OHO kala wu uvite ngiini ngele to dhiladhila kethimbo lyuukulupe? Oyendji ohaya kala ye na omaipulo, kaaye na ombili noya tula omutse kepepe. Oshi li ngawo, molwaashono uukulupe ohawu endele pamwe nomalunduluko ngaashi okwaahe na uukolele, oongandji, okudhimbwa nosho wo omikithi dhoshinamenena.

Ihe aantu ohaya kulupa momikalo dha yoolokathana. Yamwe ohaya kala ya kola komalutu noye na omadhiladhilo ge li pehala. Ehumokomeho lyopaunamiti olya kwathela yalwe ya kondjithe uuvu woshinamenena. Oshizemo, momahala gamwe aantu oyendji ohaya kala momwenyo ethimbo ele noye na uukolele.

Kutya nduno omukulupe oku li muupyakadhi mboka hawu endele pamwe nuukokele nenge hasho, aakulupe oyendji oya halelela okukala ya nyanyukwa. Ihe ongiini shika tashi vulu okuningwa? Oku shi ninga, okwiikolelela kiikala yetu, kehalo lyetu nosho wo kokutaamba ko omalunduluko monkalamwenyo nuupu. Tala komakotampango gamwe gOmbiimbeli ngoka taga vulu oku ku kwathela.

KALA WU NA ONGAMBA: “Eishonopeko olyo owino.” (Omayeletumbulo 11:2) Moshitopolwa shika, oshitya ‘eishonopeko’ otashi vulu okuukithwa kaakulupe mboka ye wete kutya itaya vulu okuninga iinima ayihe mbyoka ya li haya ningi sho aagundjuka. Tatekulu Charles gwokoBrazil ngoka e na omimvo 93, okwa ti: “Ngele owa kala nomwenyo ethimbo ele, owu na okukulupa. Kapu na we siku nokashuna kuugundjuka.”

Okukala nongamba itashi ti kutya owu na okukala netaleko ewiinayi li na ko nasha nuukulupe, “wu kale wu uvite kutya owa kulupa, noku na we shoka to vulu okuninga.” Iikala ya tya ngaaka otayi vulu oku ku teya omukumo. Omayeletumbulo 24:10, otayi ti: “Ngele to tenguka pethimbo lyuudhigu, nena oonkondo dhoye oonshona ngiini!” Pehala lyaashono, omuntu e na ongamba oha kala e na iikala iiwanawa noha kambadhala a ninge shoka ta vulu.

Tatekulu Corrado gwokoItalia, ngoka e na omimvo 77, okwa popi pandunge sho a ti: “Ngele to kulupa, owa pumbwa okweenda kashona, opo wu hume komeho.” Odhoshili kutya uuna uukulupe tawu hweenene, omalunduluko oga pumbiwa okuningwa. Corrado nomukadhi oya ninga omalunduluko ge na ko nasha niilonga yomegumbo, mokukala haya thuwa po, opo kaaya kale ya vulwa pehulilo lyesiku. Kuku Marian gwokoBrazil, ngoka e na omimvo 81, naye wo ota tyapula noonkondo ethimbo lye lyuukulupe. Okwa ti: “Ondi ilongo okutaamba ko  onkalo yandje. Ngele tandi longo iilonga yandje, ohandi fudha po kashona uuna sha pumbiwa. Ohandi kuutumba nenge ndi lale po, opo ndi leshe nenge ndi pulakene komusika. Ondi ilonga kutya itandi vulu okuninga shi thike pwaashoka nda li handi ningi nale.”

KALA WU NA ONDJELE: ‘Aakiintu naya dhiladhile nawa kombinga yomizalo dhawo, yo ya zale oonguwo dhi shi kutalwa nodha yogoka.’ (1 Timoteus 2:9) Uutumbulilo “oonguwo dhi shi kutalwa” otawu ulike kokukala tu na ondjele notwa zala nawa. Kuku Barbara gwokoKanada, ngoka e na omimvo 74, okwa ti: “Ohandi kambadhala okuzala ndo opala nokukala nda yela. Inandi hala okumonika ndi ikulupika noihandi kala tandi ipula nuukulupe.” Kuku Fern gwokoBrazil, ngoka e na omimvo 91, okwa ti: “Ohandi landa iizalomwa iipe omalupita, opo ndi kale ndo opala.” Tatekulu Antônio gwokoBrazil, e na omimvo 73, okwa ti: “Ohandi ningi ngaashi te vulu, opo ndi zale oonguwo dhayela.” Shi na ko nasha nuuyogoki we okwa gwedha ko a ti: “Ohandi iyogo nohandi ikulula esiku kehe.”

Oshikwawo, osha simana okuyanda okukala to ipula unene neholokepo lyoye mokukala itoo ‘dhiladhila nawa.’ Kuku Bok-im gwokoSouth Korea, ngoka e na omimvo 69, oku na ondjele ngele tashi ya pokuzala. Okwa ti: “Onda mona kutya itashi opalele kungame ndi zale iinima mbyoka nda li handi zala pethimbo sho nda li omugundjuka.”

KALA WU NA ETALOKO EWANAWA: “Omasiku gomuhepekwa aluhe omawinayi, ihe omwenyo omunyanyukwi aluhe ogu li moshituthi.” (Omayeletumbulo 15:15) Sho to kulupa, otashi vulika wu kokeke omadhiladhilo omawinayi, sho to dhimbulukwa oonkondo ndhoka wa li wu na pethimbo lyuugundjuka nosho wo iinima mbyoka wa li ho vulu okuninga. Shika oshi shi okuuviwa ko. Ihe nonando ongawo, ninga oonkambadhala waa gwililwe po komadhiladhilo ngoka omawinayi. Okukala to dhiladhila komathimbo ga pita, otashi ku ningitha wu kale wa gwililwa po nowa teka omukumo, mokukala itoo ningi shoka to vulu. Tatekulu Joseph gwokoKanada, ngoka e na omimvo 79, okwa dhiladhila nawa sho a ti: “Ohandi kambadhala okuninga iinima mbyoka te vulu okuninga, na ihe kala te kondjo niinima mbyoka nda li he ningi nale, ihe ngashingeyi itee vulu oku yi ninga.”

Okulesha nokwiilonga iinima iipe, ota ku vulu wo oku ku kwathela wu kale wu na omadhiladhilo omape. Onkee ano, kala ho kongo oompito dhokulesha nokwiilonga iinima iipe. Tatekulu Ernesto gwokuFilipine, ngoka e na omimvo 74, ohayi kongulumambo a ka konge omambo omawanawa gokulesha. Okwa ti: ‘Ohandi kala nda tuntukwa uuna tandi lesha omahokololo gomalweendo gomahala gi ili nogi ili. Ohandi kala nda fa ndi wete ndi li kokule negumbo nokuli.’ Tatekulu Lennart gwokoSweden, ngoka e na omimvo 75, okwa li i ilongo elaka epe.

KALA HO GANDJA: “Gandjeni, nane wo otamu ka pewa.” (Lukas 6:38, NW) Ninga oonkambadhala wu kale ho longitha ethimbo lyoye niiniwe yoye nayalwe. Shino otashi ke ku kwathela wu kale ho pondola nowa nyanyukwa. Kuku Hosa gwokoBrazil, ngoka e na omimvo 85, oha longo nuudhiginini a kwathele yalwe nonando oku na omangambeko gopalutu. Okwa ti: “Ohandi hiya ookuume mboka taye ehama nenge ya teka omukumo noku ya nyolela oontumwafo. Omathimbo gamwe ohandi ya tumine  omagano. Mboka taye ehama, ondi hole wo oku ya telekela nenge oku ya ningila uunima uutoye.”

Ngele ohatu gandja, otashi ka tsa yalwe omukumo ya kale wo haya gandja. Tatekulu Jan gwokoSweden, ngoka e na omimvo 66, okwa ti: “Ngele oho ulukile yalwe ohole, ohashi inyengitha yalwe yu ulike ohole nosho wo uukuume.” Odhoshili kutya omuntu ngoka ha gandja ohu ulike ombepo yuukumwe noha pandula uuna yalwe taya nyanyukilwa uukumwe mboka.

KALA OMUNAMBILI: “Onakuholela uuhalu we oti iyoolola mo; oye onakwiindumbika ondumbo noshaa shoka [shoondunge].” (Omayeletumbulo 18:1, OB-1954) Omathimbo gamwe otashi vulika wu kale wa hala okwiikalela, ihe yanda okukala wiikalela nokukala wa mwena. Tatekulu Innocent gwokoNigeria, ngoka e na omimvo 72, okuhole okukala pamwe nookuume. Okwa ti: “Ondi hole okweendathana naatu yomapipi ga yoolokathana.” Tatekulu Börje gwokoSweden, ngoka e na omimvo 85, okwa ti: “Ohandi kambadhala okukala pamwe naagundjuka. Uuna ndi li nayo, oonkondo dhawo ohadhi ningitha ndje ndi kale ndi uvite omugundjuka natango momutima.” Omathimbo gamwe, kala ho katuka onkatu wu hiye ookuume koye. Tatekulu Han-sik gwokoSouth Korea, ngoka e na omimvo 72, okwa ti: “Ngame nanekulu lyandje otu hole okuhiya ookuume ketu yomapipi agehe, opo tu lye uulalelo pamwe nayo.”

Ookuume ohaya popi aluhe. Molwaashoka okupopya oku li pamaludhi ogendji, owa pumbwa okukala wu na ekwatathano ewanawa nookuume. Kala wu na ko nasha nayalwe. Kuku Helena gwokoMosambike, ngoka e na omimvo 71, okwa ti: “Ngame omunambili nohandi ungaunga nayalwe nesimaneko. Ohandi pulakene shoka taya ti, opo ndi vule okumona shoka tayi ipula nasho naashoka yehole.” Tatekulu José ngwokoBrazil, ngoka e na omimvo 73, okwa ti: “Aantu oye hole okukala pamwe naamboka haya pulakene, aanahenda noye na ko nasha nayalwe, mboka haya pandula yalwe pethimbo lyo opala nosho wo mboka ye hole okuninga omashendjo omawanawa.”

Uuna to popi omadhiladhilo goye, kotokela ‘oohapu dhoye dhi kale aluhe oombwanawa.’ (Aakolossa 4:6) Kala wu hole yalwe noku ya tsa omukumo.

KALA HO PANDULA: ‘Kaleni mu shi okuhambelela.’ (Aakolossa 3:15, OB-1954) Ngele owa kwathelwa sha, ulika olupandu. Okuulika olupandu ohaku tu kwathele tu kokeke ekwatathano ewanawa. Kuku Marie-Paule gwokoKanada, ngoka e na omimvo 74, okwa ti: “Ngame nomusamane gwandje otwa tembukile kegumbo limwe. Opwa li pu na ookuume oyendji mboka ye tu kwathela. Itatu mana oku ya pandula. Otwe ya tumine nokuli uukalata womapandulo paumwene nayamwe ohatu li pamwe nayo omalupita.” Kuku Jae-won gwokoSouth Korea, ngoka e na omimvo 76, oha pandula yalwe mboka haye mu faalele kOshinyanga shUukwaniilwa. Okwa ti: “Ohandi pandula noonkondo komakwatho agehe ngoka nohandi ya pe okamaliwa komahooli. Omathimbo gamwe ohandi ya longekidhile omagano pamwe nuuntumwafo womapandulo.”

Komeho gaayihe, pandula sho wu na omwenyo. Omukwaniilwa omunandunge Salomo okwe tu dhimbulukitha a ti: “Ombwa yi na omwenyo oyi vule onime ya sa.” (Omuuvithi 9:4) Odhoshili kutya uuna tu na iikala iiwanawa nehalo lyokuninga omalunduluko, otatu vulu okunyanyukilwa ethimbo lyuukulupe.