သမ္မာကျမ်းစာက သင့်အိမ်ထောင်ရေးကို ကူညီပေးနိုင်
သမ္မာကျမ်းစာက သင့်အိမ်ထောင်ရေးကို ကူညီပေးနိုင်
အချို့သူတို့အတွက် အိမ်ထောင်ရေးဟူသောစကားလုံးသည် သာယာချမ်းမြေ့ဖွယ်စိတ်ကူးများကို ဖြစ်ပေါ်စေသည်။ အခြားသူတို့အတွက် ယင်းစကားလုံးသည် နှလုံးနာစရာဖြစ်စေသည်။ အမျိုးသမီးတစ်ဦးက “ကျွန်မရဲ့စိတ်နှလုံးထဲမှာ ကွာရှင်းထားသလိုခံစားရတယ်” ဟု ဝမ်းနည်းစွာပြောဆိုခဲ့သည်။ “တစ်ချိန်လုံး ကျွန်မပစ်ပယ်ထားခံရတယ်၊ အထီးကျန်နေတယ်လို့ပဲ ခံစားရတယ်။”
တစ်ချိန်က တစ်ဦးကိုတစ်ဦး ချစ်ခင်မြတ်နိုးပါမည်ဟု ကတိပြုခဲ့ကြသူနှစ်ဦးကို အဘယ်အကြောင်းက အလွန်အလှမ်းကွာဝေးသွားစေခဲ့သနည်း။ အကြောင်းတစ်ခုမှာ အိမ်ထောင်ရေးတွင် အဘယ်အရာပါဝင်ပတ်သက်ကြောင်း ပညာပေးမခံရသောကြောင့်ဖြစ်၏။ ဆေးဘက်ဆိုင်ရာသတင်းဆောင်းပါးရေးသူတစ်ဦးက “ကျွန်တော်တို့ဟာ ဘာလေ့ကျင့်သွန်သင်မှုမှ မရထားဘဲ အိမ်ထောင်ပြုကြတယ်” ဟူ၍ ပြောသည်။
ယနေ့ ထိုအကြောင်းကိုသိသူနည်းကြောင်း အမေရိကန်ပြည်ထောင်စု၊ နယူးဂျာစီပြည်နယ်ရှိ ရက်ဂျာစ်တက္ကသိုလ်မှ သုတေသနပြုချက်တစ်ရပ်ဖြစ်သော နိုင်ငံတကာအိမ်ထောင်ရေးစီမံချက် ပြုလုပ်သောလေ့လာမှုတစ်ရပ်က ထောက်ခံသည်။ “ဤလေ့လာမှုတွင်ပါဝင်သူ များစွာတို့သည် အိမ်ထောင်ရေးမသာယာသော၊ သို့မဟုတ် ကွာရှင်းထားသောမိဘများရှိသည့် မိသားစုတွင် ကြီးပြင်းလာခဲ့ကြ၏” ဟု ဤစီမံချက်၏ဒါရိုက်တာများက ရေးသားဖော်ပြသည်။ “မသာယာသောအိမ်ထောင်ရေးဟူသည် အဘယ်အရာဖြစ်ကြောင်း သူတို့ကောင်းစွာသိထားကြသော်လည်း သာယာချမ်းမြေ့သောအိမ်ထောင်ရေးသည် အဘယ်အရာဖြစ်ကြောင်းကို သူတို့အသေအချာမသိကြချေ။ အချို့သူတို့က သာယာပျော်ရွှင်သောအိမ်ထောင်ရေးကို ‘ကျွန်ုပ်တို့မိဘများ၏အိမ်ထောင်ရေးနှင့် ဆန့်ကျင်ဘက်’ ဟူ၍သာ ဖော်ပြနိုင်ကြသည်။”
ခရစ်ယာန်များသည် အိမ်ထောင်ရေးပြဿနာများနှင့် ကင်းလွတ်ကြသလော။ မကင်းလွတ်ပါ၊ အမှန်မှာ ပထမရာစုရှိ ခရစ်ယာန်အချို့ကို သူတို့၏အိမ်ထောင်နှင့် “လွတ်စေခြင်းငှာမကြံစည်” ရန် ဆုံးမညွှန်ကြားရသည့်အထိ ဖြစ်ခဲ့သည်။ (၁ ကောရိန္သု ၇:၂၇) ရှင်းနေသည်ကား မစုံလင်သောလူသားနှစ်ဦး ပေါင်းစပ်ဖွဲ့စည်းထားသည့် အဘယ်အိမ်ထောင်မဆိုသည် ရံဖန်ရံခါပြဿနာများရှိမည်မှန်သော်လည်း ကျွန်ုပ်တို့ အကူအညီရရှိထားပါသည်။ ခင်ပွန်းသည်များနှင့် ဇနီးသည်တို့သည် သမ္မာကျမ်းစာမူများကို လိုက်လျှောက်ကျင့်သုံးခြင်းအားဖြင့် သူတို့၏ဆက်ဆံရေးကို တိုးတက်ကောင်းမွန်လာစေနိုင်ပါသည်။
အမှန်မှာ သမ္မာကျမ်းစာသည် အိမ်ထောင်ရေးလက်စွဲစာအုပ် မဟုတ်ချေ။ သို့သော် အိမ်ထောင်ရေးအစီအစဉ်ကို အစပြုခဲ့သောအရှင်သခင်က သမ္မာကျမ်းစာကို မှုတ်သွင်းရေးသားထားစေခဲ့သောကြောင့် ၎င်း၏မူများသည် အကူအညီဖြစ်မည်ဟု ကျွန်ုပ်တို့ယုံကြည်စိတ်ချနိုင်ကြသည်။ ပရောဖက်ဟေရှာယမှတစ်ဆင့် ယေဟောဝါဘုရားသခင်က ဤသို့မိန့်တော်မူခဲ့သည်– “ငါသည် သင်၏အကျိုးနှင့်ယှဉ်သောအရာကိုသွန်သင်၍ သင်သွားအပ်သောလမ်းဖြင့်ပို့ဆောင်သော သင်၏ဘုရားသခင် ထာဝရဘုရား[သခင်]ဖြစ်၏။ သင်သည် ငါ၏ပညတ်တို့ကို စောင့်ရှောက်ပါစေသော။ သို့ပြုလျှင် သင်၏ချမ်းသာသည် မြစ်ကဲ့သို့လည်းကောင်း၊ သင်၏ဖြောင့်မတ်ခြင်း . . . သည် သမုဒ္ဒရာလှိုင်းတံပိုးကဲ့သို့လည်းကောင်း ဖြစ်ရလိမ့်မည်။”—ဟေရှာယ ၄၈:၁၇၊ ၁၈။
သင်နှင့် သင်၏အိမ်ထောင်ဖက်စပ်ကြား တစ်ချိန်ကရှိခဲ့သောမေတ္တာသည် စတင်၍ပျောက်ပျက်နေပြီလော။ အချစ်မဲ့သောအိမ်ထောင်ရေးတွင် သင်ကျော့မိနေသည်ဟု ခံစားရပါသလော။ အိမ်ထောင်သက် ၂၆ နှစ်ရှိပြီဖြစ်သော ဇနီးသည်တစ်ဦးက ဤသို့ပြောခဲ့သည်– “ဒီလိုဆက်ဆံရေးမျိုးကြောင့် ခံစားရတဲ့နာကျင်မှုကို ထုတ်ဖော်ပြောဆိုဖို့ခက်လွန်းလှပါတယ်။ အဲဒီနာကျင်မှုဟာ ကျွန်မစိတ်ထဲမှာ အမြဲကိန်းအောင်းနေသလို တည်ရှိနေပါတယ်။” သင်ထင်သလိုဖြစ်မလာသော၊ ကျေနပ်မှုမရသော အိမ်ထောင်ရေးတစ်ခုတွင် ကြိတ်မှိတ်ခံနေမည့်အစား အိမ်ထောင်ရေးသာယာဖို့ ကြိုးစားပြုလုပ်လျှင် မကောင်းပေလော။ နောက်ဆောင်းပါးက ခင်ပွန်းသည်များနှင့် ဇနီးသည်တို့သည် ကတိကဝတ်ပြုခဲ့သည့်အတိုင်း ပြုမူခြင်းနှင့်ပတ်သက်၍ သူတို့၏အိမ်ထောင်ရေးသာယာဖို့ သမ္မာကျမ်းစာမူများက မည်သို့အကူအညီပေးနိုင်ကြောင်း ဖော်ပြပါလိမ့်မည်။