Kwenda na mambu ke na kati

Kwenda na tansi ya malongi

 KITINI 4

Mutindu ya Kusadila Mbongo

Mutindu ya Kusadila Mbongo

“Sosa bandongisila ya mbote, ebuna mambu na nge ta bonga.”Bingana 20:18

Beto yonso ke vandaka na mfunu ya mbongo sambu na kusumbila dibuta na beto bima yina bo kele na yo mfunu. (Bingana 30:8) Nkutu, ‘mbongo ke taninaka.’ (Longi 7:12NW) Yo lenda vanda mpasi nde beno zole kusolula mambu ya me tala mbongo, kansi beno bika ve nde mbongo kubasisa mindondo na makwela na beno. (Baefezo 4:32) Bankwelani fwete tudilana ntima mpi kusala kumosi ntangu bo ke baka lukanu ya kusadila mbongo.

 1 YIDIKA MAMBU MBOTE-MBOTE

MAMBU YINA BIBLIA KE TUBAKA: “Nani na kati na beno yina ke zola kutunga nzo-zulu ke vandaka ntete ve sambu na kutadila ntalu ya mbongo yina yo ta lomba mpi kutala kana yandi kele ti yina me fwana sambu na kumanisa yo?” (Luka 14:28) Yo kele mbote na kuwakana na ntwala mutindu beno ta sadila mbongo na beno. (Amosi 3:3) Beno zaba bima ya beno fwete sumba mpi mbongo ikwa beno lenda sadila. (Bingana 31:16) Yo ke tendula mpenza ve nde kana beno kele na mbongo, beno fwete sumba konso kima yina beno me zola. Beno buya kubaka bamfuka. Beno sadila kaka mbongo yina beno kele na yo.—Bingana 21:5; 22:7.

MAMBU YA NGE LENDA SALA:

  • Kana mbongo ya nkaka me bikala na nsuka ya ngonda, beno sosa kuzaba mutindu beno ta sadila yo

  • Beno fiotuna badepanse kana mbongo na beno kele fioti. Mu mbandu, beno lenda lamba na madia na kisika ya kusumba na restora

 2 VANDA MASONGA MPI NA BUTAKI-KATI

MAMBU YINA BIBLIA KE TUBAKA: “Beto ke kebaka mambu yonso na masonga yonso, kaka ve na meso ya Yehowa, kansi mpi na meso ya bantu.” (2 Bakorinto 8:21) Zabisa nkwelani na nge na masonga yonso mbongo ikwa bo ke futaka nge mpi nge ke sadilaka ikwa.

Konso ntangu solula ti nkwelani na nge na ntwala ya kubaka badesizio ya mfunu na yina me tala mambu ya mbongo. (Bingana 13:10) Kana beno ke solula mambu ya me tala mbongo, yo ta sadisa beno na kutanina ngemba na makwela. Kubaka ve mbongo yina bo ke futa nge bonso ya nge mosi, kansi baka yo bonso mbongo ya dibuta.—1 Timoteo 5:8.

MAMBU YA NGE LENDA SALA:

  • Beno wakana ntalu ya mbongo yina konso muntu lenda sadila kana yandi me solula ve ti nkwelani ya nkaka

  • Beno fwete vingila ve tii kuna dikambu mosi kubasika sambu na kutubila mambu ya me tala mbongo