အကျင့်သိက္ခာ အဘယ်နေရာတွင် တွေ့နိုင်သနည်း
အကျင့်သိက္ခာ အဘယ်နေရာတွင် တွေ့နိုင်သနည်း
ကျင့်ဝတ်စံနှုန်းများ ပြောင်းလဲနေသည့်လောကတွင် ကျွန်ုပ်တို့ အသက်ရှင်နေကြရသည်။ အတိတ်က ပြစ်တင်ရှုတ်ချခဲ့သော မရိုးသားသည့်အကျင့်အကြံများကို မျက်မှောက်ခေတ်တွင် မသိကျိုးကျွန်ပြုနေကြသည်။ သူခိုးများနှင့် လူလိမ်များကို မီဒီယာများ၌ မကြာခဏ ချီးမွမ်း၊ အမွှမ်းတင်ခဲ့ကြပြီ။ ရလဒ်အနေနှင့် လူများစွာသည် သမ္မာကျမ်းစာပါ ဤဖော်ပြချက်နှင့် တူလာကြသည်– “သင်သည် သူခိုးကိုမြင်လျှင် အားရတတ်၏။”—ဆာလံ ၅၀:၁၈၊ သမ္မာ။
သို့သော် လူလိမ်များကို သဘောကျစရာအကြောင်း လုံးဝမရှိပါ။ စာရေးဆရာတစ်ဦး ဤသို့ဖော်ပြ၏– “အလိမ်ကျွမ်းကျင်သူ၏ ထူးခြားသောစရိုက်မှာ အလွန်ငယ်သည့်အရွယ်တွင်ပင် သူ့ဝန်းကျင်ရှိလူတို့ကို ဉာဏ်ဆင်လှည့်စားနိုင်သည့် ပင်ကိုစွမ်းရည်ဖြစ်သည်။ ပိုဆိုးသည်မှာ ယင်းသို့ဉာဏ်ဆင်လှည့်စားခြင်းသည် အပြစ်ရှိသည်၊ နောင်တယူရမည်ဟူသောအသိစိတ် လုံးဝမရှိခြင်းဖြစ်သည်။ ဆန့်ကျင်ဘက်အနေနှင့် သူတို့သည် ထိုသို့ပြုရ၍ အလွန်စိတ်ကျေနပ်ကြသည်—ထိုစိတ်ကျေနပ်မှုကြောင့် အလိမ်ခံရသူတို့၏ ဆိုးကျိုးများကိုထည့်မတွက်ဘဲ သူတို့လိုချင်သည့် အဘယ်အရာကိုမဆိုရရန် ဆက်၍ဉာဏ်ဆင်လှည့်စားကြသည်။”
မုဆိုးမတစ်ဦး၏ စုဆောင်းထားရာများ အလိမ်ခံရသည့်အခါ လူအများစုသည် ကိုယ်ချင်းစာသနားကြသော်လည်း စီးပွားရေးလုပ်ငန်းကြီးတစ်ခု သို့မဟုတ် အာမခံကုမ္ပဏီတစ်ခုမှငွေများ လိမ်လည်ဖြတ်စားခံရသည့်အခါ သိပ်ဝမ်းမနည်းကြပါ။ စီးပွားရေးလုပ်ငန်းများသည် ချမ်းသာကြွယ်ဝကြသည်ဟု အများစုက ဆိုကြသည်။ သို့သော် ထိုသို့သောလိမ်လည်ဖြတ်စားမှုသည် စီးပွားရေးလုပ်ငန်းလောက်ကိုသာ အခက်တွေ့စေသည်မဟုတ်ပါ၊ သူတို့၏ဆုံးရှုံးမှုအတွက် ဝယ်ယူသုံးစွဲသူများကို အစားလျော်စေကြသည်။ ဥပမာ၊ ယူနိုက်တက်စတိတ်တွင် အလိမ်ခံရသည့်ငွေကို ကာမိစေရန် မိသားစုတိုင်းသည် တစ်နှစ်လျှင် အပိုအာမခံကြေး ဒေါ်လာ ၁,၀၀၀ ကျော်ပေးကြရသည်။
ထို့ပြင် အဝတ်အစား၊ နာရီ၊ ရေမွှေး၊ အလှပြင်ပစ္စည်းများနှင့် လက်ကိုင်အိတ်စသော ကုန်ပစ္စည်းများကို တံဆိပ်အတုဖြင့် ထုတ်လုပ်ထားသောကြောင့် များစွာသောသူတို့သည် ဈေးပေါပေါဖြင့် ဝယ်ယူသုံးစွဲခွင့် ရကြသည်။ ပစ္စည်းအတုများသည် နှစ်စဉ် ဒေါ်လာသန်းပေါင်း ထောင်နှင့်ချီ၍ စီးပွားဖြစ်နေကြသည်ကို သူတို့သိကြသော်လည်း မိမိတို့ကို ဘာမျှထိခိုက်မှုမရှိဟု ယူဆကြသည်။ သို့သော် ဝယ်ယူသုံးစွဲသူများသည် တရားဝင်ကုန်ပစ္စည်းများနှင့် ဝန်ဆောင်မှုများအတွက် များစွာပေးဆောင်ကြရသည်။ ထို့ပြင် ပစ္စည်းအတုများကို ဝယ်ယူခြင်းသည် ရာဇဝတ်သားများကို ငွေပေးနေခြင်းဖြစ်သည်။
လိမ်လည်လှည့်ဖြားမှု နှိမ်နင်းရေးတွင်ပါဝင်သော စာရေးဆရာတစ်ဦးက ဤသို့ရေးခဲ့၏– “ယနေ့ လိမ်လည်လှည့်ဖြားမှု ဤမျှများနေရသည့် အဓိကအကြောင်းမှာ လူ့ကျင့်ဝတ်နှင့်မညီသည့်လူ့ဘောင်တွင် ကျွန်ုပ်တို့ အသက်ရှင်နေရသောကြောင့်ဖြစ်သည်။ လိမ်လည်လှည့်ဖြားမှုသည် ထူးခြားသည့်စရိုက်လက္ခဏာဖြစ်လာသည်အထိ လူ့ကျင့်ဝတ်များ သိသိသာသာကျဆင်းနေသည်။ . . . အိမ်တွင် လူ့ကျင့်ဝတ်အကြောင်းကို မသွန်သင်သော လူ့ဘောင်ဖြစ်နေသည်။ ကျောင်းဆရာများသည် ကိုယ်ကျင့်တရားအကြောင်း သွန်သင်ပေးသူဟု စွပ်စွဲခံရနိုင်သောကြောင့် ကျောင်းတွင်လည်း လူ့ကျင့်ဝတ်အကြောင်း မသွန်သင်ကြတော့သည့် လူ့ဘောင်တွင် ကျွန်ုပ်တို့ အသက်ရှင်နေရကြသည်။”
ဆန့်ကျင်ဘက်အနေနှင့် ယေဟောဝါသက်သေများသည် ဘုရားသခင်၏ နှုတ်မြွက်စကားတော်ပါ ကိုယ်ကျင့်တရားစံနှုန်းနှင့်အညီ နေထိုင်ရန် ကြိုးစားနေကြပြီး ယင်းကို သွန်သင်ပေးကြသည်။ သူတို့သည် အောက်ဖော်ပြပါ မူများ၏ လမ်းညွှန်မှုကို လိုက်နာကြသည်–
● “ကိုယ်နှင့်စပ်ဆိုင်သောသူကို ကိုယ်နှင့်အမျှချစ်လော့။”—မဿဲ ၂၂:၃၉။
● “သူ့ဥစ္စာကို မတရားသဖြင့် မသိမ်းနှင့်။”—မာကု ၁၀:၁၉။
● “ခိုးတတ်သောသူသည် နောက်တစ်ဖန်မခိုးဘဲ ဆင်းရဲသောသူအား ပေးကမ်းဝေငှရန်ရှိစေခြင်းငှာ မိမိလက်နှင့် ကောင်းသောအလုပ်ကို လုပ်ဆောင်အားထုတ်စေ။”—ဧဖက် ၄:၂၈။
● ‘ငါတို့သည် အရာရာတို့၌ ကောင်းမွန်စွာကျင့်နေခြင်းငှာ အလိုရှိသောသူဖြစ်သည်။’—ဟေဗြဲ ၁၃:၁၈။
သက်သေခံများသည် မာန်ဝင်နေသူများ၊ မိမိတို့ဘာသာဖြောင့်မတ်နေသူများဟု မယူမှတ်ကြသော်လည်း အထက်ပါမူများကို လူတိုင်းလိုက်နာမည်ဆိုပါက လောကကြီးသည် နေချင်စဖွယ်ပိုကောင်းသောနေရာဖြစ်လာမည်ဟု ယုံကြည်ကြသည်။ ထိုသို့သော အခြေအနေမျိုး တစ်နေ့ ဖြစ်လာမည်ဟူသည့် ဘုရားသခင်၏ကတိတော်ကိုလည်း သူတို့ယုံကြည်ကြသည်။—၂ ပေတရု ၃:၁၃။
[စာမျက်နှာ ၁၁ ပါ အကျဉ်းဖော်ပြချက်]
ဘုရားသခင်၏ နှုတ်မြွက်စကားတော်တွင်ပါသော ကိုယ်ကျင့်တရားစံနှုန်းများနှင့်အညီ လူတိုင်း လိုက်နာနေထိုင်မည်ဆိုပါက လောကကြီးသည် နေချင်စဖွယ်ပိုကောင်းသော နေရာဖြစ်လာမည်
[စာမျက်နှာ ၁၀ ပါ ရုပ်ပုံ]
စစ်မှန်သောခရစ်ယာန်များသည် “ကိုယ်နှင့်စပ်ဆိုင်သောသူကို ကိုယ်နှင့်အမျှချစ်လော့” အစရှိသည့် သမ္မာကျမ်းစာမူများကို လိုက်နာကြ