Go dayrɛkt to di men tin

Go dayrɛkt to di say we di difrɛn difrɛn atikul dɛn de

 CHAPTA 9

‘Nɔ Liv Fri Layf’

‘Nɔ Liv Fri Layf’

“Una fɔ kil di tin we de insay una at we de mek una want fɔ du dɛn bad tin we dɛn ɔda mɔtalman de du, dat na fɔ liv fri ɔ dɔti layf; fɔ want man ɔ uman we nɔto una yon; fɔ want fɔ du ɔl kayn bad tin; fɔ want plɛnti, plɛnti tin (dat jɛs tan lɛkɛ wɛn pɔsin gɛt ɔda tin we i lɛk pas Gɔd).”​—LƐTA FƆ KƆLƆSE 3:5.

1, 2. Aw Belam bin plan fɔ du bad tin to Jiova in pipul dɛn?

TINK bɔt fishaman we de go na di say we i lɛk fɔ fishin. We i de go, i de tink bɔt di kayn fish we i want fɔ kech. So i fɛn di rayt bet we da fish de go lɛk ɛn put am na di fishin-layn. Dɔn, i put di fishin-layn insay di wata. I nɔ tu te, di fishin-layn bigin ebi na in an, ɛn di fishaman drɔ di layn ɛn pul di fish. Dis mek di fishaman gladi bikɔs i yuz di rayt bet.

2 Dis fishaman in stori de mek wi mɛmba sɔntin we bin dɔn apin trade trade. I bin apin insay di ia 1473 bifo Jizɔs kam. Wan man we nem Belam bin de tink bɔt sɔntin we i go yuz as bet fɔ mek Gɔd in pipul dɛn du bad. Da tɛm de, Gɔd in pipul dɛn bin de na wan flat land we bin de na Moab. Moab bin de nia di ples we Gɔd bin dɔn prɔmis in pipul dɛn. Belam bin de mek lɛk se in na Jiova in prɔfɛt, bɔt na lay i bin de lay. We dɛn bin kɔl am fɔ go swɛ Gɔd in pipul dɛn, i bin go bikɔs in na pɔsin we want ɔltin fɔ insɛf. Bɔt Jiova nɔ bin gri mek Belam swɛ in pipul dɛn, bifo dat na blɛs i blɛs dɛn. Belam bin rili want di tin we dɛn bin dɔn prɔmis am; so i bigin tink bɔt tin we go mek Gɔd vɛks pan in pipul dɛn. Belam bin no se if di Izrɛlayt dɛn du bad bad tin na Jiova in yay, Jiova go vɛks pan dɛn. So i bin yuz di fayn fayn yɔŋ uman dɛn we de na Moab as bet.​—Di Nɔmba Dɛm 22:1-7; 31:15, 16; Rɛvɛleshɔn 2:14.

3. Aw Belam in plan bin wok?

 3 Yu tink se di plan we Belam bin gɛt, bin wok? Yɛs, i bin wok. Plɛnti plɛnti Izrɛlayt man dɛn bin tek Belam in bet. Dɛn bigin fɔ du mami ɛn dadi biznɛs wit di Moabayt uman dɛn. Ɛn dɛn ivin bigin fɔ wɔship di Moabayt gɔd dɛn. Wan pan di gɔd dɛn we dɛn bin de wɔship na Beal we bin de na Piɔ. Na dis gɔd bin de fɔ bɔn pikin biznɛs ɛn mami ɛn dadi biznɛs. Dis tin we dɛn du mek 24,000 Izrɛlayt dɛn day nia di land we Gɔd bin dɔn prɔmis dɛn. Na sɔri sɔri tin dis we bin apin!​—Di Nɔmba Dɛm 25:1-9.

4. Wetin mek bad tin bin apin to di Izrɛlayt dɛn?

4 Wetin mek dis bad tin bin apin to di Izrɛlayt dɛn? I bin apin bikɔs plɛnti pan di Izrɛlayt dɛn at bin bad. Aw? Bay we dɛn bin lɛf Jiova we na di Gɔd we pul dɛn kɔmɔt na Ijipt, we bin de kia fɔ dɛn na di ɛmti land, ɛn we bin dɔn kɛr dɛn go nia di land we i bin dɔn prɔmis dɛn. (Di Ibru Pipul Dɛn 3:12) We di apɔsul Pɔl bin de tink bɔt dis tin we apin, i bin rayt se: “Wi nɔ fɔ liv fri layf, lɛkɛ aw sɔm pipul bin du, we mek twɛnti-tri tawzin pan dɛn day wande.” *​—Fɔs Lɛta Fɔ Kɔrint 10:8.

5, 6. Wetin mek di tin we apin to di Izrɛlayt dɛn na Moab rili impɔtant fɔ wi tide?

 5 Dis stori we de na Di Nɔmba Dɛm gɛt impɔtant lɛsin dɛn fɔ Gɔd in pipul dɛn tide we de nia di tɛm we Paradays go kam. (Fɔs Lɛta Fɔ Kɔrint 10:11) Fɔ ɛgzampul, di wɔl dɔn ful-ɔp wit mami ɛn dadi biznɛs jɔs lɛk aw i bin de bi na Moab. Bɔt tide, pipul dɛn de du am pas aw di Moabayt dɛn bin de du am. Ɛvri ia, plɛnti Kristian dɛn de du mami ɛn dadi biznɛs di we aw Gɔd nɔ want. Na di sem bet Belam bin yuz fɔ kech Gɔd in pipul dɛn. (Sɛkɛn Lɛta Fɔ Kɔrint 2:11) Sɔm Kristian dɛn de na di kɔngrigeshɔn we de falamakata Zimray fɔ du bad ɛn mek ɔda pipul dɛn du wetin nɔ fayn. Udat na bin Zimray? Zimray na bin wan Izrɛlayt man we bin gɛt maynd fɔ kam wit Midianayt uman ɛn pas wit am rayt usay di Izrɛlayt dɛn bin de, ɛn go wit di uman insay in tɛnt.​—Di Nɔmba Dɛm 25:6, 14; Jud In Lɛta 4.

6 Yu tink se sɔntin lɛk wetin bin apin to di Izrɛlayt dɛn na Moab kin apin to wi tide? Yu de si di nyu wɔl we gɛt fɔ kam jisnɔ? If yu ansa na yɛs, na fɔ du ɛnitin we yu ebul fɔ du we go mek Gɔd kɔntinyu fɔ lɛk yu. Yu go du dis bay we yu du wetin di Baybul tɔk we i se wi “nɔ fɔ liv fri layf.”​—Fɔs Lɛta Fɔ Kɔrint 6:18.

Di flat land we de na Moab

WETIN I MIN FƆ LIV FRI LAYF?

7, 8. Wetin i min fɔ liv fri layf? Uskayn bad tin dɛn kin mit di wan dɛn we de liv fri layf?

7 I nɔ kin izi fɔ mek pipul dɛn tɔk bɔt dis tɔpik. Bɔt duya, i go fayn mek wi tɔk smɔl bɔt am so dat wi ɔl go ebul ɔndastand wetin i min fɔ liv fri layf, ɛn fɔ no aw wi go avɔyd tin dɛn we Gɔd nɔ lɛk. Di fɔstɛm we dɛn bin rayt di Baybul insay Grik, dɛn bin yuz di wɔd pɔnia (por·neiʹa) we min fɔ liv fri layf. Wetin i min fɔ liv “fri layf”? I min ɛnikayn mami ɛn dadi biznɛs we pɔsin de du we i nɔ mared di we aw di Baybul se. Aw pɔsin kin liv fri layf? Na we pɔsin we mared de du mami ɛn dadi biznɛs wit ɔda pɔsin, ɔ we pɔsin de du rare wok, ɔ we tu pipul dɛn we nɔ mared de du mami ɛn  dadi biznɛs, ɔ we pɔsin de yuz in mɔt fɔ ple wit ɔda pɔsin in prayvet pat, ɔ we pɔsin de du mami ɛn dadi biznɛs na ɔda pɔsin in wes, ɔ we tu pipul dɛn we nɔ mared de ple wit dɛn prayvet pat, ɔ we man de du mami ɛn dadi biznɛs wit in kɔmpin man ɔ we uman de du am wit in kɔmpin uman, ɛn we pɔsin de du mami ɛn dadi biznɛs wit animal. *

8 Di Baybul tɔk klia wan se: Di wan dɛn we de kɔntinyu fɔ du mami ɛn dadi biznɛs di we aw Gɔd nɔ want, nɔ go de na di kɔngrigeshɔn ɛn dɛn nɔ go gɛt layf we go de sote go. (Fɔs Lɛta Fɔ Kɔrint 6:9; Rɛvɛleshɔn 22:15) Pantap dat, ivin naw sɛf dɛn de gɛt prɔblɛm dɛn. Uskayn prɔblɛm dɛn, dɛn kin gɛt? Pɔsin nɔ kin biliv dɛn, dɛn nɔ kin rɛspɛkt dɛnsɛf, dɛn nɔ kin gɛt wanwɔd na dɛn mared-os, dɛn kɔnshɛns nɔ kin klia, dɛn kin gɛt bɛlɛ we dɛn nɔ want, dɛn kin gɛt dɛn bad sik, ɛn dɛn kin ivin day. (Rid Lɛta Fɔ Galeshya 6:7, 8.) Wetin mek yu go put an pan sɔntin we go briŋ pen ɛn pwɛl at? Bɔt o-ya, plɛnti pipul nɔ de tink go fa. Dɛn nɔ kin tink bɔt di bad tin we go apin to dɛn, if dɛn put an pan tin dɛn we go mek dɛn liv fri layf. Bɔt, wetin na wan pan di fɔs tin dɛn we kin mek pɔsin liv fri layf? Di pɔsin kin bigin wach tin dɛn we de sho nekɛd pipul dɛn ɔ we de sho usay pipul dɛn de du mami ɛn dadi biznɛs.

SƆNTIN WE KIN MEK PƆSIN LIV FRI LAYF

9. Yu tink se i bad fɔ wach ɛnitin we gɛt fɔ du wit mami ɛn dadi biznɛs? Ɛksplen.

9 Insay bɔku kɔntri dɛn, dɛn kin sho ɔ tɔk bɔt rud rud tin dɛn. Dɛn kin du dis na strit, insay myuzik, na tɛlivishɔn, ɛn na di Intanɛt. * Sɔm pipul dɛn fil se i nɔ bad. Bɔt dat na tru?  Nɔ, dat nɔto tru. Di wan dɛn we de wach dɛn tin ya, kin mek am abit fɔ ple wit dɛn prayvet pat, ɛn dɛn kin “du dɛn dɔti tin we dɛn at gi dɛn fɔ du.” Dis kin mek dɛn want fɔ du mami ɛn dadi biznɛs ɔltɛm, ɛn dɛn kin du am di we aw Gɔd nɔ want. Dɛn kin gɛt siriɔs prɔblɛm na dɛn mared-os, ɛn sɔm kin ivin dayvɔs. * (Lɛta Fɔ Rom 1:24-27; Lɛta Fɔ Ɛfisɔs 4:19) Wan man we bin de stɔdi aw fɔ ɛp dɛn wan dɛn we lɛk fɔ du mami ɛn dadi biznɛs tumɔs, bin se, di prɔblɛm we dɛn pipul ya gɛt tan lɛk kansa. I se ‘na tin we dɛn kin want fɔ du ɔltɛm ɛn i at fɔ mek dɛn lɛf dis abit, ɛn i at bak fɔ ɛp pɔsin we gɛt dis kayn prɔblɛm.’

I fayn fɔ put wi kɔmpyuta usay ɔlman de si am na di os

10. Aw wi go ebul fɔ du wetin de na Jems 1:14, 15? (Rid di bɔks we se “ Wetin Bin Ɛp Mi fɔ Pul An Pan Bad Layf?”)

 10 Lɛ wi tink bɔt wetin Jems 1:14, 15 se: “Na di bad we de na pɔsin in at de mek di pɔsin want fɔ du bad. Na di bad we de na pɔsin at de mek di pɔsin want sin, ɛn wɛn pɔsin sin dat go mek i day.” So if yu bigin fɔ tink bɔt bad tin, na fɔ tray tranga wan fɔ pul am na yu maynd wantɛm wantɛm! Fɔ ɛgzampul, if bay mistek yu si sɔntin we de sho mami ɛn dadi biznɛs, na fɔ tɔn yu fes wantɛm wantɛm, ɔ ɔt di kɔmpyuta, ɔ chenj di tɛlivishɔn program we yu bin de wach. Du ɔltin we yu ebul fɔ du, so dat yu nɔ go put an pan ɛnitin we go mek yu liv fri layf!​—Rid Matyu 5:29, 30.

11. We wi want lɛf fɔ tink bɔt bad tin dɛn, aw wi go sho se wi abop pan Jiova?

11 Jiova we na di Wan we no wi pas di we aw wi no wisɛf, tɛl wi se: “Una fɔ kil di tin we de insay una at we de mek una want fɔ du dɛn bad tin we dɛn ɔda mɔtalman de du, dat na fɔ liv fri ɔ dɔti layf; fɔ want man ɔ uman we nɔto una yon; fɔ want fɔ du ɔl kayn bad tin; fɔ want plɛnti, plɛnti tin (dat jɛs tan lɛkɛ wɛn pɔsin gɛt ɔda tin we i lɛk pas Gɔd).” (Lɛta Fɔ Kɔlɔse 3:5) Na tru se i nɔ kin izi fɔ du wetin dis skripchɔ se, bɔt wi fɔ mɛmba se wi Papa we de na ɛvin, lɛk wi ɛn i rɛdi fɔ lisin we wi de pre to am. (Sam 68:19) So as yu bigin tink fɔ du bad tin, pre to am wantɛm wantɛm. Beg am mek i gi yu di “pawa we di Spirit de gi” ɛn tray tranga wan fɔ tink bɔt tin dɛn we gud.​—Sɛkɛn Lɛta Fɔ Kɔrint 4:7; Fɔs Lɛta Fɔ Kɔrint 9: 27; rid di bɔks we se “ Aw A Go Ebul Lɛf Mi Bad Abit Dɛn?

12. Wetin impɔtant to Gɔd? Wetin mek wi fɔ tek tɛm wit di we aw wi de tink?

12 Sɔlɔmɔn bin rayt se: “Tek tɛm aw yu de tink; bikɔs aw yu de tink na so yu de biev.” (Prɔvabs 4:23) Na di we aw wi de tink na in Gɔd de si. Nɔto di we aw mɔtalman de si wi, impɔtant, na di we aw Gɔd de si wi na in impɔtant, bikɔs na dat go mek wi gɛt layf we go de sote go. Wi kin si dis as simpul tin, bɔt na tin we siriɔs bikɔs i go mek wi gɛt layf ɔ nɔ gɛt layf.  Na dat mek Job bin disayd se i nɔ go yuz in yay fɔ luk uman di we aw Gɔd nɔ want. (Job 31:1) Dis tin we Job du na fayn ɛgzampul fɔ wi! Wan pan di man dɛn we rayt di Sam buk bin si tin di sem we lɛk Job. I bin pre se: “Nɔ mek fulish tin ful mi yay.”​—Di Sam Dɛm 119:37.

DAYNA NƆ BIN GƐT GUD PADI DƐN

13. Udat na bin Dayna? Wetin mek in padi dɛn nɔto bin gud padi dɛn?

13 Lɛk aw wi bin lan na Chapta 3, wi padi dɛn kin mek wi du gud tin ɔ bad tin. (Prɔvabs 13:20; rid Fɔs Lɛta Fɔ Kɔrint 15:33.) Lɛ wi tɔk bɔt Dayna we na bin Jekɔb in gyal pikin. (Jɛnɛsis 34:1) Pan ɔl we Dayna in pipul dɛn bin gi am gud trenin, i bin du sɔntin we nɔ fayn. I bin mek padi wit dɛn Kenanayt yɔŋ gyal dɛn. Di Kenanayt pipul dɛn bin tan lɛk di Moabayt pipul dɛn. Ɔlman bin no se dɛn pipul ya bin de liv fri fri layf. (Lɛvitikɔs 18:6-25) Wan Kenanayt man bin de we nem Shɛkɛm. Pipul dɛn bin rɛspɛkt dis man na in famili. Shɛkɛm ɛn ɔda Kenanayt man dɛn bin de si Dayna as pɔsin we go gri fɔ liv fri layf.​—Jɛnɛsis 34:18, 19.

14. Aw di kayn padi dɛn we Dayna bin gɛt briŋ trɔbul?

 14 I go mɔs bi se Dayna nɔ bin de tink bɔt mami ɛn dadi biznɛs we i bin de si Shɛkɛm. Bɔt Shɛkɛm bin du wetin ɛni ɔda Kenanayt man bin fɔ du we i fil fɔ du mami ɛn dadi biznɛs. Sɔntɛm, Dayna bin tawa, bɔt dat nɔ bin stɔp Shɛkɛm fɔ du wetin i want fɔ du. Shɛkɛm bin “kech am ɛn rep am.” Leta, Shɛkɛm bin kam fɔ “lɛk Dayna bad bad wan so i fɔl fɔ  am,” bɔt o-ya, i bin dɔn rep am dɔn. (Rid Jɛnɛsis 34:1-4.) We dis tin bi, nɔto Dayna in wangren bin sɔfa. In wan ol famili bin sɔfa. Dis tin we bin apin to am bin mek ɔda bad tin dɛn apin we briŋ shem ɛn disgres na in famili. Bɔt ɔl dis bin apin bikɔs Dayna bin mek padi wit pipul dɛn we nɔ gud.​—Jɛnɛsis 34:7, 25-31; Lɛta Fɔ Galeshya 6:7, 8.

15, 16. Aw wi go ebul gɛt tru tru sɛns? (Rid di bɔks we tɔk bɔt “ Skripchɔ dɛn We Wi fɔ Tink Bɔt Gud Gud Wan.”)

15 Dayna go mɔs dɔn lan in lɛsin; bɔt i bin lan am afta da bad bad tin bin dɔn apin to am. Di wan dɛn we lɛk Jiova ɛn we de obe am, nɔ de wet te bad tin apin to dɛn bifo dɛn lan lɛsin. Dɛn want fɔ du wetin Gɔd want, so na dat mek dɛn de kip kɔmpin “wit pipul we gɛt sɛns.” (Prɔvabs 13:20a) So dɛn dɔn “no aw fɔ du tin tret wan,” ɛn dɛn dɔn no aw fɔ du “wetin gud.” Dis dɔn mek dɛn dɔn avɔyd bɔku prɔblɛm ɛn pwɛl at.​—Prɔvabs 2:6-9; Sam 1:1-3.

16 Di sɛns we Gɔd de gi, de fɔ ɔlman we want am. Aw pɔsin de sho se i want dis sɛns? Na bay we di pɔsin de pre ɛn stɔdi di Baybul ɔltɛm, ɛn we i de stɔdi di tin dɛn we di fetful slev de mek. (Matyu 24:45; Jems 1:5) Wan ɔda tin bak we impɔtant, na we pɔsin de put insɛf dɔŋ. Aw pɔsin go sho se i de put insɛf dɔŋ? Na bay we i rɛdi fɔ obe wetin di Baybul se. (Sɛkɛn Kiŋ 22:18, 19) Fɔ ɛgzampul, sɔmbɔdi we na Kristian kin gri se in at kɔrɔpt. (Jɛrimaya 17:9) Bɔt if i du sɔntin we nɔ fayn, dɔn pɔsin kam tɛl am, i go put insɛf dɔŋ ɛn tek di advays?

17. Ɛksplen wetin kin apin insay famili. Sho aw papa kin tɔk to in gyal pikin.

17 Tink bɔt dis ɛgzampul: Lɛ wi se wan yɔŋ gyal ɛn wan yɔŋ Kristian man de. Wan de, dɛn want fɔ kɔmɔt, bɔt di yɔŋ gyal in papa nɔ gri fɔ mek dɛn ɔl tu kɔmɔt bikɔs nɔbɔdi nɔ de we go go wit dɛn. Di pikin aks in papa se: “Bɔt papa, yu nɔ biliv mi? Wi nɔ go du ɛni bad tin.” Na tru se dis yɔŋ gyal lɛk Jiova, ɛn i nɔ go min fɔ du bad, bɔt yu tink se i de “liv in layf bay wetin dɛn sensman tich”? Ɔ i “biliv pan in yon sɛns nɔmɔ”? (Prɔvabs 28:26) Us ɔda tin dɛn de na di Baybul we go ɛp di papa ɛn in pikin fɔ disayd wetin fɔ du?​—Si Prɔvabs 22:3; Matyu 6:13; 26:41.

 JOSƐF BIN RƆNAWE PAN FRI LAYF

18, 19. Wetin Pɔtifa in wɛf bin want mek Josɛf du? Wetin Josɛf bin du?

18 Wan yɔŋ man we bin lɛk Gɔd ɛn we rɔnawe pan fri layf, na Josɛf. Josɛf na bin Dayna in stɛp brɔda. (Jɛnɛsis 30:20-24) We Josɛf bin smɔl, i bin si di kayn bad tin dɛn we bin apin we in sista bin mek da bad mistek. Ɔl dɛn tin ya we Josɛf bin de mɛmba ɛn di we aw in bin lɛk Gɔd bin ɛp am we i bin go na Ijipt as slev. In masta in wɛf bin de mɔna am “ɛvride” fɔ ledɔm wit am. Josɛf nɔ go se i de lɛf di wok ɛn go, bikɔs in na bin slev. So i bin gɛt fɔ yuz sɛns ɛn maynd fɔ du wetin rayt. Aw i bin du dis? Na bay we i bin de tɛl Pɔtifa in wɛf ɔltɛm se i nɔ go du wetin i want, ɛn leta i bin ivin rɔnawe pan am.​—Rid Jɛnɛsis 39:7-12.

19 Tink bɔt dis: If Josɛf bin de tink bɔt di uman ɔ i bin de tink bɔt mami ɛn dadi biznɛs ɔltɛm, yu tink se i bin fɔ ebul fɔ du wetin Gɔd want? I nɔ bin fɔ ebul atɔl. Josɛf nɔ bin de tink bɔt bad tin dɛn, bifo dat, i bin valyu in padi biznɛs wit Jiova. Na dat mek i bin tɛl Pɔtifa in wɛf se: “In masta . . . nɔ ayd natin pan am pas in we nain wɛf. I se, wetin fɔ mek in du dis kayn wikɛd tin ɛn sin to PAPA GƆD.”​—Jɛnɛsis 39:8, 9.

20. Wetin Jiova bin du fɔ ɛp Josɛf?

20 Jiova bin gladi fɔ Josɛf we i bin tinap tranga wan fɔ du wetin i want, pan ɔl we i nɔ bin de nia in fambul dɛn. (Prɔvabs 27:11) Leta, Jiova ɛp Josɛf. I mek dɛn pul am na jel, dɔn dɛn mek am gɔvnɔ ɛn mek i bi  di edman fɔ ɔl di chɔp biznɛs na Ijipt. (Jɛnɛsis 41:39-49) Dis mek wi no se wetin di Baybul se na Sam 97:10, na tru. I se: “Lɛ ɔl udat se i lɛk PAPA GƆD, et bad[,] i de sev udat lɛk am ɛn pul am nain ɛnimi dɛn an”!

21. Aw wan yɔŋ brɔda na Afrika bin tinap tranga wan nɔ fɔ du bad?

21 Tide, bɔku pipul dɛn we de wɔship Gɔd tan lɛk Josɛf, dɛn et “fɔ du bad,” ɛn dɛn lɛk fɔ “du gud.” (Emɔs 5:15) Wan yɔŋ brɔda na Afrika bin tɔk se, wan titi we dɛn ɔl de na klas bin tɛl am mek i ɛp am pan wan mats ɛgzam. Di titi tɛl am se i go mek dɛn tu du mami ɛn dadi biznɛs if i ɛp am. Di brɔda se: “Wantɛm wantɛm, a tɛl am se a nɔ go du am. We a tinap tranga wan nɔ fɔ du bad, a ebul gɛt mi rɛspɛkt we valyu pas silva ɛn gold.” Na tru se pipul dɛn kin “gladi fɔ du bad,” bɔt “da gladi de nɔ go te” ɛn i de briŋ kam bɔku bɔku prɔblɛm. (Di Ibru Pipul Dɛn 11:25) Pantap dat, di gladi we dɛn de gladi nɔ de nia di kayn gladi we pɔsin go gɛt we i de obe Jiova, bikɔs pɔsin we de obe Jiova go gladi sote go.​—Prɔvabs 10:22.

ALAW GƆD FƆ ƐP YU

22, 23. (a) If pɔsin we na Kristian du bad bad tin, Gɔd go fɔgiv am? (b) Wetin Gɔd kin du fɔ ɛp pɔsin we dɔn du bad bad tin?

22 Wi ɔl de sin, so na tray ɔlman de tray fɔ du wetin fayn na Gɔd in yay, ɛn wi de tray bak nɔ fɔ du wetin wi bɔdi want. (Lɛta Fɔ Rom 7:21-25) Jiova no dat, ɛn “i nɔ de fɔgɛt se na dɔti i tek mek wi.” (Sam 103:14) Sɔntɛnde, pɔsin we na Kristian kin du bad bad tin na Jiova in yay. Yu tink se Gɔd go fɔgiv am? Yɛs, i go fɔgiv am. Bɔt di pɔsin we dɔn sin, gɛt fɔ sɔfa fɔ in sin, jɔs lɛk aw Kiŋ Devid bin sɔfa fɔ in sin dɛn. Bɔt Gɔd rɛdi fɔ “fɔgiv” di wan dɛn we de fil bad bɔt dɛn sin dɛn ɛn we de “kɔnfɛs” dɛn sin.​—Sam 86:5; Jems 5:16; rid Prɔvabs 28:13.

23 Pantap dat, Gɔd dɔn gi wi sɔm man dɛn we fit ɛn we rɛdi fɔ ɛp ɔlman na di Kristian kɔngrigeshɔn. (Lɛta Fɔ Ɛfisɔs 4:8, 12; Jems 5:14, 15) Dɛn kin tray tranga wan fɔ ɛp di wan dɛn we dɔn sin fɔ mek dɛn bi Gɔd in padi bak. Ɛn fɔ mek dɛn “gɛt  mɔ sɛns” so dat dɛn nɔ go du di bad we dɛn bin dɔn du.​—Prɔvabs 15:32.

TRAY FƆ “GƐT MƆ SƐNS”

24, 25. (a) Aw di yɔŋ man na Prɔvabs 7:6-23 bin sho se i “ful bad, bad wan”? (b) Aw wi go tray fɔ “gɛt mɔ sɛns”?

24 Di Baybul tɔk bɔt pipul dɛn we “ful bad, bad wan” ɛn pipul dɛn we de tray fɔ “gɛt mɔ sɛns.” (Prɔvabs 7:7) Pɔsin we “ful bad, bad wan” nɔ kin gɛt sɛns fɔ du wetin rayt, bikɔs i nɔ tu ɔndastand aw Gɔd de tink ɛn i nɔ gɛt wan ɛkspiriɛns fɔ sav Gɔd. Na so wan yɔŋ man na Prɔvabs 7:6-23 bin tan lɛk. Dis yɔŋ man bin sin siriɔs wan. Bɔt ɛnibɔdi we de tray fɔ “gɛt mɔ sɛns” go want fɔ no di kayn pɔsin we i bi bay we i de pre ɛn stɔdi di Baybul ɔltɛm. I go tray fɔ mek wetin i de tink, wetin in at de tɛl am fɔ du, aw i de fil, ɛn wetin i want fɔ du wit in layf, bi wetin Gɔd want. So if pɔsin du ɔl dɛn tin ya, i de sho se i lɛk insɛf. Pantap dat, Gɔd go lɛk am ɛn i go “bɛtɛ na layf.”​—Prɔvabs 19:8.

25 Aks yusɛf: ‘A rili biliv se Gɔd in lɔ ɛn advays dɛn gud? A biliv tranga wan se if a obe Gɔd in lɔ ɛn advays dɛn go mek a rili gladi na layf?’ (Sam 19:7-10; Ayzaya 48:17, 18) If yu de dawt se Gɔd in lɔ dɛn gud fɔ yu, na fɔ tray fɔ pul da dawt de na yu maynd. Tink gud gud wan bɔt di bad tin dɛn we go apin to yu if yu nɔ obe Gɔd in lɔ dɛn. Pantap dat, “kam si fɔ yusɛf se PAPA GƆD na gud PAPA GƆD.” Aw pɔsin go du dis? Na bay we i de liv in layf di we aw Gɔd want, ɛn bay we i de tink bɔt tin dɛn we tru, tin dɛn we rayt na Gɔd in yay, tin dɛn we gud we nɔ de mek pɔsin sin, tin dɛn we de mek pɔsin lɛk in kɔmpin mɔtalman, ɛn tin dɛn we ɔlman si se gud. (Sam 34:8; Lɛta Fɔ Filipay 4:8, 9) Yu go si se di mɔ yu de du dɛn tin ya, na di mɔ yu go lɛk Gɔd, ɛn na di mɔ yu go lɛk wetin i lɛk ɛn et wetin i et. Josɛf nɔ bin pafɛkt. Bɔt i bin rɔnawe pan “fri layf” bikɔs i bin alaw Jiova fɔ sho am wetin fɔ du, ɛn dis bin mek i du tin dɛn we mek Gɔd gladi. I go fayn mek yusɛf du di sem tin.​—Ayzaya 64:8.

26. Us impɔtant tin wi go tɔk bɔt na di nɛks tu chapta dɛn?

 26 Gɔd mek wi prayvet pat dɛn fɔ bɔn pikin ɛn fɔ ɛnjɔy wisɛf insay mared. Bɔt i nɔ mek am fɔ lɛ wi de ple ple wit am lɛk tɔys. (Prɔvabs 5:18) Di nɛks tu chapta dɛn go tɔk bɔt di we aw Gɔd si mared.

^ par. 4 Di Nɔmba Dɛm 25:9 tɔk se na 24,000 pipul dɛn day, bɔt Fɔs Lɛta Fɔ Kɔrint 10:8 se na 23,000 pipul dɛn day. Wetin mek dɛn tu skripchɔ ya gi difrɛn nɔmba dɛn? Dis na bikɔs Di Nɔmba Dɛm ad di 1,000 edman dɛn we di jɔj dɛn bin kil wit di 23,000 pipul dɛn we Jiova insɛf sɛf bin kil. Bɔt Fɔs Lɛta Fɔ Kɔrint nɔ kɔnt di 1,000 edman dɛn we di jɔj dɛn bin kil. So na dis mek di tu skripchɔ dɛn gi difrɛn nɔmba dɛn.​—Di Nɔmba Dɛm 25:4, 5.

^ par. 7 If yu want fɔ no wetin i min we pɔsin de liv dɔti layf, na fɔ rid “Questions From Readers” we de na di Julay 15, 2006, Wachtawa. Na Jiova Witnɛs dɛn mek am.

^ par. 9 Insay dis pat, we wi tɔk bɔt “rud rud tin dɛn,” i min bɔku tin. I min ɛnitin we de pan pikchɔ, buk, ɔ ɛnitin we pɔsin de tɔk na fon we de mek pɔsin fil fɔ du mami ɛn dadi biznɛs. I min bak ɛni pikchɔ usay pɔsin mek sɔm kayn we, we de mek sɔmbɔdi fil fɔ du mami ɛn dadi biznɛs. Ɛn i min bak ɛni pikchɔ we de sho usay tu ɔ mɔ pipul dɛn de du mami ɛn dadi biznɛs.

^ par. 9 If yu want fɔ no aw pɔsin go lɛf fɔ ple wit in prayvet pat, na fɔ rid di atikul we se “Aw Pɔsin Go Ebul Lɛf fɔ Ple wit in Prayvet Pat?