Go dayrɛkt to di men tin

Go dayrɛkt to di say we di difrɛn difrɛn atikul dɛn de

MƆ TIN DƐN FƆ NO

Aw Kristian dɛn fɔ Sɛtul Mɔni Prɔblɛm?

Aw Kristian dɛn fɔ Sɛtul Mɔni Prɔblɛm?

Insay Fɔs Lɛta Fɔ Kɔrint 6:1-8, di apɔsul Pɔl bin tɔk bɔt Kristian dɛn we bin gɛt prɔblɛm wit dɛn brɔda dɛn, ɛn kɛr dɛn go na kɔt. I bin rayt to di Kristian dɛn na Kɔrint fɔ tɛl dɛn se i nɔ de fil fayn we Kristian dɛn kin “go bifo dɛn jɔj we nɔ sabi Gɔd.” (Vas 1) Pɔl bin gi dɛn gud gud rizin dɛn we fɔ mek Kristian nɔ kɛr in brɔda go na kɔt, bɔt i fɔ tray fɔ fala di advays we di ɛlda dɛn go gi fɔ sɛtul di prɔblɛm. Lɛ wi tɔk bɔt sɔm pan di rizin dɛn we Pɔl bin gi we mek Kristian dɛn nɔ fɔ kɛr dɛn kɔmpin go na kɔt. Afta dat, wi go tɔk bak bɔt ɔda tɛm dɛn we dis nɔ go wok.

If wi gɛt mɔni prɔblɛm wit wi kɔmpin Kristian, wi fɔ tray fɔ du tin di we aw Jiova want, nɔto di we aw wi want. (Prɔvabs 14:12) Jizɔs bin se i fayn fɔ mek wi sɛtul prɔblɛm kwik kwik wan bifo di prɔblɛm big. (Matyu 5:23-26) Bɔt i sɔri fɔ no se, sɔm Kristian dɛn kin vɛks pan dɛn kɔmpin pasmak ɛn ivin kɛr dɛn go kɔt. Pɔl bin se: “We una de mek plaba te una gɛt fɔ go kot, dat sho se una nɔ de klos Gɔd atɔl.” Wetin mek i se so? Di men rizin na bikɔs dat go briŋ badnem to di kɔngrigeshɔn ɛn to di Gɔd we wi de wɔship. So i fayn mek wi tink bɔt di kwɛstyɔn we Pɔl bin aks. I bin se: “I nɔ bin fɔ bɛtɛ fɔ mek pipul du una bad?”​—Vas 7.

Pɔl bin tɔk bak se Gɔd dɔn gi Kristian dɛn wan fayn we fɔ sɛtul bɔku prɔblɛm dɛn we kin apin. Dis fayn we we Gɔd dɔn gi wi, na di ɛlda dɛn we de na di kɔngrigeshɔn. Dɛn ɛlda ya na Kristian man dɛn we de stɔdi di Baybul. Dis stɔdi we dɛn de stɔdi di Baybul, de mek dɛn gɛt sɛns. Pɔl se dɛn man ya “gɛt sɛns fɔ tɔk di kes wɛn tu Kristiɛn mek plaba” we i kam pan “dɛn kes we de na dis layf.” (Vas 3-5) Jizɔs bin sho tri tin dɛn we wi fɔ du we wi want fɔ sɛtul siriɔs prɔblɛm dɛn, lɛk we pɔsin de lay pan in kɔmpin fɔ pwɛl in nem ɔ we i kruk in kɔmpin. Fɔs, wi fɔ go mit di pɔsin in wangren ɛn tray fɔ sɛtul di prɔblɛm; sɛkɔn, wi fɔ fɛn wan ɔ  tu witnɛs dɛn ɛn go bak to di pɔsin, if di fɔs we nɔ bin wok; ɛn tɔd, if dat bak nɔ wok, wi fɔ tɛl di ɛlda dɛn na di kɔngrigeshɔn.​—Matyu 18:15-17.

Kristian ɛlda dɛn nɔto lɔya ɔ biznɛsman dɛn, ɛn dɛn nɔ fɔ mek dɛnsɛf da we de. Nɔto dɛn de sho aw fɔ sɛtul mɔni prɔblɛm we di brɔda dɛn kin gɛt. Bɔt dɛn fɔ ɛp dɛn fɔ du wetin di Baybul se, ɛn ɛp dɛn fɔ gri pan sɔntin we go mek di tu pipul dɛn gɛt pis. If na prɔblɛm we dɛn nɔ ebul fɔ sɛtul, dɛn kin tɛl di sakit ovasia ɔ di branch ɔfis. Bɔt, sɔm prɔblɛm dɛn de we kin apin bitwin Kristian dɛn we di advays we Pɔl gi, nɔ go wok. Wetin na sɔm pan dɛn prɔblɛm ya?

Sɔntɛnde, sɔm prɔblɛm dɛn kin apin bitwin Kristian dɛn we dɛn nid fɔ kɛr go na kɔt, so dat pis go de. Fɔ ɛgzampul, pɔsin kin go na kɔt fɔ gɛt dayvɔs pepa, ɔ fɔ no udat go mɛn di pikin, ɔ fɔ disayd ɔmɔs di wan we want dayvɔs fɔ pe, ɔ fɔ gɛt inshɔrans bɛnifit, ɔ if di say we yu put yu mɔni nɔ gri fɔ gi yu bak, ɔ fɔ sho se di wil we yu gɛt na di tru tru wan. Apat frɔm dɛn wan ya we wi dɔn tɔk bɔt, sɔntɛnde Kristian nid fɔ kɛr pɔsin go na kɔt fɔ protɛkt insɛf, if di pɔsin bin ɔlrɛdi dɔn kɛr am go na kɔt. *

If pɔsin kɛr in kɔmpin go na kɔt bikɔs i du bad bad tin, bɔt nɔto bikɔs i gɛt bad at fɔ am, dat nɔ min se i nɔ de fala di advays we Pɔl bin gi. * Bɔt di men tin we ɛni Kristian fɔ du, na fɔ mek Jiova in nem klin ɛn fɔ mek pis ɛn wanwɔd de na di kɔngrigeshɔn. Di tin we go mek pipul dɛn no di wan dɛn we na Krays in disaypul dɛn, na di lɛk we dɛn lɛk dɛnsɛf. Ɛn dis lɛk we dɛn lɛk dɛnsɛf go mek dɛn nɔ want du ɛnitin we go mek na dɛn ‘yon biznɛs nɔmɔ go go bifo.’​—Fɔs Lɛta Fɔ Kɔrint 13:4, 5; Jɔn 13:34, 35.

^ par. 7 Wan wantɛm, pɔsin we na Kristian go du bad bad tin to in kɔmpin Kristian, lɛk fɔ rep, fɔ bit ɛn damej pɔsin, fɔ kil, ɔ fɔ tif sɔntin we rili dia. If dɛn tin ya apin, i nɔ go bad fɔ mek di ɔda Kristian go ripɔt na polis, ilɛksɛf dat go mek dɛn kɛr di pɔsin go na kɔt.

^ par. 8 If yu want fɔ no mɔ, duya na fɔ rid pej 17 to pej 22 na di Mach 15, 1997, Wachtawa, ɛn di Ɔktoba 15, 1991, Wachtawa, pej 25 to pej 28.