Go dayrɛkt to di men tin

Go dayrɛkt to di say we di difrɛn difrɛn atikul dɛn de

 CHAPTA 5

Aw Yu Go Difrɛn Frɔm di Pipul dɛn na di Wɔl?

Aw Yu Go Difrɛn Frɔm di Pipul dɛn na di Wɔl?

“If una bin gɛt wanwɔd wit di pipul dɛn na [di] wɔl, da tɛm de dɛn bin fɔ lɛk una lɛkɛ aw dɛn lɛk dɛn yon pikin dɛn. Bɔt a dɔn pik una kɔmɔt pan dɛn, una ɛn dɛn nɔ de si wan we, na dat mek dɛn nɔ lɛk una.”​—JƆN 15:19.

1. Wetin mɔ Jizɔs bin tɔk bɔt di las nɛt bifo i day?

DI LAS nɛt bifo Jizɔs day, i bin rili wɔri bɔt in disaypul dɛn. I bin ivin pre to in Papa bɔt dis. I bin se: “A nɔ de aks yu fɔ pul dɛn kɔmɔt to di ɔda pipul dɛn na [di] wɔl, a de aks yu fɔ kip dɛn mek Setan nɔ du dɛn natin. Jɛs lɛkɛ aw mi ɛn dɛn ɔda pipul na [di] wɔl nɔ de si wan we, na so dɛnsɛf ɛn di ɔda pipul dɛn na [di] wɔl nɔ de si wan we.” (Jɔn 17:15, 16) Jizɔs bin pre frɔm in at. Insay da prea de, i bin sho se i lɛk in disaypul dɛn bad bad wan. Ɛn i sho dɛn bak se di tin we i bin dɔn tɛl dɛn da ivintɛm de, impɔtant. I bin dɔn tɛl dɛn se: “Una ɛn dɛn nɔ de si wan we.” (Jɔn 15:19) Fɔ tru, i bin rili impɔtant to Jizɔs fɔ mek di wan dɛn we de fala am difrɛn frɔm di pipul dɛn na di wɔl!

2. Wetin na “di wɔl” we Jizɔs bin tɔk bɔt?

2 Di “wɔl” we Jizɔs bin tɔk bɔt min ɔl dɛn mɔtalman we nɔ de du wetin Gɔd want, we dɔn put dɛnsɛf ɔnda Setan, ɛn we de gri mek Setan in prawd spirit kɔntrol dɛn. (Jɔn 14:30; Lɛta Fɔ Ɛfisɔs 2:2; Jɔn In Fɔs Lɛta 5:19) So if ɛnibɔdi ‘lɛk di tin dɛn we de na di wɔl, dat go mek i nɔ lɛk Gɔd.’ (Jems 4:4) Bɔt aw di wan dɛn we want mek Gɔd  kɔntinyu fɔ lɛk dɛn, go de na di wɔl bɔt difrɛn frɔm di pipul dɛn na di wɔl? Wi go tɔk bɔt fayv we dɛn aw wi kin du dat: (1) Na we wi sɔpɔt Gɔd in Kiŋdɔm ɛn nɔ put an pan pɔlitiks, (2) na we wi nɔ fala di spirit we de na di wɔl, (3) na we wi tek tɛm wit di we aw wi de drɛs, (4) na we wi put ɔl wi atɛnshɔn pan Gɔd biznɛs, ɛn (5) na we wi wɛr di klos we Gɔd dɔn gi wi fɔ tek fɛt.

SƆPƆT GƆD IN KIŊDƆM ƐN NƆ PUT AN PAN PƆLITIKS

3. Wetin mek Jizɔs nɔ bin put an pan pɔlitiks we i bin de na di wɔl?

3 Jizɔs nɔ bin put an pan pɔlitiks, i bin de prich bɔt Gɔd in Kiŋdɔm, we na de i gɛt fɔ bi Kiŋ. (Daniɛl 7:13, 14; Lyuk 4:43) Na dat mek we Jizɔs bin de bifo di Roman Gɔvnɔ we nem Pɔntiɔs Paylet, i bin se: “Mi nɔto Kiŋ na dis wɔl.” (Jɔn 18:36) Di wan dɛn we de fala Krays, nɔ de kɔmɔt biɛn am, ɛn dɛn de falamakata am bay we dɛn de sɔpɔt Gɔd in Kiŋdɔm ɛn tɛl ɔda pipul dɛn bɔt da Kiŋdɔm de. (Matyu 24:14) Di apɔsul Pɔl tɔk se: “Na di mɛsej dis we Krays gi wi fɔ una, lɛkɛ se Gɔd insɛf de tɔk to una; na fɔseka Krays, wi de beg una: una alaw Gɔd mek i mek una tap fɔ bi pipul we nɔ lɛk am, ɛn bi in padi dɛn.”​—Sɛkɛn Lɛta Fɔ Kɔrint 5:20.

4. Aw tru Kristian dɛn de sho se dɛn de sɔpɔt Gɔd in Kiŋdɔm? (Rid di bɔks we se “ Fɔstɛm Kristian dɛn Nɔ Bin De Put An Pan Pɔlitiks.”.)

4 Di anɔyntɛd Kristian dɛn we de fala Jizɔs gɛt fɔ de na ɛvin. (Lɛta Fɔ Filipay 3:20) Di zil we dɛn gɛt fɔ prich bɔt di Kiŋdɔm, dɔn ɛp bɔku pipul dɛn we na Krays in “ɔda ship dɛn” fɔ bi Gɔd in padi. (Jɔn 10:16; Matyu 25:31-40) Di ɔda ship dɛn de sho se dɛn de fɔ di Kiŋdɔm bay we dɛn de sɔpɔt Jizɔs in anɔyntɛd brɔda dɛn. Jizɔs in brɔda dɛn ɛn dɛn ɔda ship ya de tɔk bɔt in Kiŋdɔm, ɛn dɛn nɔ de put an pan pɔlitiks atɔl.​—Rid Ayzaya 2:2-4.

5. Aw Kristian dɛn difrɛn frɔm di Izrɛlayt dɛn? Wetin dis dɔn mek wi nɔ de du?

 5 Nɔto jɔs bikɔs tru Kristian dɛn de sɔpɔt Krays mek dɛn nɔ de put dɛn an pan pɔlitiks. Gɔd in pipul dɛn we bin de trade trade bin de na wangren kɔntri, bɔt tide,  Gɔd in pipul dɛn de na difrɛn difrɛn say dɛn na di wɔl. (Matyu 28:19; Pita In Fɔs Lɛta 2:9) So if wi de put an pan pɔlitiks na dis wɔl, wi nɔ go ebul fɔ tɔk bɔt di Kiŋdɔm fayn fayn wan ɛn wi nɔ go gɛt wanwɔd wit wi Kristian brɔda dɛn na di wɔl. (Fɔs Lɛta Fɔ Kɔrint 1:10) Dɔn, we wɔ kam, wi go de fɛt wi brɔda dɛn we di Baybul dɔn tɛl wi se wi fɔ lɛk. (Jɔn 13:34, 35; Jɔn In Fɔs Lɛta 3:10-12) So na dis mek Jizɔs bin tɛl in disaypul dɛn se dɛn nɔ fɔ fɛt. Ɛn i bin ivin tɛl dɛn se dɛn fɔ lɛk dɛn ɛnimi dɛn.​—Matyu 5:44; 26:52; rid di bɔks we se  “A De Sɔpɔt Jiova?”.

6. We tru Kristian dɛn dɔn gi dɛn layf to Gɔd, aw dis fɔ mek dɛn si di wan dɛn we de rul dɛn?

6 Tru Kristian dɛn dɔn gi dɛn layf to Gɔd. Dɛn nɔ gi dɛn layf to ɛni mɔtalman, ɔganayzeshɔn, ɔ kɔntri. Fɔs Lɛta Fɔ Kɔrint 6:19, 20 tɔk se: “Una nɔto una yon prɔpati, una na Gɔd yon prɔpati. Gɔd pe dia fɔ una.” So pan ɔl we wi fɔ ɔna di wan dɛn we de rul wi, pe taks, ɛn put wisɛf ɔnda dɛn, wi fɔ stil gi “Gɔd wetin blant Gɔd.” (Mak 12:17; Lɛta Fɔ Rom 13:1-7) Dis min se wi fɔ wɔship am, lɛk am wit ɔl wi at, fetful to am, ɛn obe am. Wi fɔ ivin rɛdi fɔ day fɔ am.​—Lyuk 4:8; 10:27; rid Di Apɔsul Dɛn Wok [Akt] 5:29; Lɛta Fɔ Rom 14:8.

NƆ FALA DI SPIRIT WE DE NA DI WƆL

7, 8. Wetin na “di wɔl yon spirit”? Aw di dɛbul dɛn edman de “rul” pipul dɛn?

7 Wan ɔda we we Kristian dɛn nɔ kin miks pan di tin dɛn we de na di wɔl, na we dɛn nɔ gri fɔ fala di spirit we de na di wɔl. Di apɔsul Pɔl bin rayt se: “Nɔto di wɔl yon spirit wi gɛt, na Gɔd in yon Spirit wi gɛt.” (Fɔs Lɛta Fɔ Kɔrint 2:12) I bin tɛl di Kristian dɛn na Ɛfisɔs se: “Una bin de du ɔl dɛn bad tin we di pipul dɛn na di wɔl de du. Una  bin de du wetin di dɛbul dɛn edman we de ɔlɔbɔt tɛl una fɔ du, nain de rul dɛn pipul we nɔ de du wetin Gɔd tɛl dɛn fɔ du.”​—Lɛta Fɔ Ɛfisɔs 2:2, 3.

8 Wetin na “di wɔl yon spirit”? Na di tin we de mek pipul dɛn nɔ de du wetin Gɔd want, ɛn na in de mek pipul du wetin dɛn yay ɛn dɛn bɔdi want. (Jɔn In Fɔs Lɛta 2:16; Fɔs Lɛta To Timoti 6:9, 10) Di “dɛbul dɛn edman” kin mek pipul dɛn du wetin dɛn bɔdi want, i kin mek dɛn fil se wetin dɛn de du nɔ bad. Ɛn i nɔ de kɔmɔt biɛn pɔsin te di pɔsin du wetin i want. I dɔn mek pipul dɛn we de ɔlsay na di wɔl du wetin i want. Ɛn i de “rul” pɔsin bay we i de mek di pɔsin gɛt abit dɛn we Gɔd nɔ want, lɛk fɔ bisin bɔt yusɛf nɔmɔ, fɔ prawd, fɔ tink bɔt aw yu wangren go de go bifo, fɔ du wetin yu want fɔ du, ɛn nɔ fɔ obe di wan dɛn we de oba yu. * Dis dɛbul de tray fɔ mek in abit dɛn de na mɔtalman at.​—Jɔn 8:44; Di Apɔsul Dɛn Wok [Akt] 13:10; Jɔn In Fɔs Lɛta 3:8, 10.

9. Aw di spirit we de na di wɔl go ambɔg wi maynd ɛn wi at?

9 Yu fil se di spirit we de na di wɔl go ambɔg wi maynd ɛn wi at? Yɛs, bɔt na yu go gri fɔ lɛ i ambɔg yu if yu nɔ tek tɛm. (Rid Prɔvabs 4:23.) I kin bigin smɔl smɔl, sɔntɛm wi padi dɛn kin tan lɛk gud pipul dɛn, bɔt we yu wach dɛn gud, yu go si se dɛn nɔ lɛk Jiova atɔl. (Prɔvabs 13:20; Fɔs Lɛta Fɔ Kɔrint 15:33) Yu kin alaw dis bad spirit fɔ de na yu at bay we yu de rid buk dɛn we nɔ fayn fɔ rid, ɔ de luk tin dɛn we de sho mami ɛn dadi biznɛs, ɔ de go na Intanɛt wɛbsayt dɛn we de tich lay lay tin dɛn, ɔ we yu de ɛnjɔy yusɛf di we aw Gɔd nɔ want, ɔ put an pan dɛn spɔt we pɔsin kin want fɔ win pawpa, ɔ we yu put an pan ɛnitin we nɔ fayn we de na Setan in wɔl.

10. Aw wi go avɔyd di bad spirit we de na di wɔl?

 10 Aw wi go avɔyd di bad spirit we de na di wɔl, ɛn aw wi go mek Gɔd kɔntinyu fɔ lɛk wi? Wan men tin we go ɛp wi, na we wi tek di Baybul, di mitin dɛn, ɛn ɔda tin dɛn we Jiova de gi wi, siriɔs, ɛn we wi de pre ɔltɛm fɔ oli spirit. Jiova gɛt pawa fa fawe pas Setan ɛn di pipul dɛn we de ɔnda am. (Jɔn In Fɔs Lɛta 4:4) So i rili impɔtant fɔ lɛ wi de nia Jiova bay we wi de pre to am ɔltɛm.

 WI FƆ TEK TƐM DRƐS

11. Aw pipul dɛn de drɛs tide?

11 Pipul dɛn kin no di kayn pɔsin we sɔmbɔdi bi bay di we aw i de drɛs ɛn kia fɔ in bɔdi. Insay plɛnti kɔntri dɛn tide, pipul dɛn nɔ de drɛs fayn lɛk aw dɛn bin de drɛs fayn trade. Na dat mek wan man we de wok na wan tɛlivishɔn steshɔn bin tɔk se, i nɔ go te igen, klos nɔ go de fɔ dɛn rare gyal dɛn. Dis min se wi nɔ go ebul no udat na rare gyal ɛn udat nɔto rare gyal. Ivin smɔl gyal pikin dɛnsɛf de drɛs dis kayn we. Wan nyuspepa bin se pipul dɛn jɔs de wɛr ɛnikayn klos, ɛn ɔl dɛn bɔdi kin de na do. Wan ɔda we aw pipul dɛn de drɛs, na fɔ drɛs kialɛs wan. Dis de sho se dɛn nɔ want fɔ obe ɛnibɔdi ɛn dɛn nɔ gɛt wan rɛspɛkt fɔ dɛnsɛf.

12, 13. Wetin wi fɔ tink bɔt we wi de drɛs?

12 Wi we de sav Jiova fɔ drɛs fayn ɔltɛm. Wi klos fɔ nit, klin, ɛn i fɔ fit fɔ di program we wi wɛr am fɔ. Wi fɔ ‘tek tɛm pik di klos we wi de wɛr ɛn wi fɔ drɛs gud’ ɔltɛm. Wi nɔ want mek di we aw wi drɛs “kɔl atɛnshɔn” to wisɛf. Ilɛksɛf yu na man ɔ uman, yu fɔ du “dɛn gud wok” we pɔsin we de “kɔl insɛf” Gɔd pɔsin fɔ du. Wi nɔ fɔ de drɛs fɔ mek ɔlman wach wi, bɔt di we aw wi de drɛs, fɔ mek Gɔd kɔntinyu fɔ lɛk wi. (Fɔs Lɛta To Timoti 2:9, 10; Jud In Lɛta 21) Di Baybul se “ɔl una yon fayn fɔ de insay . . . , na dɛn kayn tin ya Gɔd luk se fayn.”​—Pita In Fɔs Lɛta 3:3, 4.

13 Mɛmba bak se, di we aw wi de drɛs na so pipul dɛn de si di Gɔd we wi de wɔship. We wi de drɛs, wi nɔ fɔ de wɛr dɛn dia dia tin dɛn fɔ blɔf ɔda pipul dɛn. Bɔt di we aw wi de drɛs fɔ sho se wi de ɔna Gɔd ɛn rɛspɛkt di we aw ɔda pipul dɛn de tink ɛn fil. So ɔda pipul dɛn kɔnshɛns fɔ impɔtant pas di rayt we wi gɛt fɔ drɛs di we aw wi want. Pantap ɔl dis, wi want fɔ rɛspɛkt Jiova ɛn in pipul dɛn ɛn sho se wi na Gɔd in savant dɛn we  rɛdi fɔ du wetin go “mek Gɔd gɛt di prez.”​—Fɔs Lɛta Fɔ Kɔrint 4:9; 10:31; Sɛkɛn Lɛta Fɔ Kɔrint 6:3, 4; 7:1.

Di we aw a de drɛs de gi ɔna to Jiova?

14. Us kwɛstyɔn dɛn wi fɔ aks wisɛf we i kam pan di we aw wi de drɛs ɛn kia fɔ wi bɔdi?

14 Di we aw wi de drɛs ɛn klin wi bɔdi, impɔtant mɔ we wi de go fil savis ɛn we wi de go mitin. Aks yusɛf dɛn kwɛstyɔn ya: ‘Di we aw a de drɛs ɛn kia fɔ mi bɔdi de mek pipul dɛn de wach mi tumɔs? I de mek ɔda pipul dɛn shem ɔ fil bad? A de tink se di rayt we a gɛt fɔ drɛs di we aw a want, impɔtant pas fɔ gɛt wok fɔ du na di kɔngrigeshɔn?’​—Sam 68:6; Lɛta Fɔ Filipay 4:5; Pita In Fɔs Lɛta 5:6.

15. Wetin mek Gɔd in Wɔd nɔ gi wi lɔ dɛn we de tɛl wi aw wi fɔ drɛs, kia fɔ wi bɔdi, ɛn kip wisɛf klin?

15 Di Baybul nɔ put ɛni lɔ bɔt di we aw wi fɔ drɛs, kia fɔ wi bɔdi, ɛn aw wi de kip wisɛf klin. Jiova dɔn gi wi fridɔm fɔ tink ɛn du tin dɛn di we aw wi want, so i nɔ go pul dis fridɔm na wi an. Bɔt i want mek wi biev lɛk machɔ pɔsin we ebul tink bɔt wetin di Baybul se ɛn we “no wetin gud ɛn wetin bad.” (Di Ibru Pipul Dɛn 5:14) Di tin we impɔtant pas ɔl na dat Gɔd want lɛ wi drɛs di we we go sho se wi lɛk am ɛn wi lɛk ɔda pipul dɛn. (Rid Mak 12:30, 31.) Pan ɔl we wi dɔn lan se wi fɔ tek tɛm drɛs, wi stil gɛt difrɛn difrɛn we dɛn fɔ drɛs. Wi kin si dis we Jiova  in pipul dɛn kin gɛda fɔ lan bɔt am ɛnisay na di wɔl; dɛn kin klin ɛn drɛs fayn.

PUT ƆL YU ATƐNSHƆN PAN GƆD BIZNƐS

16. (a) Wetin bɔku pipul dɛn na di wɔl fil se go mek dɛn gladi? Wetin Jizɔs bin se go gi wi tru tru gladi at? (b) Us kwɛstyɔn dɛn wi fɔ aks wisɛf?

16 Di spirit we de na di wɔl tide de ful plɛnti plɛnti pipul se na mɔni ɛn jɛntri na in go mek dɛn gladi. Bɔt Jizɔs bin se: “Nɔto di plɛnti tin dɛn we pɔsin gɛt go mek di pɔsin gɛt di tru layf.” (Lyuk 12:15) Jizɔs nɔ bin min se pipul dɛn nɔ fɔ tray fɔ gɛt wetin dɛn want na layf. Bɔt i bin de tich se tru tru layf ɛn gladi at go de fɔ di wan dɛn “we abop pan Gɔd,” ɛn we put ɔl dɛn atɛnshɔn pan Gɔd biznɛs. (Matyu 5:3; 6:22) Aks yusɛf: ‘A rili biliv wetin Jizɔs tich, ɔ a de fala di papa fɔ dɛn layman dɛn? (Jɔn 8:44)  Aw di tin dɛn we a de tɔk, di tin dɛn we a want fɔ du tumara bambay, di tin dɛn we a put fɔs na mi layf, ɛn di we aw a de liv mi layf, de sho uskayn pɔsin a bi?’​—Lyuk 6:45; 21:34-36; Jɔn In Sɛkɛn Lɛta 6.

17. Wetin na sɔm bɛnifit dɛn we pipul dɛn de ɛnjɔy we dɛn put ɔl dɛn atɛnshɔn pan Gɔd biznɛs?

17 Jizɔs bin se: “Di tin dɛn we pɔsin de du go sho if na Gɔd in sɛns i tek du dɛn.” (Matyu 11:19) Lɛ wi tɔk smɔl bɔt di bɛnifit dɛn we pipul dɛn de ɛnjɔy we dɛn put ɔl dɛn atɛnshɔn pan Gɔd biznɛs. Dɛn de rili gladi fɔ du Gɔd in wok. (Matyu 11:29, 30) Dɛn de avɔyd yagba ɛn wɔri wɔri we kin mek pipul dɛn at pwɛl. (Rid Fɔs Lɛta To Timoti 6:9, 10.) Dɛn de satisfay wit wetin dɛn gɛt, so dis dɔn mek dɛn gɛt plɛnti tɛm fɔ dɛn fambul ɛn dɛn kɔmpin Kristian dɛn. Ɔl dis de mek dɛn slip fayn. (Ɛkliziastis 5:12) Dɛn kin gladi we dɛn de gi ɔda pipul dɛn ɛnitin we dɛn ebul. (Di Apɔsul Dɛn Wok [Akt] 20:35) Ɛn dɛn “abop” pan Gɔd, gɛt kolat ɛn satisfay wit wetin dɛn gɛt. (Lɛta Fɔ Rom 15:13; Matyu 6:31, 32) Fɔ tru, dɛn blɛsin ya pas ɛnitin!

“WƐR DI KLOS WE GƆD GI” WI FƆ TEK FƐT

18. Uskayn ɛnimi di Baybul se wi gɛt? Wetin i de yuz fɔ gɛt wi? Uskayn fɛt wi de fɛt?

18 Setan nɔ want mek Kristian dɛn gɛt da layf we go de sote go ɛn i nɔ ivin want mek dɛn gɛt gladi at. Bɔt Gɔd de kɔba di wan dɛn we de du wetin go mek i lɛk dɛn. (Pita In Fɔs Lɛta 5:8) Di apɔsul Pɔl tɔk se: “Wi nɔ de fɛt mɔtalman, wi de fɛt dɛn pawa we wi nɔ de si, dɛn pawa we de rul dis dak wɔl ɛn dɛn wan we de ɔp ɔp na di klawd.” (Lɛta Fɔ Ɛfisɔs 6:12) Di Grik wɔd we dɛn translet as “fɛt” min we pipul dɛn de rasul ɔ fɛt wit dɛn an. I nɔ min fɛt we yu de yuz gɔn ɛn gɛt sɔnsay fɔ ayd. Pantap dat, we di Baybul tɔk bɔt “pawa we wi nɔ de si” ɛn “pawa we de  rul,” i de sho se dɛn wikɛd spirit dɛn dɔn plan ɛn ɔganayz dɛnsɛf fɔ fɛt Gɔd in pipul dɛn.

19. Ɛksplen aw di klos we Gɔd dɔn gi Kristian dɛn fɔ wɛr tan lɛk.

19 Pan ɔl we wi nɔ pafɛkt ɛn nɔ ebul du ɔltin, wi go ebul fɔ win dis fɛt. Aw wi go ebul du dis? Na bay we wi ‘wɛr di klos we Gɔd gi wi fɔ tek fɛt.’ (Lɛta Fɔ Ɛfisɔs 6:13) Lɛta Fɔ Ɛfisɔs 6:14-18 sho wi aw di klos tan lɛk. I se: “Una fɔ tinap traŋa: mek ɔl wetin tru bi di bɛlt we una fɔ tay; mek di rayt we bi di ayɛn plet we una go wɛr fɔ kɔba una chɛst wɛn una de fɛt. Una fɔ wɛr di sus we go mek una rɛdi fɔ tɛl pipul di Gud Nyuz we de gi kol at. Pantap ɔl dɛn tin ya, una shild na fɔ biliv pan di Masta. Dis shild ya go mek dɛn ɔt aro we Setan de shut, nɔ du una natin. Una fɔ mek di sev we Gɔd dɔn sev una, bi di kyap we una go wɛr na una ed; ɛn una fɔ yus di sɔd we di Spirit gi una, dat na Gɔd in wɔd. Una fɔ pre ɔltɛm fɔ ɔltin bay aw Gɔd in Spirit de tɛl una. Una fɔ waydawek ɛn una nɔ fɔ taya fɔ pre ɔltɛm fɔ Gɔd in pipul dɛn.”

20. Aw Kristian dɛn difrɛn frɔm tru tru sojaman dɛn?

20 Na Gɔd dɔn gi wi dis klos we wi fɔ tek fɛt, so i go mɔs ɛp wi if wi wɛr am ɔltɛm. Kristian dɛn nɔ tan lɛk tru tru sojaman dɛn we kin blo fɔ fɛt we dɛn nɔ gɛt ɛnimi; dɛn de fɛt ɔltɛm. If dɛn lɛf fɔ fɛt, dɛn go day. Dis wɔ nɔ go stɔp pas Gɔd pul Setan ɛn ɔl di wan dɛn we de biɛn am kɔmɔt na di wɔl, ɛn put dɛn wikɛd dɛbul dɛn na di ol we nɔ gɛt bɔtɔm. (Rɛvɛleshɔn 12:17; 20:1-3) So yu fɔ tray “traŋa” wan fɔ du wetin Jiova want. Yu nɔ fɔ taya if yu gɛt fɔ fɛt wit di prɔblɛm dɛn we yu gɛt. (Fɔs Lɛta Fɔ Kɔrint 9:27) Fɔ tru, na di tɛm we wi de fɛt na in wi fɔ wɔri!

21. Wetin wi fɔ du we go mek wi win dis fɛt?

21 If i lɛf to wi nɔmɔ, wi nɔ go ebul win dis fɛt. Na dat mek Pɔl bin mɛmba wi se wi fɔ de ‘pre ɔltɛm fɔ ɔltin bay aw Gɔd in Spirit de tɛl wi.’ Dɔn, wi fɔ lisin to Jiova bay  we wi de stɔdi di Baybul ɛn de wit wi brɔda ɛn sista dɛn we na Krays in “soja man” dɛn. Wi fɔ du dis bikɔs nɔto wi nɔmɔ de pan dis fɛt. (Lɛta Fɔ Filipay 2:25; Di Ibru Pipul Dɛn 10:24, 25) Di wan dɛn we de du ɔl dɛn tin ya, go win dis fɛt. Ɛn dɛn go ebul fɔ tinap tranga wan fɔ di tin dɛn we dɛn biliv if pipul dɛn tɔk bad bɔt dɛn.

RƐDI FƆ TƆK BƆT WETIN YU BILIV

22, 23. (a) Wetin mek wi fɔ rɛdi ɔltɛm fɔ tɔk bɔt wetin wi biliv, ɛn us kwɛstyɔn dɛn wi fɔ aks wisɛf? (b) Wetin wi go tɔk bɔt na di ɔda chapta?

22 Jizɔs bin tɔk se: “If una bin gɛt wanwɔd wit di pipul dɛn na [di] wɔl, da tɛm de dɛn bin fɔ lɛk una lɛkɛ aw dɛn lɛk dɛn yon pikin dɛn. Bɔt a dɔn pik una kɔmɔt pan dɛn, una ɛn dɛn nɔ de si wan we, na dat mek dɛn nɔ lɛk una.” (Jɔn 15:19) Kristian dɛn fɔ rɛdi ɔltɛm fɔ tɔk bɔt wetin dɛn biliv, dɛn fɔ du so wit rɛspɛkt ɛn dɛn nɔ fɔ fos ɛnibɔdi fɔ biliv wetin dɛn de se. (Rid Pita In Fɔs Lɛta 3:15, 16.) Aks yusɛf dɛn kwɛstyɔn ya: ‘A rili ɔndastand wetin mek Jiova Witnɛs dɛn kin tinap tranga wan nɔ fɔ du sɔm tin dɛn we bɔku pipul dɛn de du? If misɛf want fɔ du sɔntin lɛk dat, a rili biliv se wetin di Baybul ɛn di fetful slev de tɔk, na tru? (Matyu 24:45; Jɔn 17:17) Ɛn we i kam fɔ lɛ a du wetin rayt na Jiova in yay, a rɛdi fɔ sho se a difrɛn frɔm di pipul dɛn na di wɔl ɛn a gladi fɔ du dat?’​—Sam 34:2; Matyu 10:32, 33.

23 Bɔku tɛm, wi kin want fɔ sho se wi difrɛn frɔm di pipul dɛn we de na di wɔl, bɔt sɔm tin dɛn de we kin mek i nɔ izi fɔ lɛ wi du dat. Ɛn wi nɔ kin ivin no we dɛn tin ya de apin to wi. Fɔ ɛgzampul, Setan de tray fɔ mek Jiova in savant dɛn du tin dɛn we pipul dɛn de du na di wɔl. Aw i kin du dis? I kin want lɛ dɛn ɛnjɔy dɛnsɛf di we aw Gɔd nɔ want. Aw wi go fɛn we fɔ ɛnjɔy wisɛf we go mek wi fil fayn ɛn gɛt klia kɔnshɛns? Na dat wi gɛt fɔ tɔk bɔt na di ɔda chapta.

^ par. 8 If yu want fɔ no mɔ, na fɔ rid Reasoning From the Scriptures, pej 389 to pej 393. Na Jiova Witnɛs dɛn mek dis buk.