Go dayrɛkt to di men tin

Go dayrɛkt to di say we di difrɛn difrɛn atikul dɛn de

MƆ TIN DƐN FƆ NO

Aw Wi fɔ Trit Pɔsin We Dɔn Disfɛloship?

Aw Wi fɔ Trit Pɔsin We Dɔn Disfɛloship?

Bɔku tin dɛn de we kin mek wi fil pen na wi at. Bɔt wi kin fil am mɔ we dɛn disfɛloship wi padi ɔ fambul bikɔs i nɔ gri fɔ lɛf di bad we i bin de du. Di we aw wi de biev we dɛn disfɛloship wi fambul ɔ padi de sho aw wi lɛk Jiova, ɛn aw wi fetful to am. * Lɛ wi tɔk smɔl bɔt sɔm kwɛstyɔn dɛn we pipul dɛn kin aks bɔt dis tɔpik.

Aw wi fɔ trit pɔsin we dɔn disfɛloship? Di Baybul se: “Una nɔ fɔ gɛt natin fɔ du wit ɛnibɔdi we kɔl insɛf una Kristiɛn brɔda, we liv bad layf, we want ɔltin fɔ insɛf, we de pre to dɛn tin we mɔtalman mek fɔ pre to, ɛn we de gi pipul bad nem; we de drɔnk ɛn we de tif. Una nɔ fɔ sidɔm sɛf fɔ it wit pɔsin lɛkɛ dat.” (Fɔs Lɛta Fɔ Kɔrint 5:11) We di Baybul bin de tɔk bɔt pɔsin we “nɔ jɛs de lan pipul wetin Krays lan am nɔmɔ, bɔt i de lan dɛn ɔda tin,” i bin se “una nɔ fɔ kip am na una os; una nɔ fɔ tɛl am adu sɛf. Bikɔs ɛnibɔdi we tɛl am adu dɔn jɔyn an wit am fɔ du di bad wok we i de pan.” (Jɔn In Sɛkɛn Lɛta 9-11) Wi nɔ fɔ tɔk bɔt Gɔd biznɛs ɔ kip kɔmpin wit ɛnibɔdi we dɔn disfɛloship. Di Sɛptɛmba 15, 1981, Wachtawa, pej 25, bin se: ‘We yu grit pɔsin we disfɛloship yu dɔn bigin fɔ mek padi biznɛs wit am. Yu go want fɔ bigin padi biznɛs wit pɔsin we dɔn disfɛloship?’

I rili impɔtant fɔ avɔyd pɔsin we dɔn disfɛloship? Yɛs, i impɔtant. Lɛ wi tɔk bɔt tri rizin dɛn we mek i impɔtant. Fɔs, i de sho se wi fetful to Gɔd ɛn i Wɔd, di Baybul. Wi nɔ de obe Jiova di tɛm nɔmɔ we i izi fɔ wi bɔt ivin we i tranga fɔ wi. We wi lɛk Gɔd, i go mek wi want fɔ obe ɔl in lɔ dɛn bikɔs wi no se i lɛk wi, i nɔ de du bad ɛn in lɔ dɛn na fɔ wi  yon bɛtɛ wan. (Ayzaya 48:17; Jɔn In Fɔs Lɛta 5:3) Sɛkɔn, we wi lɛf fɔ kip kɔmpin wit di pɔsin we dɔn disfɛloship, i de protɛkt wi ɛn ɔda pipul dɛn na di kɔngrigeshɔn mek wi nɔ gɛt bad abit dɛn, ɛn i go mek di kɔngrigeshɔn gɛt gud nem. (Fɔs Lɛta Fɔ Kɔrint 5:6, 7) Di tɔd rizin na dat, we yu tinap tranga wan fɔ wetin di Baybul se, i kin ɛp di pɔsin we dɔn disfɛloship. We wi sɔpɔt di ɛlda dɛn we bin de tray fɔ ɛp di pɔsin, dat go mek di pɔsin bigin tink bɔt di bad we i dɔn du. We i lɛf fɔ ɛnjɔy di fayn padi biznɛs we i bin gɛt wit di kɔngrigeshɔn, dat go ɛp am fɔ mek i no se na bad i bin du. Ɛn dis go ɛp am fɔ kam bak to Jiova.​—Lyuk 15:17.

Wetin yu go du, if yu fambul disfɛloship? Bikɔs pipul dɛn we de insay di sem famili kin rili lɛk dɛnsɛf, i nɔ kin izi fɔ fetful to Jiova we wan pɔsin na di famili disfɛloship. Bɔt aw wi fɔ trit wi fambul we dɔn disfɛloship? Wi nɔ go ebul tɔk bɔt ɔl di tin dɛn we kin apin, bɔt lɛ wi tɔk bɔt tu ɛgzampul dɛn.

Sɔntɛnde, di pɔsin we dɔn disfɛloship kin stil de na os wit in fambul dɛn. We pɔsin disfɛloship, i nɔ min se in biznɛs wit in fambul dɛn dɔn dɔn. I kin stil de wit dɛn na os ɛn du di wok dɛn we i bin de du. Bɔt di bad tin we di pɔsin du de sho se na in pwɛl di fayn padi biznɛs we in ɛn in fambul dɛn bin gɛt we dɛn de sav Jiova togɛda. So di fambul dɛn we fetful to Jiova nɔ go alaw dɛn fambul we dɔn disfɛloship fɔ jɔyn dɛn we dɛn de wɔship Gɔd. Fɔ ɛgzampul, if di pɔsin we disfɛloship de usay di famili de du famili wɔship, i nɔ fɔ tek pat. Bɔt if di pɔsin we disfɛloship na smɔl pikin, na in mama ɛn papa gɛt di wok fɔ tich am ɛn fɔ tren am. So, mama ɛn papa we lɛk dɛn pikin go stɔdi di Baybul wit am. *​—Prɔvabs 6:20-22; 29:17.

Sɔntɛnde, di pɔsin we dɔn disfɛloship nɔ kin de na di  sem os wit in fambul dɛn. Wan wantɛm, gud rizin kin de fɔ mek pɔsin na di famili tɔk to am, bɔt dɛn nɔ fɔ tray fɔ tɔk to am ɔltɛm. Kristian dɛn we fetful nɔ fɔ luk fɔ we dɛn fɔ tɔk to dɛn fambul we dɔn disfɛloship we nɔ de na os wit dɛn. Bifo dat, we wi fetful to Jiova ɛn in ɔganayzeshɔn go ɛp wi fɔ trit di disfɛloship pɔsin di we aw di Baybul dɔn tɛl wi. We ɔlman na di famili tinap tranga wan bikɔs dɛn lɛk Jiova, i go ɛp di pɔsin fɔ tink bɔt di advays dɛn we di ɛlda dɛn dɔn gi am. *​—Di Ibru Pipul Dɛn 12:11.

^ par. 3 Di tin dɛn we wi gɛt fɔ tɔk bɔt na dis tɔpik nɔ de nɔmɔ fɔ di wan dɛn we disfɛloship bɔt i de bak fɔ di wan dɛn we lɛf di kɔngrigeshɔn fɔ dɛnsɛf.

^ par. 7 If yu want fɔ no mɔ bɔt aw fɔ trit smɔl pikin we disfɛloship ɛn we de na os wit in mama ɛn papa, na fɔ rid di Ɔktoba 1, 2001, Wachtawa, pej 16 to pej 17, ɛn di Novɛmba 15, 1988, Wachtawa, pej 20.

^ par. 8 If yu want fɔ no mɔ bɔt aw fɔ trit yu fambul we dɔn disfɛloship, na fɔ rid di Epril 15, 1988, Wachtawa, pej 26 to pej 31, ɛn di Sɛptɛmba 15, 1981, Wachtawa, pej 26 to pej 31.