ENN sel coup enn mine charbon ki trouve pré ar Pittsburgh, Pennsylvanie, en Amérique, ti inondé ar enn grand quantité de l’eau. Neuf dimoune ki travail dan sa mine-la ti coincé dan enn ti l’espace ki pa ti inondé apepré 70 metre enba la terre. Trois jour plitar, zot ti reussi sorti ladan, zot pa ti gagne nanyin. Couma ti reussi sap zot?

Grace a bann plan sa mine-la ek enn systeme satellite ki’nn permette zot koné exactement kot bann travailleur-la ti été (GPS), bann ki ti sauve zot ti fouille enn trou 65 centimetre largeur ek zot ti desann enn espece casier ziska kot sa bann zom-la ti coincé. Grace a sa casier-la, ti tire sa bann travailleur-la dan place ki ti kapav vinn zot tombe ek ti amenn zot enn par enn la-haut. Zot tou ti content, soulagé ek reconnaissant ki ti reussi sap zot.

La plupart parmi nou jamais pa pou coincé enba la terre pareil couma sa neuf travailleur mine-la ni nou pou bizin faire face ar la mort dan enn catastrophe. Pourtant, nou tou nou bizin secours, parski nou pa kapav evite bann mauvais consequence maladie, vieillesse ek finalement la mort. Patriarche Job ki ti fidele ti dire: “Enn dimoune ki enn femme inn donne naissance, vive pou enn tigit lé-temps, ek so la-vie rempli ar difficulté. Li’nn sorti pareil couma enn fleur ek inn coupe li, li sauvé couma l’ombrage ek li pa contigne existé.” (Job 14:​1, 2) Zordi, apepré 3,500 an plitar, sa bann parole-la zot encore toujours vrai parski kisannla parmi nou kapav sauve la mort​—consequence final nou la-vie. N’importe kot-sa nou resté ou-soit ki quantité nou prend soin nou la-santé, nou bizin secours ar souffrance, vieillesse, ek la mort, ki pa’lé largue nou.

Bann scientifik ek lezot specialiste faire beaucoup zeffort pou faire nou vive pli longtemps ki seki zordi dimoune considere couma normal. Enn l’organisation dire ki so l’objectif c’est pou “gagne victoire lor la mort ki nou pa kapav evité” ek “pou aide so bann membre dan zot bann recherche pou zot reussi trouve enn moyen pou gagne l’immortalité.” Mais, ziska ler, bann progré ki la science finn faire ek grand determination ki zot ena pa’nn reussi faire dimoune vive plus ki sa 70-80 an ki Moïse ti mentionné ena 3,500 an-la.​—Psaume 90:⁠10.

Ki ou accepté seki Job ti dire lor la vie ek la mort ou-soit non, a mesure ki bann l’année passé, ou pa pou kapav evité ki ou aussi ou “sauvé couma l’ombrage,” loin ar ou bann camarade, ou famille, ou lakaz, ek tou seki ou finn accompli, pou al ziska la mort. Le roi Salomon ki ti sage ek ki ti regne en Israël dan le passé, ti ecrire: “Bann ki vivant koné ki zot pou mort; mais bann dimoune mort pa konn nanyin ditou, zot nepli gagne okenn la-paye, parski zot souvenir nepli existé dan l’esprit bann dimoune.”​—Ecclésiaste 9:⁠5.

La realité li bien triste couma la Bible explik nou: la mort li’nn “regné couma le roi” lor l’humanité pareil couma enn chef ki dominere. Oui, la mort sa-mem nou pli pire l’ennemi ek nou bien bizin ki delivré nou ar sa. (Romains 5:⁠14; 1 Corinthiens 15:⁠26) Mem bann sauveteur ki’nn gagne pli bon formation ek ki pli bien equipé dan le monde pa kapav sap ou net ladan. Parkont, nou Createur, Jéhovah Li, Li finn organise enn secours ki pou tire nou net ladan.

[Remerciement photo lor page 3]

Photo par Gene J. Puskar-Pool/Getty Images