Kwenda na mambu ke na kati

Kwenda na tansi ya malongi

 KITINI 1

Tula Ntima na Nzambi Sambu na Kuvanda ti Makwela ya Kiese

Tula Ntima na Nzambi Sambu na Kuvanda ti Makwela ya Kiese

“Muntu yina gangaka bo banda na luyantiku salaka bo bakala mpi nkento.”—Matayo 19:4

Yehowa * Nzambi muntu salaka makwela ya ntete. Biblia ke zabisa beto nde yandi gangaka nkento ya ntete mpi ‘nataka yandi na muntu.’ Adami waka kiese mingi mpi tubaka nde: “Yai kele mukwa ya mikwa na mono mpi nsuni ya nsuni na mono.” (Kuyantika 2:22, 23NW) Yehowa ke zolaka nde bankwelani kuvanda ntangu yonso na kiese.

Ntangu nge me kwela, nge lenda yindula nde mambu yonso ta vanda mbote mpenza. Na kutuba ya mbote, ata bakala ti nkento yina ke zolanaka mingi ke kutanaka ti bampasi. (1 Bakorinto 7:28) Kamukanda yai kele ti minsiku ya Biblia mpi kana nge sadila yo, yo lenda sadisa nge na kuvanda ti makwela mpi dibuta ya kiese.—Nkunga 19:9-12.

 1 NDIMA MUKUMBA YINA YEHOWA ME PESAKA NGE

MAMBU YINA BIBLIA KE TUBAKA: Bakala kele mfumu ya dibuta.—Baefezo 5:23.

Yehowa ke zolaka nde bakala kulungisa bampusa ya nkento na yandi na zola yonso. (1 Piere 3:7) Yandi gangaka nkento sambu na kusadisa bakala mpi yandi ke zola nde bakala kusadila nkento na yandi mambu ti lukumu mpi zola. (Kuyantika 2:18) Bakala fwete zola nkento na yandi mingi mpi kuvanda ti luzolo ya kutula bampusa ya nkento na yandi na ntwala ya bampusa na yandi.—Baefezo 5:25-29.

Yehowa ke zolaka mpi nde nkento kuvanda ti luzitu ya mudindu na bakala na yandi mpi yandi sadisa bakala na kulungisa mikumba na yandi. (1 Bakorinto 11:3; Baefezo 5:33) Pesa maboko na badesizio ya bakala na nge mpi sala kumosi ti yandi na ntima ya mvimba. (Bakolosai 3:18) Kana nge sala mutindu yai, nge ta sepedisa Yehowa mpi bakala na nge.—1 Piere 3:1-6.

MAMBU YA NGE LENDA SALA:

  • Yula nkwelani na nge mutindu nge lenda vanda bakala to nkento ya mbote. Widikila yandi na dikebi yonso mpi sala yina nge lenda sala sambu na kutomisa mambu

  • Vanda ntima-nda. Yo ta baka ntangu sambu beno zole kuzaba mutindu ya kupesana kiese

2 KUDIBANZA MPENZA SAMBU NA MAWI YA NKWELANI NA NGE

MAMBU YINA BIBLIA KE TUBAKA: Nge fwete sosa mambote ya nkwelani na nge. (Bafilipi 2:3, 4) Baka yandi na mbalu mpi kuvila ve nde Yehowa ke lombaka bansadi na yandi na ‘kuvanda mawete na bantu yonso.’ (2 Timoteo 2:24) Biblia ke tubuka nde: ‘Bituba-tuba ya bantu ke lwadisaka bantu ya nkaka bonso mbele, kansi mambu ya bantu ya mayele ke belulaka.’ Yo yina, pona bangogo na nge na dikebi yonso. (Bingana 12:18) Mpeve ya Yehowa ta sadisa nge na kutuba na mawete mpi na zola.—Bagalatia 5:22, 23; Bakolosai 4:6.

MAMBU YA NGE LENDA SALA:

  • Lomba lusadisu sambu Nzambi kubwisa nge ntima, mpi tanina mabanza ya mbote na ntwala ya kusolula mambu ya mfunu ti nkwelani na nge

  • Yindula mbote-mbote mambu ya nge ta tuba mpi mutindu nge ta tuba yo

 3 BENO SALA MAMBU NA KIMVUKA

MAMBU YINA BIBLIA KE TUBAKA: Kana nge me kwela, beno me kuma “nsuni mosi” ti nkwelani na nge. (Matayo 19:5) Kansi beno kele kaka bantu zole mpi mabanza na beno lenda swaswana. Yo yina, beno fwete sosa kuvanda na bumosi na mabanza mpi na mawi. (Bafilipi 2:2) Bumosi kele mfunu ntangu beno ke baka badesizio. Biblia ke tuba nde: “Sosa bandongisila ya mbote, ebuna mambu na nge ta bonga.” (Bingana 20:18) Bika nde minsiku ya Biblia kutwadisa beno ntangu beno ke baka badesizio ya mfunu.—Bingana 8:32, 33.

MAMBU YA NGE LENDA SALA:

  • Kuzabisa ve nkwelani na nge kaka mambu mpi bangindu na nge, kansi monisa yandi mpi mawi na nge

  • Solula ti nkwelani na nge na ntwala ya kusala mambu

^ par. 4 Yehowa kele Zina ya Nzambi mutindu Biblia ke monisa yo.