‘Mwauvwila Mazwi Yane’

“Nga mukuvwila mazwi yane, ale mwemwe yasambi yane umu cumi, nupya mulamanya icumi, ni cumi cilamulenga ukuya antungwa.”​—YOANI 8:31, 32.

Vino Cikapiliula: “Mazwi” yakwe Yesu yakalozya kuli vino wasambilizyanga ivyafuma uku ntulo ya papelapela. Yesu watiile: “Tata uwantumile u wampeela isunde pali vino ndinzile ukulanda nu kusambilizya.” (Yoani 12:49) Lino Yesu wapepanga kuli Yeova Leza Isi wakwe uwa kwi yulu, walanzile ukuti: “Amazwi yako ali cumi.” Nupya lino wasambilizyanga waomvyanga sana ivyaya umwi Izwi Lyakwe Leza. (Yoani 17:17; Mateo 4:4, 7, 10) Fwandi aina Klistu ya cumi ‘yakauvwila mazwi yakwe,’ kuli kuti yazumila ukuti Izwi Lyakwe Leza, Baibo aali “cumi” nupya vyonsi vino yazumilamo na vino yakacita vyasintilila pali Baibo.

Vino Aina Klistu ya Kutandikilapo Yalangililanga Ukuti Yazumila Ukuti Izwi Lyakwe Leza Aali Cumi: Umwina Klistu umwi uwalemvileko na Baibo, umutumwa Paulo, nawe kwene walangilile ukuti wacindike Izwi Lyakwe Leza wakwe vino Yesu walicindike. Walemvile ukuti: “Amalembo yonsi yafuma kuli Leza nupya yakaomviwa.” (2 Timoti 3:16) Aonsi aapeelwa umulimo wa kusambilizya aina Klistu yauze yalinzile ‘ukulalondela sana mazwi ya cumi umu misamblizizye yao.’ (Tito 1:7, 9) Aina Klistu ya kutandikilapo yayakomelizye ukuti yalinzile ukutaluka uku “mano ya untunze nu ku ucenjezi, ukulingana ni ntambi zya yantu alino ni visambilizyo vya sile sile ivya muno nsi ivyapusana nu kulonda kwakwe Klistu.”—Kolose 2:8.

Aaweni Ndakai Azumila Ukuti Izwi Lyakwe Leza Aali Cumi?: Ibuku limwi ilikalanda pali vyakwe ya Katolika (Catechism of the Catholic Church) lyalanzile ukuti: “Vino [ya Katolika] yazumilamo vitasintilila sile pali vino Malembo ya Muzilo yakalanda. Lelo yene yazumila nu mu ntambi zya yantunze.” Muli magazini imwi (Maclean) mwali mazwi yano umuomvi umwi uwa uteeko, uwa ku Toronto, umu Canada walanzile aakuti: “U mulandu ci uno tungaatungulwilwa na mazwi aalemvilwe mpiti sana? Twakwata ivingi vino tungaomvya, nomba ivintu vivyo vikakaana ukuomba ningo pano tukaika sana amano kuli vino Yesu wasambilizyanga nu ku Malembo.”

Ibuku lyuze lyakwe ya Katolika (New Catholic Encyclopedia) lyalanzile pali ya Nte Yakwe Yeova ukuti: “Vyonsi vino yazumilamo na vino yakacita vyasintilila sile pali Baibo.” Patalengile sana pano umonsi umwi uku Canada wacilinginye Nte Yakwe Yeova umwi ala akwezya ukuilondolola pakuti amusimikile. Umonsi wiyo wamunenyile ala akusonta pali Baibo ati: “Inkumanya, inalola sile cikwene icikamumanyisya.”