Wulu kɔ nuhua edwɛkɛ ne azo

Wulu kɔ nuninyɛne ne azo

Awie Biala Ɛnrɛhola Ɛnrɛzonle Menlenlɛ Nwiɔ

Awie Biala Ɛnrɛhola Ɛnrɛzonle Menlenlɛ Nwiɔ

“Awie biala ɛnrɛhola ɛnrɛzonle menlenlɛ nwiɔ. . . . Zɔhane ala yɛɛ bɛnrɛhola Nyamenle nee ezukoa sonle a.”—MAT. 6:24.

1-3. (a) Ezukoa nwo ngyegyelɛ boni a menli dɔɔnwo yia ye ɛnɛ a, na kɛzi bie mɔ bɔ mɔdenle kɛ bɛdi nwolɛ gyima ɛ? (Nea mɔlebɛbo nvoninli ne.) (b) Ngakula ɛtetelɛ nwo ngyegyelɛ boni a ɛhye fa ba a?

MARILYN * ka kɛ, “me hu James vi gyima bara sua nu kenle biala la ɛnee yevɛ, noko ninyɛne mɔɔ yɛhyia nwo la anu ekyi bie ala a ye ahatualɛ ne kola nwolɛ gyima di a. Ɛnee mekpondɛ kɛ mete ye ɛvɛlɛ zo na meboa ye memaa yɛtotɔ ninyɛne mɔɔ yɛ ra Jimmy agɔnwo mɔ sukuluma lɛ la bie yɛmaa ye.” Ɛnee Marilyn eza kpondɛ kɛ bɛboa bɛ mbusuafoɔ na bɛsie ezukoa bɛmaa bɛ kenlebie. Ɔ gɔnwo mɔ dɔɔnwo ɛhɔ maanle gyɛne zo kɛ bɛkakpondɛ ezukoa. Noko mekɛ mɔɔ ɔlɛsuzu ye ɛdulɛ ne anwo la, ɛnee ɔnnwu mɔɔ ɔwɔ kɛ ɔyɛ a. Duzu ati ɔ?

2 Ɛnee Marilyn sulo kɛ ɔbagyakyi ye abusua ne mɔɔ anwo hyia ye nee ɛzonlenlɛ nwo ngyehyɛleɛ kpalɛ mɔɔ bɛyɛ la yeahɔ. Noko, ɔnyianle adwenle kɛ bie mɔ ɛhɔli mekɛ bie wɔ abolokyi mɔɔ yeanga bɛ mbusua sunsum nu gyinlabelɛ a. Noko akee, kɛzi ɔbadɛnla maanle gyɛne zo yeatete Jimmy la gyegyele ye. Asoo ɔbahola yeatete ɔ ra ne “kɛmɔ Awulae kpondɛ la” wɔ Intanɛte zo?—Ɛfɛ. 6:4.

3 Marilyn kpondɛle adehilelɛ. Ɛnee ɔ hu ɛngulo kɛ ɔbagyakyi ye ɛkɛ yeahɔ, ɔnva nwo kɛ ɔngola ɔnzi ye adenle la. Mgbanyima ne mɔ nee awie mɔ gyɛne mɔɔ bɛwɔ asafo ne anu la dule  ye folɛ kɛ ɔmmakɔ, noko mediema mraalɛ dɔɔnwo zile ye adua kɛ ɔhɔ. Bɛhanle bɛhilele ye kɛ, “Saa ɛkulo wɔ abusua ne a, ɛbahɔ. Ɛbahola wɔadoa zo wɔazonle Gyihova.” Ɛnee ye adwenle nu yɛ ye kesee ɛdeɛ, noko Marilyn nee ɔ hu James yɛɛ ɔ ra Jimmy lile nrɛlaleɛ na ɔhɔle. Ɔbɔle bɛ ɛwɔkɛ kɛ, “Menrɛhyɛ fee.”

ABUSUA ƐZONLELILƐ NEE BAEBOLO NGYINLAZO

4. Duzu ati a menli dɔɔnwo tu adenle a, na nwane mɔ a bɛta bɛgyakyi bɛ mra bɛmaa bɛ a?

4 Gyihova ɛngulo kɛ ye ngɛkɛlɛ di ehyia. Adendulɛ le ndenle mɔɔ menli dua zo di ehyia zo konim la anu ko. (Edw. 37:25; Mrɛ. 30:8) Tete selɛ Gyekɔbo zoanle ɔ mra wɔ Yigyibiti kɛ bɛhɔdɔ aleɛ amaa ɛhɔne angu bɛ. * (Mɔl. 42:1, 2) Ɛnɛ, tɛ ɛhɔne ti a menli dɔɔnwo tu adenle a. Bie a ɛnee kakɛ ɛlɛbu bɛ kɔme. Bie mɔ noko kulo kɛ bɛ abusua ne kpazi wɔ ɛbɛlabɔlɛ nu. Amaa bɛadwu bɛ bodane nwo wɔ ezukoa duma nu la, bie mɔ gyakyi bɛ mbusua tu adenle. Fane dɔɔnwo ne ala, bɛgyakyi bɛ mra ngyikyi bɛmaa awovolɛ ne mɔ ko, bɛ mediema mgbanyinli, bɛ nlenya anzɛɛ bɛ nla mɔ, bɛ mbusuafoɔ, anzɛɛ bɛ gɔnwo mɔ. Ɔnva nwo kɛ bɛdabɛ mɔɔ bɛgyakyi bɛ bokavolɛ nee bɛ mra bɛtu adenle la di nyane la, bɛte nganeɛ kɛ bɛnrɛhola bɛnrɛyɛ nwolɛ ɛhwee.

5, 6. (a) Duzu a Gyisɛse hilehilele ye wɔ anyelielɛ nee banebɔlɛ nwo a? (b) Nwonane afoa nu ninyɛne boni a Gyisɛse hilele ye ɛdoavolɛma kɛ bɛyɛ nwolɛ nzɛlɛlɛ a? (d) Kɛzi Gyihova yila yɛ ɛ?

5 Wɔ Gyisɛse mekɛ zo ɛnee menli dɔɔnwo di ehyia, na ɛnee bɛnlɛ moalɛ biala. Bie a bɛdele nganeɛ kɛ saa bɛlɛ ezukoa a anrɛɛ bɛ nye balie. (Maake 14:7) Noko ɛnee Gyisɛse kpondɛ kɛ menli fa bɛ rɛle wula debie gyɛne nu. Ɛnee ɔkpondɛ kɛ bɛfa bɛ nwo bɛto Gyihova mɔɔ le anwonyia mɔɔ ɛnzɛkye ɛlɛ Ɛvileka la anwo zo. Wɔ Gyisɛse Boka Zo Ɛdendɛlɛ ne anu, ɔhilehilele nu kɛ nɔhalɛ anyelielɛ nee banebɔlɛ kpalɛ ɛngyi nwonane afoa nu ninyɛne anzɛɛ yɛ mɔdenlebɔlɛ zo, emomu, agɔnwolɛvalɛ kpalɛ mɔɔ yɛ nee yɛ anwuma Selɛ ne bɛanyia la azo.

6 Wɔ ye asɔneyɛlɛ neazo ne anu, Gyisɛse anga kɛ yɛzɛlɛ yɛbiza ezukoa, emomu, mɔɔ yɛhyia nwo la, “yɛ ɛnɛ dahuu aleɛ.” Ɔzele ye tievolɛma kɛ: “Bɛmmakpondɛ bɛ anwonyia bɛsie azɛlɛ ye azo. . . . Bɛkpondɛ bɛ anwonyia bɛzie anwuma.” (Mat. 6:9, 11, 19, 20) Yɛbahola yɛava yɛ nwo yɛado Gyihova anwo zo kɛ ɔbayila yɛ kɛmɔ yebɔ yɛ ɛwɔkɛ la. Nyamenle nyilalɛ ne ɛnle ɛlielɛ mɔɔ ɔdie yɛ ɔto nu la angome; ɔmaa yɛnyia mɔɔ yɛhyia nwo la noko. Nɔhalɛ, adenle kokye mɔɔ yɛdua zo yɛnyia nɔhalɛ anyelielɛ nee banebɔlɛ kpalɛ la a le kɛ yɛbava yɛ nwo yɛado yɛ anwuma Selɛ ne mɔɔ ɔdwenle yɛ nwo la anwo azo, tɛ ezukoa ɔ.—Bɛgenga Mateyu 6:24, 25, 31-34.

7. (a) Nwane mɔ a Gyihova ɛva ngakula ɛtetelɛ ɛwula bɛ sa a? (b) Duzu ati a ɔwɔ kɛ awovolɛ nwiɔ ne a tete bɛ mra ne mɔ ɛ?

7 Yɛ abusua nu ɛzonlelilɛ mɔɔ yɛbabu ye kɛmɔ Gyihova bu ye la boka ‘Nyamenle tenleneyɛlɛ mɔɔ yɛbalumua yɛakpondɛ la anwo.’ Ngyinlazo ɛhye wɔ Mosisi Mɛla ne anu na ɔfane Keleseɛnema noko anwo: Ɔwɔ kɛ awovolɛ tete bɛdabɛ mumua ne bɛ mra wɔ sunsum nu. (Bɛgenga Mɛla ne 6:6, 7.) Nyamenle ɛva gyima ɛhye ɛmaa awovolɛ, tɛ nlenya mɔ anzɛɛ awie gyɛne biala. Belemgbunli Sɔlɔmɔn hanle kɛ: “Me ra nrenya, tie ɛ ze ngilehilelɛ, yɛɛ mmakpo ɛ nli folɛdulɛ.” (Mrɛ. 1:8) Gyihova kulo kɛ awovolɛ nwiɔ ne nee bɛ mra tɛnla, bɛmaa bɛ adehilelɛ na bɛkilehile bɛ. (Mrɛ. 31:10, 27, 28) Saa ngakula tie mɔɔ bɛ awovolɛ ka fane Gyihova  anwo na bɛnwu kɛzi bɛsonle ye dahuu la a, bɛkola bɛsukoa bɛyɛ bie.

NGYEGYELƐ MƆƆ BƐ NYE ƐNLA

8, 9. (a) Saa wovolɛ bie gyakyi ye abusua tu adenle a, nzenzaleɛ boni a ta ba a? (b) Nganeɛdelɛ nee ɛbɛla kpalɛ ɛbɔlɛ nwo ngyegyelɛ boni a adendulɛ kola fa ba a?

8 Kolaa na menli adu ahɔ abolokyi la, bɛbɔ mɔdenle kɛ bɛbazuzu ngyegyelɛ nee ninyɛne mɔɔ ɔwɔ kɛ bɛfa bɛbɔ afɔle la anwo, noko bɛ nuhua ekyi bie ala a nwu ngyegyelɛ mɔɔ bɛ mbusua mɔɔ bɛbagyakyi bɛ bɛ nzi bɛahɔ nu la amuala a. (Mrɛ. 22:3) * Mekɛ mɔɔ Marilyn hɔle la, yeangyɛ yɛɛ ɔbɔle ɔ bo kɛ ɔdi nyane wɔ ye abusua ne mɔɔ ɔ nee bɛ avinli ɛde la anwo a. Ɔ hu nee ɔ ra ne noko lile nyane. Ɛnee ɔ ra Jimmy ta biza ye kɛ, “Duzu ati a ɛgyakyile me ɛkɛ ɛhɔle a?” Na mekɛ mɔɔ siane ekyi ne mɔɔ Marilyn hanle kɛ ɔkali la yɛle ɛvolɛ dɔɔnwo la, ɔnwunle kɛ nzenzaleɛ mɔɔ gyegye la ɛra ye abusua ne anu. Ɛnee Jimmy te nganeɛ kɛ ɔ nee ye mame avinli ɛlɛte. Ɔvale nyanelilɛ ɔhanle kɛ, “Ɛlɔlɛ mɔɔ ɔlɛ ɔmaa me la ɛminli.”

9 Saa awovolɛ nee ngakula ɛnde kɛ abusua a, ɔkola ɔfa nganeɛdelɛ nee ɛbɛla kpalɛ ɛbɔlɛ nwo ngyegyelɛ ɔba. * Saa ngakula ne mɔ le ngyikyi na bɛ avinli te kyɛ a, ɔmaa ngyegyelɛ ne yɛ kpole. Marilyn hilehilele nu hilele Jimmy kɛ ye boɛyɛlɛ ti a ɔzile kpɔkɛ zɔhane a. Noko Jimmy dele nganeɛ kɛ ye mame ɛkpo ye. Mɔlebɛbo ne, ɔ nye anlie ye mame ɛhɔlɛ ne anwo. Noko nzinlii mɔɔ ye mame ziale rale la, ɔ nye anlie nwo kɛ yera la. Kɛmɔ yɛta yɛnwu ye wɔ ngakula mɔɔ bɛkɛgyakyi bɛ ɛkɛ anwo la, Jimmy dele nganeɛ kɛ ɔnle kɛ ɔyɛ tieyɛ ɔmaa ye na ɔda ɛlɔlɛ ali ɔkile ye.—Bɛgenga Mrɛlɛbulɛ 29:15.

Ɛnrɛhola ɛnrɛyɛ ɛ ra atuu wɔ Intanɛte zo (Nea ɛdendɛkpunli 10)

10. (a) Kɛzi nwonane afoa nu ninyɛne mɔɔ awovolɛ fa maa ngakula mɔɔ bɛgyakyi bɛ ɛkɛ la ka bɛ ɛ? (b) Saa wovolɛ bɔ mɔdenle kɛ ɔbadɛnla maanle gyɛne zo yeatete ɔ ra a ngyegyelɛ boni a wɔ nu a?

10 Ɔwɔ nuhua kɛ Marilyn bɔle mɔdenle kɛ ɔbanwa ye ezukoa nee ahyɛlɛdeɛ la, ɔnwunle kɛ ɔ ra ne ɛlɛtwe ɔ nwo avi ɔ nwo. Ɔlɛkile ye kɛ ɔhulo ezukoa ɔdɛla ye abusua ne anzɛɛ Gyihova bɔbɔ. (Mrɛ. 22:6) Jimmy hanle hilele ye kɛ, “Mmasia ɛba, kɔ zo nwa me ninyɛne.” Marilyn nwunle kɛ ɔnrɛhola ɔnrɛlua kɛlata ɛhɛlɛle, telefuu, anzɛɛ video zo ɔnrɛtete ɔ ra ne. Ɔhilehilele nu kɛ, “Ɛnrɛhola ɛnrɛyɛ ɛ ra atuu, anzɛɛ ɛnrɛva ye ɛnrɛbɔ wɔ ɛbolɛ wɔ Intanɛte zo.”

Esiane boni a bahola ado wɔ wɔ mekɛ mɔɔ ɛnle wɔ bokavolɛ ne anwo la ɛ? (Nea ɛdendɛkpunli 11)

11. (a) Kɛzi nwonane afoa nu gyima mɔɔ agyalɛma bɛade bɛ avinli ahɔyɛ la baha bɛ agyalɛ ne ɛ? (b) Kɛzi adiema raalɛ ko ranwunle kɛ ɔwɔ kɛ ɔkɔboka ye abusua ne anwo ɛ?

11 Ɛnee agɔnwolɛvalɛ mɔɔ Marilyn nee  Gyihova yɛɛ ɔ hu James lɛ la noko ɛlɛsɛkye. Ɛnee ɔnda ɔngɔ debiezukoalɛ nee daselɛlilɛ na ɛnee ɔwɔ kɛ ɔko ɔtia nla nwo edwɛkɛ mɔɔ ye gyimamenle fa toa ye la. Kɛmɔ ɛnee bɛnlɛ bokavolɛ mɔɔ ɔbikye bɛ mɔɔ bɛlɛyia ngyegyelɛ a bɛbahɔ ye ɛkɛ la ati, Marilyn nee James vale bɛ nwo wulowulale awie mɔ yemɔti ɔhale kyɛkyɛ na bɛabɔ ɛbɛlatane. Marilyn nwunle kɛ ɔnva nwo kɛ ɔ nee ɔ hu bɛanzɛkye agyalɛ la, saa ɔnle ɔ hu anwo a, bɛnrɛhola bɛnrɛli Baebolo adehilelɛ mɔɔ se bɛli bɛ nganeɛdelɛ nee bɛ nla nu ngyianlɛ nwo gyima la azo. Ɛnee bɛnrɛhola bɛnrɛbɔ adawu, bɛnrɛnlea bɛ nyunlu, anzɛɛ bɛnrɛbɔ nu bɛnrɛzele, bɛnrɛzɔ bɛ sa, bɛnrɛbeta bɛ nwo, bɛnrɛha “ɛhulolɛ” edwɛkɛ bɛnrɛhile bɛ nwo, anzɛɛ bɛnrɛyɛ “mɔɔ fɛta” kɛ agyalɛma yɛ la. (Sɔl. 1:2; 1 Kɔl. 7:3, 5) Yɛɛ bɛnrɛhola bɛ nee bɛ ra ne ɛnrɛbɔ nu ɛnrɛzonle Gyihova kpalɛ. Marilyn ka kɛ: “Mekɛ mɔɔ mendele ye wɔ maangyeba nyianu bie abo kɛ dahuu abusua ɛzonlenlɛ nwo hyia amaa yɛanyia ngoane wɔ Gyihova kenle kpole ne anu la, mendele ɔ bo kɛ ɔwɔ kɛ mesia mekɔ sua nu. Ɛnee ɔwɔ kɛ mebɔ ɔ bo metoto ninyɛne boɛ wɔ sunsum nee abusua asetɛnla nu.”

FOLƐDULƐ KPALƐ NEE FOLƐDULƐ ƐTANE

12. Baebolo nu folɛdulɛ boni a yɛbahola yɛava yɛamaa menli mɔɔ bɛgyakyi bɛ mbusua bɛdu adenle la ɛ?

12 Kpɔkɛ mɔɔ Marilyn zile kɛ ɔsia yeahɔ sua nu la vale ngyegyelɛ ekyi rale. Mgbanyima mɔɔ wɔ asafo ne mɔɔ ɔwɔ nu wɔ maanle zo anu la, hanvole ye wɔ ye diedi nee ye akɛnrazilɛ ne anwo. Noko, menli mɔɔ ɛnee ɛgyakyi bɛ bokavolɛ nee bɛ mbusua bɛ nzi la bie mɔ anye anlie nwolɛ. Kɛ anrɛɛ bɛbazukoa ye neazo kɛnlɛma ne la, bɛbɔle mɔdenle kɛ bɛbu ye abɛ nu. Bɛhanle kɛ, “Ɔnrɛhyɛ ɛbazia wɔara. Saa ɛsia ɛkɔ sua nu a kɛ ɔkɛyɛ na wɔanyia ɛ nloa aleɛ ɛ?” Kɛ anrɛɛ Keleseɛnema bɛaheha edwɛkɛ ɛtane zɛhae la, ‘ɔwɔ kɛ bɛkilehile mbɛlɛra ne mɔ bɛmaa bɛkulo bɛ hu mɔ nee bɛ mra,’ bɛyɛ gyima wɔ sua nu, “amaa awie anga Nyamenle edwɛkɛ ne anwo edwɛkɛ ɛtane.”—Bɛgenga Taetɛse 2:3-5.

13, 14. Duzu ati a ɔhyia diedi na awie ahola ava Gyihova alumua mɔɔ ye abusua ne kulo la anyunlu ɛ? Maa neazo.

13 Menli mɔɔ tu adenle kɔyɛ gyima la anu dɔɔnwo ɛnyia subane mɔɔ maa bɛkulo amaamuo nee mbusuafoɔ, titile bɛ awovolɛ bɛtɛla debie biala la. Ɔhyia diedi na Keleseɛnenli bie ahola akpo nyɛleɛ mɔɔ menli dɔɔnwo die to nu anzɛɛ debie mɔɔ ye abusua ne kulo amaa yeazɔ Gyihova anye la.

14 Yɛva Carin kɛ neazo: “Mɔɔ menwole me ra Don la, ɛnee me nee me hu yɛ gyima wɔ maanle zo, na ɛnee membɔle ɔ bo  kɛ mesukoa Baebolo ne la ɔtɛkyɛle. Ɛnee awie biala mɔɔ wɔ me abusua ne anu la anye la kɛ mebava Don meamaa me awovolɛ atete ye wɔ sua nu kɔkpula kɛ yɛbanyia ezukoa.” Mekɛ mɔɔ Carin zile kpɔkɛ kɛ ɔdaye mumua ne ɔbatete Don la, ye mbusuafoɔ mɔɔ ɔ hu boka nwo la hanle kɛ ɔle mgbovonle na bɛzelele ye. Carin ka kɛ: “Nɔhalɛ, wɔ zɔhane mekɛ ne ɛnee menze nvonleɛ mɔɔ wɔ nwo kɛ mebava Don meamaa me awovolɛ wɔ ɛvolɛ ekyi anu la amuala. Noko ɛnee meze kɛ Gyihova ɛva yɛ ra nrenya ne ɛtetelɛ ɛwula yɛdayɛ mɔɔ yɛle ye awovolɛ la asa nu.” Mɔɔ Carin vale ɛkolɛ bieko la, ɔ hu mɔɔ ɛnle nɔhalɛ ne anu la hanle kɛ ɔye ye. Kpɔkɛ kpalɛ mɔɔ Carin zile ye mɔlebɛbo ne la manle ye diedi nu yɛle se yemɔti eza ɔgyinlanle kpundii ɔmanle Gyihova. Kɛkala, ɔ nee ɔ hu yɛɛ ɔ mra ne mɔ anye die kɛ bɛde ɛleka ko la. Saa Carin vale ɔ mra ne mɔ ko anzɛɛ bɛ mu nwiɔ ɔmanle awie a, anrɛɛ mɔɔ bavi nu ara la bayɛ ngakyile.

15, 16. (a) Ka anwubielɛ mɔɔ adiema raalɛ bie nyianle wɔ ye ngakula nu la. (b) Duzu ati a ɔzile kpɔkɛ kɛ ɔnrɛyɛ ɔ ra raalɛ zɔhane ɛ?

15 Dasevolɛ bie mɔɔ bɛfɛlɛ ye Vicky la ka kɛ: “Me nana tetele me mekɛ ekyi wɔ mekɛ mɔɔ ɛnee me diema raalɛ ekyi nee me awovolɛ de la. Mekɛ mɔɔ menziale mengɔle me awovolɛ ɛkɛ la, ɛnee nganeɛ mɔɔ mete memaa bɛ la ɛhakyi. Ɛnee me diema raalɛ ne kola ka ye edwɛkɛ kile bɛ, ɔbeta bɛ, na ɔbikye bɛ. Mendele nganeɛ kɛ me nee me awovolɛ avinli ɛde, bɔbɔ mekɛ mɔɔ menyɛle kpanyinli la, ɛnee ɔyɛ se kɛ mebala me nganeɛdelɛ ali meahile bɛ. Me nee me diema raalɛ ne ɛnee yɛmaa yɛ awovolɛ ɛnwu kɛ yɛbanlea bɛ wɔ bɛ mgbanyinli mekɛ nu. Noko mame, mebayɛ zɔ ɔluakɛ mete nganeɛ kɛ ɔle me gyima, na me diema raalɛ ne yemɔ ɔbavi ɛlɔlɛ nu a yeayɛ a.”

16 Vicky ka kɛ: “Kɛkala me mame kulo kɛ mefa me ra ralɛ ne memaa ye memaa ɔtete ye kɛmɔ ɔvale me ɔmanle ye mame la. Menluale nrɛlɛbɛ adenle zo memkpole. Me nee me hu yɛkulo kɛ yɛtete yɛ ra ne wɔ Gyihova adenle zo. Na mengulo kɛ mekɛzɛkye abusuabɔlɛ mɔɔ me nee me ra ne yɛbanyia ye kenlebie la.” Vicky ɛnwu kɛ adenle kpalɛ ne a le kɛ ɛbava Gyihova nee ye ngyinlazo wɔalumua ezukoa nee mɔɔ mbusuafoɔ kulo la anyunlu. Gyisɛse hanle kɛ: “Awie biala ɛnrɛhola ɛnrɛzonle menlenlɛ nwiɔ,” Nyamenle nee ezukoa.—Mat. 6:24; Ade. 23:2.

GYIHOVA MAA DEBIE “KPALƐ” FI YƐ MƆDENLEBƆLƐ NU BA

17, 18. (a) Duzu a ɔwɔ kɛ Keleseɛnema yɛ ye dahuu a? (b) Kpuyia boni mɔ a yɛbazuzu nwo wɔ edwɛkɛ mɔɔ doa zo la anu a?

17 Saa yɛfa Belemgbunlililɛ ne nee ye tenleneyɛlɛ yɛdumua wɔ yɛ ɛbɛlabɔlɛ nu a, yɛ Ze, Gyihova bamaa yɛ sa aha debie biala mɔɔ yɛhyia nwo la. (Mat. 6:33) Ɛhye ati, nɔhalɛ Keleseɛnema ze mɔɔ ɔwɔ kɛ bɛyɛ ye dahuu a. Ɔnva nwo ngyegyelɛ biala mɔɔ yɛbahɔ nu la, Gyihova ɛbɔ ɛwɔkɛ kɛ ɔbahile yɛ “adenle yeamaa [yɛavi] nu” mɔɔ ɔngyia kɛ yɛbulu Baebolo ngyinlazo zo a. (Bɛgenga 1 Kɔlentema 10:13.) Saa ‘yɛsi abotane yɛkendɛ’ Gyihova, na ‘yɛfa yɛ rɛle yɛwula ye nu’ ɔlua nzɛlɛlɛ mɔɔ yɛbayɛ yɛakpondɛ nrɛlɛbɛ nee adehilelɛ la azo, na yɛfa ye mɛla nee ngyinlazo ne mɔ yɛyɛ gyima a, “ɔbali yeamaa” yɛ. (Edw. 37:5, 7) Yɛsonle ɔ ngomekye kɛ yɛ Menle a, ɔbayila yɛ mɔdenlebɔlɛ ne azo. Saa yɛdumua yɛkpondɛ ye a, ɔbamaa yɛ ɛbɛla ɛbɔlɛ ayɛ “kpalɛ.”—Fa to Mɔlebɛbo 39:3.

18 Kɛ ɔkɛyɛ na yɛali ngyegyelɛ mɔɔ adendulɛ bava ara la anwo gyima ɛ? Duzu a yɛbahola yɛayɛ na yɛ abusua ne anyia mɔɔ ɔhyia nwo mɔɔ ɔnrɛhyia kɛ yɛtu adenle a? Na kɛ ɔkɛyɛ na yɛahola yɛavi ɛlɔlɛ nu yɛaboa awie mɔ yɛamaa bɛazi kpɔkɛ kpalɛ wɔ ɛhye anwo ɛ? Edwɛkɛ mɔɔ doa zo la babua kpuyia ɛhye mɔ.

^ ɛden. 1 Tɛ bɛ alumua kpalɛ ɔ.

^ ɛden. 4 Ɔbayɛ kɛ adenle biala mɔɔ Gyekɔbo amra ne mɔ dule hɔle Yigyibiti la, bɛgyakyi bɛ mbusua dapɛne nsa. Nzinlii mɔɔ Gyekɔbo nee ɔ mra ne mɔ dule hɔle Yigyibiti la, bɛvale bɛ ye mɔ nee bɛ mra bɛhɔle.—Mɔl. 46:6, 7.

^ ɛden. 8 Nea edwɛkɛ “Immigration—Dreams and Realities” mɔɔ wɔ February 2013 Awake! ne anu la.

^ ɛden. 9 Amaneɛbɔlɛ kile kɛ menli mɔɔ gyakyi bɛ agyalɛ bokavolɛ nee bɛ mra tu kɔ maanle gyɛne zo kɔyɛ gyima la yia ngyegyelɛ mɔɔ anu yɛ se la dɔɔnwo. Bie a le agyalɛzɛkyelɛ, menli mɔɔ bɛ awodeɛ le ko la nla, anzɛɛ mogyafonla, yɛɛ ɔka ngakula ne mɔ subane, bɛ debiezukoalɛ, bɛta bɛfa ɛya, bɛ rɛle bɔ, bɛdwenledwenle, anzɛɛ bɛte nganeɛ kɛ ɔwɔ kɛ bɛpɛ bɛ ngoane zo.