Daneɛle 9:1-27

  • Daneɛle ɛtanehanlɛ nwo asɔneyɛlɛ (1-19)

    • Ɔbadɔ mgbane ɛvolɛ 70 (2)

  • Geebeleɛle rale Daneɛle anwo ɛkɛ (20-23)

  • Bɛhanle dapɛne 70 anwo ngapezo bɛdole ɛkɛ (24-27)

    • Mɛzaya ne bavinde wɔ dapɛne 69 anzi (25)

    • Bɛbapɛ Mɛzaya ne bɛavi ɛkɛ (26)

    • Bɛbazɛkye suakpole ne nee ɛleka nwuanzanwuanza ne (26)

9  Wɔ Ahazelɔse ara Dalayɛse+—Medeanli ne mɔɔ bɛziele ye belemgbunli wɔ Kaledeama belemgbunlililɛ+ ne azo la—ɛvolɛ mɔɔ limoa  wɔ ye tumililɛ ne ɛvolɛ mɔɔ limoa la anu, medame Daneɛle, menwunle ɛvolɛ dodo mɔɔ Gyɛlusalɛm badɔ mgbane la wɔ mbuluku ne mɔ anu kɛ mɔɔ Gyihova edwɛkɛ ne mɔɔ ɔhanle ɔhilele ngapezonli Gyɛlɛmaya la de la:+ Ɔle ɛvolɛ 70.+  Ɔti mengɔle Gyihova, nɔhalɛ Nyamenle ne anyunlu, membodole ye wɔ asɔneyɛlɛ nu, mengyele ɛhɔne+ na mengedale ɛrele yɛɛ membɔle nzonle.  Menzɛlɛle Gyihova me Nyamenle ne na menganle yɛ ɛtane ne mɔ kɛ: “O Gyihova nɔhalɛ Nyamenle ne, Wɔmɔ mɔɔ ɛle bedevinli na ɛ nwo yɛ ɛzulolɛ, mɔɔ ɛdi wɔ ngyekyeleɛ zo na ɛda ɛlɔlɛ kpundii ali+ ɛkile bɛdabɛ mɔɔ bɛkulo wɔ na bɛdi wɔ mɛla ne mɔ azo la,+  yɛvo na yɛyɛ ɛtane yɛɛ yɛyɛ amumuyɛ na yɛde atua;+ yɛɛ yɛhwe yɛ nwo yɛvi wɔ mɛla nee wɔ ndɛnebualɛ ne mɔ anwo.  Yɛandie wɔ azonvolɛ ngapezoma ne mɔ,+ mɔɔ dendɛle wɔ wɔ duma nu hilele yɛ arelemgbunli, yɛ mgbanyima, yɛ nenyia mɔ nee menli mɔɔ wɔ azɛlɛ ne azo kɔsɔɔti la.  O Gyihova, wɔmɔ a tenleneyɛlɛ le wɔ ɛdeɛ a, na yɛmɛ a anyiemgba* fɛta yɛ a kɛ mɔɔ ɔde ye ɛnɛ la, Dwudama, Gyɛlusalɛmma nee Yizilayɛma amuala, bɛdabɛ mɔɔ bɛbikye nee bɛdabɛ mɔɔ bɛwɔ moamoa wɔ azɛlɛ ne mɔɔ ɛbɔle bɛ asande ɛhɔguale zolɛ la amuala azo la, ɔluakɛ bɛanli nɔhalɛ bɛammaa wɔ.+  “O Gyihova, yɛmɛ a anyiemgba* fɛta yɛ a, yɛ arelemgbunli, yɛ mgbanyima nee yɛ nenyia mɔ, ɔluakɛ yɛyɛ ɛtane yɛtia wɔ.  Anwunvɔnezelɛ nee ɛtanefakyɛ le Gyihova yɛ Nyamenle ne ɛdeɛ,+ ɔluakɛ yɛde ɔ nwo atua.+ 10  Yɛandie Gyihova yɛ Nyamenle ne ane, yɛanli ye mɛla ne mɔ mɔɔ ɔluale ye ngapezoma ne mɔ anwo zo ɔvale ɔmaanle yɛ la azo.+ 11  Yizilayɛma amuala ɛbulu wɔ Mɛla ne azo, bɛandie ɛ ne na bɛhwenle bɛ nwo, yemɔti ɛwolale amowa nee ndane ne mɔɔ bɛhɛlɛ bɛ wɔ nɔhalɛ Nyamenle ne sonvolɛ Mosisi Mɛla ne anu la ɛguale yɛ nwo zo,+ ɔluakɛ yɛyɛ ɛtane yɛtia Ye. 12  Yeli ye edwɛkɛ mɔɔ ɔhanle ɔtiale yɛ nee mɔɔ tia yɛ+ tumivolɛma mɔɔ nea yɛ nwo zo la* azo, yeva munzule kpole yera yɛ nwo zo; bɛtɛyɛle debie zɛhae bie wɔ aleɛabo ɛlɛ, kɛ mɔɔ bɛyɛ ye wɔ Gyɛlusalɛm la.+ 13  Kɛ mɔɔ bɛhɛlɛ ye wɔ Mosisi Mɛla ne anu la, munzule ɛhye mɔ amuala ɛra yɛ nwo zo,+ noko yɛtɛsɛlɛle Gyihova yɛ Nyamenle ne anyunlu ɛlolɛ, yɛtɛtwenle yɛ nwo yɛtɛfile yɛ nvonleɛ nwo+ yɛɛ yɛtɛnyianle wɔ nɔhalɛ* ne anwo nwunu. 14  “Ɔti Gyihova hɔle zo nleanle na ɔvale munzule ɔrale yɛ nwo zo, ɔluakɛ Gyihova yɛ Nyamenle ne le tenlene wɔ gyima mɔɔ yeyɛ la kɔsɔɔti anu; noko yɛtɛtiele ɔ ne.+ 15  “Kɛkala, O Gyihova yɛ Nyamenle, Wɔmɔ mɔɔ ɛvale ɛsalɛ mɔɔ tumi wɔ nu ɛliele wɔ menli ne ɛvile Yigyibiti azɛlɛ zo+ na ɛliele duma ɛmaanle ɛ nwo too yeradwu ɛnɛ la,+ yɛyɛ ɛtane yɛɛ yɛyɛ amumuyɛ. 16  O Gyihova, kɛ mɔɔ wɔ tenlene gyima ne mɔ kɔsɔɔti de la,+ yɛsɛlɛ wɔ, ye wɔ ɛya ne nee wɔ ɛya kpole ne fi wɔ suakpole Gyɛlusalɛm, wɔ boka nwuanzanwuanza ne anwo zo; ɔlua yɛ ɛtane ne nee yɛ nenyia mɔ nvonleɛ ne mɔ ati, Gyɛlusalɛm nee wɔ menli ne ɛrayɛ anyiemgba debie wɔ bɛdabɛ mɔɔ bɛbɔ yɛ bɛyia la kɔsɔɔti anye zo.+ 17  Ɔti, O yɛ Nyamenle, kɛkala tie wɔ sonvolɛ asɔneyɛlɛ nee ye modolɛ, na maa ɛ nyunlu ɛda wɔ wɔ ɛzonlenlɛsua ne+ mɔɔ ɛdɔ mgbane la azo,+ ɔlua wɔ duma ne ati, O Gyihova. 18  O me Nyamenle, yɛ ɛnzolɛ na tie! Buke ɛ nye na nea yɛ tɛnlabelɛ ne mɔɔ ɛzɛkye nee suakpole ne mɔɔ bɛfa wɔ duma bɛfɛlɛ ye la; ɔluakɛ tɛ yɛ tenlene gyima ti a yɛlɛbodo wɔ a, emomu wɔ anwunvɔnezelɛ kpole ne ati ɔ.+ 19  O Gyihova, tie yɛ. O Gyihova, fa kyɛ yɛ.+ O Gyihova, nea na yɛ nwolɛ debie! O me Nyamenle, wɔ duma ne ati mmakyɛ, ɔluakɛ bɛfa wɔ duma a bɛfɛlɛ wɔ suakpole ne nee wɔ menli ne a.”+ 20  Mekɛ mɔɔ megua zo melɛyɛ asɔne na melɛka me ɛtane nee me menli Yizilayɛma ɛtane ne na melɛfa me Nyamenle ne boka nwuanzanwuanza ne anwo modolɛ meado Gyihova me Nyamenle ne anyunlu la,+ 21  ɛhɛe, mekɛ mɔɔ megua zo melɛtendɛ wɔ asɔneyɛlɛ nu la, nrenyia Geebeleɛle+ mɔɔ menlimoale menwunle ye wɔ ɛnyelɛzodeɛnwunlɛ ne anu la,+ rale me nwo ɛkɛ ne na ɛnee mevɛ kpalɛ, kɛyɛ mekɛ mɔɔ bɛfa bɛbɔ ahyɛlɛ afɔle ne wɔ nɔsolɛ nu la anu. 22  Ɔmaanle me ndelebɛbo na ɔhanle kɛ: “O Daneɛle, mera kɛ mebamaa wɔ nwunu nee ndelebɛbo. 23  Mekɛ mɔɔ ɛbɔle wɔ nzɛlɛlɛ ne abo ala la, menyianle nrɛlaleɛ bie, na mera kɛ mebaha meahile wɔ, ɔluakɛ ɛle sonla mɔɔ ɛsonle bolɛ kpalɛ.*+ Ɔti suzu edwɛkɛ ne anwo na te ɛnyelɛzodeɛnwunlɛ ne abo. 24  “Bɛva dapɛne* 70 bɛmaa wɔ menli ne nee wɔ suakpole nwuanzanwuanza ne,+ amaa bɛapɛ mɛladonlɛ zo, bɛava ɛtane bɛara awieleɛ,+ bɛayɛ nvonleɛ nwo mgbɔdalɛ,+ bɛava dahuu tenleneyɛlɛ bɛara,+ bɛazɔ ɛnyelɛzodeɛnwunlɛ nee ngapezo* ne anloa,+ na bɛakpokpa Nwuanzanwuanza Ɛleka Ne Mɔ Anu Nwuanzanwuanza ne.* 25  Nwu ye na te ɔ bo kɛ ɔvi edwɛkɛ mɔɔ se bɛmaa Gyɛlusalɛm ɛyɛ kɛ ye dɛba ne na bɛkyekye ye bieko la azo+ kɔdwu Mɛzaya,*+ Adekilevolɛ ne+ anwo zo la, bayɛ dapɛne 7 nee dapɛne 62.+ Bɛbakyekye ye bieko bɛamaa yeayɛ kɛ ye dɛba ne la, ɔbanyia gua zo na bɛadu kuma bɛabɔ ye bɛayia, noko ɔbayɛ anwongyelelɛ mekɛ nu. 26  “Na dapɛne 62 ne anzi, bɛbapɛ Mɛzaya ne bɛavi ɛkɛ,*+ na ɔnrɛha ye ɛhwee.+ “Na adekilevolɛ bie mɔɔ ɛlɛba la menli ne bazɛkye suakpole ne nee ɛleka nwuanzanwuanza ne.+ Na azuyilɛ ne a bamaa yeara ye awieleɛ a. Na bɛbaho too awieleɛ ne ara; kpɔkɛ mɔɔ bɛzi bɛmaa ye la a le kɛ ɔbadɔ mgbane.+ 27  “Na ɔbamaa ngyekyeleɛ ne ayɛ gyima amaa menli dɔɔnwo wɔ dapɛne ko anu; na wɔ dapɛne foa ko anu, ɔbamaa bɛagyakyi afɔlebɔlɛ nee ahyɛlɛ afɔlebɔdeɛ.+ “Na mɔɔ bɔ maanle la badɛnla kyibadeɛ ninyɛne ne mɔ andɛba ne azo;+ na bɛbawola mɔɔ bɛzi nwolɛ kpɔkɛ la bɛagua mɔɔ ɛdɔ mgbane la azo kɔkpula kɛ ɔ bo zo babɔ bɔkɔɔ.”

Ɔbodwɛkɛ

Hibulu aneɛ nu, “nyiane.”
Hibulu aneɛ nu, “nyiane.”
Hibulu aneɛ nu, “ye ndɛnebuavolɛma mɔɔ buale yɛ ndɛne la.”
Anzɛɛ “nɔhalɛlilɛ.”
Anzɛɛ “bɛkulo wɔ edwɛkɛ kpalɛ; bɛbu wɔ kpalɛ.”
Wɔ ɛke dapɛne 1 biala le ɛvolɛ 7.
Hibulu aneɛ nu, “ngapezonli.”
Hibulu aneɛ nu, “Nwuanzanwuanza Nu Nwuanzanwuanza Ɛleka ne. Anzɛɛ Nwuanzanwuanza Kpalɛ. Ɔbayɛ kɛ ɔfale anwuma, ɛleka mɔɔ Nyamenle de la anwo.”
Anzɛɛ “Mɔɔ Bɛkpokpa Ye.”
Anzɛɛ “bɛbahu ye.”