Yehowa ke lomba nge na ‘kuzola kwikama.’ (Mishe 6:8, NW) Kikalulu yai kele mfunu mingi na makwela na nge sambu kana yo kele ve, nge ta tudila ve nkwelani na nge ntima. Kutudila nkwelani ntima kele mfunu mingi sambu yo ke yedisaka zola.

Kwikama na makwela ke mekama mingi bubu yai. Sambu na kutanina makwela na nge, nge fwete baka lukanu ya kusala mambu yai zole.

MAMBU YINA BIBLIA KE TUBAKA: “Zikisa mambu ya kuluta mfunu.” (Bafilipi 1:10) Makwela na nge kele kima mosi ya kuluta mfunu na luzingu na nge. Yo yina, yo me fwana na kubaka kisika ya ntete.

Yehowa ke zolaka nde nge tudila nkwelani na nge dikebi mpi beno “mona kiese.” (Longi 9:9) Yandi ke monisa pwelele nde nge fwete mona ve nkwelani na nge mpamba, kansi beno fwete sosa mabaku ya kupesana kiese. (1 Bakorinto 10:24) Monisa nkwelani na nge nde yandi kele mfunu sambu na nge mpi baka yandi na mbalu.

MAMBU YA NGE LENDA SALA:

• Zikisa nde beno ke lutisa ntangu kumosi mbala na mbala mpi tudila nkwelani na nge dikebi ya mingi

• Sadila ngogo “beto” na kisika ya “mono”

MAMBU YINA BIBLIA KE TUBAKA: “Konso muntu yina ke landa na kutala nkento mosi ti nzala ya kuvukisa nitu ti yandi me sala dezia bizumba ti nkento yango na ntima na yandi.” (Matayo 5:28) Kana nkwelani mosi ke landa kuyindula mambu ya mansoni, yandi kele ve ya kwikama na nkwelani na yandi.

Yehowa ke tuba nde nge fwete “tanina ntima na nge.” (Bingana 4:23, NW; Yeremia 17:9) Sambu na kutanina ntima na nge, nge fwete tanina meso na nge. (Matayo 5:29, 30) Landa mbandu ya Yobi, tata ya mabuta yina salaka kuwakana ti meso na yandi sambu na kutala ve nkento ya nkaka ti bangindu ya mbi. (Yobi 31:1) Baka lukanu ya kutala ve pornografi mpi ya kubuya kusala bangwisana ya zola ti muntu yina kele ve nkwelani na nge.

MAMBU YA NGE LENDA SALA:

• Monisa bantu ya nkaka pwelele nde nge kele ya kwikama kibeni na nkwelani na nge

• Tudila mawi ya nkwelani na nge dikebi mpi zenga mbala mosi bangwisana yina lenda sala nde nkwelani na nge kumona mbi