1, 2. A weni uwatupeezile kampingu, nupya u mulandu ci uno tulinzile ukataizya pa kutupeela kampingu?

YEOVA LEZA waumvile antu nu untungwa wakuisolwela ivya kucita. Pakuti twasoolola ningo ivyakucita Yeova watupeela ica kututungulula. Ni cikatutungulula a Kampingu, kulikuti, amaka yano twakwata akupalula icisuma ni ciipe. Ngi cakuti tukuomvya ningo kampingu witu, angatwazwa ukulacita ivisuma lyonsi nu kutaluka uku viipe. Vino Yeova watupeela kampingu, cikalangilila ukuti watutemwa nupya akalonda ukuti twacita ivisuma.

² Antu yamwi amu nsi ii yakacita ivisuma nupya yakataluka uku viipe nandi icakuti yatamanya amasunde ya muli Baibo. (Welengini Loma 2:14, 15.) U mulandu ci? A pa mulandu wakuti yakwata kampingu. Kampingu ikaavwa antu aingi ukuti yatacita ivintu iviipe. Mutale mwelenganye vino cingaya, ngi cakuti antu yatakweti kampingu. Limwi nga tukauvwa iviipe ivingi cuze ukuluta na pali vino caya ndakai. Fwandi tulinzile twataizya pa mulandu wakuti Yeova watupeela kampingu.

3. Uzye kampingu angatwazwa uli umu cilongano?

 ³ Antu aingi yasielenganya ukuti yangasambilizya kampingu wao. Lelo antu yakwe Yeova yene yakaalonda ukuti kampingu wao aomba ningo, pano angayazwa ukuti yaombela pamwi umu cilongano. Tukalonda ukuti kampingu witu atwazwa ukwiusya vino Baibo ikalanda pa visuma ni viipe. Pakuti tusambilizye kampingu witu, tutalinzile sile ukumanya vino Baibo ikalanda, lelo tulinzile nu kucita vivyo kwene. Tulinzile ukutemwa ukusunda kuno kwaya muli Baibo nu kutaila ukuti kungatwazwa. Paulo walemvile ukuti: “Twimilila pa kunena antu kukwata kutemwa kuno kukafuma mu mwenzo uswepe, nu kwelenganya kusuma nu utailo uwa mpomvu.” (1 Timoti 1:5) Ngi cakuti twasambilizya kampingu witu nupya twatandika nu kucita vino ikutunena, tulatemwa nu kutaila sana Yeova. Vino tukaomvya kampingu witu i vikalangilila kutemwa kuno twatemwa Yeova na vino tukalondesya ukumuombela. Nupya kampingu kwene akalangilila vino twaya.

4. Uzye tungasambilizya tutuli kampingu witu?

⁴ Uzye tungasambilizya tutuli kampingu witu? Tulinzile ukuwelenga Baibo lyonsi, nu kwelenganyapo pali vino tukuwelenga alino nu kulenga Yeova ukuti aatwazwa ukulaomvya vino tukusambilila. Cii cikupiliula ukuti tutalinzile sile ukumanya ivisinka na masunde ivyaya muli Baibo, lelo tulinzile nu kuomvya vino tukusambilila. Lino tukusambilila Baibo, cino tukalonda u kumanya Yeova ningo. Tukamumanya ningo, nu kumanya vino wapata na vino watemwa. Lino tukusambilila pali Yeova lyonsi, lyene kampingu witu alaamanya zuwa iciipe ni cisuma. Ngi cakuti tukusambilizya kampingu witu lyonsi, tulatandika ukwelenganya wakwe vino Yeova akaelenganya.

5. I vyani vino tumasambilila umwi lyasi lii?

⁵ Limwi tungayuzya tuti: Uzye nga twasambilizya ningo kampingu witu, angatwazwa uli ukupingulapo ningo? Uzye tungacindika uli kampingu wakwe Yauze? Uzye Kampingu angatwazwa uli ukucita ivisuma? Lekini tulande pa vintu vitatu vino tulinzile ukuomvya kampingu: (1) pa umi witu, (2) umwa kulezezya icitendwe, na (3) umu mulimo wa kusimikila.

6. Uzye tukapingulapo uli pa umi witu?

⁶ Baibo ikatunena ukuti tutacita ivintu ivingatuletelela, nupya ikatunena nu kuteka umwenzo lino tukucita vimwi, wa kulya nu kumwa. (Mapinda 23:20; 2 Kolinto 7:1) Ngi cakuti tukuvwila vino Baibo ikalanda, cingatwazwa ukucingilila umi witu. Nandi cakuti tukalwala nu kufwa ndakai, uzye tungapingulapo uli pa kulwaziwa? Ndakai umu mpanga izingi mwaya imilembo iyaomviwa pa myaka iingi na ino yakupanga likwene. Ilingi, aku maofesi yakwe ya nte yakapokelela makalata ukufuma uku ina na ya nkazi akauzya apa milwazizye ipusane-pusane. Aingi yakauzya  ukuti, “Uzye umuomvi wakwe Yeova angazumila imilwazizye iya musango uu?”

7. Uzye tungapingulapo uli pa kulwaziwa ukuomvya uwazi?

⁷ Aina aakaombela apa maofesi yakwe ya Nte Yakwe Yeova, na ya eluda umu vilongano, yatakwata amaka akupingwila Aina Klistu yauze pali vino yangalwaziwa nandi cakuti iiyayuzya. (Galatiya 6:5) Nomba ya eluda yanganenako Umwina Klistu pali vino Yeova akalanda pa milwazizye iiyo, apakuti apingulepo ningo. Yeova watunena ukutaluka uku wazi. (Milimo 15:29) Isunde lii likatwazwa ukuti tutalinzile ukuzumila ukulwaziwa ukuli konsi ukuomvya uwazi nanti sile ukuzumila ivintu 4 ivikapanga uwazi. Ilyasi lii lingacuzya kampingu wa mwina Klistu ngi cakuti limwi wazumila ukulwaziwa ukuomvya utuntu tunono utukafuma umu vintu 4 ivikapanga uwazi. * (Lolini futunoti.) I vyani na vyuze vino Baibo yalandapo ivingatwazwa ukupingula ningo pali vino tungatemwa ukulwaziwa?

8. Uzye ilembelo lyakwe Filipi 4:5 lingatwazwa uli ukusoolola ningo ivyakucita apa umi witu?

⁸ Mapinda 14:15 ikalanda ukuti: “Umuntu iciwelewele wene akataila muli vyonsi kwene, lelo uwamano wene akawaka imipitile yakwe.” Ndakai kwaya imilwazizye ino yamanyikwa ukuti ikapozya indwala zimwi. Fwandi tulinzile ukucenjela uku milwazizye imwi ino cingaloleka kwati ikapozya, nomba itasininkiziwa. Paulo walemvile ukuti: “Mwalanga kuteeka mwenzo uku antu onsi.” (Filipi 4:5) Kuteeka umwenzo kungatwazwa ukuti twike sile mano uku kuombela Yeova ukuluta ukusumba sile amano apa umi witu. Ngi cakuti twika sile amano uku kusakamala umi witu ale lyene tukucita ivingatuzipila sile swenga. (Filipi 2:4) Twamanya ukuti tutange tuye nu umi umalilike umu nsi ii. Acino, mwaiusya ukuti ukuombela Yeova ali cintu icisuma sana cino mungasoololapo ukucita umu umi winu.—Welengini Filipi 1:10.

9. Uzye ilembelo lyakwe Loma 14:13, 19 lingatwazwa uli ivyakupingula pa umi, nupya tungalenga uli ukuti umu cilongano mutaya umutende?

⁹ Umwina Klistu uwateeka umwenzo  asipatikizya yauze ukucita vino akwelenganya ukuti vili ningo. Umu mpanga imwi, mwali atwalana yamwi akomelizye yauze ukutandika ukulya ivyakulya vino yaweni ukuti ivisuma. Yanenyile na aina yamwi umu cilongano ukuti nayo yangatandika ukulya, lelo yamwi yene yakanyile. Lino ivyakulya vii vitaomvile ningo, aina na ya nkazi aingi yatuvwile ningo. Atwalane yaaya, yalondekwanga ukuisolwela aineco ukwezya ukulya ivyakulya vii nandi foo. Fwandi tunguzya tuti, uzye cali ningo ukunenako yauze pa vyakulya viivi, nu kuleta ukupusana umu cilongano? Umu musumba wa Loma u waliko mpiti, Aina Klistu yelenganyanga ivipusane apa milile na pa kuzevya ukwaliko. Uzye Paulo wayazwile uli? Watile: “Umuntu umwi akaelenganya ukuti uwanda umwi wacindama kuluta manda yauze, lino umuze nawe akaelenganya ukuti amanda yonsi alingane. Cila muntu alinzile asininkizye cipuma mu mwenzo wakwe.” Acino twacenjela ukuti tutalenga yauze ukusoka pali vino tukacita.—Welengini Loma 14:5, 13, 15, 19, 20.

10. U mulandu ci uno tulinzile ukucindikila vino yauze yakapingulapo ukucita? (Lolini icikope cakutandikilako.)

¹⁰ Insita zimwi, tutange tumanye umulandu uno umwi umu cilongano angapingwilapo ukucita vimwi, vino umweneco akulola ukuti vili sile ningo. Uzye nga caya vii tungacita uli? Tulinzile ukuteeka umwenzo pa kupingula nupya tutalinzile ukumunena ukuti atacita vino watapingula. Limwi angaya ale akulondekwa ukusambilizya kampingu wakwe ningo nandi ale kampingu wakwe umutonte. (1 Kolinto 8:11, 12) Nandi limwi cingaya ukuti, sweswe kwene tukulondekwa ukusambilizya kampingu witu ningo. Fwandi nga tukulonda ukupingula ukucita vimwi nanti ukusoolola vino tulinzile ukulwaziwa, swensi cila muntu tulinzile ukuisoolwela ivya kucita nu kuzumila vyonsi ivingafumamo.

11, 12. Uzye Baibo ikatwazwa uli ukusoolola ivya kulezezyamo icitendwe?

¹¹ Yeova watuumvile ukuti, ukulezya icitendwe kwatwazwa nupya twaipakizya. Solomoni walanzile ukuti kwaya “insita ya kusansamuka” ni “nsita ya kucina.” (Kasambilizya 3:4) Lelo asi lyonsi lino ukulezya icitendwe kuka-azwa nanti ukulenga tupuze. Nupya tutalinzile ukulasumba sana insita ikulu ku vyakulezezyamo icitendwe. Uzye kampingu witu angatwazwa uli ukuipakizya ukulezya icitendwe uku vintu vino Yeova akalola ningo?

¹² Baibo ikatunena ukuti tulinzile ukutaluka uku “vintu vino untunze ukacita.” Ni vintu vii, i vicitwa vya winyi, kukowela, vya nsonyi, ukupepa utuluwi, ulozi, uwanisi, ukulwa, uzuwa, kusoka, kupatukana, muvimbila, ukolesi, muzangalwe, nga na vyuze vikoline na vii. Paulo walemvile ukuti, “yao akacita vintu vii yene yatalapyana uwene wakwe Leza.” (Galatiya 5:19-21) Fwandi tulinzile  ukuyuzya sweineco ukuti: Uzye kampingu wane akangazwa ukukanaya umu vyangalo muno mukaya ukucimyanya, unkalwe, uzuwa alino nu kulumbanya impanga? Uzye kampingu wane akancelula ndi cakuti natunkwa ukutamba filimu muno yakukomelezya uzelele, ukolesi alino nu kutaila imipasi?

13. Uzye ukusunda ukwaya pali 1 Timoti 4:8 na pali Mapinda 13:20 kungatwazwa uli ukusoolola ningo ivya kulezezyamo icitendwe?

¹³ Muli Baibo mwaya ivisinte ivikatwazwa ukusambilizya ningo kampingu witu, pali vino tungasoolola ivya kulezezyamo icitendwe. Baibo ikati: “Ukuyelezya umwili kukaazwilizya panono.” (1 Timoti 4:8) Aingi yamanya ukuti ukutukusya umwili kungalenga tuye nu umi usuma. Nga ndi cakuti tukulonda ukutukusya umwili pamwi na yauze? Uzye tulinzile ukuya pamwi sile na ali yonsi yano twatemwa? Mapinda 13:20 ikalanda ukuti: “Akapita nu wa mano nawe kwene alakwata mano,” lelo aakapita na awelewele alacula. I cumi cumi, cacindama wakwe cimwi ukuomvya kampingu witu umusambiliziwe ningo pa kusoolola ivya kulezezyamo icitendwe.

14. Uzye ulupwa lumwi, lwaomvizye uli ilembelo lyakwe Loma 14:2-4?

¹⁴ Ya Daniela na ya Christian yakwata ana akazyana yaili. Ya Christian yalanzile ukuti: “Lino twali pa mapepo ya lupwa twalanzile pa vya kulezezyamo icitendwe. Twalanzyanyizye ukuti kwaya ukucina kumwi ukwazipa na kuno kutazipa. Uzye aantu ya musango cii yano tulinzile ukucinila pamwi nayo? Lyene umwanitu wenga wailizyanyizye ukuti, lino kukaya insita ya kupuuza uku sukulu kuno akasambilila, kwaya ya Nte yamwi ance yano yakacita ivintu vino asitemwa. Insita imwi akapatikiziwa nu kuti nawe angacitako ivintu kwene vivyo. Nomba twamulondolwelile ukuti cila muntu wakwata kampingu wakwe, wino akamwazwa ukusoolola ivyakucita, na antu yano angaya nayo.”—Welengini Loma 14:2-4.

15. Uzye ilembelo lyakwe Mateo 6:33 lingamwazwa uli lino mukusoolola ivya kulezezyamo icitendwe?

¹⁵ Uzye mukasumba insita ikulu sana ku vyakulezezyamo icitendwe? Uzye ivyacindama sana umu umi winu u kulongana,  ukuya umu mulimo wa kusimikila, ukuisambilizya Baibo, nanti uzye mwasumba sana mano uku vintu vya kulezezyamo icitendwe? I cani icacindama sana cino mulinzile ukucita? Yesu walanzile ukuti: “Mutale mulonde uwene wakwe Leza, nga nu wololoke wakwe, nga nawe alamupeela vintu vii vyonsi.” (Mateo 6:33) Lino mukusoolola ivya kucita, uzye mukaiusya amazwi yakwe Yesu?

16. Uzye kampingu witu akatukomelezya uli ukukosola ilandwe?

¹⁶ Kampingu umusambiliziwe ningo asitucelula sile ukuti tutacita iciipe, lelo akatwazwa nu kucita ivisuma. Pa visuma vii, paya ukusimikila uku ng’anda ni ng’anda alino nu kusimikila ukuli konsi kuno tuli. Vikwene ali vino na Paulo wacitanga. Walemvile ukuti: “Pano Mwene uwampile ilamulo lya kukosola. Kalanda kunondi ndi nsyakukosola Ilandwe.” (1 Kolinto 9:16) Nga tukukolanya Paulo tulaya na kampingu umusuma, nupya tulamanya ukuti vino tukucita ivilungame. Ngi cakuti tukusimikila ilandwe lisuma kuli yauze ala tukuyazwa ukuti yaye na kampingu musuma. Acino Paulo walanzile ukuti: “Vino tukulanda vyene ivya cumi. Caleka antu yauze muli ya kampingu yao yangasininkizya ukuti sweswe yakutailwa.”—2 Kolinto 4:2.

17. Uzye kampingu umusambiliziwe ningo watungulwile uli nkazi uwa cance?

¹⁷ Nkazi umwi uwi zina lyakuti Jacqueline, lino wali ni myaka 16 wasambililanga icisambililo cimwi (biology) muno yakaasambilila pa vintu vya umi apa sukulu. Lyene yasambililanga pali vino ivintu vizile iviyako. Walanzile ukuti: “Kampingu wane wankanyizye ukuti nani ningalandapo pali vino yasambilizyanga wakwe vino nalandangapo lyonsi. Ntalondanga ukuti nani nzumilizyeko ukuti ivintu vizile ivisanguka sile. Naile kuli ya mwalimu nu kuyanena pali vino nazumila. I canzungwisye i cakuti yampokelile ni nsansa nu kunzumilizya ukuti ninganena anji ukuti ivintu vyaumvilwe sile.” Jacqueline akalanda ukuti uvwile ningo sana pano wacisile vino kampingu umusambiliziwe ningo ukuomvya Baibo, wamunenyile ukucita. Uzye namwe, kampingu winu akamukomelezya ukucita icisuma?

18. U mulandu ci uno tulinzile ukukwatila kampingu umusuma?

¹⁸ Cino tukalondesya ukucita, u kuomvya visinte vya muli Baibo na masunde yakwe Yeova. Kampingu itu ingatwazwa ukufikilizya uyo uu. Ngi cakuti tukusambilila Baibo lyonsi nu kwelenganyapo pali vino tukuwelenga nu kuvikonka, tulasambilizya ningo kampingu witu. Lyene kampingu witu alaatutungulula ningo umu umi witu!