛ yɛkulo bɛ. Kɛmɔ yɛnwu ye la, adenle titile ko mɔɔ yɛdua zo yɛyɛ ɛhye la a le kɛ yɛbaha Belemgbunlililɛ edwɛkɛ ne yeahile bɛ. Saa bɛdie edwɛkpa ne bɛdi a nea nyilalɛ ngakyile mɔɔ bɛbanyia a!

22 Yɛlɛ ndelebɛbo kpalɛ dɔɔnwo mɔɔ ɔdaye ti ɔwɔ kɛ yɛkulo Gyihova a. Eza yɛlɛ ndenle dɔɔnwo mɔɔ yɛkola yɛdua zo yɛkulo yɛ gɔnwo mɔ a. Saa yɛkulo Nyamenle nee yɛ gɔnwo mɔ a, ɛnee yɛlɛda ye ali kɛ yɛbu edwɛkɛ ne mɔɔ Gyisɛse hanle la. Mɔɔ tɛla biala la, ɛnee yɛlɛyɛ mɔɔ sɔ yɛ anwuma Selɛ, Gyihova anye la.