Frer ek Ser Kassholm inn fer Lekol Galaad an 1979. Apre lekol, plizir fwa inn “plant” zot, setadir zot inn gagn lafektasion pou al servi dan diferan pei, kouma par exanp Birmani, Iran, Moris, Tanzani, ek Zair. Se dan Lekol Galaad ki zot ti tann zot formater, Frer Jack Redford, donn sa konsey-la. Sa konsey-la inn bien ed zot, parski plizir fwa “inn plant” zot, “inn derasinn” zot, ek “inn replant” zot. Anou ekout zot.

Mats, to kapav dir nou kouma to’nn gagn laverite?

Mats: Pandan Deziem Lager Mondial, mo papa ti pe res Pologn, ek li’nn trouve ki kantite Legliz Katolik ti enn larelizion bien ipokrit. Kanmem sa, souvan li ti dir, “Bizin ena enn vre relizion kitpar!” Avek letan, mo’nn konpran ki li ti ena rezon. Mo ti abitie aste bann liv segonnme pou lir, ek enn parmi zot ti enn liv kouler ble ki ti apel La vérité qui conduit à la vie éternelle. Tit sa liv-la ti paret bien interesan, ek mo ti lir liv-la mem zour ki mo ti gagn li. So landemin gramatin, mo ti kone ki mo ti dekouver laverite!

Depi Avril 1972, mo ti koumans lir pli boukou piblikasion bann Temwin Zeova, ek mo ti gagn bann repons ki mo ti pe poz momem lor Labib. Mo ti koumadir sa marsan dan lexanp Zezi la. Apre ki mo ti trouv enn perl ki ena boukou valer, mo ti “vann” tou seki mo ti ena pou mo kapav aste li. Mo ti abandonn mo proze pou al liniversite ek pou vinn enn dokter, pou mo kapav fer plis pou Zeova. (Mat. 13:45, 46) Lerla, mo’nn pran batem le 10 Desam 1972.

Dan lespas enn an, mo bann paran ek mo ti frer osi ti aksepte laverite ek zot ti pran batem. Ek an Ziliet 1973, mo’nn koumans mo servis pionie permanan. Parmi bann pionie ki ti ena dan nou lasanble, ti ena enn zoli ser ki ti bien spiritiel. Li ti apel Ann-Catrin. Nou’nn tom amoure ek nou’nn marye an 1975. Ek pandan kat lane, nou’nn servi dan Strömsund, enn zoli lavil dan Laswed, kot boukou dimounn ti anvi konn plis lor Labib.

Ann-Catrin: Mo papa ti gagn laverite kan li ti dan liniversite dan Stockholm. Sa lepok-la, mo ti ena zis trwa mwa, me kanmem sa, li ti pe amenn mwa renion ek predikasion. Mo mama  pa ti kontan ditou, ek li ti anvi montre ki bann Temwin Zeova dan lerer. Selman, li pa ti reisi. Avek letan, li osi li’nn pran batem. Mo’nn pran batem laz 13 an, ek mo’nn koumans fer pionie laz 16 an. Apre ki mo ti al servi dan Umea, kot ti bizin plis proklamater, mo ti vinn enn pionie spesial.

Apre nou maryaz, Mats ek mwa nou’nn ed boukou dimounn pou konn laverite. Sa finn rann nou bien zwaye. Enn parmi zot ti enn zenn tifi ki ti apel Maivor. Kan li ti gagn laverite, li ti abandonn enn karyer sportif, ek avek letan, li’nn vinn mo ti ser so konpagnon servis. Toule-de inn fer Lekol Galaad an 1984 ek azordi zot pe servi kouma misioner dan Ekwater.

Dan bann diferan lafektasion ki zot ti gagne kan zot ti misioner, kouma zot inn swiv konsey pou “fleri kot inn plant zot”?

Mats: Dan bann diferan lafektasion ki nou’nn gagne, enn kitsoz ki’nn ed nou pou adapte ar bann sanzman se ki nou’nn touletan fer zefor pou swiv lexanp Zezi, sirtou so limilite. (Kol. 2:6, 7) Par exanp, kan nou al dan enn nouvo pei, olie ki nou atann ki lezot adapte ar nou, nou esey konpran kifer zot fer bann kitsoz dan enn sertenn fason. Nou vremem anvi konpran zot fason panse ek zot kiltir. Ek plis nou ti swiv lexanp Zezi, plis nou ti santi nou “kouma enn pie ki’nn plante dan bor bann kanal delo.” Gras-a sa, nou ti reisi fleri kot ti plant nou.—Ps. 1:2, 3.

Ann-Catrin: Pou ki enn pie kapav pouse apre ki’nn replant li, li bizin osi gagn soley. Zeova inn touletan “enn soley” pou nou. (Ps. 84:11) Li’nn beni nou ek Li’nn donn nou bann frer ek ser ki bien kontan nou. Par exanp, kan nou ti dan enn ti lasanble dan Téhéran, dan Iran, bann frer ek ser ti bien zenere ek zot ti montre lospitalite anver nou. Sa ti rapel nou lospitalite sertin serviter Zeova dan lepok Biblik. Nou ti pou bien kontan si nou ti kapav res Iran, me an Ziliet 1980, nou laktivite ti interdi laba, ek nou ti ena zis 48-er pou kit sa pei-la. Apre sa, nou ti gagn enn nouvo lafektasion. Nou ti bizin al servi dan Zair (ki azordi apel Kongo) dan Lafrik.

Kan mo ti aprann ki ti nou pou bizin al servi dan Lafrik, mo ti plore parski mo ti per akoz bann serpan ek bann maladi ki ena laba. Selman, de bon kamarad ki’nn servi dan Lafrik pandan plizir lane ti dir nou: “Zame to pa’nn al Lafrik. Ale twa! Al gete! Nou nou sir ki to pou kontan sa pei-la.” Ek zot ti ena rezon, parski bann frer ek ser laba ena boukou lamour. Avredir, kan nou ti bizin kit Lafrik si-z-an apre parski nou laktivite ti interdi laba, mo santiman lor sa pei-la ti sanze net. Kan mo ti priye Zeova, mo ti fer enn sourir, parski mo ti demann Li pou les nou kontign res laba.

Ki bann benediksion zot inn gagne dan zot servis pou Zeova?

Mats: Gras-a bann lafektasion ki nou’nn gagne, nou’nn vinn bann bon kamarad ar bann lezot misioner ki sorti dan diferan pei. Dan sertin pei kot nou ti ete, Ann-Catrin ek mwa nou ti ena plis ki 20 letid Labib sakenn, ek sa ti rann nou bien zwaye. Enn kitsoz ki zame mo pa pou bliye, se lamour ek lospitalite nou bann frer ek ser dan  Lafrik. Kan nou ti pe vizit bann lasanble dan Zair, nou ti pe dormi dan nou mini-vann. Mem si bann frer ek ser laba ti bien mizer, zot ti fer sir ki nou ti ena seki nou bizin. (2 Kor. 8:3) Enn kitsoz ki bien inportan pou Ann-Catrin ek mwa, se moman kot nou zwenn ansam pou rakont nou lazourne. Toulezour, alafin lazourne, Ann-Catrin ek mwa nou ti asiz ansam ek nou ti rakont nou kamarad bann kitsoz ki ti ariv nou sa zour-la, ek nou ti remersie Zeova pou tou seki Li ti fer pou nou.

Ann-Catrin: Pou mwa, enn kitsoz ki’nn rann mwa zwaye, se ki mo’nn gagn lokazion pou konn bann frer ek ser dan lemond antie. Nou’nn osi dekouver bann nouvo kiltir, ek aprann bann nouvo langaz, kouma Farsi, Franse, Louganda, ek Swaili. Nou’nn ede pou form bann nouvo disip Zezi, nou’nn fer bann nouvo kamarad, ek nou’nn travay “kot-a-kot” ansam avek zot pou servi Zeova.—Sof. 3:9.

Nou’nn osi gagn lokazion pou trouv bann kitsoz extraordiner ki Zeova inn kree. Sak fwa ki nou ti aksepte enn nouvo lafektasion, se koumadir Zeova ti pe trap nou lame pou amenn nou promne ek dekouver bann nouvo kitsoz. Zeova inn ansegn nou bann kitsoz ki zame nou pa ti pou reisi aprann par nou-mem.

Ki bann difikilte zot inn gagne, ek kouma zot inn reisi sirmont sa?

Mats: Nou’nn gagn bann lepidemi ki’nn rann nou bien malad. Par exanp, nou ti gagn malarya. Ann-Catrin de-trwa fwa inn bizin fer bann loperasion an irzans. Nou ti bien trakase osi pou nou bann paran ki ti pe vinn vie. Akoz sa, nou bien rekonesan anver nou bann frer ek ser ki’nn pran zot swin. Zot inn fer sa avek boukou pasians, lamour, ek lazwa. (1 Tim. 5:4) Mem si nou ti fer nou maximum pou soutenir nou bann paran, detanzantan nou ti santi nou koupab parski nou ti anvi fer plis pou ed zot.

Ann-Catrin: An 1983, kan nou ti pe servi dan Zair, mo ti gagn kolera ek mo ti bien malad. Enn dokter ti dir Mats: “Zot bizin kit sa pei-la zordi  mem!” Alor, so landemin, nou ti pran sel avion ki ti ena, enn avion kargo, pou al Laswed.

Mats: Nou ti bien plore, parski nou ti panse ki nou ti pou nepli kapav servi kouma misioner. Selman, mem si dokter-la ti dir ki Ann-Catrin so lasante ti pou nepli parey, li ti geri net. Ek enn an plitar, nou ti retourn Zair, me sann fwa-la, dan enn ti lasanble dan Lubumbashi, kot koz Swaili.

Ann-Catrin: Kan nou ti dan Lubumbashi, mo ti fer enn pert. Mem si nou pa ti pans pou ena zanfan, mo ti bien sagrin kan nou ti-baba ti mor. Selman, pandan sa moman difisil-la, Zeova ti donn nou enn kado ki nou pa ti atann. Nou ti gagn plis letid Labib ki avan. Dan mwins ki enn an, nou ti sorti 35 proklamater pou vinn 70 proklamater dan nou lasanble, ek nou lasistans ti sorti 40 pou vinn 220. Nou ti bien okipe dan nou servis ek Zeova ti pe beni nou bann zefor. Gras-a sa, mo ti santi mwa pli bien. Me kanmem sa, nou ankor mazinn nou ti-baba ek nou ankor koz lor li. Nou pe atann avek inpasians pou trouve kouma dan Paradi, Zeova pou tir net sa douler-la dan nou leker.

Mats: Avek letan, Ann-Catrin ti koumans santi li feb ek li ti bien fatige. Se dan sa moman-la mem ki mo ti aprann ki mo ti ena enn kanser kolon ek ki mo ti bizin fer enn gro loperasion. Azordi, mo santi mwa bien ek Ann-Catrin ankor pe fer so maximum dan so servis pou Zeova.

Nou’nn konpran osi ki se pa zis nou tousel ki gagn bann difikilte. Apre zenosid ki ti ena dan Rwanda an 1994, nou ti al get bann frer ek ser ki ti dan bann kan refizie. Kan nou ti trouv zot lafwa, zot landirans, ek zot lospitalite, mem si zot ti pe pas par bann sitiasion bien difisil, nou ti konpran ki Zeova donn so bann serviter lafors pou andir ninport ki difikilte.—Ps. 55:22.

Ann-Catrin: An 2007, kan nou ti asiste linogirasion Biro Nasional Ouganda, nou ti gagn enn lot leprev. Apre linogirasion, nou ti pran enn bis, ansam ar apepre 25 lezot misioner ek Betelit, pou al Nairobi, dan Kenya. Selman, avan ki nou ti ariv lor frontier Kenya, enn kamion ki ti pe vinn dan lot direksion, inn tap ar nou bis. Sofer-la ek sink parmi nou bann kamarad ti mor sur le coup, ek enn ser ti mor dan lopital. Nou vremem inpasian pou retrouv nou bann kamarad!—Zob 14:13-15.

Avek letan, mo bann blesir ti geri. Selman, akoz sa aksidan-la, Mats ek mwa, ek de-trwa lezot pasaze sa bis-la, pandan inpe letan nou ti angwase. Pou mwa, sa langwas-la ti vini aswar.  Kan mo ti dormi, souvan mo somey ti kase parski mo leker ti pe vane. Sa ti fer mwa gagn extra per! Selman, kan nou ti priye Zeova ek kan nou ti lir ek reflesi lor nou bann verse prefere, sa ti ed nou pou santi nou pli kalm. Nou ti osi al rod led ar bann sikolog, ek sa osi ti bien ed nou. Aster-la, nou nepli angwase kouma avan, me nou kontign priye Zeova pou ki Li ed nou pou rekonfort bann ki soufer akoz langwas.

Kan zot explike kouma zot inn reisi fer fas ar zot bann difikilte, zot dir ki Zeova inn sarye zot “koumadir dizef.” Ki zot pe rod dir?

Mats: Se lexpresion Swaili “Tumebebwa kama mayai mabichi,” ki vedir “Inn sarye nou koumadir dizef.” Parey kouma enn dimounn ki fer bien atansion kan li sarye dizef pou ki zot pa kase, avek boukou lamour Zeova inn soutenir nou dan sak lafektasion ki nou’nn gagne. Nou’nn touletan ena seki nou ti bizin, ek nou’nn mem gagn plis ki seki nou ti bizin. Enn fason ki Zeova inn montre nou so lamour ek ki Li’nn soutenir nou, se atraver konpasion ki Komite Santral inn montre anver nou.

Ann-Catrin: Mo ti pou kontan rakonte kouma Zeova inn soutenir nou. Enn zour, mo ti gagn enn call telefonn ek mo ti aprann ki mo papa ti dan ICU. Mats ti fek gagn malarya ek li ti ankor feb. Nou pa ti ena ase kas pou aste enn biye pou al Laswed. Alor, nou ti desid pou vann nou loto. Me inpe apre, nou ti gagn de lot call telefonn. Premie call-la se enn koup ki ti tann koz lor nou sitiasion, ek zot ti anvi pey enn biye pou nou. Ek deziem call-la ti enn ser aze ki ti ramas inpe kas dan enn bwat, ki li ti apel “Pou enn kikenn ki bizin led.” Sa ti vremem extraordiner pou trouve kouma Zeova inn azir bien vit dan sa sitiasion-la!—Ebre 13:6.

Kan zot mazinn sa 50 an ki zot inn fer dan servis aplintan la, ki leson zot inn aprann?

Ann-Catrin: Mo’nn aprann ki nou lafors se kan nou “res kalm ek fer [Zeova] konfians.” Kan nou fer Zeova konfians, Li lager pou nou. (Iza. 30:15; 2 Kro. 20:15, 17) Ek parski nou’nn fer nou maximum dan sak lafektasion ki Li’nn donn nou, nou’nn gagn bann benediksion ki nou pa ti pou gagne si nou ti fer bann lezot kitsoz.

Mats: Pli gran leson ki mo’nn aprann, se ki mo bizin kont lor Zeova dan sak sitiasion, ek mo bizin fer zefor pou trouve kouma Li pe ed mwa. (Ps. 37:5) Zeova inn promet ki Li pou touletan ed so bann serviter, ek Li’nn touletan ed mwa. Aster-la ki nou pe servi dan Betel Birmani, nou ankor pe trouve kouma Li pe ed nou.

Zeova inn montre boukou lamour fidel anver nou, ek nou anvi ki bann zenn ki anvi fer plis dan zot servis pou Zeova, resanti sa lamour-la zot osi. Nou sir ki zot pou resanti sa lamour-la si zot les Zeova ed zot pou fleri ninport kotsa inn plant zot.