Go dayrɛkt to di men tin

Go dayrɛkt to di say we di difrɛn difrɛn atikul dɛn de

MƆ TIN DƐN FƆ NO

Smɔl Smɔl Tin dɛn We De na di Blɔd ɛn Ɔda Tin dɛn bɔt Ɔpreshɔn

Smɔl Smɔl Tin dɛn We De na di Blɔd ɛn Ɔda Tin dɛn bɔt Ɔpreshɔn

Smɔl smɔl tin dɛn we de na di blɔd. Na 4 men tin dɛn mekɔp di blɔd. Dɛn 4 tin ya na: Rɛd sɛl, wayt sɛl, pletlɛt, ɛn plasma. Na frɔm dɛn 4 tin ya, dɔktɔ dɛn kin pul smɔl smɔl tin dɛn. Fɔ ɛgzampul, di rɛd sɛl gɛt wan protin we dɛn kɔl ɛmoglobin. Dɔktɔ dɛn kin yuz mɔtalman ɔ animal ɛmoglobin fɔ mek mɛrɛsin. Ɛn dɛn kin yuz dɛn mɛrɛsin ya fɔ trit pipul dɛn we nɔ gɛt bɛtɛ blɔd ɔ we dɔn lɔs bɔku blɔd.

Plasma: If yu sheb plasma to tɛn pat, di nayn pat na wata. I gɛt tin dɛn lɛk shuga, sɔl, ɛn ɔda impɔtant tin dɛn we de ɛp di bɔdi. Di plasma gɛt plɛnti ɔda tin dɛn. Tin dɛn we de mek di blɔd tik, we de ɛp di bɔdi fɔ fɛt sik dɛn, ɛn wan protin we dɛn kɔl albumin. If pɔsin gɛt dɛn bad sik dɛn, dɔktɔ dɛn kin gi am wan injɛkshɔn we dɛn kɔl gama globulin. Dɛn kin pul di gama globulin frɔm pipul dɛn blɔd. Bɔt nɔto ɔlkayn pɔsin in blɔd dɛn kin pul am. Dɛn kin pul am pan pipul dɛn we nɔ de gɛt da kayn sik de. Wan ɔda tin we de na di blɔd na wayt blɔd sɛl. Insɛf gɛt tin dɛn we de fɛt sɔm sik dɛn, so dɔktɔ dɛn kin yuz dɛn tin ya fɔ mɛn kansa ɛn sɔm infɛkshɔn dɛn.

Yu tink se Kristian dɛn fɔ tek mɛrɛsin dɛn we gɛt smɔl smɔl tin dɛn we dɛn pul frɔm blɔd? Di Baybul nɔ tɛl wi klia wan wetin fɔ du. So ɔl Kristian gɛt fɔ disayd wetin i fɔ du we go mek Gɔd gladi. Sɔm Kristian dɛn go disayd nɔ fɔ tek ɛnitin we dɛn pul frɔm blɔd, ilɛk na smɔl wan sɛf. Dɛn go se di  lɔ we Gɔd bin gi di Izrɛlayt dɛn bin se if dɛn kil ɛni animal dɛn fɔ tɔn in blɔd na grɔn. (Ditarɔnɔmi 12:22-24) Sɔm go disayd nɔ fɔ tek di wan ol blɔd ɔ di men tin dɛn we de insay di blɔd. Bɔt dɛn go rɛdi fɔ tek di smɔl smɔl tin dɛn we de insay di blɔd. Dɛn kin se di smɔl smɔl tin dɛn we de na di blɔd nɔ min layf igen.

I go fayn fɔ mek wi aks wisɛf dɛn kwɛstyɔn ya bifo wi disayd if wi go tek ɔ nɔ go tek di smɔl smɔl tin dɛn we de insay blɔd: If a nɔ gri fɔ tek ɛnitin we de insay blɔd, a no klia wan se a nɔ go tek ɛni mɛrɛsin we de fɛt sik dɛn na mi bɔdi ɔ we go ɛp mi blɔd fɔ tik so dat a go stɔp fɔ blid? A go ebul ɛksplen to mi nɔs ɔ dɔktɔ wetin mek a de tek sɔm pan di tin dɛn we de insay blɔd ɛn wetin mek a nɔ de tek sɔm?

Ɔda tin dɛn bɔt ɔpreshɔn. If dɔktɔ dɛn gɛt fɔ du ɔpreshɔn pan pɔsin, dɛn gɛt difrɛn we fɔ mek di pɔsin nɔ lɔs bɔku blɔd. Sɔntɛnde, dɛn kin miks di blɔd wit wata we gɛt mɛrɛsin. (Dɛn kɔl dis ɛmodaylyushɔn.) Dɛn kin put di blɔd insay bag dɛn ɛn ad wata we gɛt mɛrɛsin to di balans blɔd we de insay di bɔdi fɔ lɛ i bɔku. Dɛn kin put di blɔd bak insay di pɔsin in bɔdi we dɛn de du di ɔpreshɔn ɔ we dɛn dɔn dɔn. Dɛn gɛt wan ɔda mashin we dɛn kɔl sɛl savej mashin. Dis mashin kin gɛda di blɔd we kin kɔmɔt pan pɔsin we dɛn de du in ɔpreshɔn. Di mashin kin klin di blɔd ɛn put am bak na di pɔsin in bɔdi. Bɔku dɔktɔ dɛn gɛt difrɛn we aw dɛn  kin du dis, so i go fayn mek Kristian dɛn aks dɛn dɔktɔ dɛn aw dɛn kin du am.

We yu want disayd wetin fɔ du, aks yusɛf dɛn kwɛstyɔn ya: ‘If dɛn gɛt fɔ mek mi blɔd pas ɔdasay ɛn dɛn go ivin stɔp di blɔd fɔ pas fɔ sɔm tɛm, mi kɔnshɛns go gri fɔ lɛ a si dis blɔd as stil pat pan mi bɔdi? Ɔ a go trowe am na grɔn  lɛk aw Gɔd in lɔ se? (Ditarɔnɔmi 12:23, 24) Mi kɔnshɛns go klia if dɛn tek mi blɔd, put mɛrɛsin insay ɛn put am bak na mi bɔdi? A ɔndastand klia wan se if a nɔ gri fɔ mek dɛn yuz mi blɔd fɔ ɛnikayn tin min se a nɔ go tek blɔd tɛst, a nɔ go gri mek mi blɔd pas na mashin usay dɛn de put wata we gɛt mɛrɛsin pan am, ɛn put am bak na mi bɔdi, ɔ yuz mashin we de pɔmp blɔd lɛk di at?’

If ɛni Kristian gɛt fɔ go ɔnda ɔpreshɔn, na in gɛt fɔ disayd wetin i want mek dɛn du wit in blɔd. Na in bak gɛt fɔ disayd uskayn tɛst i go du, ɛn if i go want mek dɛn tek sɔm pan in blɔd, put mɛrɛsin insay ɛn put am bak na in bɔdi.

DI WAN DƐN WE WI NƆ FƆ TEK

DI WAN OL BLƆD

Rɛd Sɛl

Wayt Sɛl

Pletlɛt

Plasma

DI WAN DƐN WE WI FƆ DISAYD

Smɔl smɔl tin dɛn insay rɛd sɛl

Smɔl smɔl tin dɛn insay wayt sɛl

Smɔl smɔl tin dɛn insay pletlɛt

Smɔl smɔl tin dɛn insay plasma