Go dayrɛkt to di men tin

Go dayrɛkt to di say we di difrɛn difrɛn atikul dɛn de

 CHAPTA 8

Gɔd Lɛk Pipul dɛn We Klin

Gɔd Lɛk Pipul dɛn We Klin

“Mi padi dɛn, Gɔd dɔn mek ɔl dɛn prɔmis ya fɔ wi. So, lɛ wi nɔ du ɛnitin we go mek wi bɔdi ɔ wi spirit nɔ klin, lɛ wi liv fɔ Gɔd nɔmɔ, ɛn lɛ wi sho pipul se wi de fred Gɔd.”​—SƐKƐN LƐTA FƆ KƆRINT 7:1.

1-3. (a) Wetin mek mama dɛn kin mek shɔ se dɛn pikin dɛn nit ɛn klin? (b) Wetin mek Jiova want lɛ di wan dɛn we de wɔship am, klin? Wetin mek wi want fɔ kip wisɛf klin?

TINK bɔt mama we de rɛdi in pikin fɔ kɔmɔt. I de mek shɔ se i was am fayn, dɔn i drɛs am nit ɛn klin. I no se, fɔ klin na impɔtant tin we go mek in pikin gɛt wɛlbɔdi. I no bak se di we aw pikin drɛs, go mek in mama ɛn papa gɛt gudnem ɔ badnem.

2 Jiova we na wi Papa, want lɛ ɔl in savant dɛn klin. Na dat mek in Wɔd tɔk se: “Mi padi dɛn, Gɔd dɔn mek ɔl dɛn prɔmis ya fɔ wi. So, lɛ wi nɔ du ɛnitin we go mek wi bɔdi ɔ wi spirit nɔ klin, lɛ wi liv fɔ Gɔd nɔmɔ, ɛn lɛ wi  sho pipul se wi de fred Gɔd.” * (Sɛkɛn Lɛta Fɔ Kɔrint 7:1) Jiova lɛk wi ɛn i no se if wi klin, i go fayn fɔ wi. I want mek di wan dɛn we de wɔship am, klin. Dis go mek pipul dɛn tɔk gud bɔt am. So we wi klin ɛn gɛt fayn abit dɛn, dis go briŋ prez ɛn gudnem to Jiova.​—Izikɛl 36:22; rid Pita In Fɔs Lɛta 2:12.

3 Wi no se Gɔd lɛk klin pipul dɛn, so dis de mek wi want fɔ klin ɔltɛm. Wi want fɔ liv wi layf di we we go briŋ ɔna to Jiova. Wetin mek? Bikɔs wi lɛk am. Wi want fɔ du wetin go mek Gɔd kɔntinyu fɔ lɛk wi. Bɔt naw, lɛ wi tɔk bɔt wetin mek wi fɔ kip wisɛf klin, wetin i min fɔ bi pɔsin we klin, ɛn aw wi go kip wisɛf klin. Dis go ɛp wi fɔ no di tin dɛn we wi fɔ tray fɔ du mɔ.

WETIN MEK WI FƆ KIP WISƐF KLIN?

4, 5. (a) Wetin na di men rizin we mek wi fɔ klin? (b) Aw di tin dɛn we Jiova dɔn mek sho se in na klin Gɔd?

4 Wan we aw Jiova de sho wi se wi fɔ klin na bay we insɛf sɛf klin. In Wɔd tɛl wi se wi “fɔ tray fɔ tan lɛkɛ am.” (Lɛta Fɔ Ɛfisɔs 5:1) Wetin na di men rizin we mek wi fɔ klin? Di men rizin na dat, di Gɔd we wi de wɔship we na Jiova, na Gɔd we klin ɛn i oli pas ɛnitin we yu kin tink bɔt.​—Rid Lɛvitikɔs 11:44, 45.

5 Jɔs lɛk aw wi kin wach di tin dɛn we Jiova dɔn mek ɛn si di kwaliti dɛn we i gɛt, na so wi go wach di tin dɛn we i dɔn mek ɛn si se na Gɔd we klin. (Lɛta Fɔ Rom 1:20) Gɔd bin mek di wɔl klin fɔ lɛ mɔtalman de de. Jiova mek sɔm tin dɛn we de klin di briz ɛn di wata. Di wɔl ebul fɔ klin insɛf fayn fayn wan. Dis dɔn sho wi klia wan se Gɔd we “mek di wɔl” na klin Gɔd. (Jɛrimaya 10:12) So wisɛf fɔ klin.

6, 7. Aw di Lɔ we Gɔd bin gi Mozis sho se fɔ lɛ pɔsin wɔship Jiova fayn fayn wan, i fɔ klin?

 6 Wan ɔda rizin we mek wi fɔ klin na dat, Jiova we de rul di wan ol wɔl, want lɛ di wan dɛn we de wɔship am bi pipul dɛn we klin. Insay di Lɔ dɛn we Jiova bin gi di Izrɛlayt dɛn, pɔsin fɔ klin if i want fɔ mek Gɔd gladi fɔ in wɔship. Di Lɔ bin se di de we di ay prist de mek sakrifays fɔ pipul dɛn sin dɛn, i fɔ was tu tɛm. (Lɛvitikɔs 16:4, 23, 24) Di prist dɛn fɔ was dɛn an ɛn dɛn fut dɛn bifo dɛn mek ɛni sakrifays to Jiova. (Ɛksodɔs 30:17-21; Sɛkɛn Kronikul 4:6) Di Lɔ bin tɔk bɔt 70 tin dɛn we kin mek pɔsin in bɔdi nɔ klin, ɛn we kin mek i nɔ klin fɔ wɔship Gɔd. So ɛni Izrɛlayt we nɔ klin nɔ fɔ jɔyn ɔda Izrɛlayt dɛn fɔ wɔship Gɔd. Sɔntɛnde, dɛn bin de ivin kil pɔsin if i go wɔship Gɔd we i nɔ klin. (Lɛvitikɔs 15:31) Ɛnibɔdi we bin dɔn du sɔntin we mek i nɔ klin, fɔ klin insɛf di we aw Gɔd bin sho. Di pɔsin fɔ klin in bɔdi ɛn in klos. Bɔt if i nɔ gri fɔ du dat, dɛn fɔ kil am.​—Nɔmbaz 19:17-20, NW.

7 Tide, wi nɔ de ɔnda di Lɔ dɛn we Gɔd bin gi Mozis. Bɔt dɛn lɔ ya de ɛp wi fɔ no aw Gɔd de tink bɔt difrɛn difrɛn tin dɛn. Di Lɔ bin sho klia wan se di wan dɛn we de wɔship Gɔd fɔ klin. Jiova na Gɔd we nɔ de chenj. (Malakay 3:6) If wi wɔship nɔ klin, Jiova nɔ go gladi fɔ am. (Jems 1:27, NW) So i go fayn fɔ mek wi no aw Jiova want wi fɔ klin.

WETIN I MIN FƆ BI PƆSIN WE KLIN NA GƆD IN YAY?

8. Us 4 we dɛn Jiova want lɛ wi klin?

8 We di Baybul tɔk bɔt fɔ klin, i nɔ jɔs min se na fɔ was wi bɔdi ɔ klin di tin dɛn we wi gɛt. Fɔ klin na Gɔd in yay, gɛt fɔ du wit ɔltin we wi de du. Na 4 men we de we Jiova want mek wi klin. Dɛn 4 we ya na: (1) Di we aw wi de wɔship am, (2) di we aw wi de liv wi layf, (3) di tin dɛn we  wi de tink, ɛn (4) di we aw wi de klin wi bɔdi ɛn di tin dɛn we wi gɛt. Lɛ wi tɔk bɔt wetin dɛn tin ya min.

9, 10. Wetin na klin wɔship? Wetin tru Kristian dɛn fɔ avɔyd?

9 Klin wɔship. Wetin na klin wɔship? Na we wi nɔ de miks di wɔship we wi de wɔship Jiova wit lay lay wɔship. We di Izrɛlayt dɛn bin de kɔmɔt na Babilɔn fɔ go bak na Jerusɛlɛm, Jiova bin tɛl dɛn se mek dɛn “nɔ tɔch natin we dɔti” ɛn mek dɛn kip dɛnsɛf klin. (Ayzaya 52:11) Di men rizin we mek dɛn bin de tɔn bak, na fɔ go bigin wɔship Jiova bak. Di wɔship we dɛn fɔ gi to Gɔd, fɔ klin. Dɛn nɔ fɔ dɔti Gɔd in wɔship wit dɛn lay lay tin dɛn we di pipul dɛn na Babilɔn bin de du.

10 Tide, wi we na tru Kristian dɛn gɛt fɔ tek tɛm mek wi nɔ miks tru tru wɔship wit lay lay wɔship. (Rid Fɔs Lɛta Fɔ Kɔrint 10:21.) Wi rili gɛt fɔ tek tɛm, bikɔs di tin dɛn we lay lay rilijɔn de du, de ɔlsay. Dɛn lay lay rilijɔn dɛn de tich se, di sol kin kɔmɔt pan pɔsin we dɔn day, ɛn dɛn kin tich plɛnti ɔda lay lay tin dɛn. Na bikɔs pipul dɛn biliv dɛn tin ya na in mek dɛn kin mek wekin, tri dez, fɔti dez, ɛn wan ia. (Ɛkliziastis 9:5, 6, 10) Tru Kristian dɛn fɔ avɔyd ɛnitin we gɛt fɔ du wit lay lay rilijɔn. * Wi nɔ fɔ gri mek ɔda pipul dɛn fos wi fɔ miks wi klin wɔship wit lay lay wɔship.​—Di Apɔsul Dɛn Wok [Akt] 5:29.

11. Wetin i min fɔ liv klin layf? Wetin mek i rili impɔtant fɔ liv klin layf?

11 Liv klin layf. Fɔ liv klin layf, wi nɔ fɔ du mami ɛn dadi biznɛs di we aw Gɔd nɔ want. (Rid Lɛta Fɔ Ɛfisɔs 5:5.) I rili impɔtant fɔ mek wi liv klin layf. Insay di ɔda chapta, wi go lan se fɔ mek Gɔd kɔntinyu fɔ lɛk wi, wi “nɔ fɔ liv fri layf.” Di wan dɛn we nɔ lɛf fɔ du mami ɛn dadi biznɛs di we aw Gɔd nɔ want, “nɔ go go na di say we Gɔd de rul.”  (Fɔs Lɛta Fɔ Kɔrint 6:9, 10, 18) Na Gɔd in yay, dɛn pipul ya de du “dɔti dɔti tin.” If dɛn kɔntinyu pan dis kayn layf, dɛn go gɛt di “sɛkɛn day.”​—Rɛvɛleshɔn 21:8.

12, 13. Wetin di tin we pɔsin de tink kin mek i du? Aw wi go ebul fɔ tink bɔt klin tin dɛn?

12 Tink bɔt klin tin dɛn. Di tin dɛn we wi de tink na in wi kin du. If wi kɔntinyu fɔ tink bɔt bad tin dɛn ɛn alaw dɛn fɔ de na wi at, wande wande, wi go du tin we nɔ fayn na Gɔd in yay. (Matyu 5:28; 15:18-20) Bɔt if wi de tink bɔt tin dɛn we gud ɛn klin, dat go ɛp wi fɔ du tin dɛn we fayn na Gɔd in yay. (Rid Lɛta Fɔ Filipay 4:8.) Aw wi go ebul fɔ tink bɔt klin tin dɛn? Wan men tin we wi fɔ du, na fɔ avɔyd fɔ ɛnjɔy wisɛf wit ɛnitin we go dɔti di we aw wi de tink. * Pantap dat, wi go ebul tink bɔt klin tin dɛn we wi stɔdi Gɔd in Wɔd ɔltɛm.​—Di Sam Dɛm 19:8, 9.

13 If wi want fɔ mek Gɔd kɔntinyu fɔ lɛk wi, wi wɔship fɔ klin, wi layf fɔ klin, ɛn di tin dɛn we wi de tink fɔ klin. Wi go tɔk mɔ bɔt dɛn tin ya insay ɔda chapta dɛn na dis buk. Bɔt naw, lɛ wi tɔk bɔt aw wi go klin wi bɔdi ɛn di tin dɛn we wi gɛt.

AW WI GO KIP WISƐF KLIN?

14. Wetin mek Jiova want mek wi klin?

14 Fɔ kip wisɛf klin min se wi fɔ klin wi bɔdi ɛn di say we wi de. Yu tink se pɔsin fɔ jɔs disayd fɔ du wetin in fil fɔ du we i kam pan tin dɛn lɛk fɔ klin in bɔdi ɛn di say we i de? Nɔ, pɔsin we de wɔship Jiova nɔ fɔ du dat. Lɛk aw wi bin dɔn tɔk, Jiova want mek wi klin bikɔs na tin we gud fɔ wi ɛn i de sho di kayn Gɔd we wi de wɔship. Tink bɔt di ɛgzampul we wi bin dɔn tɔk bɔt. We yu kin si pikin we dɔti ɔltɛm ɔ we dɛn nɔ de kia fɔ, i kin mek yu tink bɔt uskayn  mama ɛn papa i gɛt, nɔto so? Wi nɔ want mek di we aw wi de drɛs ɔ liv wi layf briŋ badnem pan Jiova ɔ mek pipul dɛn nɔ rɛspɛkt di prich we wi de prich. Di Baybul se: “Wɛn wi de du ɛnitin, wi nɔ de ambɔg ɛnibɔdi, so dat nɔbɔdi nɔ go blem wi fɔ di wok we wi de du. Bɔt bay aw wi de du ɔltin, wi de sho se na Gɔd wok wi de du.” (Sɛkɛn Lɛta Fɔ Kɔrint 6:3, 4) Bɔt aw wi go kip wi bɔdi ɛn ɔda tin dɛn klin?

15, 16. Wetin pɔsin we klin kin du? Aw wi klos fɔ de?

15 Wi fɔ kip wisɛf klin ɛn nit. Pipul dɛn kin liv difrɛn we na difrɛn kɔntri dɛn, bɔt pan ɔl dat, wi fɔ ebul fɛn sop ɛn wata fɔ was ɔltɛm ɛn fɔ mek shɔ se wi ɛn wi pikin dɛn klin. If wi na pɔsin we klin, wi go de was wi an wit sop ɛn wata bifo wi it ɔ ol chɔp na wi an. Ɛn wi go was wi an afta wi kɔmɔt na tɔylɛt, afta wi was pikin, ɛn afta wi  chenj in napi ɔ pampas. We wi de was wi an wit sop ɛn wata, go mek wi nɔ gɛt plɛnti sik dɛn we kin kil pipul dɛn. Sɔntɛnde, pipul dɛn kin gɛt rɔn-bɛlɛ bikɔs dɛn nɔ was dɛn an. Bɔt if wi de was wi an, plɛnti sik dɛn nɔ go mit wi. If pɔsin de na say we nɔ gɛt tɔylɛt, i fɔ dig ol, tɔylɛt de ɛn kɔba am fayn, lɛk aw di Izrɛlayt dɛn bin de du.​—Ditarɔnɔmi 23:12, 13.

16 Wi fɔ de was wi klos dɛn ɔltɛm so dat dɛn go klin ɛn nit. Nɔto pawpa pas Kristian wɛr klos we dia pasmak ɔ klos we de na stayl, bɔt i fɔ tek tɛm pik di klos we i de wɛr, ɛn in klos fɔ nit ɛn klin. (Rid Fɔs Lɛta To Timoti 2:9, 10.) Ilɛk usay wi de, di we aw wi de drɛs fɔ mek pipul dɛn “yɛri ɛn biliv dɛn tin we wi de lan dɛn bɔt Gɔd.”​—Taytɔs 2:10.

17. Wetin mek wi os ɛn ɔda tin dɛn we wi gɛt fɔ klin ɛn nit?

17 Wi os ɛn ɔda tin dɛn we wi gɛt. Sɔntɛm, wi os nɔ gɛt dia dia tin dɛn, bɔt wi fɔ tray tranga wan fɔ mek i nit ɛn klin. Semweso, if wi gɛt motoka we wi kin yuz fɔ go mitin ɛn fil savis, wi fɔ tray tranga wan fɔ mek i klin ɔltɛm. I fɔ klin insay ɛn i fɔ klin na do. Lɛ wi nɔ fɔgɛt se we wi os ɛn di tin dɛn we wi gɛt klin, de sho di kayn Gɔd we wi de wɔship. Ɛn lɛ wi mɛmba se, na wi kin tich pipul dɛn se Jiova na Gɔd we klin, ɛn i gɛt fɔ kam “kil dɛn wan we bin de pwɛl di wɔl.” Dɔn, wi kin tich dɛn bak se i nɔ go te igen, Gɔd in Kiŋdɔm gɛt fɔ kam mek dis wɔl bi Paradays. (Rɛvɛleshɔn 11:18; Lyuk 23:43, NW) So wi want mek wi os ɛn ɔda tin dɛn we wi gɛt, sho pipul dɛn se ivin naw wi de tray fɔ gɛt klin abit dɛn we go mek wi ebul fɔ de na di nyu wɔl we gɛt fɔ kam.

Wi fɔ klin wi bɔdi ɛn di say we wi de

18. Aw wi go sho se wi rɛspɛkt wi Kiŋdɔm Ɔl?

18 Di say we wi de wɔship. Di Kiŋdɔm Ɔl na di say we wi de wɔship Jiova, so di lɛk we wi lɛk Jiova fɔ mek wi rɛspɛkt wi Kiŋdɔm Ɔl. We nyu pɔsin kam na di Kiŋdɔm Ɔl, wi want fɔ mek i lɛk di ples. If wi de klin wi Kiŋdɔm Ɔl ɔltɛm,  kia fɔ am, ɛn mek di say dɛn we dɔn pwɛl, dis go mek di ples fayn fɔ luk. Wi de sho rɛspɛkt fɔ wi Kiŋdɔm Ɔl bay we wi de tray fɔ mek i luk gud ɔltɛm. Na big big tin fɔ mek wi yuz wi tɛm fɔ ɛp fɔ klin ɛn mek di say dɛn we dɔn pwɛl na di ples we wi de wɔship. (Sɛkɛn Kronikul 34:10) Na di sem tin wi fɔ du we wi go na wi Asɛmbli Ɔl ɔ ɔda say dɛn we wi kin ol asɛmbli ɔ kɔnvɛnshɔn.

AVƆYD ABIT DƐN WE NƆ KLIN

19. Fɔ mek wi bi pɔsin we klin, uskayn abit dɛn wi fɔ avɔyd? Wetin di Baybul tɔk we go ɛp wi?

19 Fɔ mek wi bi pɔsin we klin, wi fɔ avɔyd abit dɛn we nɔ klin, lɛk fɔ smok, fɔ drink pasmak, ɛn fɔ tek drɔgs. Di Baybul nɔ tɔk bɔt ɔl di dɔti dɔti abit dɛn we de na di wɔl tide, bɔt i tɔk bɔt tin dɛn we go ɛp wi fɔ no aw Jiova de si dɛn tin ya. We wi lɛk Jiova ɛn no aw i de fil bɔt dɛn tin ya, dat go mek wi want fɔ du tin dɛn we go mek i gladi. Lɛ wi tɔk bɔt fayv tin dɛn we de na di Baybul we go ɛp wi.

20, 21. Uskayn tin dɛn Jiova nɔ want mek wi put an pan? Us rizin mek wi fɔ obe am?

20 “Mi padi dɛn, Gɔd dɔn mek ɔl dɛn prɔmis ya fɔ wi. So, lɛ wi nɔ du ɛnitin we go mek wi bɔdi ɔ wi spirit nɔ klin, lɛ wi liv fɔ Gɔd nɔmɔ, ɛn lɛ wi sho pipul se wi de fred Gɔd.” (Sɛkɛn Lɛta Fɔ Kɔrint 7:1) * Jiova nɔ want mek wi put an pan ɛni abit we go dɔti wi bɔdi ɛn di we aw wi de tink. Wi fɔ avɔyd dɛn bad abit dɛn we go damej wi bɔdi ɛn di we aw wi de tink.

21 Di Baybul gi wi gud rizin fɔ “lɛ wi nɔ du ɛnitin we go mek wi bɔdi ɔ wi spirit nɔ klin.” Us rizin i gi? Luk aw Sɛkɛn Lɛta Fɔ Kɔrint 7:1 bigin. I se: “Mi padi dɛn, Gɔd dɔn mek ɔl dɛn prɔmis ya fɔ wi.” Wetin na dɛn prɔmis ya? Insay di vas dɛn we de bifo Sɛkɛn Lɛta Fɔ Kɔrint 7:1, Jiova se:  “A go tek una lɛkɛ mi yon. A go bi una Papa.” (Sɛkɛn Lɛta Fɔ Kɔrint 6:17, 18) Jɔs tink bɔt dis: Jiova dɔn prɔmis se i go kia fɔ yu ɛn i go lɛk yu lɛk aw papa kin lɛk in pikin. Bɔt Jiova go du dat if nɔmɔ wi avɔyd ɛnitin we “go mek wi bɔdi ɔ wi spirit nɔ klin.” So i nɔ go fayn fɔ lɛ yu alaw ɛni dɔti abit fɔ pwɛl di fayn padi biznɛs we yu gɛt wit Jiova.

22-25. Us skripchɔ dɛn go ɛp wi fɔ avɔyd abit dɛn we nɔ klin?

22 “Yu fɔ lɛk di Masta we na yu Gɔd wit ɔl yu at, wit ɔl yu layf ɛn wit ɔl yu maynd.” (Matyu 22:37) Jizɔs bin se na dis lɔ impɔtant pas ɔl di ɔda lɔ dɛn. (Matyu 22:38) I fayn fɔ mek wi lɛk Jiova da kayn we de. Bɔt fɔ mek wi lɛk Jiova wit ɔl wi at, layf, ɛn wit ɔl wi maynd, wi fɔ avɔyd abit dɛn we go mek wi nɔ gɛt lɔng layf ɔ we go ambɔg di we aw wi de tink.

23 Na “[Jiova] de gi ɔlman layf ɛn ɔltin we i want.” (Di Apɔsul Dɛn Wok [Akt] 17:24, 25) Layf na gift we Gɔd dɔn gi wi. Wi lɛk Jiova bikɔs na in dɔn gi wi dis gift, so wi want fɔ sho rɛspɛkt fɔ dis gift. Wi want fɔ avɔyd dɛn abit dɛn we nɔ gud fɔ wi wɛlbɔdi wan, bikɔs dɛn abit ya de sho se wi nɔ gɛt wan rɛspɛkt fɔ layf.​—Sam 36:9.

24 “Yu fɔ lɛk yu kɔmpin mɔtalman lɛkɛ aw yu lɛk yusɛf.” (Matyu 22:39) We pɔsin gɛt abit dɛn we nɔ klin, nɔto in wangren de sɔfa, di wan dɛn we de nia am sɛf de sɔfa. Fɔ ɛgzampul, if pɔsin we de smok de nia sɔmbɔdi we nɔ de smok, di pɔsin we de smok go ambɔg di ɔda pɔsin, in wɛlbɔdi wan. If pɔsin de du sɔntin we de ambɔg di wan dɛn we de nia am, i de pwɛl Gɔd in lɔ we se wi fɔ lɛk wi kɔmpin mɔtalman. If dis pɔsin tɔk se i lɛk Gɔd, na lay i de lay, bikɔs i de du tin dɛn we Gɔd nɔ lɛk.​—Jɔn In Fɔs Lɛta 4:20, 21.

25 “Mɛmba di Kristiɛn dɛn we yu de wok wit fɔ de du wetin di gɔvmɛnt ɛn di pipul dɛn we dɛn put oba dɛn, tɛl dɛn fɔ du ɛn fɔ rɛdi fɔ du ɔltin we gud.” (Taytɔs 3:1) Bɔku kɔntri  dɛn dɔn pas lɔ se, i bad fɔ gɛt ɔ yuz drɔgs. So wi we na tru Kristian nɔ fɔ gɛt ɔ yuz drɔgs.​—Lɛta Fɔ Rom 13:1.

26. (a) Wetin wi fɔ du fɔ mek Gɔd kɔntinyu fɔ lɛk wi? (b) Wetin mek fɔ klin na Gɔd in yay na di bɛst we fɔ liv?

26 Fɔ mek Gɔd kɔntinyu fɔ lɛk wi, wi nɔ fɔ jɔs du sɔm tin dɛn we klin ɛn du ɔda tin dɛn we nɔ klin. Ɔltin na wi layf fɔ klin. Fɔ avɔyd ɛn fɔ stɔp fɔ du bad tin dɛn nɔ kin izi, bɔt wi go ebul du am. * Na di bɛst we dis fɔ liv bikɔs Jiova de tich wi fɔ bɛnifit wisɛf ɔltɛm. (Ayzaya 48:17) Wan men tin we mek wi fɔ klin na dat i go mek Gɔd gɛt gudnem ɛn dat go mek wi gladi. Dis go sho se wi lɛk Gɔd, ɛn i go mek wi kɔntinyu fɔ du wetin go mek i lɛk wi.

^ par. 2 Di Grik wɔd we dɛn translet as “klin” nɔ jɔs de tɔk se wi bɔdi fɔ klin. Bɔt i de tɔk bak se wi abit ɛn di we aw wi de wɔship Gɔd fɔ klin.

^ par. 20 Insay dis vas, di wɔd “spirit” min di men tin we wi de tink bɔt.

^ par. 26 Rid di bɔks we se “ A De Tray Tranga Wan fɔ Du Wetin Rayt?” ɛn di wan we de ɔp dis pej we se “ Gɔd Ebul Du Ɔltin.

^ par. 68 Nɔto in rial nem.