KAN nu anpwazone par enn manze, nu gayn enn move sansasyon. Enn dimunn ki’nn anpwazone plizir fwa, bizin fer plis atansyon lor bann kitsoz ki li manze. Me, li pa pu lozik ki li aret manze net, zis pu evit tu risk ki li anpwazone ankor enn kut. Si li fer sa, li pa pu rezud so problem, okontrer li pu gayn plis problem ankor. San manze, enn dimunn pa kapav viv lontan.

Li parey kan enn kikenn trayi nu konfyans. Sa fer nu buku lapenn. Si plizir fwa dimunn finn trayi nu konfyans, sa kapav amenn nu pu byin reflesi lor swa nu frekantasyon. Me, nu pa pu regle sa problem-la si nu aret frekant bann dimunn net, zis pu evite ki zot desevwar nu. Kifer? Parski, kan nu pa fer lezot konfyans, sa kapav fer nu perdi nu boner. Pu nu viv ere, nu bizin ena bann relasyon baze lor konfyans.

Liv Jugend 2002 fer sa komanter-la: “Konfyans se enn bann kitsoz prinsipal ki permet nu ena enn sinp esanz avek lezot, tulezur.” Zurnal Neue Zürcher Zeitung dir: “Tu dimunn ena enn dezir pu fer lezot konfyans. Konfyans telman amelyor kalite nu lavi ki san sa, nu pa pu kapav kontiyn viv.” Dayer, sa zurnal-la kontiyn dir ki san konfyans “enn dimunn pa kapav fer fas ar lavi.”

Pwiski nu byin bizin ena konfyans an enn kikenn, kisannla nu kapav fer konfyans san risk ki li pu desevwar nu?

Fer Zeova Konfyans Avek Tu To Leker

Labib dir nu: “Fer Zeova konfyans avek tu to leker.” (Proverb 3:5) Avredir, parol Bondye plizir fwa ankuraz nu pu fer konfyans nu Kreater, Bondye Zeova.

Kifer eski nu kapav fer Bondye konfyans? Dabor, parski Bondye Zeova Li enn Bondye ki sin. Profet Izai ti ekrir: “Zeova Li sin, sin, sin.” (Izai 6:3) Eski sa panse-la pa tro atir u? Avredir, li bizin atir u. Kifer? Parski kan nu dir ki Zeova sin, sa vedir ki Li pir, pena okenn kitsoz move an Li. Nu kapav kont antyerman lor Li. Zame Li pa pu vinn koronpi uswa Li pu koz brit ar nu. Se inposib ki Li trayi nu konfyans.

Anplis, nu kapav ena konfyans an Bondye parski Li ena kapasite ek Li anvi sutenir tu bann ki servi Li. Par egzanp, so gran pwisans permet Li pu azir. So la zistis ek so la sazes parfe gid so bann  aksyon. Ek so lamur, ki nu pa kapav konpare, pus Li pu azir. Lapot Zan ti ekrir: “Bondye Li lamur.” (1 Zan 4:8) Lamur Bondye inflyans tu seki Li fer. Parski Zeova sin ek ki Li ena bann gran kalite, sa fer Li enn Papa ideal. Se enn kikenn an ki nu kapav ena ful konfyans. Apart Zeova, pena nanyin, ni personn an ki nu kapav fer sa kantite konfyans-la.

Fer Zeova Konfyans ek Truv Boner

Enn lot bon rezon kifer nu kapav ena konfyans an Zeova se parski Li konpran nu pli byin ki ninport kisannla. Li kone ki sak dimunn bizin ena enn relasyon sir, dirab ek ki baze lor konfyans avek zot Kreater. Bann dimunn ki ena sa kalite relasyon-la, santi zot an sekirite. Lerwa David ti tir sa konklizyon-la: “Ere sa dimunn for ki met so konfyans an Zeova.” (Psom 40:4) Plizir milyon dimunn zordi pe repet avek tu zot leker sa bann parol David-la.

Anu get detrwa legzanp. Doris finn viv dan République Dominicaine, l’Allemagne, la Grèce, ek États-Unis. Li dir: “Mo byin kontan ki mo finn fer Zeova konfyans. Li kone kuma pu pran mwa swin lor plan fizik, spirityel, ek afektif. Se meyer kamarad ki enn kikenn kapav ena.” Wolfgang, enn konseye ziridik, explike: “Se extraordiner ki mo kapav kont lor enn kikenn ki interese ar mo byinet, enn kikenn ki kapav ek ki pu fer seki pli bon pu mwa!” Ham, ki ti ne dan l’Asie, me ki res dan l’Europe asterla, dir: “Mo ena ful konfyans ki Zeova kontrol tu kitsoz, ek Li pa fer erer, donk mo kontan ki mo kapav kont lor Li.”

Byinsir, sakenn parmi nu, bizin pa zis fer konfyans nu Kreater, me fer konfyans bann dimunn usi. Akoz sa, Zeova, antan ki enn kamarad ki saz ek ki ena lexperyans, donn nu konsey lor ki kalite dimunn nu bizin ena konfyans. Kan nu lir Labib avek buku latansyon, nu kapav pran byin kont so konsey dan sa domenn-la.

Bann Dimunn Nu Kapav Fer Konfyans

Enn ekrivin Psom ti ekrir: “Pa met zot konfyans dan bann dimunn inportan, ni dan garson enn zom ki finn fer avek later, ki pa kapav donn delivrans.” (Psom 146:3) Sa parol ki sorti dan Labib-la ed nu pu rekonet ki buku dimunn pa merit nu konfyans. Mem bann ki byin estime, ki konsidere kuma bann “dimunn inportan” dan lemond, pa otomatikman merit nu konfyans. Par egzanp ena bann exper ki spesyalize dan sertin domenn lor la konesans uswa dan sertin aktivite. Suvan, konsey ki zot donn nu kapav met nu dan lerer. Ek kan nu met nu konfyans an sa bann ‘dimunn inportan-la,’ byin vit nu kapav gayn desepsyon.

Byinsir, sa pa vedir ki nu bizin dut tu dimunn. Me, li kler ki nu bizin byin swazir bann dimunn an ki nu met nu konfyans. Lor ki kitsoz nu pu baz nu? Enn legzanp dan ansyin Izrael kapav ed nu. Ti ariv enn moman kot Moiz ti bizin nom bann dimunn pu asim bann gran responsabilite dan Izrael. Li ti gayn konsey pu  “swazir dan tu bann dimunn, bann zom kapab, ki ena la krint pu Bondye, an ki zot kapav fer konfyans, ki deteste profi inzis.” (Egzod 18:21) Ki nu kapav aprann dan sa legzanp-la?

Sa bann zom-la, ti bann zom ki ti manifeste, dan enn sertin degre bann kalite ki fer Bondye plezir avan ki zot nome pu gayn sa bann gran pozisyon-la. Zot ti deza fini donn prev ki zot ena la krint pu Bondye, ki zot ena enn gran respe pu zot Kreater ek ki zot ena la krint pu depler Li. Tu dimunn ti kone ki sa bann zom-la ti fer tu seki zot kapav pu sutenir bann prinsip Bondye. Zot ti deteste bann profi inzis. Sa montre ki zot ti ena lafors moral ki ti pu anpes zot vinn koronpi par puvwar. Zot pa ti pu trayi konfyans lezot zis pu zot prop lintere uswa pu lintere zot fami uswa zot bann kamarad.

Eski li pa saz ki nu’si nu baz nu lor sa bann fakter-la kan nu swazir bann dimunn an ki nu kapav fer konfyans? Eski nu konn bann dimunn ki, par zot kondwit zot montre ki zot ena la krint pu Bondye? Eski zot determine pu gard bann prinsip ki Bondye finn etabli lor kondwit? Eski zot ena enn latasman konple pu Bondye ek eski sa anpes zot fer bann kitsoz ki pabon? Eski zot ase onet pu evit aranz enn sityasyon dan zot lavantaz uswa pu gayn seki zot, zot anvi? Wi, bann zom ek bann fam ki manifeste sa bann kalite-la merit nu konfyans.

Fode Pa Nu Dekuraze si Suvan Lezot Desevwar Nu

Nu bizin ena pasyans kan nu pe deside kisannla nu pu fer konfyans. Kifer? Parski se tigit par tigit ki nu fer enn kikenn konfyans. Meyer kitsoz ki nu kapav fer se devlop konfyans an enn dimunn dusma-dusma, etap par etap. Kuma? Kitfwa nu pu obzerv so kondwit pandan inpe letan. Nu pu gete kuma li azir dan sertin sityasyon. Eski, mem dan bann ti kitsoz, nu kapav fer li konfyans? Par egzanp, eski li return bann kitsoz ki li’nn pran prete, parey kuma li ti promet? Eski li ariv aler dan bann randevu? Si wi, kitfwa u pu ena santiman ki u kapav fer li konfyans dan bann kitsoz inpe pli serye. Sa li an armoni avek sa prinsip-la: “Seki fidel dan bann ti kitsoz, pu fidel dan bann gran kitsoz usi.” (Lik 16:10) Si nu fer enn bon swa ek nu ena pasyans, sa pu evit nu bann gran desepsyon.

Me ki nu pu fer si enn kikenn finn desevwar nu? Bann etidyan Labib sirman pu rapel la nwit kot Zezi Kris ti arete. Pandan sa la nwit-la so bann zapot ti byin desevwar li. Zida Iskaryot ti vann li, lezot ti sove parski zot ti per. Pyer ti mem trayi Zezi trwa fwa. Me Zezi ti konpran ki se selman Zida ki ti fer sa avek bann move mobil. Se vre ki bann disip Zezi ti desevwar li dan enn moman byin-byin inportan. Me sa pa finn anpes Zezi, detrwa semenn plitar, pu rekonfirm konfyans ki li ti ena an so 11 zapot, ki ti reste. (Matye 26:45-47, 56, 69-75; 28:16-20) Nu’si nu kapav fer parey. Si nu ena santiman ki enn kikenn ki nu ti fer konfyans finn trayi nu, li pu bon ki nu get byin si li finn fer sa avek bann move mobil, uswa parski dan sa moman-la li finn ena enn febles.

Eski Lezot Kapav Fer Mwa Konfyans?

Enn kikenn ki deside pu swazir bann dimunn ki li pu fer konfyans, bizin azir dan enn fason ekitab. Li bizin demann limem: ‘Eski lezot kapav fer mwa konfyans? Ki kantite degre fidelite mo bizin atann ki mo pu manifeste ek ki lezot usi pu manifeste?’

Wi, enn kikenn an ki lezot kapav fer konfyans, se enn kikenn ki tuletan koz la verite. (Efezyin 4:25) Li pa aranz seki li pu dir pu fer plezir bann dimunn ki pu ekut li, pu li gayn enn sertin lavantaz personel. Ek si li fer enn promes, li pu fer tu seki li kapav pu gard so parol. (Matye 5:37) Si enn kikenn finn rakont li enn kitsoz konfidansyel, li pu gard konfyans sa dimunn-la kan li pa al rakont sa lezot. Enn kikenn an ki nu kapav konte, li enn kikenn ki fidel anver so konzwin. Li pa get bann kitsoz pornografik. Li pena bann panse malprop, ek li pa flirte. (Matye 5:27, 28) Enn dimunn ki merit nu konfyans, se enn kikenn ki travay dir  pu gayn so lavi ek sutenir so fami. Li pa rod gayn larzan fasil lor ledo lezot dimunn. (1 Timote 5:8) Kan nu gard sa bann panse Labib ki rezonab-la dan nu lespri, sa pu ed nu pu rekonet bann dimunn ki nu kapav fer konfyans. Anplis, kan numem nu respekte sa bann prinsip-la, sa pu ed sakenn parmi nu pu merit konfyans lezot.

Komye li ti pu bon pu viv dan enn lemond kot ena bann dimunn an ki nu kapav fer konfyans ek kot bann desepsyon nepli egziste! Eski se zis enn rev sa? Antuka, pa pu bann dimunn ki konsider bann promes Labib kuma bann promes ki serye. Kifer? Parski Parol Bondye anonse ki pu ena enn “nuvo later” ki pu byin zoli ek kot pa pu ena desepsyon, mansonz ek explwatasyon, sagrin, maladi ek mem lamor! (2 Pyer 3:13; Psom 37:11, 29; Revelasyon 21:3-5) Eski li pa vo lapenn ki nu rod konn inpe plis lor sa lesperans-la? Bann Temwin Zeova pu byin kontan pu donn u bann linformasyon lor la ek lor lezot size byin inportan.

[Zimage page 4]

Kan nu pa fer lezot konfyans, sa kapav fer nu perdi nu boner

[Zimage page 5]

Zeova Limem pli merit nu konfyans

[Zimage page 7]

Nu tu nu bizin ena bann relasyon avek lezot ki baze lor konfyans