Mateyu Edwɛkpa 2:1-23
2 Mɔɔ bɛwole Gyisɛse wɔ Bɛtelɛhɛm+ mɔɔ wɔ Dwudiya wɔ Belemgbunli Hɛlɔdo*+ mekɛ zo la, nea! nwɔlɔra neɛnleanuma* bie vi Aduduleɛ rale Gyɛlusalɛm,
2 rabizale kɛ: “Nienwu a Dwuuma belemgbunli ne mɔɔ bɛwo ye la wɔ a?+ Ɔluakɛ yɛnwunle ye ɛwɔlɔra ne wɔ Aduduleɛ lɔ, na yɛra kɛ yɛbahoto ye.”*
3 Mekɛ mɔɔ Belemgbunli Hɛlɔdo nee menli mɔɔ wɔ Gyɛlusalɛm amuala dele ɛhye la, bɛ adwenle zɛkyele.
4 Ɔyiale ɛsɔfo mgbanyinli nee mɛla kilehilevolɛma* ne amuala, na ɔbizale bɛ ɛleka mɔɔ bɛbawo Kelaese ne* la.
5 Bɛbuale ye kɛ: “Wɔ Bɛtelɛhɛm+ mɔɔ wɔ Dwudiya la, ɔluakɛ mɔɔ ngapezonli ne hɛlɛle la ɛne:
6 ‘Na wɔmɔ, O Bɛtelɛhɛm mɔɔ wɔ Dwuda maanle nu la, ɛnle sua ekyi wɔ Dwuda amɛnladoma avinli, ɔluakɛ wɔ nuhua yɛɛ amɛnlado mɔɔ banlea me menli Yizilayɛma la bavi ara a.’”+
7 Yemɔti Hɛlɔdo vɛlɛle nwɔlɔra neɛnleanuma ne ahane na ɔbizale bɛ mekɛ fɔɔnwo ne mɔɔ ɛwɔlɔra ne vindele la.
8 Akee ɔzoanle bɛ wɔ Bɛtelɛhɛm, na ɔhanle kɛ: “Bɛhɔkpondɛ kakula ne kpalɛ, na saa bɛnwu ye a bɛrabɔ me amaneɛ na medame noko mengɔngoto ye bie.”
9 Bɛdiele belemgbunli ne bɛwiele la, bɛzile nu bɛhɔle, na nea! ɛwɔlɔra ne mɔɔ bɛnwunle ye wɔ Aduduleɛ nehane+ la lile bɛ nyunlu too ɔhɔgyinlanle ɛleka mɔɔ kakula ne wɔ la anwuma.
10 Bɛnwunle ɛwɔlɔra ne la, bɛ nye liele kpole kpalɛ.
11 Na mekɛ mɔɔ bɛhɔle sua ne anu la, bɛnwunle kakula ne nee ye mame Mɛle, na bɛhotole ye.* Eza bɛbukebukele bɛ ninyɛne ne mɔ azo na bɛmaanle ye ahyɛlɛdeɛ—nvutuke nee ɛyɛlɛvuanlɛ yɛɛ alufuanlɛ.
12 Noko kɛmɔ Nyamenle bɔle bɛ kɔkɔ wɔ ɛlalɛ nu+ kɛ bɛmmasia bɛkɔ Hɛlɔdo ɛkɛ ne bieko la ati, bɛluale adenle gyɛne zo bɛhɔle bɛ maanle nu.
13 Mɔɔ bɛhɔle la, nea! Gyihova* anwumabɔvolɛ yele ɔ nwo hilele Dwosefi wɔ ɛlalɛ nu,+ na ɔzele ye kɛ: “Dwazo, fa kakula ne nee ye mame nriandi kɔ Yigyibiti, na tɛnla ɛkɛ kɔkpula kɛ me nee wɔ badendɛ la, ɔluakɛ Hɛlɔdo barakpondɛ kakula ne ahu ye.”
14 Yemɔti Dwosefi dwazole nɔe ne na ɔvale kakula ne nee ye mame ɔhɔle Yigyibiti.
15 Ɔdɛnlanle ɛkɛ ne too Hɛlɔdo wule. Ɛhye maanle edwɛkɛ mɔɔ Gyihova* luale ye ngapezonli ne anwo zo hanle la rale nu kɛ: “Menvɛlɛle me ra nrenyia ne menvile Yigyibiti.”+
16 Mɔɔ Hɛlɔdo nwunle kɛ nwɔlɔra neɛnleanuma ne ɛbɛlɛbɛla ye la, ɔvale ɛya kpole, yemɔti ɔzoanle ɔmaanle bɛhɔhunle ngakula mrenyia mɔɔ bɛwɔ Bɛtelɛhɛm nee ye maanzinli ne mɔ anu, mɔɔ bɛli ɛvolɛ nwiɔ anzɛɛ bɛtɛdwule la amuala, kɛ mɔɔ nwɔlɔra neɛnleanuma ne hilele ye mekɛ ne la.+
17 Ɛhye maanle edwɛkɛ ne mɔɔ bɛluale ngapezonli Gyɛlɛmaya anwo zo bɛhanle la rale nu kɛ:
18 “Bɛdele ɛnelɛ bie wɔ Releema, ɛzunlɛ nee awolɛyelɛ dɔɔnwo. Relahyɛle ɔ,+ ɔlɛsu ɔ mra, na bɛkyekye ɔ rɛle a ɔmkponle, ɔluakɛ bɛnle ɛkɛ ne bieko.”+
19 Mekɛ mɔɔ Hɛlɔdo wule la, nea! Gyihova* anwumabɔvolɛ yele ɔ nwo hilele Dwosefi wɔ ɛlalɛ nu+ wɔ Yigyibiti
20 na ɔhanle kɛ: “Dwazo, fa kakula ne nee ye mame na kɔ Yizilayɛ maanle nu, ɔluakɛ menli mɔɔ ɛnee ɛlɛkpondɛ kakula ne ahu ye la ɛwu.”
21 Yemɔti ɔdwazole na ɔvale kakula ne nee ye mame ɔhɔle Yizilayɛ azɛlɛ zo.
22 Na mɔɔ ɔdele kɛ Aakɛleeyɛse ɛli ye papa Hɛlɔdo agya na ɔlɛdi belemgbunli wɔ Dwudiya la, ɔzulole kɛ ɔbahɔ ɛkɛ. Eza kɛmɔ Nyamenle bɔle ye kɔkɔ wɔ ɛlalɛ nu+ la ati, ɔhɔle Galeli maanzinli nu.+
23 Na ɔhɔdɛnlanle sua bie mɔɔ bɛfɛlɛ ye Nazalɛte la azo,+ amaa edwɛkɛ ne mɔɔ ngapezoma ne hanle la ara nu kɛ: “Bɛbavɛlɛ ye Nazalɛtenli.”*+
Ɔbodwɛkɛ
^ Nea Edwɛkɛbohilelɛ.
^ Anzɛɛ “ngonyiama.”
^ Anzɛɛ “yɛbabɔ yɛ ti aze yɛamaa ye.”
^ Mɔlebɛbo ne, ɛnee ɛhye le Ngɛlɛlera ne anwo kɛlɛhɛlɛvolɛ, noko wɔ Gyisɛse mekɛ zo, ɛnee ɔle awie mɔɔ ze Mɛla ne kpalɛ na ɔkilehile la.
^ Anzɛɛ “Mɛzaya ne; Mɔɔ Bɛkpokpa Ye.”
^ Anzɛɛ “bɛbɔle bɛ ti aze bɛmaanle ye.”
^ Bie a ɔvi Hibulu edwɛkɛkpɔkɛ “ɛfifilɛ” anu.
