Ena dé-trois l’année, enn la-banque japonais ti organise enn competition avek sa theme-la: “Lettre d’amour par enn kikenn ki ena 60 an.” Ti organise sa competition-la surtout pou encourage bann Japonais ki ti ena entre 50-70 an pou dire seki zot ‘ressenti vrai-mem’ pou zot conjoint. Enn ladan ti ecrire so madame: “Kitfois to pou riyé, mais si mo pa dire toi sa, mo pou regretté. Alors laisse mo dire toi li bien fort: Merci to’nn marié avek moi.”

Dan plusieurs culture, ek aussi dan certain pays l’Asie, bann dimoune pa finn gagne l’habitude dire seki zot ressenti. Pourtant plus ki 15,000 dimoune ti participe dan sa competition-la. Bann dimoune ti tellement content sa competition-la ki ti organise enn deuxieme competition apré, ek ti mem publié bann livre basé lor sa bann lettre-la. Alors, sa montré nou ki au fond zot-mem, beaucoup dimoune bien envie dire zot conjoint seki zot ressenti pou zot ek ki quantité zot content zot. Parkont, ena lezot ki hesité pou exprime zot bann sentiment. Kifer? Kitfois c’est parski sa demann bann zeffort ek enn certain talent pou explik lezot—mem zot conjoint—seki zot ressenti pou zot.

Hitoshi Kato, ki’nn ecrire enn livre lor la retraite, dire ki beaucoup madame agé en Japon rod divorce avek zot mari parski zot ena bann sentiment negatif ki’nn bien enraciné ek ki zot inn gardé pendant plusieurs l’année. Li’nn ecrire, “Mais, sa arrivé aussi parski bann couple pa reussi dire zot camarade seki zot ressenti kan ena bann problem.”

Apré ki li’nn prend retraite, enn mari kapav gagne choque kan so madame envoye li enn papier divorce. Kitfois pendant plusieurs l’année, sa couple-la pa’nn dire seki zot ressenti pou zot camarade. Li possible ki missié ek madame toulé-deux finn faire zeffort pou exprime  zot, mais zot pa’nn arrivé garde zot conversation lor enn ton positif. Au lieu ki zot faire zot relation vinn pli solid, zot inn trouve-zot touletan pé laguerre kont zot camarade.

Couma eski bann couple kapav reglé zot problem en paix ek exprime zot bann sentiment dan enn bon fason? Kitfois sa pou interesse-ou pou koné ki ou pou trouve bann suggestion bien pratik, pa dan enn livre recent ki’nn ecrire par enn conseiller lor mariage, mais dan enn vié livre ki dimoune finn bien apprecié depuis bien longtemps—la Bible!