Go dayrɛkt to di men tin

Go dayrɛkt to di say we di difrɛn difrɛn atikul dɛn de

 CHAPTA 16

Tinap fɔ Fɛt Setan ɛn In Kɔni Kɔni We Dɛn

Tinap fɔ Fɛt Setan ɛn In Kɔni Kɔni We Dɛn

“Tinap fɔ fɛt Setan, i go rɔnawe.”​—JEMS 4:7.

1, 2. Udat dɛn kin gladi we pipul dɛn kin baptayz?

IF YU dɔn de sav Jiova fɔ lɔng tɛm, i go mɔs bi se yu dɔn lisin to bɔku tɔk dɛn we dɛn kin gi fɔ di wan dɛn we want baptayz na wi asɛmbli ɛn kɔnvɛnshɔn dɛn. Bɔt ilɛksɛf yu dɔn go bɔku tɛm na dɛn program ya, ɛnitɛm we yu si di wan dɛn we want baptayz tinap ɛn rɛdi fɔ baptayz, dat kin mek yu rili fil gud. Ɛn ɔlman na di ɔdiɛns kin gladi, ɛn dɛn kin klap lawd lawd wan. Sɔntɛnde, yu kin gladi te yu kray we yu si ɔda pipul dɛn de kam fɔ sav Jiova. Wi kin rili gladi na dɛn program ya!

2 Na wan wantɛm nɔmɔ insay di ia wi kin si usay pipul dɛn de baptayz, bɔt di enjɛl dɛn de si dis plɛnti tɛm. Jɔs tink bɔt di kayn “gladi we go de na ɛvin” we di enjɛl dɛn de si plɛnti plɛnti pipul dɛn de baptayz ɛvri wik. (Lyuk 15:7, 10) Di enjɛl dɛn kin rili gladi we dɛn de si Gɔd in pipul dɛn de bɔku na di wɔl!—Egay 2:7.

SETAN “DE GO ƆLƆBƆT LƐKƐ AŊRI LAYƆN”

3. Wetin mek Setan de waka “lɛkɛ aŋri layɔn”? Wetin Setan want fɔ du?

3 Ɔda enjɛl dɛn de we kin vɛks we dɛn de si pipul dɛn de baptayz. Setan ɛn in dɛbul dɛn nɔ kin fil fayn atɔl we dɛn de si pipul dɛn de lɛf fɔ du di bad bad tin dɛn we ɔda pipul dɛn de du na di wɔl. Wetin mek? Bikɔs Setan bin  dɔn tɔk se no mɔtalman nɔ de we de sav Jiova bikɔs i rili lɛk am, ɛn i tɔk bak se nɔbɔdi nɔ de we go fetful to Gɔd we tin tranga fɔ am. (Rid Job 2:4, 5.) So ɛnitɛm we pɔsin gi in layf to Jiova, dis de sho se wetin Setan bin tɔk na lay. I jɔs tan lɛk se bɔku bɔku pipul dɛn de slap Setan ɛvri wik insay di ia. Na dat mek Setan “de go ɔlɔbɔt lɛkɛ aŋri layɔn, fɔ fɛn udat in go fɔdɔm pan.” (Pita In Fɔs Lɛta 5:8) Dis “layɔn” want fɔ pwɛl di fayn padi biznɛs we wi gɛt wit Gɔd.​—Di Sam Dɛm 7:1, 2; Sɛkɛn Lɛta To Timoti 3:12.

Ɛnitɛm we pɔsin gi in layf to Jiova ɛn baptayz, dis de sho se wetin Setan bin tɔk na lay

4, 5. (a) Us tu tin dɛn Jiova nɔ go ɛva alaw Setan fɔ du? (b) Wetin Gɔd in Wɔd prɔmis tru Kristian dɛn?

4 Pan ɔl we wi gɛt bad bad ɛnimi, wi nɔ fɔ fred pasmak. Wetin mek? Bikɔs tu tin dɛn de we Jiova nɔ go ɛva alaw dis “aŋri layɔn” fɔ du to wi. Wetin na dɛn tu tin ya? Fɔs, Jiova dɔn tɔk se “bɔku bɔku pipul” dɛn we na tru  Kristian dɛn nɔ go day we da “big trɔbul” go kam na di wɔl. (Rɛvɛleshɔn 7:9, 14) Gɔd nɔ de ɛva lay. So Setan insɛf sɛf no se i nɔ go ɛva ebul fɔ ful ɔl Gɔd in pipul dɛn.

5 Fɔ no di sɛkɔn tin we Setan nɔ go ebul du wi, lɛ wi tink bɔt wan tru tin we wan prɔfɛt bin tɔk. Di prɔfɛt Azaraya bin tɛl Kiŋ Esa se: “PAPA GƆD de wit una we una de wit am.” (Sɛkɛn Kronikul 15:2; rid Fɔs Lɛta Fɔ Kɔrint 10:13.) Bɔku bɔku ɛgzampul dɛn dɔn sho se, Setan nɔ de ɛva ebul fɔ dɔnawe wit ɛniwan pan Gɔd in savant dɛn wans dɛn de nia Gɔd. (Di Ibru Pipul Dɛn 11:4-40) Semweso, ɛni Kristian we de nia Gɔd go ebul fɔ fɛt Setan ɛn win am. Na dat mek Gɔd in Wɔd prɔmis wi se: “Una tinap fɔ fɛt Setan, i go rɔnawe go lɛf una.”​—Jems 4:7.

“WI DE FƐT DƐN PAWA WE WI NƆ DE SI”

6. Aw Setan de fɛt Kristian dɛn?

6 Setan nɔ go ebul win dis fɛt, bɔt if yu nɔ tek tɛm, i go damej yu. Setan no se i go ebul wi if i mek wi nɔ gɛt tayt padi biznɛs wit Jiova. Aw Setan kin tray fɔ du dis? I kin du dis tri we: (1) Bay we i de fɛt wi tranga wan, (2) bay we i de fɛt wi fes-to-fes, ɛn (3) bay we i de yuz kɔni kɔni trik dɛn. Lɛ wi tɔk bɔt aw Setan de yuz dɛn tri we ya fɔ fɛt wi.

7. Wetin mek Setan de fɛt Gɔd in pipul dɛn?

7 Setan de fɛt wi tranga wan. Di apɔsul Jɔn bin se na “Setan de rul di ol wɔl.” (Jɔn In Fɔs Lɛta 5:19) Dɛn wɔd ya na wɔnin fɔ ɔlman we na tru Kristian. Setan dɔn ebul di pipul dɛn we nɔ de sav Gɔd. So naw, i dɔn tɔn in atɛnshɔn to Jiova in pipul dɛn ɛn i de fɛt dɛn tranga wan. (Mayka 4:1; Jɔn 15:19; Rɛvɛleshɔn 12:12, 17) I dɔn vɛks bad bikɔs i no se na smɔl tɛm nɔmɔ lɛf fɔ am. So i de briŋ mɔ prɔblɛm pan Gɔd in pipul dɛn. Tide, Setan de pul in las-ɛn-las wamat pan wi fɔ pwɛl di fayn padi biznɛs we wi gɛt wit Gɔd. So na naw mɔ wi fɔ rɛdi pas aw  wi bin rɛdi fɔ “no wetin gɛt fɔ bi” ɛn fɔ “no wetin [wi] sɔpoz fɔ du.”​—Fɔs Kronikul 12:32.

8. Wetin di apɔsul Pɔl bin min we i se wi de “fɛt” dɛn pawa we wi nɔ de si?

8 Setan de fɛt wi fes-to-fes. Di apɔsul Pɔl bin wɔn in kɔmpin Kristian dɛn se: “Wi de fɛt dɛn pawa we wi nɔ de si . . . dɛn wan we de ɔp ɔp na di klawd.” (Lɛta Fɔ Ɛfisɔs 6:12) Insay dis vas, we Pɔl yuz di wɔd “fɛt,” i min fes-to-fes fɛt. Dis de sho se wi ɔl gɛt fɔ fɛt dɛn wikɛd spirit dɛn. Ilɛksɛf wi de na kɔntri usay bɔku pipul dɛn biliv dɛn wikɛd spirit dɛn ɔ nɔ biliv dɛn, wi nɔ fɔ ɛva fɔgɛt se di tɛm we wi bin gi wi layf to Jiova, na da tɛm de wi bigin fɔ fɛt dɛn wikɛd spirit ya, ɛn wi nɔ go ebul kɔmɔt insay dis fɛt. Na dat mek Pɔl bin ɛnkɔrej di Kristian dɛn na Ɛfisɔs fɔ “tinap traŋa wan,” fɔ mek Setan nɔ ebul dɛn.​—Lɛta Fɔ Ɛfisɔs 6:11, 13, 14.

9. (a) Wetin mek Setan ɛn di dɛbul dɛn de yuz kɔni kɔni we dɛn? (b) Wetin mek Setan de tray fɔ ambɔg di we aw wi de tink, ɛn aw wi go ebul fɔ avɔyd dat? (Rid di bɔks we se “ Tek Tɛm wit Setan In Kɔni Kɔni Trik Dɛn”) (c) Us ɔda kɔni kɔni tin we wi de kam tɔk bɔt?

9 Setan de yuz kɔni kɔni trik dɛn. Pɔl bin ɛnkɔrej Kristian dɛn fɔ tinap tranga wan fɔ mek Setan nɔ yuz in “kɔni” trik dɛn pan dɛn. (Lɛta Fɔ Ɛfisɔs 6:11) We Pɔl yuz di Grik wɔd we dɛn translet as “kɔni,” i bin min di difrɛn difrɛn we dɛn we di wikɛd spirit dɛn de yuz fɔ ful pipul dɛn. Dɛn wikɛd spirit ya gɛt gud rizin we mek dɛn de du dis. Wetin mek wi se so? Wɛl, sɔm Kristian dɛn kin ebul fɔ tinap tranga wan fɔ fɛt Setan pan wan tin, bɔt dɛn nɔ kin ebul fɛt am pan ɔda tin. Setan ɛn di dɛbul dɛn kin de wach di we aw wi de biev so dat dɛn go no usay wi nɔ de du fayn. Wans dɛn dɔn no usay wi nɔ de du fayn, dɛn go tray fɔ yuz dat fɔ mek wi pwɛl di fayn padi biznɛs we wi gɛt wit Gɔd. Wi gladi fɔ no se di Baybul dɔn sho wi ɔl di kɔni kɔni we dɛn we Setan de yuz fɔ  ful pipul dɛn. (Sɛkɛn Lɛta Fɔ Kɔrint 2:11) Insay dis buk, wi bin dɔn tɔk bɔt sɔm pan di kɔni kɔni tin dɛn we Setan de yuz; sɔm pan dɛn na want want, bad padi, ɛn fri layf. Naw, lɛ wi tɔk bɔt wan ɔda kɔni kɔni tin we Setan de yuz, dat na juju biznɛs.

JUJU BIZNƐS GO MEK YU KƆMƆT BIƐN JIOVA

10. (a) We pɔsin put an pan juju biznɛs, wetin dat de mek i du? (b) Aw Jiova si juju biznɛs? Aw yu si juju biznɛs?

10 We pɔsin de put in an pan juju biznɛs, dat de mek i gɛt sɔntin fɔ du wit dɛn dɛbul dɛn. Aw pɔsin kin du dat? Na bay we i de lukin-grɔn, ple majik, yuz juju fɔ mek bad tin apin to ɔda pɔsin, ɛn tray fɔ no bɔt di wan dɛn we dɔn day. Wi ɔl no se Jiova “et pipul dɛn we de du dɛn kayn tin dɛn de.” (Ditarɔnɔmi 18:10-12; Rɛvɛleshɔn 21:8) Wisɛf fɔ et ɛnitin we “bad.” So wi nɔ fɔ ɛva du ɛnitin we go mek wi gɛt sɔntin fɔ du wit dɛn dɛbul dɛn. (Lɛta Fɔ Rom 12:9) If wi put an pan dɛn kayn tin ya, na bad bad tin wi dɔn du; wi dɔn kɔmɔt biɛn Jiova we na wi Papa we de na ɛvin!

11. Wetin mek Setan go gladi if wi put an pan juju biznɛs? Gi ɛgzampul.

11 Setan no se if pipul dɛn put an pan juju biznɛs, dat de mek dɛn kɔmɔt biɛn Jiova, so na dat mek i de tray ɔlkayn we fɔ lɛ plɛnti pipul dɛn put an pan juju biznɛs. So ɛnitɛm we Setan mek wan Kristian put an pan juju biznɛs, Setan dɔn win. Wetin mek wi se so? Tink bɔt dis ɛgzampul: If wan sojaman kɔmɔt biɛn in kɔmpin dɛn ɛn jɔyn in ɛnimi dɛn, di ɛnimi dɛn bɔsman go mɔs gladi. Di ɛnimi dɛn bɔsman go ivin yuz dis sojaman fɔ blɔf ɛn provok di sojaman in fɔs bɔsman. Semweso, if Kristian put an pan juju biznɛs, dat de sho se i dɔn kɔmɔt biɛn Jiova bay wilful ɛn dɔn put insɛf ɔnda Setan. Jɔs tink bɔt aw Setan go gladi fɔ blɔf ɔ provok Jiova we wan Kristian  du dat! Ɛniwan pan wi go want mek Setan blɔf ɔ provok Jiova? Nɔ, wi nɔ go want dat atɔl! Wi nɔto pipul dɛn we de kɔmɔt biɛn Jiova.

KWƐSTYƆN DƐN WE KIN MEK PƆSIN BIGIN DAWT

12. Wetin Setan de yuz fɔ mek wi chenj di we aw wi de tink bɔt juju biznɛs?

12 If wi rili et juju biznɛs, Setan nɔ go ebul mek wi put an pan am. So we i nɔ ebul mek wi put an pan juju biznɛs, i go tray fɔ chenj di we aw wi de tink. Aw i kin du dis? I kin fɛn ɔlkayn we fɔ kɔnfyus Kristian dɛn fɔ mek dɛn bigin “kɔl bad, gud ɛn gud, bad.” (Ayzaya 5:20) Fɔ mek Setan ebul du dis, i kin yuz sɔntin we i bin dɔn de yuz frɔm tɛm. Wetin na da tin de? I kin aks kwɛstyɔn dɛn we kin mek wi bigin dawt.

13. Aw Setan dɔn de yuz kwɛstyɔn dɛn fɔ mek pipul dɛn dawt?

13 Lɛ wi si aw Setan bin de yuz dis we ya trade trade. We Iv bin de na Idɛn, Setan bin aks am se: “Fɔ tru tru PAPA GƆD tɛl una se, una nɔ fɔ it di frut dɛn pan ɔl di tik dɛn na di fam?” Di tɛm we Job bin de na di wɔl, di enjɛl dɛn bin gɛt wan mitin na ɛvin. Insay dis mitin, Setan bin aks Gɔd se: “Yu fil se na fɔ natin mek Job de fred yu? Ɛn di tɛm we Jizɔs bin bigin prich, Setan bin chalenj Jizɔs ɛn tɛl am se: “If yu na Gɔd in pikin, tɛl dɛn ston ya fɔ tɔn to bred.” Jɔs tink bɔt dis: We Setan bin de tɛl Jizɔs dɛn wɔd ya, i bin de tray fɔ provok Jiova. Wetin mek wi se so? Na bikɔs siks wik bifo dis, Jiova bin dɔn tɔk bɔt Jizɔs se: “Dis na mi Pikin we a lɛk, a gladi fɔ am.”​—Na wi mek am italiks; Jɛnɛsis 3:1; Job 1:9NW; Matyu 3:17; 4:3.

14. (a) Aw Setan de yuz dawt we i kam pan juju biznɛs? (b) Wetin wi de kam tɔk bɔt naw?

14 Tide, Setan de yuz dis sem we fɔ mek wisɛf bigin  dawt if i bad fɔ put an pan juju biznɛs. I sɔri fɔ no se Setan dɔn put dawt na sɔm Kristian dɛn maynd. Ɛn dɛn dɔn bigin fɔ aks if na ɔl juju biznɛs rili bad. (Sɛkɛn Lɛta Fɔ Kɔrint 11:3) Aw wi go ebul ɛp dɛn kayn pipul ya fɔ kɔrɛkt di we aw dɛn de tink? Aw wi go mek shɔ se Setan in kɔni kɔni trik dɛn nɔ afɛkt wi? Fɔ ansa dɛn kwɛstyɔn ya, lɛ wi tɔk bɔt tu eria dɛn na layf we Setan dɔn put juju biznɛs, dat na, di we aw wi de ɛnjɔy wisɛf ɛn wɛlbɔdi biznɛs.

SETAN WANT LƐ WI PWƐL WI PADI BIZNƐS WIT JIOVA

15. (a) Aw plɛnti pipul dɛn we de na dɛn wetman kɔntri dɛn, kin si wich ɛn juju biznɛs? (b) Aw sɔm Kristian dɛn de tink bɔt juju biznɛs?

15 Insay dɛn wetman kɔntri dɛn, pipul dɛn nɔ kin tek wich ɛn juju biznɛs, siriɔs. Fim dɛn, buk dɛn, tɛlivishɔn program dɛn, ɛn kɔmpyuta gem dɛn de sho juju biznɛs as tin we pipul dɛn fɔ yuz fɔ ɛnjɔy dɛnsɛf. Ɛn dɛn kin sho bak se ɛnibɔdi we de du dɛn tin ya na pɔsin we gɛt sɛns, ɛn na tin we nɔ bad. Pipul dɛn dɔn so lɛk fim ɛn buk dɛn we de tɔk bɔt juju biznɛs dat dɛn dɔn mek fan klɔb dɛn. Dis dɔn sho wi klia wan se di dɛbul dɛn dɔn ebul mek bɔku pipul dɛn nɔ de fil se juju biznɛs na bad tin. Yu tink se dis dɔn ambɔg di we aw sɔm Kristian dɛn de tink bɔt juju biznɛs? Yɛs, i dɔn ambɔg sɔm. Aw i ambɔg dɛn? Fɔ ɛgzampul, we wan Kristian wach wan fim bɔt juju biznɛs, i tɔk se, “A wach di fim, bɔt a nɔ put an pan juju biznɛs.” Wetin mek fɔ tink da kayn we de rili bad?

16. Wetin mek i rili bad fɔ lɛ wi ɛnjɔy wisɛf wit ɛnitin we gɛt fɔ du wit juju biznɛs?

16 Wi no se fɔ put an pan juju biznɛs ɛn fɔ wach am na fim na tu difrɛn tin, bɔt dat nɔ min se fɔ wach am nɔ  bad. Wetin mek wi se so? Tink bɔt dis: Gɔd in Wɔd sho se Setan ɛn in dɛbul dɛn nɔ ebul no wetin wi de tink. * So fɔ lɛ dɛn wikɛd spirit ya no usay wi nɔ de du fayn ɛn wetin wi de tink, dɛn kin de wach di we aw wi de biev ɛn di tin dɛn we wi de du fɔ ɛnjɔy wisɛf. We Kristian de ɛnjɔy fɔ wach fim dɛn ɛn rid buk dɛn we gɛt majik ɛn ɔda juju biznɛs, i de tɛl di dɛbul dɛn bɔt insɛf; i de sho di dɛbul dɛn usay i nɔ de du fayn. So we di dɛbul dɛn dɔn no dis bɔt di pɔsin, dɛn de tray tranga wan fɔ yuz dis tin fɔ mek dɛn pwɛl di fayn padi biznɛs we di pɔsin gɛt wit Jiova. Infakt, sɔm pipul dɛn we bin bigin lɛk juju biznɛs bikɔs dɛn bin de ɛnjɔy dɛnsɛf wit am, dɔn put an pan tru tru juju biznɛs.​—Rid Lɛta Fɔ Galeshya 6:7.

We yu sik, Jiova go sɔpɔt yu

17. Us kɔni kɔni we Setan de yuz pan pɔsin we sik?

17 Setan nɔ jɔs de tray fɔ yuz di tin dɛn we wi kin ɛnjɔy wisɛf wit, bɔt i de yuz bak wi wɛlbɔdi biznɛs fɔ pwɛl di fayn padi biznɛs we wi gɛt wit Jiova. Aw i de du dis? If Kristian dɔn sik bad ɛn i dɔn tray difrɛn difrɛn say dɛn fɔ gɛt wɛlbɔdi, bɔt i jɔs de wɔs mɔ ɛn mɔ, dis kin mek in at pwɛl bad. (Mak 5:25, 26) So Setan ɛn in dɛbul dɛn go yuz dis pɔsin in wɛlbɔdi biznɛs fɔ pwɛl in fayn padi biznɛs wit Jiova. Setan ɛn in dɛbul dɛn no se Gɔd in Wɔd dɔn wɔn Kristian dɛn mek dɛn nɔ go to “di wan dɛn we de ɛp pipul we de kɔmit sin.” (Ayzaya 31:2) So fɔ lɛ di dɛbul dɛn mek Kristian dɛn nɔ du wetin dis lɔ se, dɛn kin tɛmpt di pɔsin fɔ tek tritmɛnt we gɛt juju biznɛs. Dɛn kin du dis bikɔs dɛn no se di pɔsin rili want wɛlbɔdi. Bɔt  if di pɔsin du dis, i dɔn du bad bad tin na Gɔd in yay. If di dɛbul dɛn kɔni kɔni trik wok, dis go pwɛl di pɔsin in fayn padi biznɛs we i gɛt wit Gɔd. Aw dis kin apin?

18. Uskayn tritmɛnt dɛn Kristian nɔ go tek? Wetin mek i nɔ go tek am?

18 Jiova bin tɛl di Izrɛlayt dɛn we dɔn “sin” bay we dɛn put an pan juju biznɛs se: “We una tret una an dɛn to mi, A go kɔba mi yay lɛ a nɔ si, i lɛk we una pre bɔku bɔku prea A nɔ go lisin.” (Ayzaya 1:13, 15) So wi nɔ want fɔ du ɛnitin we go mek Jiova nɔ yɛri wi prea ɛn nɔ sɔpɔt wi, mɔ di tɛm we wi sik. (Di Sam Dɛm 41:3) So if ɛni tru Kristian kam fɔ no se di tritmɛnt ɔ mɛrɛsin we dɛn want gi am gɛt juju biznɛs, i nɔ fɔ put an pan am atɔl. * (Matyu 6:13) If i du dat, Jiova go kɔntinyu fɔ sɔpɔt am.​—Rid di bɔks we se “ Dis Tin Gɛt Ɛnitin fɔ Du wit Juju Biznɛs?

STORI DƐN BƆT DƐBUL BIZNƐS

19. (a) Wetin Setan dɔn ful bɔku pipul dɛn fɔ biliv bɔt in pawa? (b) Uskayn stori dɛn tru Kristian dɛn nɔ fɔ pul?

19 Plɛnti pipul dɛn we de na dɛn wetman kɔntri dɛn nɔ kin tek di pawa we Setan gɛt, siriɔs. Bɔt na ɔda kɔntri dɛn, pipul dɛn kin tek dis siriɔs. Setan dɔn ful bɔku  pipul dɛn na dɛn kɔntri ya fɔ mek dɛn biliv se i gɛt plɛnti pawa we i bi se i nɔ gɛt da kayn pawa de. So dis dɔn mek pipul dɛn de fred dɛn wikɛd spirit ya; dɛn de fred dɛn we dɛn de du plɛnti tin na layf, lɛk we dɛn de it, wok, ɛn slip. Bɔku stori dɛn de bɔt di pawaful tin dɛn we dɛbul dɛn de du. Di we aw pipul dɛn kin gladi fɔ pul dɛn stori ya, kin mek ɔda pipul dɛn kɔle pan di dɛbul dɛn. Yu tink se wisɛf fɔ de pul dɛn kayn stori ya? Nɔ, wi nɔ fɔ du dat. Infakt, pipul dɛn we de sav di tru Gɔd nɔ fɔ du dat fɔ tu impɔtant rizin.

20. Aw pɔsin go ɛp Setan fɔ tɔk dɛn lay lay tin dɛn?

20 Di fɔs rizin na dat, if wi de tɔk bɔt dɛn dɛbul stori dɛn, wi de ɛp Setan fɔ mek in biznɛs go bifo. Aw? Di Baybul sɛf dɔn sho se Setan kin du pawaful tin dɛn, bɔt i dɔn wɔn wi bak se Setan kin du sɔm lay lay pawaful tin dɛn ɛn i kin “ful” pipul dɛn. (Sɛkɛn Lɛta Fɔ Tɛsalonayka 2:9, 10) Setan na di men pɔsin we de ful pipul dɛn, so i  no aw fɔ mek di wan dɛn we biliv juju biznɛs, biliv tin dɛn we nɔto tru. Dɛn kayn pipul ya kin rili biliv se dɛn si ɛn yɛri sɔntin, ɛn dɛn kin tɔk am lɛk se na tru tru tin we apin. We dɛn kin tɔk dis tɔk ɔltɛm, dɛn kin de ad pan di stori. If pɔsin we na Kristian de tɔk bɔt dɛn stori ya, i go tan lɛk se i de du wetin Setan want we na in “de mek pipul lay.” Di pɔsin go de ɛp Setan fɔ tɔk lay lay tin dɛn.​—Jɔn 8:44; Sɛkɛn Lɛta To Timoti 2:16.

21. Na uskayn tin dɛn wi fɔ de tɔk bɔt?

21 Di sɛkɔn rizin na dat, ilɛksɛf pɔsin we na Kristian bin dɔn gɛt sɔntin fɔ du wit dɛn dɛbul dɛn, i nɔ fɔ de tɔk bɔt dɛn kayn stori dɛn de to ɔda Kristian dɛn. Wetin mek? Bikɔs di Baybul tɛl wi se: “Lɛ wi luk ɔp to Jizɔs ɔltɛm bikɔs nain de mek wi biliv Gɔd, ɛn ɛp wi fɔ biliv am sote go.” (Di Ibru Pipul Dɛn 12:2) So na pan Jizɔs wi fɔ put ɔl wi atɛnshɔn, nɔto pan Setan. Wan tin we wi fɔ no na dat, we Jizɔs bin de na di wɔl, i nɔ bin de tɛl in disaypul dɛn stori bɔt dɛn dɛbul dɛn, pan ɔl we i bin fɔ ebul tɛl dɛn bɔku tin bɔt wetin Setan ebul du ɛn wetin i nɔ ebul du. Bifo dat, Jizɔs bin put ɔl in atɛnshɔn fɔ prich bɔt Gɔd in Kiŋdɔm. Jɔs lɛk Jizɔs ɛn di apɔsul dɛn, wi fɔ de tɔk bɔt “dɛn big wok we Gɔd de du.”​—Di Apɔsul Dɛn Wok [Akt] 2:11; Lyuk 8:1; Lɛta Fɔ Rom 1:11, 12.

22. Wetin wi go kɔntinyu fɔ du fɔ mek ‘gladi de na ɛvin’?

22 Na tru se Setan kin yuz bɔku kɔni kɔni trik dɛn, lɛk juju biznɛs, fɔ tray fɔ pwɛl wi fayn padi biznɛs wit Jiova. Bɔt we wi et wetin bad ɛn lɛk wetin gud, dat go mek wi nɔ gi Setan wan chans fɔ lɛ i mek wi put an pan ɛnikayn juju biznɛs. (Rid Lɛta Fɔ Ɛfisɔs 4:27.) Jɔs tink bɔt di kayn “gladi we go de na ɛvin” if wi kɔntinyu fɔ tinap tranga wan fɔ fɛt Setan in “kɔni” trik dɛn te di tɛm we i nɔ go de igen.​—Lɛta Fɔ Ɛfisɔs 6:11.

^ par. 16 Di tin dɛn we wi kin yuz fɔ tɔk bɔt udat Setan bi (dat na pɔsin we gɛt trangayes, pɔsin we de pwɛl ɔda pɔsin in nem, pɔsin we de ful ɔda pɔsin, pɔsin we de mek ɔda pɔsin du bad, ɛn layman) nɔ de sho se i ebul no wetin de na wi at ɛn maynd. Bɔt di Baybul tɛl wi se Jiova “de si di at,” ɛn Jizɔs “no wetin ɔlman na [di] wɔl de tink ɛn i de si insay dɛn at.”​—Prɔvabs 17:3; Rɛvɛleshɔn 2:23.

^ par. 18 Fɔ no mɔ bɔt dis, na fɔ rid di Disɛmba 15, 1994, Wachtawa, pej 19 to pej 22 we tɔk bɔt “A Health Test for You?” ɛn “The Bible’s Viewpoint: Your Choice of Medical Treatment—Does It Matter?” we de na di Janwari 8, 2001, Awake!