Go dayrɛkt to di men tin

Go dayrɛkt to di say we di difrɛn difrɛn atikul dɛn de

 CHAPTA 3

Lɛk di Wan dɛn We Gɔd Lɛk

Lɛk di Wan dɛn We Gɔd Lɛk

“Udat de rakpala wit pipul we gɛt sɛns de gɛt sɛns.”—PRƆVABS 13:20.

1-3. (a) Wetin na wan tru wɔd we di Baybul tɔk we nɔbɔdi nɔ go ebul dinay? (b) Aw wi go ebul fɛn padi dɛn we go ɛp wi fɔ du wetin Gɔd want?

MƆTALMAN fiba spɔnj. If yu put wata rawnd spɔnj, di spɔnj de sɔk ɔl di wata. Semweso, if wisɛf nɔ tek tɛm, wi go bigin falamakata di we aw pipul dɛn de tink, tɔk ɛn biev. Sɔntɛnde, wi nɔ kin ivin no we wi de du dat.

2 Na dat mek di Baybul tɔk wan tru we nɔbɔdi nɔ go ebul dinay. I se: “Udat de rakpala wit pipul we gɛt sɛns de gɛt sɛns, bɔt if yu se na fulman kabudu yu de rɔbskin wit, yu go tɔn rederaun.” (Prɔvabs 13:20) Dis skripchɔ nɔ de tɔk bɔt pipul dɛn we wi kin spɛn smɔl tɛm wit. We i yuz di wɔd “rakpala” min se, na pipul dɛn we wi kin rɔbskin wit ɔ kip kɔmpin wit ɔltɛm. * We wan buk we de tɔk bɔt di Baybul, bin de tɔk bɔt dis vas, i bin se: “Fɔ rakpala wit pɔsin min se yu rili lɛk di pɔsin ɛn yu want fɔ de nia am ɔltɛm.” Yu nɔ tink se wi kin want fɔ falamakata di wan dɛn we wi lɛk? Dat na tru, bikɔs wi kin want fɔ de nia di pipul dɛn we wi lɛk, dat kin mek wi want tan lɛk dɛn. Sɔntɛnde, i kin fayn, bɔt sɔntɛnde, i nɔ kin fayn.

3 Fɔ lɛ Gɔd kɔntinyu fɔ lɛk wi, i impɔtant fɔ lɛ wi mek padi wit pipul dɛn we go ɛp wi fɔ du wetin Gɔd want.  Aw wi go ebul du dat? Na fɔ lɛk di wan dɛn we Gɔd lɛk, ɛn bi padi wit di wan dɛn we na Gɔd in padi. Tink bɔt dis: Di bɛst padi dɛn we wi go ɛva gɛt na pipul dɛn we gɛt abit dɛn we Jiova want lɛ in padi dɛn gɛt. So lɛ wi tɔk smɔl bɔt sɔm pipul dɛn we Gɔd lɛk. We wi lan bɔt di wan dɛn we Jiova de pik fɔ bi in padi dɛn, go ɛp wi fɔ no udat dɛn wi go mek padi wit.

DI WAN DƐN WE GƆD LƐK

4. Wetin mek Jiova gɛt di rayt fɔ pik udat go bi in padi? Wetin mek di Baybul kɔl Ebraam “Gɔd in padi”?

4 We i kam pan padi biznɛs, Jiova de pik udat dɛn fɔ bi in padi. Yu nɔ tink se i gɛt di rayt fɔ du dat? Yɛs, i gɛt di rayt fɔ du dat, bikɔs na in de pantap ɔlman na di wɔl. Ɛn na big big blɛsin fɔ lɛ wi bi Gɔd in padi. So, na udat dɛn Jiova de pik fɔ bi in padi? Jiova de mek padi wit di wan dɛn we de abop pan am ɛn we gɛt fet. Fɔ ɛgzampul, lɛ wi tɔk bɔt Ebraam. Na man we bin rili gɛt fet. No ɔda tin nɔ de we at pas fɔ tɛl pɔsin mek i kil in wangren pikin ɛn sakrifays am. * Bɔt Ebraam bin “gri fɔ tek Ayzak, we na bin in wangren pikin, fɔ sakrifays am,” ɛn i bin “biliv se Gɔd ebul mek Ayzak rayz bak, if i day.” (Di Ibru Pipul Dɛn 11:17-19) Bikɔs Ebraam bin gɛt fet ɛn i bin want fɔ obe Jiova na dat mek di Baybul kɔl am “Gɔd in padi.”​—Jems 2:21-23; Ayzaya 41:8.

5. Aw Jiova de fil bɔt di want dɛn we fetful ɛn we rɛdi fɔ du wetin i want ɔltɛm?

5 I rili impɔtant to Jiova we wi de obe am wit ɔl wi at. I lɛk di wan dɛn we fetful ɛn we de du wetin i want ɔltɛm.  (Rid Sɛkɛn Samiɛl 22:26.) As wi bin lan insay Chapta 1, Jiova de gladi fɔ di wan dɛn we de obe am bikɔs dɛn lɛk am. Na dat mek Prɔvabs 3:32 se Jiova “lɛk pɔsin we de waka tret” wit am, ɛn i de mek dis kayn pɔsin bi “in padi.” Jiova de kɔl di wan dɛn we de du wetin i want fɔ kam na in “os.” Dis min se i de kɔl dɛn fɔ kam wɔship am ɛn pre to am ɔltɛm.​—Sam 15:1-5.

6. Aw wi go sho se wi lɛk Jizɔs? Aw Jiova de fil bɔt di wan dɛn we lɛk in Pikin?

6 Jiova lɛk di wan dɛn we lɛk in wangren Pikin we na Jizɔs. Na dat mek Jizɔs tɔk se: “Ɛnibɔdi we lɛk mi go du wetin a lan am fɔ du. Mi Papa go lɛk di pɔsin, ɛn mi ɛn mi Papa go kam to am, ɛn tap wit am.” (Jɔn 14:23) Aw wi go sho se wi lɛk Jizɔs? Wi go sho se wi lɛk am, we wi du di tin dɛn we i tɛl wi fɔ du, lɛk fɔ prich di gud nyus ɛn mek disaypul. (Matyu 28:19, 20; Jɔn 14:15, 21) Pan ɔl we wi nɔ pafɛkt, wi go sho bak se wi lɛk Jizɔs we wi tray tranga wan fɔ falamakata am bay di we aw wi de tɔk ɛn du tin dɛn. (Pita In Fɔs Lɛta 2:21) Jiova kin gladi fɔ di wan dɛn we de tray fɔ falamakata Jizɔs bikɔs dɛn lɛk am.

7. Wetin mek i fayn fɔ mek padi wit Jiova in padi dɛn?

7 Jiova want lɛ in padi dɛn gɛt fet, i want lɛ dɛn de biɛn am ɔltɛm ɛn obe am. I want bak lɛ in padi dɛn lɛk Jizɔs ɛn falamakata di we aw i bin de liv in layf. I go fayn mek wi aks wisɛf dɛn kwɛstyɔn ya: ‘Mi padi dɛn gɛt dɛn kwaliti ya? A dɔn mek Jiova in padi dɛn bi mi padi dɛn?’ I rili mek sɛns fɔ lɛ wi aks wisɛf dɛn kwɛstyɔn ya. Wetin mek? Bikɔs pipul dɛn we gɛt abit dɛn we Gɔd lɛk ɛn we gɛt zil fɔ prich di gud nyus, kin ɛp wi fɔ kɔntinyu fɔ du wetin go mek Gɔd gladi.—Rid wetin de na di bɔks we se “ Aw Yu Go No Udat Na Gud Padi?

 WAN ƐGZAMPUL WE DE NA DI BAYBUL

8. Wetin yu lɛk bɔt di padi biznɛs we bin de bitwin: (a) Naomi ɛn Rut? (b) di tri Ibru bɔbɔ dɛn? (c) Pɔl ɛn Timoti?

8 Bɔku ɛgzampul dɛn de na di Baybul bɔt pipul dɛn we bin dɔn bɛnifit bikɔs dɛn bin pik gud padi dɛn. Yu go rid bɔt di padi biznɛs we bin de bitwin Naomi ɛn in dɔtɛnlɔ we na Rut, bitwin di tri Ibru bɔbɔ dɛn we bin de na Babilɔn, ɛn bitwin Pɔl ɛn Timoti. (Rut 1:16; Daniɛl 3:17, 18; Fɔs Lɛta Fɔ Kɔrint 4:17; Lɛta Fɔ Filipay 2:20-22) Naw, lɛ wi tɔk bɔt wan padi biznɛs we bin spɛshal. Dat na di padi biznɛs we bin de bitwin Devid ɛn Jonɛtan.

9, 10. Wetin mek Devid ɛn Jonɛtan bin bi tayt padi?

9 Di Baybul se afta Devid kil Golaya, Jonɛtan bigin “lɛk Devid in biznɛs.” I bin lɛk Devid lɛk aw i lɛk in yon layf. (Fɔs Samiɛl 18:1) So dɛn padi biznɛs bigin fɔ tayt mɔ ɛn mɔ. Pan ɔl we Jonɛtan bin big pas Devid, dɛn padi biznɛs bin kɔntinyu te Jonɛtan day na wɔ. * (Sɛkɛn Samiɛl 1:26) Wetin mek dɛn bin lɛk dɛnsɛf bad bad wan?

10 Devid ɛn Jonɛtan bin bi tayt padi bikɔs dɛn ɔl tu bin lɛk Gɔd ɛn dɛn bin rili want fɔ kɔntinyu fɔ du wetin Gɔd want. Dɛn ɔl tu bin want fɔ mek Gɔd gladi. Dɛn bin gɛt fayn fayn abit dɛn we mek dɛn padi biznɛs bin de tayt mɔ ɛn mɔ. Jonɛtan bin lɛk di kayn maynd ɛn zil we Devid bin gɛt we i nɔ bin fred fɔ fɛt fɔ Jiova in nem. Devid bin gɛt dip rɛspɛkt fɔ Jonɛtan bikɔs Jonɛtan bin rɛdi fɔ du wetin Jiova want ɛn i bin bisin bɔt am. Fɔ ɛgzampul, tink bɔt wan tɛm we Devid in at bin pwɛl bad. I bin de rɔnawe pan Jonɛtan in papa we na Kiŋ Sɔl we bin want fɔ kil am. Bɔt pan ɔl dat, Jonɛtan bin sɔpɔt  Devid. Jonɛtan “go fɛn Devid ɛn tɛl am fɔ biliv PAPA GƆD.” (Fɔs Samiɛl 23:16) Tink bɔt aw Devid bin fil we in bɛst padi bin kam fɛn am fɔ ɛnkɔrej ɛn sɔpɔt am! *

11. Wetin yu lan frɔm di padi biznɛs we bin de bitwin Jonɛtan ɛn Devid?

 11 Wetin wi lan frɔm di padi biznɛs we bin de bitwin Jonɛtan ɛn Devid? Wi lan se di tin we impɔtant pas ɔl, na we tu padi dɛn tek dɛn padi biznɛs wit Gɔd siriɔs. I fayn fɔ mek padi wit pipul dɛn we biliv wetin yu biliv, we de liv dɛn layf di we aw yu de liv yu layf, ɛn we rɛdi fɔ du wetin Gɔd want ɔltɛm. Dis go mek una fil fri fɔ tɔk bɔt wetin una de tink, aw una de fil, ɛn bɔku ɔda tin dɛn we una go yuz fɔ ɛnkɔrej unasɛf. (Rid Lɛta Fɔ Rom 1:11, 12.) Wi go ebul fɔ fɛn dɛn kayn padi ya na di kɔngrigeshɔn. Bɔt yu tink se na ɔlman we de kam mitin na di Kiŋdɔm Ɔl na gud padi? Nɔ, nɔto ɔlman go bi gud padi.

 AW WI GO PIK WI TAYT PADI DƐN?

12, 13. (a) Wetin mek wi fɔ tek tɛm pik di kayn pipul dɛn we wi de mek padi wit na di kɔngrigeshɔn? (b) Us prɔblɛm, dɛn fɔstɛm Kristian dɛn bin gɛt? Us wɔnin Pɔl bin gi dɛn?

12 Ivin insay di kɔngrigeshɔn wi want fɔ tek tɛm pik udat dɛn go bi wi padi dɛn. Wi want fɔ mek padi wit pipul dɛn we go ɛp wi fɔ sav Jiova. Dis fɔ mek wi sɔprayz? Nɔ, dis nɔ fɔ mek wi sɔprayz. Sɔm Kristian dɛn na di kɔngrigeshɔn kin tek lɔng tɛm fɔ bi tayt padi wit Jiova, jɔs lɛk aw sɔm frut dɛn we de na di sem tik kin tek lɔng tɛm fɔ rɛp. Semweso, insay ɛni kɔngrigeshɔn, sɔm Kristian dɛn kin dɔn bi Jiova in tayt padi ɛn ɔda wan dɛn kin stil de tray fɔ bi in padi. (Di Ibru Pipul Dɛn 5:12–6:3) So wi fɔ bia ɛn lɛk di wan dɛn we jɔs dɔn baptayz ɔ we stil de tray fɔ lan bɔt Jiova. Wi de du dis bikɔs wi want fɔ ɛp dɛn fɔ bi Jiova in tayt padi.—Lɛta Fɔ Rom 14:1; 15:1.

13 Sɔntɛnde, tin dɛn kin apin insay di kɔngrigeshɔn we fɔ mek wi tek tɛm wit di wan dɛn we wi de mek padi wit. Sɔm pipul dɛn de na di kɔngrigeshɔn we kin du tin dɛn we nɔ fayn. Ɔda wan dɛn kin de vɛks ɔ grɔmbul grɔmbul bɔt di tin dɛn we de apin insay di kɔngrigeshɔn. Di kɔngrigeshɔn dɛn we bin de di tɛm we di apɔsul dɛn bin de, bin gɛt dɛn sem prɔblɛm ya. Sɔm Kristian dɛn bin fetful, bɔt sɔm nɔ bin de du wetin fayn na Gɔd in yay. Plɛnti pan di Kristian dɛn we bin de na Kɔrint nɔ bin de du wetin de na di Baybul, so di apɔsul Pɔl bin wɔn di kɔngrigeshɔn. I tɛl dɛn se: “Una nɔ mek ɛnibɔdi mek una ful. ‘Bad kɔmpin de pwɛl pɔsin.’” (Fɔs Lɛta Fɔ Kɔrint 15:12, 33) Pɔl bin wɔn Timoti se ivin insay di kɔngrigeshɔn nɔto ɔlman go de du wetin Jiova want. Pɔl bin advays Timoti fɔ avɔyd  dɛn kayn pipul dɛn de, ɛn i tɛl am mek i nɔ mek padi wit dɛn.​—Sɛkɛn Lɛta To Timoti 2:20-22.

14. Aw wi go ebul du wetin Pɔl bin tɔk bɔt padi biznɛs?

14 Aw wi go ebul du wetin Pɔl bin tɔk bɔt padi biznɛs? Wi go ebul du dat we wi nɔ bi tayt padi wit ɛnibɔdi we de du bad ɔ we de mek ɔda pɔsin du bad, ilɛksɛf i de na di kɔngrigeshɔn ɔ i nɔ de na di kɔngrigeshɔn. (Sɛkɛn Lɛta Fɔ Tɛsalonayka 3:6, 7, 14) Wi nɔ fɔ mek natin pwɛl wi padi biznɛs wit Jiova. Mɛmba se wi tan lɛk spɔnj, i kin izi fɔ mek wi falamakata di we aw wi padi dɛn de tɔk, tink, ɛn du tin dɛn. Jɔs lɛk aw wi nɔ go put spɔnj insay dɔti wata ɛn fil se na klin wata go de insay am, na so wi nɔ go mek padi wit pipul dɛn we gɛt bad abit dɛn ɛn fil se wi go gɛt gud abit dɛn.—Fɔs Lɛta Fɔ Kɔrint 5:6.

Yu go ebul fɛn gud padi dɛn na di kɔngrigeshɔn

15. Aw yu go ebul fɛn padi dɛn na di kɔngrigeshɔn we de tray tranga wan fɔ du wetin Jiova want?

15 Wan tin we wi gladi fɔ no na dat wi go ebul fɛn gud padi dɛn na di kɔngrigeshɔn. (Di Sam Dɛm 133:1) Aw yu go ebul fɛn padi dɛn na di kɔngrigeshɔn we de tray fɔ du wetin Gɔd want? As yu de tray fɔ gɛt abit dɛn we Gɔd lɛk, dis go mek ɔda pipul dɛn want fɔ bi yu padi. Bɔt yusɛf fɔ du ɔda tin dɛn we go ɛp yu fɔ mek padi wit ɔda pipul dɛn. (Rid di bɔks we se “ Wetin Bin Ɛp Wi fɔ Mek Gud Padi Dɛn?”) We yu de fɛn padi, luk fɔ di wan dɛn we gɛt abit dɛn we yu lɛk. Dɔn, fala di advays we di Baybul gi we i se wi fɔ opin wi at. Dis min se wi fɔ fɛn padi dɛn na di kɔngrigeshɔn ilɛksɛf dɛn gɛt difrɛn kɔla, kɔlchɔ, ɔ kɔmɔt difrɛn kɔntri. (Sɛkɛn Lɛta Fɔ Kɔrint 6:13; Pita In Fɔs Lɛta 2:17) Nɔ mek padi nɔmɔ wit pipul dɛn we yu ɛn dɛn gɛt di sem ej. Mɛmba se, Jonɛtan bin big pas Devid fa fawe. Bɔku big pipul dɛn de we yu go mek padi wit we go gi yu sɛns ɛn we no plɛnti tin bɔt layf.

 WE WI GƐT PRƆBLƐM WIT WI BRƆDA DƐN

16, 17. Wetin mek wi nɔ go lɛf di kɔngrigeshɔn we wi brɔda dɛn mek wi fil bad ɔ du wi sɔntin we wi nɔ lɛk?

16 Wan wantɛm, wi kin gɛt prɔblɛm wit wi brɔda dɛn bikɔs wi ɔl gɛt difrɛn we aw wi de tink ɛn du tin dɛn, ɛn di we aw dɛn mɛn wi difrɛn. Wi brɔda dɛn kin se ɔ du tin dɛn we kin mek wi fil bad. (Prɔvabs 12:18) Sɔntɛnde, dɛn prɔblɛm ya kin kam bikɔs pipul dɛn difrɛn, dɛn nɔ kin ɔndastand dɛn kɔmpin, ɔ dɛn kin tink difrɛn we bɔt sɔntin. Wi go vɛks fɔ dat ɛn lɛf di kɔngrigeshɔn? If wi rili lɛk Jiova ɛn lɛk di wan dɛn we i lɛk, wi nɔ go du dat.

17 Na Jiova nɔmɔ wi fɔ lɛk ɛn wɔship wit ɔl wi at bikɔs na in mek wi ɛn na in de mek wi kɔntinyu fɔ liv.  (Rɛvɛleshɔn 4:11) Dɔn, wi fɔ sɔpɔt di ɛlda dɛn we Jiova de yuz fɔ sho ɔlman na di kɔngrigeshɔn wetin fɔ du. (Di Ibru Pipul Dɛn 13:17) So if wi brɔda dɛn mek wi fil bad ɔ du wi sɔntin we wi nɔ lɛk, wi nɔ go lɛf di kɔngrigeshɔn fɔ dat. Nɔto Jiova du wi bad. Di lɛk we wi lɛk Jiova go mek wi nɔ want fɔ tɔn wi bak pan in ɛn in pipul dɛn!—Rid Sam 119:165.

18. (a) Wetin wi go du fɔ ɛp mek pis de na di kɔngrigeshɔn? (b) We wi fɔgiv pipul dɛn fɔ di rayt rizin, us blɛsin wi go gɛt?

18 If wi rili lɛk wi brɔda dɛn, wi go ɛp fɔ mek pis de na di kɔngrigeshɔn ɔltɛm. Jiova nɔ de fil se di wan dɛn we i lɛk, fɔ pafɛkt. So wisɛf nɔ fɔ fil se wi brɔda dɛn fɔ pafɛkt. Lɔv fɔ mek wi fɔgiv wi brɔda dɛn we dɛn du wi bad, ɛn wi fɔ mɛmba se wi ɔl nɔ pafɛkt, wi kin mek mistek. (Prɔvabs 17:9; Pita In Fɔs Lɛta 4:8) Lɔv go ɛp wi fɔ kɔntinyu fɔ fɔgiv wi brɔda dɛn. (Lɛta Fɔ Kɔlɔse 3:13) I nɔ kin izi fɔ du wetin di Baybul se. Bɔt if wi alaw wamat fɔ kɔntrol wi layf, wi go kɔntinyu fɔ vɛks ɛn kip grɔj na wi at. Sɔntɛm, wi go fil se di vɛks we wi vɛks na we dat fɔ pɔnish di pɔsin we dɔn du wi bad. Fɔ tru, fɔ kip bad tin na wi at nɔ fayn. We wi fɔgiv pipul dɛn fɔ di rayt rizin go mek wi gɛt plɛnti blɛsin. (Lyuk 17:3, 4) Dis go mek wi gɛt kolat ɛn i go ɛp mek pis de na di kɔngrigeshɔn. Bɔt di tin we pas ɔl na dat, i go mek wi padi biznɛs wit Jiova go de tayt mɔ ɛn mɔ.—Matyu 6:14, 15; Lɛta Fɔ Rom 14:19.

WETIN GO MEK WI LƐF FƆ KIP KƆMPIN WIT SƆMBƆDI?

19. Wetin kin apin we go mek wi lɛf fɔ kip kɔmpin wit sɔmbɔdi na di kɔngrigeshɔn?

19 Sɔntɛnde, wi fɔ lɛf fɔ kip kɔmpin wit sɔmbɔdi we bin dɔn de na di kɔngrigeshɔn. Dis kin apin we di pɔsin  pwɛl Gɔd in lɔ bay wilful ɛn nɔ gri fɔ chenj ɛn dɛn disfɛloship am. Ɔ we di pɔsin lɛf di trut ɛn bigin tich lay lay tin dɛn ɔ we i disayd fɔ lɛf di kɔngrigeshɔn. Gɔd in Wɔd tɛl wi se wi “nɔ fɔ gɛt natin fɔ du wit” dɛn kayn pipul ya. * (Rid Fɔs Lɛta Fɔ Kɔrint 5:11-13; Jɔn In Sɛkɛn Lɛta 9-11) I nɔ kin izi fɔ lɛf fɔ kip kɔmpin wit pɔsin we na wi padi ɔ fambul. Bɔt yu nɔ tink se wi fɔ tinap tranga wan ɛn sho se wi de put Jiova ɛn in lɔ bifo ɛni ɔda tin na wi layf? Mɛmba se Jiova lɛk we in savant dɛn fetful to am ɛn de obe am.

20, 21. (a) Wetin mek i fayn we dɛn de disfɛloship pipul dɛn we nɔ gri fɔ chenj? (b) Wetin mek i impɔtant fɔ lɛ wi pik di kayn pipul dɛn we wi de mek padi wit?

20 Fɔ disfɛloship pipul dɛn na di kɔngrigeshɔn, na tin we Jiova de du fɔ sho se i rili lɛk wi. Wetin mek wi se so? Wan rizin na bikɔs we dɛn pul di wan dɛn we nɔ gri fɔ chenj, na di kɔngrigeshɔn, i de sho se wi lɛk Jiova in nem ɛn di lɔ dɛn we i dɔn gi wi. (Pita In Fɔs Lɛta 1:15, 16) Dɔn, i de mek di kɔngrigeshɔn klin. (Fɔs Lɛta Fɔ Kɔrint 5:7; Di Ibru Pipul Dɛn 12:15, 16) Pantap dat, i de sho se wi lɛk di pɔsin we dɔn du di bad. Dis go mek i fil sɔri fɔ wetin i dɔn du ɛn kam bak to Jiova.​—Di Ibru Pipul Dɛn 12:11.

21 Fɔ tru, i kin izi fɔ bigin tink, tɔk, ɛn biev lɛk di pipul dɛn we wi de mek padi wit. So i impɔtant fɔ mek wi pik di kayn pipul dɛn we wi de mek padi wit. We wi bi padi wit di wan dɛn we na Jiova in padi dɛn, ɛn lɛk di wan dɛn we i lɛk, go ɛp wi fɔ gɛt gud padi dɛn. Di tin dɛn we wi go lan frɔm dɛn padi ya, go ɛp wi fɔ du wetin go mek Jiova gladi fɔ wi.

^ par. 2 Di Ibru wɔd we dɛn yuz fɔ translet “rakpala wit” min fɔ “mek padi wit.”​—Prɔvabs 22:24.

^ par. 4 We Jiova bin tɛl Ebraam fɔ kil in pikin, i bin de sho di kayn sakrifays we insɛf gɛt fɔ du, we i go sɛn in wangren Pikin fɔ kam day fɔ wi. (Jɔn 3:16) Jiova nɔ bin gri lɛ Ebraam kil in pikin. I bin gi am wan ship fɔ mek di sakrifays.​—Jɛnɛsis 22:1, 2, 9-13.

^ par. 9 Devid na bin smɔl bɔbɔ di tɛm we i kil Golaya. Bɔt bay di tɛm we Jonɛtan bin day, Devid bin dɔn ol lɛk 30 ia so. (Fɔs Samiɛl 17:33; 31:2; Sɛkɛn Samiɛl 5:4) Ɛn Jonɛtan bin ol lɛk 60 ia we i day. So i go mɔs bi se i bin big pas Devid fɔ lɛk 30 ia so.

^ par. 10 Insay Fɔs Samiɛl 23:17, Jonɛtan tɔk fayv tin dɛn fɔ ɛnkɔrej Devid: (1) I tɛl Devid mek i nɔ fred. (2) I tɛl Devid se Sɔl nɔ go ebul du am ɛnitin. (3) I ɛp Devid fɔ mɛmba se i go bi kiŋ jɔs lɛk aw Gɔd bin dɔn prɔmis. (4) I tɛl Devid se i go de wit am te go, i nɔ go ɛva kɔmɔt biɛn am. (5) I tɛl Devid se in papa we na Sɔl sɛf no se i de fɔ in di Devid.

^ par. 19 Fɔ no mɔ bɔt aw fɔ trit pɔsin we dɔn disfɛloship ɔ pɔsin we dɔn lɛf di kɔngrigeshɔn, na fɔ rid di say we se Aw Wi fɔ Trit Pɔsin We Dɔn Disfɛloship?.