Le-pep Bondye Bizin Kontan la Bonte
“Ki Jéhovah pe reklam twa, apart pratik la zistis, kontan la bonte ek mars dan enn fason modes avek to Bondye?”—MIKA 6:8.
1, 2. (a) Kifer li normal ki Jéhovah atann ki so pep manifeste la bonte? (b) Ki bann kestyon konsernan la bonte, merit nu latansyon?
JÉHOVAH, Li enn Bondye ki ena la bonte. (Romains 2:4; 11:22) Premye kup imin, Adam ek Ève ti sirman rekonesan pu sa. Dan zardin Éden, zot ti anture avek bann kitsoz ki Jéhovah ti’nn kre pu rann zot ere. Sa ti temwayn la bonte ki Jéhovah manifeste anver bann dimunn. Jéhovah kontiyn montre Li bon anver tu dimunn, mem anver bann ki move ek ki pena rekonesans.
2 Dimunn finn kre dan resanblans Bondye. Akoz sa, zot ena kapasite pu reflet so bann kalite. (Genèse 1:26) Li pa etonan donk ki Jéhovah atann ki nu manifeste la bonte. Kuma Mika 6:8 dir, lepep Bondye bizin “kontan la bonte.” Me ki ete la bonte? Ki rapor la bonte ena avek bann lezot kalite ki Bondye manifeste ek ki nu’si, nu bizin manifeste? Etandone ki dimunn ena kapasite pu manifeste la bonte, kifer eski lemond li san pitye? Wi, kifer eski li pa fasil pu viv dan sa lemond-la? Kifer, nu, antan ki Kretyin, nu bizin fer tu seki nu kapav pu manifeste la bonte dan nu bann relasyon avek lezot?
Ki Ete la Bonte?
3. Kuma u pu explik la bonte?
3 Nu manifeste la bonte kan nu interes nu avek byinet nu prosin ek kan nu fer kitsoz pu zot. La bonte pus nu pu ed lezot par nu bann aksyon, ek li fer nu ena konsiderasyon dan nu bann parol. Nu montre nu bon kan nu fer dibyin, olye ditor. Enn bon dimunn se enn dimunn ki amikal, ki dus, ki konpran santiman lezot, ek ki ena bon manyer. Li zenere ek li ena konsiderasyon pu lezot. Lapot Paul ti donn bann Kretyin sa konsey-la: “Kuver zot avek bann profon santiman konpasyon, la bonte, limilite, la duser ek pasyans.” (Colossiens 3:12) Alor, la bonte form parti dan linz sinbolik ki sak vre Kretyin bizin met lor li.
4. Kuma Jéhovah inn premye pu manifeste la bonte anver limanite?
4 Se Jéhovah ki finn montre la bonte an premye. Kuma Paul inn dir, “Bondye, nu Sover, inn manifeste so bonte ek so lamur anver bann dimunn.” Kuma? “Li’nn sov nu atraver enn bain ki redonn lavi ek kan Li’nn renuvle nu par mwayin lespri sin.” (Tite 3:4, 5) Bondye servi disan Jésus pu pirifye bann Kretyin ki’nn resevwar lespri sin, seki vedir Li aplik bann byinfe la ranson an zot faver. Zot repran lavi uswa nesans grasa lespri sin ek zot vinn “enn nuvo kreasyon,” setadir bann garson spirityel Bondye. (2 Corinthiens 5:17) Pa fini, Bondye manifeste usi so bonte ek so lamur anver “la grand ful,” ki’nn “lav zot rob ek ki’nn blansi sa dan disan Lanyo.”—Révélation 7:9, 14; 1 Jean 2:1, 2.
5. Kifer li normal pou atann ki bann ki gide par lespri sin Bondye, manifeste la bonte?
5 La bonte form parti usi dan frwi lespri sin Bondye, setadir so la-fors aktif. Paul ti dir: “Frwi-de-lespri Bondye se lamur, lazwa, lape, pasyans, bienveillance, la bonte, lafwa, la duser, maîtrise de soi. Kont sa bann kitsoz-la pena okenn lalwa.” (Galates 5:22, 23) Donk eski li pa normal pu atann ki bann ki gide par lespri Bondye, manifeste la bonte anver lezot?
Vre la-Bonte Li Pa enn Febles
6. Kan la bonte li enn febles, ek kifer?
6 Sertin panse ki la bonte li enn febles. Zot krwar ki enn dimunn bizin sever, mem brit parfwa, pu lezot kapav truve ki li enn dimunn byin ferm. Me an realite, bizin buku kuraz pu manifeste vre bonte, ek pu evit bonte malplase. Vre la bonte fer parti dan frwi-de-lespri, donk li pa kapav enn latitid feb ki ferm lizye lor move kondwit. Par kont, bonte malpase li vremem enn febles, ki kapav mem fer dimunn exkiz bann move aksyon.
7. (a) Kuma eski Éli ti azir dan enn fason molo-molo? (b) Kifer bann ansyin bizin fer atansyon pu pa manifeste enn bonte malplase?
7 Anu pran legzanp Éli ki ti gran pret an Israël. Li pa ti ase disiplinn so bann garson, Hophni ek Phinéas, ki ti okip fonksyon pret dan tabernak. Zot pa ti satisfe avek porsyon sakrifis ki ti prevwar pu zot dan Lalwa Bondye. Alor, zot ti fer enn serviter al demann lavyann kri avek enn dimunn ki ti pe ofer sakrifis, avan mem ki bril lagres zanimo-la lor lotel, pu fer la fime monte. Pa fini, bann garson Éli ti gayn relasyon sexyel avek bann fam ki ti servi dan lantre tabernak. Me, olye ki Éli tir Hophni ek Phinéas dan zot fonksyon pret, li ti sinpleman repran zot dan enn fason molo-molo. (1 Samuel 2:12-29) Akoz sa, li pa etonan ki “parol Jéhovah ti vinn rar sa lepok-la”! (1 Samuel 3:1) Bann ansyin dan la kongregasyon kapav tir enn leson isi. Fode pa ki zot les zot tante pu manifeste enn bonte malplase anver bann ki ena enn move kondwit ek ki kapav met spirityalite la kongregasyon an danze. Wi, vre la bonte pa ferm lizye lor bann parol ek aksyon ki vyol bann prinsip Bondye.
8. Kuma eski Jésus inn manifeste vre la-bonte?
8 Jésus Christ, nu Model, finn les pli gran legzanp de bonte. Me zame li pa ti manifeste enn bonte malplase. La Bib dir nu ki ‘li ti resanti enn gran lafeksyon pu bann dimunn parski zot ti maltrete ek zot ti byin dezespere parey kuma bann brebi ki pena berze.’ Bann dimunn sinser pa ti per pu apros Jésus; zot ti mem amenn zot bann ti zanfan ver li. Sey imazinn pu enn ti moman, la bonte ek konpasyon ki Jésus ti manifeste kan “li [ti] pran sa bann zanfan-la dan so lebra ek li [ti] kumans beni zot.” (Matthieu 9:36; Marc 10:13-16) Selman, pa parski Jésus ti bon, ki li ti ferm lizye lor seki move. Non, li ti tuletan ferm an faver bann prinsip drwat Bondye. Grasa kuraz ki Bondye ti donn li, Jésus ti denons bann sef relizye ipokrit so lepok. Plizir fwa li ti repet sa bann parol ki nu kapav lir dan Matthieu 23:13-26: “Malediksyon lor zot, scribes ek Pharisiens, bann ipokrit!”
La Bonte ek Lezot Kalite Ki Prodir par Lespri Sin
9. Ki lyin la bonte ena avek la pasyans ek la bienveillance?
9 La bonte ena enn lyin avek lezot kalite ki prodir par lespri sin. Dan lalis frwi-de-lespri, la bonte site ant pasyans ek bienveillance (fer dibyin). Sa li apropriye, parski enn dimunn ki kiltiv la bonte, montre sa par so pasyans. Li ena pasyans mem avek bann dimunn ki pena la bonte. La bonte ena enn lyin usi avek la bienveillance, an-se-sans ki enn dimunn ki bon fer lezot dibyin par so bann aksyon. Parfwa donk, mo Grec ki tradir par “bonte,” li tradir usi par “bienveillance” (fer dibyin). La bonte bann premye Kretyin ti telman inpresyonn bann non-Kretyin, ki dapre Tertullien, zot ti apel bann ki ti swiv Jésus ‘bann dimunn ki ranpli ar la bonte.’
10. Ki lyin ena ant la bonte ek lamur?
10 La bonte ena enn lyin usi avek lamur. Konsernan so bann disip, Jésus ti dir: “Par sa zot tu pu kone ki zot mo bann disip, si zot ena lamur ant zot.” (Jean 13:35) Ek an rapor avek sa lamur-la, Paul ti dir: “Lamur ena pasyans ek li bon.” (1 Corinthiens 13:4) La bonte ena enn rapor usi avek lexpresyon “bonté de cœur” ki servi suvan dan la Bib. Sa se enn bonte ki motive par lamur fidel. Mo Hébreu ki tradir par “bonté de cœur” inplik plis ki lafeksyon. Se enn bonte ki, motive par lamur, devlop enn latasman avek enn obze ziska ki so lobzektif an rapor avek sa obze-la, li realize. Jéhovah montre so bonté de cœur, uswa so lamur fidel dan diferan fason. Par egzanp, nu truv sa dan fason ki Li sov so bann serviter ek Li protez zot.—Psaume 6:4; 40:11; 143:12.
11. Ki lasirans bonté de cœur Jéhovah donn nu?
11 Bonté de cœur ki Jéhovah manifeste, atir bann dimunn ver Li. (Jérémie 31:3) Kan bann fidel serviter Bondye bizin so delivrans uswa so led, zot kone ki so bonté de cœur li vremem enn lamur fidel anver zot. Zot kone ki zot kapav kont lor la. Donk, zot kapav priye avek konfyans, parey kuma finn exprime dan sa psaume-la: “Mwa, mo ena konfyans dan to lamur fidel; mo leker pu rezwir dan delivrans ki to [pu] amene.” (Psaume 13:5) Parski lamur Bondye Li fidel, so bann serviter kapav ena antyerman konfyans an Li. Zot ena sa lasirans-la: “Jéhovah pa pu abandonn so pep, ni Li pu kit so prop leritaz.”—Psaume 94:14.
Kifer Lemond san Pitye Kumsa?
12. Kan ek kuma eski enn reyn dominer inn kumanse?
12 Repons pu sa kestyon-la ena enn rapor avek seki ti arive dan zardin Éden. Apre kreasyon bann premye imin, enn kreatir spirityel ki ti’nn vinn egois ek arogan, ti met enn plan debut pu li diriz lemond. Ek li finn reysi; li’nn vinn “sef sa lemond-la” enn sef ki byin dominer. (Jean 12:31) Li’nn fini par gayn non Satan le Diable, pli gran lennmi Bondye ek bann dimunn. (Jean 8:44; Révélation 12:9) So plan egois pu etabli enn reyn rival ar Bondye, ti kumanse enn tipe apre kreasyon Ève. Donk, se kumsa ki enn move reyn inn kumanse kan Adam inn swazir pu pa sumet ar reyn Bondye ek pu rezet So bonte konpletman. (Genèse 3:1-6) Me mem si zot ti krwar ki zot ti pe diriz zotmem, Adam ek Ève finn an realite sumet zot ar dominasyon Satan le Diable, ek ar so linflyans egois ek arogan.
13-15. (a) Mansyonn sertin konsekans ki finn ena parski nu premye paran finn rezet reyn Jéhovah. (b) Kifer lemond li san pitye?
13 Anu get sertin konsekans ki sa finn ena. Adam ek Ève finn perdi zot plas dan zardin Éden. Zot finn bizin kit enn zardin ranpli ar verdir ek frwi ki bon pu la sante, pu al viv dan enn sityasyon difisil andeor zardin Éden. Bondye ti dir Adam: “Parski to’nn ekut to fam ek to’nn manz sa frwi ki mo ti defann zot pu manze-la, ebyin akoz twa, later pu modi. Wi, tutlong to lavi, to pu bizin rinte pu to rekolte kitsoz pu to manze. Se pikan ek move zerb ki later pu prodir pu twa.” Bondye ti modi later an-se-sans ki li ti pu vinn byin difisil pu kiltiv later. Lefe sa malediksyon-la—avek so pikan ek move zerb—ti telman afekte bann desandan Adam, ki Lamek, papa Noé, ti fer mansyon ‘duler zot lamin akoz later ki Jéhovah ti modi.’—Genèse 3:17-19; 5:29.
14 Adam ek Ève ti perdi usi lavi trankil ki zot ti pe amene. Asterla, zot ti pu konn la sufrans. Bondye ti dir Ève: “Mo pu ogmant duler to groses buku, wi, se avek sufrans ki to pu gayn zanfan. To pu resanti plis dezir pu to mari, me li, li pu dominn twa.” Plitar, Caïn, premye-ne Adam ek Ève ti tuy so frer Abel san okenn pitye.—Genèse 3:16; 4:8.
15 Lapot Jean ti dir: “Lemond antye dan puvwar le méchant.” (1 Jean 5:19) Zordi lemond manifeste bann mem move tre karakter ki so sef Satan. Dimunn egois ek arogan. Ala kifer lemond li san pitye! Me sa pa pu kontiyne tuletan. Kan Rwayom Bondye pu diriz later, Jéhovah garanti ki lemond pu ranpli avek bonte ek konpasyon, kontrerman ar sa lemond san pitye kot nu pe viv-la.
Kan Rwayom Bondye Reyne, Partu Pu Ena la Bonte
16. Kifer la bonte pu enn kalite remarkab pandan reyn Rwayom Bondye, ek ki sa obliz nu fer?
16 Tu dimunn ki sutenir Rwayom Bondye bizin renome pu zot bonte. Se seki Jéhovah ek Jésus Christ, le-Rwa dan Rwayom Bondye, reklam zot. (Mika 6:8) Jésus Christ ti donn nu enn avangu kuma la bonte pu enn kalite remarkab dan reyn ki so Papa inn konfye li. (Hébreux 1:3) Nu kapav remark sa dan bann parol ki Jésus ti dir kan li ti denons bann sef relizye so lepok, ki ti pe met bann gro fardo lor le-pep. Li ti dir: “Vinn ver mwa, zot tu ki pe rinte ek ki ena pwa lor zot, ek mwa, mo pu sulaz zot. Pran mo zug lor zot ek aprann ar mwa, parski mo dus ek mo ena limilite dan mo leker, ek zot pu gayn sulazman pu zot nam. Parski mo zug li dus ek mo la-sarz li leze.” (Matthieu 11:28-30) Buku sef relizye ek lezot dirizan sa lemond-la, inpoz enn kantite regleman ek obligasyon lor ledo bann dimunn, san exprim okenn rekonesans an retur. Par kont, seki Jésus demann so bann disip pu fer, li satisfer zot bezwin ek li dan zot porte. Wi, la sarz ki Jésus propoz so bann disip, li vremem rekonfortan ek bon! Eski sa pa pus nu pu manifeste la bonte anver lezot parey kuma Jésus ti fer?—Jean 13:15.
17, 18. Kifer nu kapav sir ki bann ki pu reyne dan lesyel avek Jésus ek tu so bann reprezantan lor later, zot pu manifeste la bonte?
17 Enn fwa, Jésus ti fer enn remark byin interesan avek so bann zapot. Seki li ti dir, ti fer byin resorti gran diferans ki ena ant reyn Rwayom Bondye ek reyn bann dimunn. La Bib dir: “Enn gran diskisyon ti leve ant zot [bann disip] pu kone kisannla pli siperyer parmi zot. Me li ti dir zot: ‘Parmi bann nasyon, le-rwa fer dominer ar lepep ek bann ki ena puvwar, zot apel Bienfaiteur. Me zot, fode pa zot kumsa. Okontrer, seki pli gran parmi zot bizin vinn pli tipti, ek seki sef bizin vinn serviter [lezot]. Parski, lekel ki pli gran, seki asiz atab, uswa seki servi? Eski se pa seki asiz atab? Me purtan mwa, mo parmi zot kuma selwi ki pe servi.’ ”—Luc 22:24-27.
18 Bann dirizan sa lemond-la ‘fer dominer ar’ zot pep; pu zot, se enn fason pu montre zot grander. Anplis, zot rod bann gran tit, kumadir sa bann tit-la fer zot vinn pli siperyer ki bann dimunn ki anba zot lotorite. Me Jésus ti dir ki enn dimunn gayn vre grander kan li fer zefor pu kontiyn servi lezot. Tu bann ki pu reyne dan lesyel avek Christ ek tu so bann reprezantan lor later, bizin efors zot pu manifeste limilite ek la bonte, parey kuma Jésus.
19, 20. (a) Kuma Jésus inn montre ki kantite Jéhovah manifeste la bonte? (b) Kuma eski nu kapav manifeste la bonte parey kuma Jéhovah?
19 Anu get lezot konsey ki Jésus ti done. Pu montre ki kantite Jéhovah manifeste la bonte, Jésus ti dir: “Si zot kontan bann ki kontan zot, ki merit zot ena? Parski mem bann ki fer pese kontan bann ki kontan zot. Ek si zot fer dibyin anver bann ki fer dibyin anver zot, vremem, ki merit zot ena? Bann ki fer pese usi fer parey. Pa fini, si zot pret san lintere bann dimunn ar ki zot atann pu gayn kitsoz an retur, ki merit zot ena? Bann ki fer pese usi pret larzan san lintere pu ki zot kapav gayn otan an retur. Okontrer, kontiyn kontan zot bann lennmi ek fer seki bon ek pret san lintere, san atann nanyin an retur. Zot rekonpans pu gran, ek zot pu vinn bann zanfan Bondye Tu Pwisan, parski Li montre Li bon [mem] anver bann ki pena rekonesans ek ki move. Kontiyn ena mizerikord, parey kuma zot Papa Li ena mizerikord.”—Luc 6:32-36.
20 La bonte ki Jéhovah manifeste, li pa enn bonte egois. Li pa demann nanyin ek li pa atann nanyin an retur. Avek bonte, Jéhovah “fer so soley lev lor bann move ek lor bann bon, ek Li fer lapli tom lor bon ek move dimunn tulede.” (Matthieu 5:43-45; Actes 14:16, 17) Alor, parey kuma Jéhovah, nu pu evit fer ditor bann dimunn ki pena rekonesans. Me pa zis sa, nu pu fer zot dibyin, mem si zot nu bann lennmi. Kan nu manifeste la bonte, nu montre Jéhovah ek Jésus ki nu anvi prezan kan zot Rwayom pu diriz later, kan la bonte ek lezot kalite pu inflyans tu relasyon ki egziste ant bann dimunn.
Kifer Nu Bizin Manifeste la Bonte?
21, 22. Kifer nu bizin manifeste la bonte?
21 Pu enn vre Kretyin, li byin inportan manifeste la bonte. Sa montre ki lespri sin pe azir lor nu. Kan nu manifeste vre la-bonte, nu imit Jéhovah ek Jésus Christ. Anfin, tu bann ki pu viv anba reyn Rwayom Bondye, zot bizin manifeste la bonte. Alor, nu bizin kontan la bonte ek aprann manifeste sa kalite-la.
22 Dan ki fason pratik nu kapav manifeste la bonte dan nu lavi tulezur? Prosin lartik pu koz lor la.
Kuma U Pu Reponn?
• Ki ete la bonte?
• Kifer lemond li san pitye?
• Kuma nu kone ki pu ena la bonte partu kan Bondye pu diriz later?
• Kifer bann ki anvi viv lor later kan Rwayom Bondye pu dirize, bizin manifeste la bonte?
[Kestyon]
[Zimaz lor paz 8]
Bann ansyin efors zot pu tret bann brebi avek bonte
[Zimaz lor paz 9]
Bann serviter Jéhovah kapav tuletan kont lor so lamur fidel dan bann moman difisil
[Zimaz lor paz 10]
Dan so bonte, Jéhovah donn tu dimunn lapli ek soley