Yelemia 3:1-25
3 Bantu bepangulanga’mba: “Shi muntu wapanga wandi mukaji, nandi wamushiye kadi wasongwe na muntu mukwabo, le ukajokela kudi mwana-mukaji’wa monka?”
Le ntanda’ya keisubijibwepo bininge?+“Mubalonga busekese na balunda bavule,+Le pano mukajokela kondi?” i Yehova unena.
2 “Tulula meso obe pa mikuna padi tō umone.
Le i kwepi kokebalēlepo nobe ku bukomo?
Webashikatyīle kufula kwa mashinda,Pamo bwa muntu wendakana* mu ntanda mutuputupu.
Usubijanga’nka kusubija ntandaNa bundumba bobe ne bubi bobe.+
3 O mwanda minoko ya mvula ibakankajibwa,+Kadi i kutupu mvula ku muketeko.
Abe udi na mumwekelo* wampikwa bumvu wa mukaji ulonga busekese;Ubapele kwivwana bumvu.+
4 Ino pano ubangabija’mba,‘Tata, abe wi mulunda wa mu bunkasampe bwami!+
5 Le muntu ubwanya kwikala nyeke na nsungu,Nansha kwikala na kīji mafuku onso?’
Bino ye byonena,Ino uloñanga nyeke bibi byonso byobwanya kulonga.”+
6 Mu mafuku a Yoshia,+ Yehova waunenene amba: “‘Le ubamone byalonga Isalela wa kubulwa kikōkeji? Ukandanga pa lūlu lonso lulampe ne kwenda munshi mwa mutyi onso muvwambile mwanda wa kulonga busekese.+
7 Nansha paapwile kulonga bino byonso, nadi mulombola nyeke ajokele kondi,+ ino aye kajokelepo; kadi Yuda wadi utala’nka kutala mwanabo mwana-mukaji ndalandala.+
8 Ami pa kumona nabya, napangile Isalela wa kubulwa kikōkeji na mukanda wa dilubu+ pa mwanda wa makoji andi.+ Ino Yuda, mwanabo mwana-mukaji ndalandala katyininepo; aye nandi watamba kalonga busekese.+
9 Watyepekele bundumba bwandi, kadi wasubija ntanda nyeke, walonga makoji na mabwe ne mityi.+
10 Nansha nankyo, Yuda mwanabo mwana-mukaji ndalandala kajokelepo kondi na mutyima onso, ino wajokele enka bya buzazangi,’ i Yehova unena.”
11 Penepo Yehova waunena’mba: “Isalela wa kubulwa kikōkeji wemwekeja* bu moloke kutabuka Yuda ndalandala.+
12 Enda kasapule bino binenwa kungala’mba:+
“‘“Abe Isalela mushetemuke, joka,” i Yehova unena.’+ ‘“Nkikemutalepo munshi na bukalabale,+ mwanda ami ne wa lulamato,” i Yehova unena.’ “Nkikekalapo na nsungu nyeke.
13 Itabija’tu mambo obe, mwanda ubatombokela Yehova Leza obe. Wadi upalakanya nyeke katōkwe* kobe ku beni* munshi mwa mutyi onso muvwambile, ino kemwakōkelepo diwi dyami,” i Yehova unena.’”
14 “Banwe bana bashetemuke, jokai,” i Yehova unena. “Mwanda naikala mfumwenu* wa bine; kadi nkemusela, umo ku kibundi, babidi mu kisaka, nkemuselela ku Ziona.+
15 Nkemupa bakumbi ba mwendele mutyima wami,+ kadi bakemudisha na buyuki ne bujinguludi.
16 Mu oa mafuku mukevudija ne kupa bipa mu ntanda’ya,” i Yehova unena.+ “Kebakanenapo monka’mba, ‘Sanduku wa kipwano kya Yehova!’ Kakāyapo ku mutyima wabo, kadi kebakamuvulukapo nansha kumulanga kwine, kadi kakalongwapo monka.
17 Mu kine kitatyi’kya baketa Yelusalema bu lupona lwa Yehova;+ mizo yonso ikabungilwa pamo ku dijina dya Yehova ku Yelusalema,+ kadi kebakalondapo monka mutyima wabo mubi na kibengo.”
18 “Mu mene mafuku’a, njibo ya Yuda ne njibo ya Isalela bakenda pamo,+ kadi bonso pamo bakatamba ku ntanda ya kungala kebenda ku ntanda yonapele bakulutuba benu bu bupyani.+
19 Kadi nalangile amba, ‘Bine, nemutūdile mu bukata mwa bana ne kwimupa ntanda milumbuluke, bupyani buyampe kutabuka mu bukata mwa mizo!’*+ Kadi nalangile amba mukangita’mba, ‘Tata!’ ne amba kemukalekapo kunonda.
20 ‘Na bubine, pamo’nka bwa mukaji utantuka wandi mulume* na bundalandala, abe nobe, a njibo ya Isalela, ubaunonga bya bu ndalandala,’+ i Yehova unena.”
21 Lunwa lubaivwanwa pa mikuna padi tō,Kudila ne kuzenza kwa bantu ba Isalela,Mwanda abanyengakanya dishinda dyabo;Abailwa Yehova Leza wabo.+
22 “Banwe bana bashetemuke, jokai.
Nkemundapa kushetemuka kwenu.”+
“Batwe bano! Tubaiya kodi,Mwanda abe Yehova, wi Leza wetu.+
23 Bine, mikuna ne lupotopoto lwa pa ngulu i bya bubelabubela.+
Bine lupandilo lwa Isalela ludi mudi Yehova Leza wetu.+
24 Ino kintu kya bumvu* kibadi mwingilo upungija wa bakulutuba betu tamba pa bunkasampe bwetu,+Mikōko yabo ne bañombe babo,Babo bana bana-balume ne bana-bakaji.
25 Tulālei bya bumvu,Kadi bumvu bwetu bwitupūte,Mwanda tubapi Yehova Leza wetu mambo,+Batwe ne batata tamba pa bunkasampe bwetu kufika ne dyalelo,+Kadi ketukōkelepo diwi dya Yehova Leza wetu.”
Kunshi kwa Dyani
^ Kishima pa kishima i, “mwine Alabia.”
^ Kishima pa kishima i, “mpala.”
^ Nansha’mba “wamwekeja muya wandi.”
^ Kishima pa kishima i, “mashinda.”
^ Nansha’mba “baleza ba kungi.”
^ Bibwanika padi i, “wenu mulume.”
^ Kishima pa kishima i, “bwa bibumbo bya mizo.”
^ Kishima pa kishima i, “mulunda nandi.”
^ Nansha’mba “leza wa bumvu.”
