BEAUCOUP dimoune kapav recite la priere Notre Père, sa la priere modele ki Jésus ti montré so bann disciple-la. (Matthieu 6:9-13) Chaque fois zot faire sa la priere-la, zot appel Bondié “nou Papa.” Mais comié parmi sa bann dimoune-la kapav dire ki zot konn Li bien?

Ou, eski ou konn Bondié bien? Eski ou ena bann relation bien proche avek Li? Eski ou koz avek Li ek raconte Li ou la joie ek ou la peine? En realité, ki vedir konn Bondié?

“Jéhovah, c’est so nom”

Kitfois tou seki enn ti zenfant koné lor so papa, c’est ki li appel papa. Mais a mesure ki li grandi, li aprann konn nom ek reputation so papa ek surement li fiere so papa. Mais ki nou kapav dire lor sa Kikenn ki dan le ciel ek ki’nn donne nou la vie-la? Eski ou konn so nom ek seki sa nom-la vedir?

Mem si beaucoup dimoune repete phrase “ que ton nom soit sanctifié ” kan zot faire la priere Notre Père, kitfois zot pa koné ki pou reponn kan demann zot: “Ki sa nom-la sa?” Enn le ciel rempli avek zetoile, enn grand montagne, bann corail tou couleur ki rempli avek bann creature ki vivant, tousala zot bann preuve ki Bondié existé. Mais, sa bann kitsoz-la pa faire nou koné couma Bondié appelé. Pou nou konn so nom, nou bizin guette dan la Bible. La Bible dire dan tigit mot-mem: “Jéhovah, c’est so nom.”—Exode 15:3.

Bondié envie ki nou konn Li par so nom, Jéhovah. Kifer? Parski so nom represente seki Li été. Sa nom-la vedir litteralement “Li faire arrivé,” setadir Li vinn tou seki Li bizin pou Li realise so projet. Anou prend enn l’exemple: pou li occupe so famille, enn papa vinn enn soutien financier pou so famille, enn conseiller, enn juge, enn kikenn ki negocié, enn kikenn ki protegé, ek enn enseignant, dependant lor seki so famille bizin ek lor zot situation. Dan mem fason, nom Jéhovah donne nou garantie ki Bondié kapav accompli so volonté pou bonheur tou bann ki servi Li, mem ki arrivé dan l’avenir.

Anou examine different role ki nou Bondié ki content nou prend, dan enn certain sens, en accord avek signification so nom. Sa pou aide ou pou comprend ki qualité Bondié Jéhovah été, ek aussi aprann ki ou bizin faire pou vinn proche ar Li.

“Bondié l’amour ek la paix”

L’apotre Paul ti appel nou Createur, “Bondié l’amour ek la paix.” (2 Corinthiens 13:11) Kifer? Avant li, Jésus Christ ti dire: “Bondié finn tellement content le monde ki Li finn donne so sel Garson ki Li finn crée direct, pou ki tou seki ena la foi en li pa detruire, mais gagne la vie pou touletan.” (Jean 3:16) Parski Li ti bien content bann dimoune, Bondié ti donne so Garson ki Li bien content couma enn ranson. Grace a sa, bann ki ena la foi dan li ena possibilité pou gagne la vie eternel, debarrassé ar souffrance ki peché finn amené. C’est a cause sa ki Paul ti dire aussi: “Salaire ki peché payé, c’est la mort. Mais don ki Bondié donné, c’est la vie eternel par Christ Jésus nou Seigneur.” (Romains 6:23) Eski sa pa bizin pousse nou pou content Bondié ek vinn proche ar Li?

Bondié montré so l’amour pa zis pou bann dimoune en general, mais aussi pou chaque dimoune ki ena la foi. Dan le passé, souvent bann Israélite ti rebellé kont Bondié. Moïse ti dire zot: “Ah peuple bete ki pena sagesse, eski c’est coumsa ki zot contigne agir envers Jéhovah?  Eski Li pa zot Papa, ki’nn crée zot, ki’nn faire zot ek ki’nn rann zot bien stable?” (Deutéronome 32:6) Eski ou comprend ki sa vedir? En tant ki enn Papa ki content so bann zenfant, Jéhovah ti ena sentiment pou so peuple, malgré ki Li ti konn zot bann defaut. Li ti donne zot tou seki zot ti kapav bizin lor plan materiel, affectif ek spirituel.

Nou tou nou passe par bann periode kot nou tombé-levé ek parfois nou senti-nou malheureux, ek mem deprimé. Nou bizin enn kikenn pou aide nou ena l’attitude ki bizin lor nou situation ek nou bann probleme. Kisannla kapav aide nou? Jéhovah donne bann preuve a travers so Parole, la Bible ki Li enn Kikenn ki conseil nou ek prend nou soin avek beaucoup l’amour. Sa Livre sacré-la expliké kifer nou passe par sa quantité souffrance-la ek couma nou kapav reussi faire face ar sa. Jéhovah Li pareil couma enn papa ki avek beaucoup l’amour, aide so garson ki’nn tombé ek ki’nn blessé. Dan so grand l’amour, Jéhovah coumadir abaisse-Li pou donne nou l’aide ki nou bizin. Oui, la main Jéhovah pa trop courte pou aide bann ki ena la foi en Li.—Isaïe 59:1.

Enn lot preuve ki Bondié content nou, c’est ki Li “ecoute la priere.” (Psaume 65:2) Couma eski sa montré nou so l’amour? L’apotre Paul expliké: “Pa tracassé pou okenn kitsoz, mais dan tou kitsoz, par la priere, supplication avek bann remerciement, demann Bondié seki zot bizin; ek la paix ki Bondié donné ek ki pli grand ki tou pensée, pou protege zot leker ek zot l’esprit, par moyen Christ Jésus.” (Philippiens 4:6, 7) Si ou prié Bondié avek sincerité ek ou suive direction ki Li donné dan so Parole, ou aussi ou kapav konn “la paix ki Bondié donné ek ki pli grand ki tou pensée.”

“Enn Bondié connaissance”

Dan la Bible nou aprann ki Jéhovah “ena enn connaissance parfait.” En tant ki “enn Bondié connaissance,” Li comprend bann humain ek Li koné ki zot bizin plus ki n’importe kisannla. (Job 36:4; 1 Samuel 2:3) Par moyen so serviteur Moïse Li ti faire koné ki “enn dimoune pa vive zis avek di-pain, mais avek tou parole ki sorti dan la bouche Jéhovah.” (Deutéronome 8:3; Matthieu 4:4) Sa vedir ki pou nou trouve vrai satisfaction dan nou la vie, nou bizin plus ki zis ena bann di-bien materiel.

Nou Createur donne nou bann conseil ki ena valeur dan so Parole, la Bible. Kan nou etudié la Bible ek applik so bann conseil dan nou la vie, nou profite “tou parole ki sorti dan la bouche Jéhovah.” Par exemple, enn chretienne ki appel Zuzanna dire concernant so la vie famille: “Lire la Bible ensam, assisté bann reunion ensam, ek partage avek lezot seki nou aprann, tousala inn faire nou mariage vinn solide. Grace a l’enseignement spirituel ki Bondié donné, nou ena bann mem l’objectif ek nou finn vinn pli proche.”

Eski ou ti pou content profite sa direction spirituel ki Bondié donné-la? Kan ou etudié la Bible regulierement ek applik so bann conseil, sa permette ou gagne beaucoup benediction Bondié.—Hébreux 12:9.

‘Bondié ki sauve nou’

Zordi partout dan le monde ena beaucoup desaccord. Personne pa koné ki pou arrivé demain. Si ou reste dan enn pays kot ena la guerre, surement ou pé attann kan ou pou vive dan la paix. Dan lezot partie le monde, bann dimoune vive dan la peur a cause criminalité ek violence, l’economie ki pa stable, ek bann attak terroriste. Kisannla ki pou delivré nou ar tousala? Zordi plus ki jamais, bann dimoune bizin protection ek delivrance.

La Bible dire: “Nom Jéhovah li enn la tour solide. Enn dimoune juste galopé al ladan ek li gagne protection.” (Proverbes 18:10) Kan nou konn nom Bondié ek nou ena confiance dan sa nom-la, sa kapav faire nou pense seki Bondié inn  faire ek seki Li pou faire encore pou delivré bann ki ena la foi en Li. Jéhovah inn prouvé ki Li kapav delivré so peuple. Par exemple, Li ti sap Israël kan Li ti detruire bann char la guerre ek l’armée Pharaon. Jéhovah ti montré ki Li enn Bondié fidele, enn Bondié ki pa blié bann ki dan enn grand chagrin, ek ki envie agir dan zot faveur.—Exode 15:1-4.

En plus, nou l’avenir eternel depann lor la foi ki nou ena en Jéhovah en tant ki nou Sauveur. Le roi David ki ti regne en Israël dan le passé, ti bizin faire face ar enn quantité l’epreuve. Li ti montré la foi en Jéhovah en tant ki Sauveur kan li ti dire concernant Jéhovah: “To-mem mo Bondié ki sauve moi.” (Psaume 25:5) Avek confiance, l’apotre Pierre ti dire: “Jéhovah koné couma pou delivré bann dimoune ki attaché ar Li, kan zot dan l’epreuve.”—2 Pierre 2:9.

Concernant enn dimoune ki compte lor Li pou gagne l’aide, Bondié inn promette: “Mo pou protege li parski li’nn aprann konn mo nom.” (Psaume 91:14) Bann serviteur Bondié ki vive dan lepok moderne inn trouvé ki sa promesse-la vrai. Henryk ki reste Pologne, pé servi Jéhovah avek fidelité depuis 70 an, malgré l’opposition ek persecution ki li’nn gagné. Kan Henryk ti ena selman 16 an, bann Allemand ti envoye so papa dan camp concentration Auschwitz ek ti mette li ek so frere dan enn centre redressement nazi. Apré sa, zot ti transfert li dan plusieurs camp concentration enn apré lot. Concernant sa lepok-la, Henryk rappel: “Dan tou mo bann l’epreuve, Jéhovah jamais pa finn abandonne moi. Li finn toujours aide moi pou reste fidele, mem si plusieurs fois mo’nn manké mort.” Oui, Jéhovah donne so bann serviteur la foi ek la force ki zot bizin pou enduré.

Bientot Bondié pou montré ki Li enn Sauveur pou tou bann ki ena la foi en Li ek ki compte lor Li pou gagne delivrance. Li dire: “Mo-mem Jéhovah, ek a part moi pena okenn sauveur.” (Isaïe 43:11) Dan “la guerre grand jour Bondié, sa Kikenn Tout-Puissant-la,” Li pou detruire tou bann mauvais lor la terre ek Li pou delivré bann dimoune ki droite. (Révélation 16:14, 16; Proverbes 2:21, 22) Jéhovah donne nou sa l’assurance-la: “Bann ki ena l’humilité pou herite la terre, ek vrai-mem zot pou trouve enn grand la joie dan l’abondance la paix.”—Psaume 37:11.

Couma nou kapav vinn “bann zenfant Bondié”?

Dan lepok prophete Malaki, bann Israélite ti pretann ki Jéhovah ti zot Papa. Pourtant, kan zot ti bizin montré l’honneur envers Li ek l’attachement pou Li, zot ti offert di-pain ki ti contaminé ek bann zanimo ki ti aveugle ek ti boiteux en sacrifice. A cause sa Jéhovah ti demann zot: “Si mo enn papa, kot l’honneur ki mo merité?”—Malaki 1:6.

Pa faire mem erreur ki sa bann Israélite ki pa ti fidele-la. Nou encourage ou plutot pou aprann konn Jéhovah ek vinn proche ar Li. Disciple Jacques donne nou sa conseil-la: “Vinn proche ar Bondié, ek Li pou vinn proche ar zot.”—Jacques 4:8.

Kan enn dimoune accepté Jéhovah couma so Papa, sa mette certain responsabilité lor li. Si ou  faire zeffort pou honore Bondié kan avek fidelité, ou respecté so bann principe dan tou domaine ou la vie avek fidelité, jamais Li pa pou blié ou bann zeffort-la. Au contraire, Li pou aide ou pou marche lor sa chemin droite ki amenn dan le monde nouveau ki Li’nn promette, kot “dimoune nepli pou en deuil, zot nepli pou ploré ek nepli pou ena douleur.” (Révélation 21:4) Lerla tou bann dimoune ki obeissant ‘pou nepli esclave ar seki pé detruire zot ek zot pou gagne liberté extraordinaire bann zenfant Bondié.’—Romains 8:21.

[L’encadré page 5]

Bondié envie ki nou konn so nom, Jéhovah, ki vedir litteralement “Li faire arrivé”

[Zimage page 6]

“Dan tou mo bann l’epreuve, Jéhovah jamais pa finn abandonne moi.”—HENRYK

[Zimage page 7]

“Lire la Bible ensam, assisté bann reunion ensam, ek partage avek lezot seki nou aprann, tousala inn faire nou mariage vinn solide.”—ZUZANNA