ကင်ညာနိုင်ငံတွင် ထိုက်တန်သူများကို ရှာဖွေခြင်း
ကင်ညာနိုင်ငံတွင် ထိုက်တန်သူများကို ရှာဖွေခြင်း
ကင်ညာနိုင်ငံသည် သဘာဝအလှနှင့်ပြည့်စုံသော နိုင်ငံတစ်နိုင်ငံဖြစ်သည်။ ထူထပ်သောသစ်တောများ၊ ကျယ်ပြန့်သောလွင်ပြင်များ၊ အလွန်ပူပြင်းသည့်သဲကန္တာရများနှင့် နှင်းဖုံးနေသောတောင်များသည် သာယာကြည်နူးဖွယ်ကောင်းသော ဤနယ်မြေကိုတင့်တယ်လှပစေသည်။ ၎င်းသည် မြင်းဒရယ် တစ်သန်းကျော်နှင့် အန္တရာယ်သင့်နေသည့်ကြံ့များ၏ ဇာတိမြေဖြစ်သည်။ မြက်ခင်းပြင်များကိုဖြတ်၍ ရွေ့ရှားသွားလာနေသည့် များပြားလှသော သစ်ကုလားအုတ်အုပ်စုများကိုလည်း တွေ့မြင်နိုင်သည်။
အရှိန်ပြင်းစွာပျံဝဲတတ်သည့် လင်းယုန်ငှက်များမှသည် သာယာနာပျော်ဖွယ်တေးသံများနှင့် ချိုသာသောအသံများပေးသည့် အရောင်စုံသောတေးသီငှက်မြောက်မြားစွာအထိ အာကာသကောင်းကင်ဆိုင်ရာသတ္တဝါများလည်း အများအပြားရှိသည်။ ထို့ပြင် ဆင်များနှင့် ခြင်္သေ့များကို မည်သူသတိမပြုမိဘဲနေမည်နည်း။ ကင်ညာနိုင်ငံ၏ ရှုခင်းများနှင့်အသံများသည် မေ့နိုင်ဖွယ်မရှိပေ။
သို့တိုင် ဤလှပတင့်တယ်သောနယ်မြေတစ်လွှားကြားရသည့် အခြားအသံတစ်သံရှိသေးသည်။ ၎င်းမှာ မျှော်လင့်ချက်သတင်းကို ကြေညာနေသည့် ထောင်နှင့်ချီသောသူတို့၏အသံဖြစ်သည်။ (ဟေရှာယ ၅၂:၇) ထိုအသံများသည် လူမျိုးနှင့်ဘာသာစကားပေါင်း ၄၀ ကျော်ပြောသူတို့ထံ ရောက်ရှိနေသည်။ ဤသဘောမျိုးဖြင့် ကင်ညာနိုင်ငံသည် ဝိညာဉ်ရေးအရလှပသော နိုင်ငံတစ်နိုင်ငံလည်းဖြစ်သည်။
ကင်ညာလူမျိုးအများစုသည် ဘာသာရေးကိုင်းရှိုင်းပြီး ဝိညာဉ်ရေးရာကိုဆွေးနွေးရန် တလိုတလားရှိကြသည်။ သို့ရှိစေကာမူ ကင်ညာနိုင်ငံသည် အခြားတိုင်းပြည်များစွာကဲ့သို့ပင် ပြောင်းလဲနေသောကြောင့် စကားပြောဆိုရန် လူများကိုရှာဖွေခြင်းသည် စိန်ခေါ်ချက်တစ်ခုဖြစ်နေသည်။
စီးပွားရေးအခြေအနေ ကျပ်တည်းမှုကြောင့် လူအများ မိမိတို့၏ဘဝလမ်းစဉ်ကိုပြောင်းလဲရန် ဖိအားပေးခံရကြသည်။ ထုံးတမ်းစဉ်လာအရ အိမ်၌သာအလုပ်လုပ်ကြသည့် အမျိုးသမီးများသည် ယခုတွင် ရုံးများ သို့မဟုတ် ကားလမ်းများတစ်လျှောက် အသီးအနှံ၊ ဟင်းသီးဟင်းရွက်၊ ငါးရောင်းခြင်းနှင့် ခြင်းတောင်းရက်ခြင်းကို လုပ်ကိုင်နေကြရသည်။ အမျိုးသားများသည် မိမိတို့မိသားစုကိုကျွေးမွေးထောက်ပံ့ရန် အချိန်ကြာကြာ ပင်ပင်ပန်းပန်း အားထုတ်လုပ်ဆောင်ကြရသည်။ ကလေးများပင် သူတို့၏လက်ကလေးများထဲတွင် မြေပဲလှော်၊ ကြက်ဥပြုတ်အထုပ်များအပြည့်နှင့် လမ်းမများပေါ်လျှောက်သွားကာ မိမိတို့ကုန်များကို ရောင်းချနေကြရသည်။ အကျိုးဆက်အနေနှင့် တစ်နေ့တာအတွင်း လူအနည်းငယ်သာ အိမ်၌ရှိကြသည်။ ထိုအခြေအနေက ဘုရားသခင့်နိုင်ငံတော်သတင်းကောင်းကြေညာသူများအတွက် ပြောင်းလဲမှုများပြုရန် လိုအပ်စေခဲ့သည်။
ယေဟောဝါသက်သေများ၏ အသင်းတော်များသည် အိမ်ပြင်တွင် မိမိတို့၏နေ့စဉ်လုပ်ငန်းဆောင်တာများကို ဆောင်ရွက်နေကြသူများနှင့်အတူ သူငယ်ချင်းများ၊ ဆွေမျိုးများ၊ စီးပွားရေးသမားများနှင့် လုပ်ဖော်ဆောင်ဖက်များကို အာရုံစိုက်ကြရန် အကြံပေးခံရကြသည်။ ညီအစ်ကိုများသည် တွေ့နိုင်သည့်နေရာတိုင်းတွင် လူများကိုဟောပြောခြင်းဖြင့် တုံ့ပြန်ခဲ့ကြသည်။ (မဿဲ ၁၀:၁၁) ဤသို့တိုးချဲ့ရန် အားထုတ်မှုက အကျိုးများဖြစ်ထွန်းစေခဲ့ပါသလော။ အမှန်ပင် အကျိုးဖြစ်ထွန်းခဲ့ပြီ! နမူနာအချို့ကို သုံးသပ်ကြည့်ပါ။
ဆွေမျိုးများ—ကျွန်ုပ်တို့၏အရင်းနှီးဆုံးအိမ်နီးချင်းများ
ကင်ညာနိုင်ငံ၏မြို့တော် နိုင်ရိုဘီတွင်နေထိုင်သူ သုံးသန်းခန့်ရှိသည်။ မိမိကိုယ်တိုင်၏သားသည် သက်သေခံတစ်ယောက်ဖြစ်နေ၍ များစွာစိတ်ပျက်ရသည့် ယေဟောဝါသက်သေများကိုမနှစ်သက်သော အငြိမ်းစားစစ်ဗိုလ်တစ်ဦးသည် ထိုမြို့၏အရှေ့ဘက်တွင်နေထိုင်သည်။ ဖေဖော်ဝါရီလတစ်လတွင် ထိုအငြိမ်းစားအရာရှိသည် သားဖြစ်သူနေထိုင်သော ရစ်ဖ်တောင်ကြားဒေသရှိ နာခူရူမြို့သို့ မိုင် ၁၀၀ ခရီးကိုသွားရောက်ခဲ့သည်။ ထိုသို့အလည်အပတ်သွားချိန်တွင် သားဖြစ်သူသည် ထာဝရအသက်ရစေသော အသိပညာ*စာအုပ်ကို သူ့အားလက်ဆောင်ပေးခဲ့သည်။ ဖခင်ဖြစ်သူသည် ယင်းကိုယူပြီး အိမ်ပြန်သွားခဲ့သည်။
အိမ်ပြန်ရောက်သောအခါ ယခင်ကအရာရှိဖြစ်သူသည် ဇနီးသည်အား ထိုစာအုပ်ပေးလိုက်ရာ ယင်းကို ယေဟောဝါသက်သေများထုတ်ဝေကြောင်းမသိဘဲ စတင်ဖတ်ရှုတော့သည်။ တဖြည်းဖြည်းနှင့် ကျမ်းစာအမှန်တရားသည် သူ၏နှလုံးကိုထိမိလာကာ သိလာသမျှကို ခင်ပွန်းအားဝေမျှပြောဆိုခဲ့သည်။ စူးစမ်းလိုစိတ်ဖြင့် သူသည်လည်း ၎င်းစာအုပ်ကိုစတင်ဖတ်ရှုလေသည်။ ထုတ်ဝေသူများကို သူတို့သိရှိလာသောအခါ မိမိတို့သည် ယေဟောဝါသက်သေများနှင့်ပတ်သက်၍ အမှန်မကြားသိခဲ့ကြကြောင်း သဘောပေါက်လေသည်။ ထိုအခါ ဒေသခံသက်သေခံများနှင့်ဆက်သွယ်ပြီး ကျမ်းစာသင်အံမှုစခဲ့သည်။ ထိုစာအုပ်ကို ကိုယ်တိုင်ဖတ်ရှုခဲ့ခြင်းမှ ဆေးလိပ်သောက်ခြင်း၊ ရောင်းခြင်းသည် ခရစ်ယာန်မပီသကြောင်း သဘောပေါက်ခဲ့သည်။ (မဿဲ ၂၂:၃၉; ၂ ကောရိန္သု ၇:၁) ထိုအခါ တုံ့ဆိုင်းမနေဘဲ သူတို့ဆိုင်ရှိ စီးကရက်အားလုံးကို ဖျက်ဆီးပစ်လိုက်ကြသည်။ လအနည်းငယ်ကြာသော် သူတို့သည် နှစ်ခြင်းမခံရသေးသော ကြေညာသူများဖြစ်ကြရန် အရည်အချင်းပြည့်မီလာပြီး မကြာမီ ခရိုင်စည်းဝေးကြီးတစ်ခု၌ နှစ်ခြင်းခံခဲ့ကြသည်။
အမှိုက်သရိုက်မှ ရတနာတစ်ခုရရှိ
မြို့တော်နယ်ပယ်၏အချို့သောဒေသများတွင် ထောင်နှင့်ချီသောလူများနေထိုင်ကြသည့် ပြန့်ကျဲနေသောကျေးရွာများရှိသည်။ ဤတွင် ရွှံ့၊ သစ်သား၊ သတ္တုအစအနများ သို့မဟုတ် သွပ်ပြားများနှင့်ဆောက်လုပ်ထားသည့် အိမ်တန်းများကိုတွေ့ရှိရသည်။ စက်ရုံအလုပ်ရုံများတွင် အလုပ်အကိုင်ရှားပါးသည့်အခါ လူများသည် ကြံဖန်ပြုလုပ်တတ်ကြသည်။ ဂျူအာ ကာလီ (ဆွာဟီလီစကားဖြင့် “ရက်စက်သောနေ”) အလုပ်သမားများသည် နေရောင်ခြည်အောက်တွင် ကားတာယာအဟောင်းများမှ ကြိုးသိုင်းဖိနပ်များ၊ သို့မဟုတ် စွန့်ပစ်ထားသောသံဘူးများမှ ရေနံဆီမီးခွက်များကို တပင်တပန်းပြုလုပ်ကြရသည်။ အခြားသူများမူ ပြန်လည်အသုံးပြုနိုင်ရန် စက္ကူ၊ သံဘူးများနှင့် ပုလင်းများကို အမှိုက်ပုံများတွင်ရှာဖွေကြသည်။
အမှိုက်သရိုက်မှ ရတနာတစ်ခုရနိုင်မည်လော။ ရနိုင်ပါသည်! ညီအစ်ကိုတစ်ဦးက ဤသို့ပြန်ပြောပြသည်– “ဗလကောင်းပြီး ညစ်ပတ်ပေရေတဲ့အဝတ်အစားနဲ့ ကြမ်းတမ်းပုံရတဲ့လူတစ်ယောက်ဟာ စွန့်ပစ်ထားတဲ့ သတင်းစာနဲ့မဂ္ဂဇင်းတွေအပြည့်ပါတဲ့ ပလတ်စတစ်အိတ်ကြီးတစ်ခုကိုထမ်းပြီး ကျွန်တော်တို့ရဲ့အစည်းအဝေးခန်းမမြေကွက်ထဲ လျှောက်လာတယ်။ သူ့နာမည်က ဝီလျံလို့ခေါ်တယ်လို့ပြောပြပြီး ‘မကြာသေးခင်ကထုတ်တဲ့ ကင်းမျှော်စင်တွေခင်ဗျားမှာရှိလား’ လို့ ကျွန်တော့်ကိုသူမေးတယ်။ သူဘာကိုရည်ရွယ်တယ်ဆိုတာစဉ်းစားရင်း ကျွန်တော်အတော်လေးစိုးရိမ်သွားတယ်။ မဂ္ဂဇင်းငါးစောင်ကို ကျွန်တော်ပြတဲ့အခါ သူကတစ်အုပ်ပြီးတစ်အုပ်ကိုကြည့်ပြီးနောက် ‘ဒါတွေအားလုံးကျွန်တော်ယူမယ်’ လို့ပြောတယ်။ တအံ့တဩနဲ့ ကျွန်တော့်အခန်းထဲကိုပြန်ဝင်သွားပြီး သင်သည် ကမ္ဘာ့ပရဒိသုအတွင်း ထာဝစဉ်အသက်ရှင်နိုင်သည် ဆိုတဲ့စာအုပ်ကိုယူလာခဲ့တယ်။ * ပရဒိသုရုပ်ပုံကို ကျွန်တော်ပြပြီး လူတွေနဲ့အခမဲ့ကျမ်းစာသင်အံမှု ပြုလုပ်တဲ့အကြောင်းရှင်းပြခဲ့တယ်။ အဲဒီနောက် သူ့ကိုကျွန်တော် ဒီလိုအကြံပေးလိုက်တယ်– ‘ဝီလျံ မနက်ဖြန်လာမလား။ ကျွန်တော်တို့သင်အံမှုစရအောင်။’ ပြောတဲ့အတိုင်းပဲ သူလုပ်ခဲ့တယ်!
“တနင်္ဂနွေတစ်နေ့ကျတော့ ပထမဆုံးအကြိမ် အစည်းအဝေးကိုသူလာတက်ခဲ့တယ်။ အဲဒီနေ့မှာ ကျွန်တော်က လူထုဟောပြောချက်ပေးနေတယ်။ အထဲကိုဝီလျံဝင်လာပြီး ပရိသတ်ကို အမြန်ဝေ့ကြည့်လိုက်တော့ ကျွန်တော့်ကိုစင်မြင့်ပေါ်မှာတွေ့သွားတာနဲ့ ခန်းမအပြင်ဘက်ကို ထွက်ပြေးသွားခဲ့တယ်။ နောက်ပိုင်းမှာ ဘာကြောင့်အဲဒီလိုလုပ်တာလဲလို့ သူ့ကိုမေးကြည့်တယ်။ ရှက်ကိုးရှက်ကန်းနဲ့ သူဒီလိုပြန်ဖြေတယ်– “လူတွေက အရမ်းကိုသန့်ရှင်းကြတာ။ ကျွန်တော်ကြောက်သွားတယ်။”
“ဝီလျံဟာ သင်အံမှုမှာတိုးတက်လာတာနဲ့အမျှ ကျမ်းစာအမှန်တရားက သူ့အသက်တာကို ပြောင်းလဲစေခဲ့တယ်။ ရေချိုး၊ ဆံပင်ညှပ်၊ သန့်ရှင်းသပ်ရပ်တဲ့အဝတ်အစားတွေကိုဝတ်ပြီး မကြာခင် စည်းဝေးတွေကိုမှန်မှန်တက်လာတယ်။ ထာဝရအသက်ကိုရစေသောအသိပညာ စာအုပ်ကိုထုတ်ဝေလိုက်တဲ့အခါ အဲဒီစာအုပ်နဲ့စပြီး ကျွန်တော်တို့ကျမ်းစာလေ့လာကြတယ်။ အဲဒီအတောအတွင်း သီအိုကရက်တစ်ဓမ္မအမှုကျောင်းမှာ ဟောပြောချက်နှစ်ခုပေးနေပြီး နှစ်ခြင်းမခံသေးတဲ့ကြေညာသူတစ်ဦးဖြစ်လာတယ်။ အထူးစည်းဝေးနေ့မှာ သူနှစ်ခြင်းယူတဲ့အခါ ကျွန်တော်ရဲ့ဝိညာဏညီအစ်ကိုအဖြစ် ကြိုဆိုရလို့ ဝမ်းသာပီတိဖြစ်ခဲ့ရတယ်။”
ဝီလျံသည် ကင်းမျှော်စင်မဂ္ဂဇင်း၏တန်ဖိုးကို မည်သည့်နေရာတွင် ပထမဦးဆုံးတွေ့ခဲ့ရသနည်း။ “အမှိုက်သရိုက်ထဲမှာ ပစ်ထားတဲ့စာရွက်တွေထဲက စာစောင်တချို့ကို ကျွန်တော်တွေ့ခဲ့တာပါ။” မှန်ပါသည်၊ ဖြစ်နိုင်ဖွယ်မရှိသောထိုနည်းဖြင့် ရတနာတစ်ခုကို သူတွေ့ရှိခဲ့သည်!
အလုပ်ခွင်တွင်သက်သေခံခြင်း
ကျွန်ုပ်တို့၏အလုပ်ခွင်တွင် အလွတ်သဘောသက်သေခံရန် အခွင့်အရေးယူဖို့အတွက် အမြဲတစေနိုးနိုးကြားကြားရှိသလော။ နိုင်ရိုဘီအသင်းတော်တစ်ခုမှာ အကြီးအကဲတစ်ဦးဖြစ်သူ ဂျိမ်းစ်သည် ထိုနည်းဖြင့် ကျမ်းစာအမှန်တရားကို ကြားသိခဲ့ရသည်။ တစ်ဖန် သူသည် အခြားသူများကိုချဉ်းကပ်ရန် ထိုနည်းလမ်းကိုအသုံးပြုရာတွင် ကျွမ်းကျင်လာသည်။ ဥပမာ၊ တစ်ခါက လုပ်ဖော်ဆောင်ဖက်တစ်ဦးသည် “ယေရှုကယ်တင်သည်” ဟူသည့် ရင်ထိုးစာတန်းတပ်ဆင်ထားပြီး ရုံးတွင်းသို့ဝင်လာသည်ကို ဂျိမ်းစ်တွေ့ခဲ့သည်။ ဧဝံဂေလိတရားဟောပြောသူ ဖိလိပ္ပုကိုတုပကာ ဂျိမ်းစ်သည် အလုပ်ဖော်အား ဤသို့မေးလိုက်သည်– “ဒီစကားလုံးတွေက ဘာဆိုလိုတယ်ဆိုတာကို တကယ်သဘောပေါက်သလား။” (တမန်တော် ၈:၃၀) ထိုမေးခွန်းက ကောင်းမွန်သောဆွေးနွေးမှုတစ်ခုကို စတင်စေခဲ့သည်။ ကျမ်းစာသင်အံမှုစတင်ခဲ့ပြီး ထိုသူသည်နောက်ပိုင်းတွင်နှစ်ခြင်းယူခဲ့သည်။ ဂျိမ်းစ်သည် အခြားသူများနှင့်ရော အောင်မြင်မှုရရှိခဲ့ပါသလော။ သူ့ကိုပြောပြခွင့်ပြုပါ–
“တောမ်နဲ့ကျွန်တော်က ကုမ္ပဏီတစ်ခုထဲမှာ အလုပ်လုပ်ကြတယ်။ ဝန်ထမ်းကြိုပို့ကားကို အတူစီးလေ့ရှိတယ်။ တစ်မနက်မှာ ကျွန်တော်တို့အတူထိုင်ဖြစ်ကြတယ်။ ကျွန်တော်တို့ရဲ့စာအုပ်တစ်အုပ်ကို ကျွန်တော်ဖတ်နေပြီး အဲဒါကိုတောမ်ကောင်းကောင်းမြင်နိုင်အောင် ကိုင်ထားတယ်။ ကျွန်တော်မျှော်လင့်တဲ့အတိုင်းပဲ သူ့ရဲ့အာရုံကိုဖမ်းစားနိုင်ခဲ့ပြီး ဝမ်းသာစွာနဲ့ သူ့ကိုစာအုပ်ငှားပေးလိုက်တယ်။ ဖတ်ခဲ့ရတဲ့အရာတွေကို သူအရမ်းစွဲမှတ်သွားပြီး ကျမ်းစာသင်အံမှုကိုလက်ခံခဲ့တယ်။ အခုဆို သူနဲ့သူ့ဇနီးတို့ဟာ နှစ်ခြင်းခံပြီးတဲ့ ယေဟောဝါရဲ့ကျေးကျွန်တွေဖြစ်နေကြပြီ။”
ဂျိမ်းစ်ကဆက်၍ ဤသို့ပြောပြသည်– “ကျွန်တော်တို့ကုမ္ပဏီရဲ့ နေ့လယ်ထမင်းစားချိန်အတွင်းမှာ မကြာခဏဆိုသလို အရမ်းကိုစိတ်ဝင်စားဖို့ကောင်းတဲ့ စကားစမြည်ပြောဆိုမှုတွေရှိခဲ့တယ်။ အဲ့ဒီအချိန်မျိုးတွေမှာ ဧဖရိမ်နဲ့ ဝေါလ်တာတို့ကို ကျွန်တော်ဆုံတွေ့ခဲ့တာ။ ကျွန်တော်ဟာ သက်သေခံတစ်ယောက်ဖြစ်တာကို နှစ်ယောက်စလုံးကသိကြတယ်။ ယေဟောဝါသက်သေတွေကို ဘာကြောင့်ဒီလောက်အတိုက်အခံလုပ်ကြရသလဲဆိုတာကို ဧဖရိမ်သိချင်ခဲ့တယ်။ ဝေါလ်တာက သက်သေခံတွေနဲ့ တခြားဘာသာတွေ ကွဲပြားခြားနားတဲ့ကိစ္စကို မေးမြန်းခဲ့တယ်။ သူတို့နှစ်ယောက်စလုံးက ကျွန်တော်ပေးခဲ့တဲ့ ကျမ်းစာအဖြေတွေကို အရမ်းကျေနပ်သဘောကျသွားပြီး ကျမ်းစာသင်ဖို့သဘောတူခဲ့ကြတယ်။ ဧဖရိမ်ဟာ မြန်မြန်ဆန်ဆန်တိုးတက်လာတယ်။ အတော်ကြာတော့ သူနဲ့သူ့ဇနီးတို့ဟာ ယေဟောဝါထံ သူတို့အသက်တာကို ဆက်ကပ်အပ်နှံခဲ့ကြတယ်။ အခုသူဟာ အကြီးအကဲတစ်ယောက်အဖြစ်အမှုဆောင်နေပြီး သူ့ဇနီးက မှန်မှန်ရှေ့ဆောင်တစ်ယောက်ဖြစ်တယ်။ ဒါပေမဲ့ ဝေါလ်တာကတော့ ပြင်းထန်တဲ့ဆန့်ကျင်မှုတွေကိုကြုံရတဲ့အတွက် သူလေ့လာနေတဲ့စာအုပ်ကို လွှင့်ပစ်လိုက်တယ်။ ဒါပေမဲ့ ကျွန်တော်ဇွဲနဲ့ဆက်ကြိုးစားခဲ့တဲ့အတွက် သင်အံမှုကိုသူပြန်ဆက်လုပ်ခဲ့တယ်။ အခုသူလည်း အကြီးအကဲတစ်ဦးအဖြစ် အမှုဆောင်ခွင့်ရနေတယ်။” ဂျိမ်းစ်သည် သူ၏အလုပ်ခွင်တွင် အလွတ်သဘောသက်သေခံရန်အခွင့်အလမ်းများကို အရယူခဲ့သောကြောင့် စုစုပေါင်း ၁၁ ယောက်ကို စစ်မှန်သောခရစ်ယာန်များဖြစ်လာစေခဲ့သည်။
အံ့သြဖွယ်အကောင်းဆုံးရလဒ်တစ်ခု
ဗစ်တိုးရီးယားအိုင်၏ကမ်းခြေပေါ်ရှိ ကျေးရွာငယ်တစ်ခုတွင် မိတ်ဆွေများနှင့်ဆွေမျိုးများသည် အသုဘအခမ်းအနားတစ်ခု၌ စုဝေးခဲ့ကြသည်။ အသုဘပို့ဆောင်သူတို့တွင် သက်ကြီးရွယ်အိုသက်သေခံတစ်ဦးပါဝင်သည်။ သူသည် ဒေါ်လီအမည်ရှိသော ကျောင်းဆရာမတစ်ဦးထံချဉ်းကပ်ပြီး သေသူတို့၏အခြေအနေနှင့် သေခြင်းကိုထာဝစဉ်ဖယ်ရှားပေးမည့် ယေဟောဝါ၏ရည်ရွယ်ချက်တို့ကိုရှင်းပြခဲ့သည်။ သူ၏လိုလားသောတုံ့
ပြန်မှုကိုသတိပြုမိပြီး ဤသို့အာမခံခဲ့သည်– “ခင်ဗျားရဲ့ဇာတိမြို့ကိုပြန်ရောက်တဲ့အခါ ကျွန်တော်တို့ရဲ့ခရစ်ယာန်သာသနာပြုတစ်ယောက် ခင်ဗျားဆီရောက်လာပြီး ကျမ်းစာသင်ပေးလိမ့်မယ်။”ဒေါ်လီ၏ဇာတိမြို့သည် ကင်ညာနိုင်ငံ၏ တတိယအကြီးဆုံးမြို့တော်ဖြစ်သည်။ ထိုအချိန်၌ သက်သေခံသာသနာပြုလေးယောက်သာ ထိုတွင်အမှုဆောင်နေကြသည်။ သက်ကြီးရွယ်အိုညီအစ်ကိုသည် အဘယ်ခရစ်ယာန်သာသနာပြုကိုမျှ ဒေါ်လီထံသွားရန် အကြောင်းမကြားခဲ့ပေ။ ထိုအတိုင်းပင်ဖြစ်လာလိမ့်မည်ဟု သူအပြည့်အဝယုံကြည်စိတ်ချခဲ့ခြင်းသာဖြစ်သည်။ ထိုအတိုင်းပင်ဖြစ်ခဲ့ပါသည်! များမကြာမီ ခရစ်ယာန်သာသနာပြုညီအစ်မတစ်ဦးသည် ဒေါ်လီနှင့်တွေ့ပြီး ကျမ်းစာသင်အံမှုစတင်ခဲ့သည်။ ဒေါ်လီသည် ယခုနှစ်ခြင်းခံယူပြီးပြီဖြစ်ကာ သူ၏သမီးငယ်သည် သီအိုကရက်တစ်ဓမ္မအမှုကျောင်းတွင် နာမည်စာရင်းသွင်းထားပြီး သားနှစ်ယောက်လည်း နှစ်ခြင်းယူပြီးပြီဖြစ်သည်။ သူသည် ရှေ့ဆောင်လုပ်ငန်းကျောင်းကို တက်ရောက်ခွင့်ပင်ရခဲ့၍ ပျော်ရွှင်မှုခံစားခဲ့ရသည်။
တိုးတက်မှုများကိုဂရုပြုခြင်း
အလွတ်သဘောသက်သေခံခြင်းကို အလေးထားခြင်းက ကင်ညာနိုင်ငံရှိ ထောင်နှင့်ချီသောသူတို့အား သတင်းကောင်းကိုကြားနာစေခဲ့ပြီ။ ဤအလွန်အရေးပါသောလုပ်ငန်းတွင် ကြေညာသူ ၁၅,၀၀၀ ကျော်ပါဝင်နေကြပြီး လွန်ခဲ့သောနှစ်က ခရစ်တော်၏သေခြင်းအောက်မေ့ရာပွဲတော်ကို ၄၁,၀၀၀ ကျော်တက်ရောက်ခဲ့ကြသည်။ ကင်ညာနိုင်ငံတစ်ဝန်းလုံးတွင် အစည်းအဝေးတက်ရောက်သူ အရေအတွက်သည် နိုင်ငံတော်ကြေညာသူအရေအတွက်၏ နှစ်ဆဖြစ်လေ့ရှိသည်။ ယင်းက နိုင်ငံတော်ခန်းမများ ပို၍လိုအပ်လာစေခဲ့သည်။
နိုင်ငံတော်ခန်းမများကို မြို့ကြီးများနှင့် ဝေးလံခေါင်သီသောဒေသများ နှစ်ခုလုံးတွင် ဆောက်လုပ်လျက်ရှိသည်။ ၎င်းတို့ထဲမှတစ်ခုသည် နိုင်ရိုဘီ၏အရှေ့မြောက်ဘက် မိုင် ၂၀၀ ခန့်တွင်ရှိသော ဝေးလံသည့် ဆမ်ဘူရူမြို့တွင်ဖြစ်သည်။ ၁၉၃၄ တွင် ပထမဆုံးသွပ်မိုးနှင့်အိမ်ကိုဆောက်ခဲ့ရာ ၎င်းသည် နေရောင်အောက်တွင် အရောင်ဝင်းလက်လျက်ရှိသောကြောင့် ထိုမြို့ကို ဆမ်ဘူရူစကားဖြင့် “တောက်ပခြင်း” ဟုအဓိပ္ပာယ်ရသော မာရာလာလ်ဟု ခေါ်တွင်ခဲ့ကြသည်။ နောက်ခြောက်ဆယ့်နှစ်နှစ်အကြာ၌ မာရာလာလ်တွင် သွပ်မိုးနှင့် နောက်ထပ်အဆောက်အအုံတစ်ခုကို ဆောက်လုပ်ခဲ့သည်။ ၎င်းသည်လည်း စစ်မှန်သောဝတ်ပြုရေးအတွက် ဒေသခံနေရာဖြစ်သောကြောင့် အလွန် “ဝင်းလက်” ၍ “တောက်ပ” လျက်ရှိသည်။
ကင်ညာနိုင်ငံ၏ ဤဝေးခေါင်သောဒေသတွင် ကြေညာသူ ၁၅ ယောက်သည် ပထမဆုံးသော ဘုရားသခင့်နိုင်ငံတော်ခန်းမဆောက်လုပ်ရန် အလွန်ကြိုးစားအားထုတ်ခဲ့ကြသည်။ ရန်ပုံငွေနည်းသောကြောင့် ညီအစ်ကိုများသည် ဒေသခံပစ္စည်းများကို အားထားခဲ့ကြရသည်။ မြေနီကိုရေဆွတ်ကာ ထောင်ထားသောတိုင်များကြား သိပ်သည်းစွာသွပ်သွင်း၍ နံရံများကိုပြုလုပ်ခဲ့ကြသည်။ ထိုနံရံများကို နွားချေးနှင့်ပြာရောနှောကာ ချောမွေ့အောင်လိမ်းကျံကြရာ နှစ်နှင့်ချီခံသည့် ခိုင်မာသောအချောကိုင်ခြင်းကို ပြုလုပ်ခဲ့ရသည်။
အဆောက်အအုံအတွက် တိုင်များရရှိရန် ညီအစ်ကိုများသည် သစ်ပင်ခုတ်ရန်ခွင့်ပြုချက် ရယူခဲ့ကြရသည်။ သို့သော် အနီးဆုံးသစ်တောသည် ခြောက်မိုင်ခန့်ကွာဝေးသည်။ ညီအစ်ကို၊ ညီအစ်မများသည် ထိုသစ်တောသို့လမ်းလျှောက်သွား၍ သစ်ပင်များကိုခုတ်လှဲကာ လုံးချောခုတ်ထစ်ပြီး ဆောက်လုပ်ရေးမြေနေရာသို့ တိုင်များကိုပြန်သယ်ယူလာရသည်။ တစ်ကြိမ်တွင် သစ်တောမှအပြန်ခရီးကြမ်းနှင်လာစဉ် ညီအစ်ကိုများကို ရဲကတားဆီးကာ သူတို့၏ခွင့်ပြုချက်သည် တရားမဝင်ဟုဆိုသည်။ ရဲသားက အထူးရှေ့ဆောင်ကို သစ်ပင်များခုတ်လှဲသည့်အတွက် အဖမ်းခံရမည်ဟုဆိုသည်။ ရဲသားကိုကောင်းစွာသိသော ဒေသခံညီမတစ်ယောက်က– “ကျွန်မတို့ရဲ့ညီအစ်ကို,ကို ရှင်ဖမ်းမယ်ဆိုရင် ကျွန်မတို့အားလုံးလည်း သစ်ပင်ခုတ်ခဲ့တဲ့အတွက် အားလုံးကို ရှင်ဖမ်းရလိမ့်မယ်!” ထိုအခါ အရာရှိသည် သူတို့အားလုံးကိုသွားခွင့်ပြုလိုက်သည်။
တောထဲတွင် သားရိုင်းတိရစ္ဆာန်များရှိသောကြောင့် သွားလာရခြင်းမှာ အန္တရာယ်မကင်းပေ။ တစ်နေ့တွင် ညီမတစ်ယောက်သည် သစ်ပင်တစ်ပင်ကိုခုတ်လှဲခဲ့သည်။ ယင်းသည် မြေကြီးပေါ်လှဲကျသည်နှင့် တိရစ္ဆာန်တစ်ကောင်သည် ခုန်၍ပြေးသွားသည်ကို သူတွေ့ရသည်။ ညိုဝါရောင်တောက်ပခြင်းကြောင့် သမင်တစ်ကောင်သာဖြစ်မည်ဟု ထင်ခဲ့သော်လည်း နောက်ပိုင်းခြေရာများအားဖြင့် ယင်းသည်ခြင်္သေ့တစ်ကောင်ဖြစ်ကြောင်း တွေ့ခဲ့ရသည်! ယင်းသို့သောအန္တရာယ်များရှိသော်ငြား ညီအစ်ကိုများသည် ခန်းမကိုပြီးစီးအောင်ဆောက်လုပ်ခဲ့နိုင်ကြပြီး ယေဟောဝါအားချီးမွမ်းရာ “တောက်ပ” သည့်နေရာတစ်ခုအဖြစ် ဆက်လက်တည်ရှိနေသည်။
၁၉၆၃၊ ဖေဖော်ဝါရီ ၁ ရက်သည် ကင်ညာနိုင်ငံ၏သီအိုကရက်တစ်သမိုင်းတွင် ထူးခြားသောနေ့တစ်နေ့ဖြစ်သည်။ ထိုနေ့တွင် စတုရန်းပေ ၈၀ ရှိတစ်ခန်းတည်းသော ပထမဆုံးဌာနခွဲရုံးကို ဖွင့်လှစ်ခဲ့သည်။ ၁၉၉၇၊ အောက်တိုဘာ ၂၅ ရက်သည် ကင်ညာနိုင်ငံ၏သီအိုကရက်တစ်သမိုင်းတွင် နောက်ထပ်မှတ်တိုင်တစ်ခုဖြစ်ခဲ့သည်—စတုရန်းပေ ၈၄,၀၀၀ ရှိဗေသလအဆောက်အအုံသစ်ကို ဆက်ကပ်အပ်နှံသည့်နေ့ဖြစ်သည်! ထိုအပြီးသတ်စီမံကိန်းသည် သုံးနှစ်တာအတွင်း ကြိုးစားပမ်းစားအားထုတ်မှု၏ ထူးခြားသောနိဂုံးဖြစ်ခဲ့သည်။ ၂၅ နိုင်ငံမှ စေတနာ့ဝန်ထမ်းများသည် ရွှံ့ထူပြီး ပေါင်းပင်များသည့် ၇.၈ ဧကရှိလယ်ကွက်ကို ဗေသလမိသားစုဝင် ၈၀ အဆင်ပြေလွယ်ကူစွာနေထိုင်နိုင်သည့် ဌာနခွဲအသစ်အတွက် လှပသောဥယျာဉ်အသွင်သို့ ပြောင်းလဲပေးခဲ့သည်။
မိမိလူမျိုးတော်အတွက် ယေဟောဝါပြုလုပ်တော်မူရာများကြောင့် ကျွန်ုပ်တို့ဝမ်းမြောက်ရန် အကြောင်းများစွာရှိပါသည်။ ကင်ညာနိုင်ငံ၌ ထိုက်တန်သူများကိုအရှိန်အဟုန်တိုးမြှင့်၍ အနှံ့အပြားရှာဖွေရန် မိမိကျေးကျွန်များ၏စိတ်နှလုံးကို လှုပ်ရှားပေးကာ ယင်းနိုင်ငံကို ဝိညာဉ်ရေးရာလှပသည့် နယ်မြေအဖြစ်ပြုလုပ်ပေးခြင်းကြောင့် ကိုယ်တော်ကိုများစွာကျေးဇူးတင်ပါသည်။
[Footnotes]
^ အပိုဒ်၊ 13 ကင်းမျှော်စင် သမ္မာကျမ်းစာနှင့် ဝေစာအသင်း၊ မြန်မာမှထုတ်ဝေသည်။