“Imanyisya Antu Yaa Izina Lyako”

“Indenga izina lyako ukumanyikwa ku yantu yano wampeezile umu nsi. . . . Imanyisya antu yaa izina lyako nupya ndatwalilila ukulimanyisya.”​—YOANI 17:6, 26.

Vino Cikapiliula: Yesu wamanyisyanga izina lyakwe Leza ukupitila umu kuliomvya lino wasimikilanga. Lino Yesu wabelenganga Malembo, wakwe vino wacitanga imiku iingi, walumbulanga ni zina lyakwe Leza. (Luka 4:16-21) Wasambilizye alondezi yakwe ukulapepa ukuti: “Tata, leka izina lyako licindikwe.”—Luka 11:2.

Uzye Aina Klistu ya Kutandikilapo Yamanyisyanga Uli Izina Lyakwe Leza? Umutumwa Petulo wasambilizye aikolo ya mu Yelusalemu ukuti Leza wasoolola “antu akaamilwa ukwi zina lyakwe,” ukufuma umu nko izipusanepusane. Atumwa na antu yauze yasimikilanga ukuti “wensi aakaama api zina lyakwe Yeova alapusuka.” (Milimo 2:21; Loma 10:13) Nupya yaomvizye ni zina lyakwe Leza muli vino yalembanga. Ibuku limwi (Tosefta) umwali masunde ya Yayuda, ilyasizile ukulembwa umu 300 C.E., lyalanzile pali vino alwani yosile impapulo zya ina Klistu ukuti: “Kutali uwalesizye antu ukoca mabuku yakwe ya kakosoola na mabuku yauze [aa Yayuda alandanga ukuti aina Klistu]. Lelo yosile amabuku yayo yonsi, . . . kumwi na mabuku muno yafumyanga Izina Lyakwe Leza.”

Aaweni Aakamanyisya Izina Lyakwe Leza Ndakai? Baibo imwi (Revised Standard Version) iyalemvilwe na ya National Council of the Churches of Christ aa ku United States yalanzile ukuti: “Lino kutatala kwaya aina Klistu, yalesizye Ayuda ukulaomvya sile izina lyonga pa kwama Leza uwayako sile wenga, kwati limwi yakulonda ukumupusanyako kuli ya leza yauze, nupya ukucita vivyo kutanga kwazwe umuntu akaya uku ceici ca ina Klistu ukuya nu utailo.” Fwandi api zina lyakwe Leza yapyanikizyepo ilumbo lyakuti “UMWENE.” Patalengile sana pano uteeko wa ku Vatican waneniile ya Bisyopu aa mu mpanga iya ukuti: “Yatalinzile ukulaomvya nanti ukulumbula ivilembo ivikapanga izina lyakwe Leza (YHWH) umu nyimbo nu mu mapepo yao.” *

Aaweni akaomvya nu kulenga izina lyakwe Leza ukumanyikwa uku yantu yauze ndakai? Lino Segii uwa ku Keugusitani (Kyrgyzstan) wali umwance watamvile vidyo iyalangililanga ukuti izina lyakwe Leza, a Yeova. Lelo ukufuma lilyo kwene, papisile imyaka 10 ukwaula ukuti auvwepo izina lyakwe Leza. Lyene Segii wizile akukila uku United States, nupya ya Nte Yakwe Yeova yaili yaile umu kumusimikila nupya yamulanzile izina lyakwe Leza muli Baibo. Segii watemilwe sana ukuzana antu akaomvya izina lyakuti Yeova. Nupya nga mwalonda upiliulo wa mazwi yakuti “Yeova Leza” muli dikisyonali imwi (Webster’s Third New International Dictionary) ikalondolola ukuti, “a Leza wa papelapela nupya ali Leza sile wino ya Nte Yakwe Yeova yakapepa.”

[Footnote]