Yelemia 16:1-21
16 Kinenwa kya Yehova kyaiya monka kondi amba:
2 “Kufwaninwepo kusonga, kadi kufwaninwepo kubutwila bana bana-balume ne bana-bakaji mu kino kifuko.
3 Mwanda Yehova wanena namino pa mwanda wa bana bana-balume ne bana-bakaji babutwilwa muno, ne pa mwanda wa bainabo bebabutula ne pa mwanda wa bashabo bebabutula mu ino ntanda’mba:
4 ‘Bakafwa misongo ya lufu,+ ino i kutupu muntu ukebadila nansha kwibajīka; bakekala bwa mboleo pa nshi.+ Bakafwa ku kipete ne ku kipupo kya nzala,+ kadi imbidi yabo mifwe ikekala ke byakudya bya byoni bya mūlu ne bya banyema ba pa ntanda.’
5 Mwanda Yehova wanena namino amba,‘Kokatwela mu njibo musobelwa masobo a badila madilo,Kadi kokenda kukadila nansha kwitūla pa kyabo kyaba.’+
‘Mwanda nayata bano bantu ndoe yami,’ i Yehova unena,‘Ne buswe bwami bwa ndamatyidile ne lusa.+
6 Ne bakatampe ne batyetye bakafwa mu ino ntanda.
Kebakajīkwapo,Kekudipo ukebadila,Kadi kekudipo ukeketaketa nansha kwitenda lupole pa mwanda wabo.*
7 Kekudipo ukapa badi mu madilo byakudya,Mwanda wa kwibasenga pa mwanda wa bafwe babo;Kadi kekudipo ukebapa kitomeno kya busengiKya kutoma pa mwanda wa kujimija kobajimija shabo nansha inabo.
8 Kokatwela mu njibo ya masobo,Ushikate nabo mwanda wa kudya ne kutoma.’
9 “Mwanda Yehova wa bibumbo, Leza wa Isalela wanena namino amba, ‘Mu kino kifuko, mu mafuku enu kadi mu meso enu, nsa kufudija lunwa lwa kusepelela ne kusangala, diwi dya musoñañani ne diwi dya mutundaile dine.’+
10 “Pokalombola bano bantu bino binenwa byonso, bakakwipangula’mba, ‘Mwanda waka Yehova wetunena kino kyamalwa kyonso kikatampe namino? Le i kilubo’ka ne i bubi’ka botulongēle Yehova Leza wetu?’+
11 Ukebalondolola’mba, ‘“I mwanda bakulutuba benu baundekele,”+ i Yehova unena, “kadi badi balonda nyeke baleza bakwabo, bebengidila ne kwivukwila kobadi.+ Ino ami baundekele, kadi kebalaminepo bijila byami.+
12 Kadi banwe mubalonga bibi kutabuka ne bakulutuba benu bene,+ kadi muntu ense momudi ulondanga kibengo kya mutyima wandi mubi pa kyaba kya kunkōkela.+
13 O mwanda nkemwela panja pa ino ntanda, mukaponene mu ntanda yokemuyukilepo banwe ne bakulutuba benu bene,+ kadi kwine’kwa mukengidila’ko baleza bakwabo dyuba ne bufuku,+ mwanda nkikemutōkelwapo mutyima.”’
14 “‘Inoko, mafuku āyanga,’ i Yehova unena, ‘okebakanenapo monka’mba: “Bine ne Yehova byadi’ko mūmi, mwine watambije bantu ba Isalela mu ntanda ya Edipito!”+
15 ino bakanena’mba: “Bine ne Yehova byadi’ko mūmi, mwine watambije bantu ba Isalela ku ntanda ya kungala ne mu matanda onso mwaebapalakeninye!” kadi nkebajokeja ku ntanda yabo yonapele bakulutuba babo.’+
16 ‘Nsa kutuma babiluwe ba lui bavule,’ i Yehova unena,‘Nabo bakebapoya.
Kupwa nkatuma babiluwe ba ntanda bavule,Nabo bakebapoya mu ngulu ne pa mikuna yonsoNe mu mpako ya bimabwe mwine.
17 Mwanda meso ami adi pa byonso byobalonga.*
Kebafyemepo ku meso ami,Kadi kilubo kyabo kekifyemepo ku meso ami.
18 Dibajinji, nkebapa mfuto mibwanine pa kilubo ne bubi bwabo,+Mwanda abakobakanya ntanda yami na byelekejo byampikwa būmi* bya bilezaleza bya mukenyeKadi abayuja bupyani bwami na bintu byabo bya munyanji.’”+
19 A Yehova, bukomo bwami ne kifuko kyami kikomejibwe,Kifuko kyami kya kunyemena’mo mu difuku dya tusua,+Mizo ikāya kodi tamba ku mafulo a ntanda,Kadi bakanena amba: “Bakulutuba betu bapyene bubela bonkabonka,Bintu bya bituputupu, byampikwa kamweno ne mvubu.”+
20 Le muntu ubwanya kwipungila balezaAbo papo ke balezapo binebine?+
21 “O mwanda nkebayukija,Mu kino kitatyi, nsa kwibayukija bukomo bwami ne buninge bwami,Kadi bakayuka’mba dijina dyami ne Yehova.”
