Kwenda na mambu ke na kati

Kwenda na tansi ya malongi

 KITINI 6

Mutindu Bana Ke Sobaka Makwela

Mutindu Bana Ke Sobaka Makwela

“Bana kele makabu ya Yehowa.”Nkunga 127:3

Kana mwana me butuka, yo lenda vanda diambu ya kiese to ya mpasi sambu na dibuta. Sambu beno me buta, beno lenda yituka na kumona nde beno ta sadila ntangu mpi ngolo na beno sambu na kukeba mwana na beno. Kukonda mpongi mpi bansoba ya mawi lenda tula bangwisana na beno na kigonsa. Yo ta lomba nde beno zole kusala bansoba sambu na kukeba mwana na beno mpi kutanina makwela na beno. Inki mutindu bandongisila ya Biblia lenda sadisa beno na kunwana ti bampasi yai?

 1 BENO BAKISA MUTINDU MWANA KE SOBA LUZINGU NA BENO

MAMBU YINA BIBLIA KE TUBAKA: “Zola kele ntima-nda mpi ntima ya mbote.” Diaka, yo “ke sosaka ve mambote na yo mosi, ke waka makasi ve.” (1 Bakorinto 13:4, 5) Sambu nge me buta, nge ta tula dikebi ya mingi na mwana na nge. Kansi, bakala na nge lenda mona nde nge ke tudila yandi diaka ve dikebi, yo yina kuvila ve nde yandi ke zolaka mpi nde nge tudila yandi dikebi. Na mawete mpi na ntima-nda yonso, nge lenda sadisa bakala na nge na kudiwa nde yandi kele mfunu mpi landa na kukeba mwana na nge.

Biblia ke tuba nde: ‘Beno babakala, beno landa kuzinga ti bankento na beno na kutadila nzayilu.’ (1 Piere 3:7) Zaba nde nkento na nge ta sadila ngolo na yandi sambu na kukeba mwana na beno. Yandi me kuma ti mikumba mingi mpi mikumba yango lenda yangisa, kulembisa to nkutu kupesa yandi mawa. Na bantangu ya nkaka, yandi lenda wila nge nkutu makasi, kansi kanga ntima sambu “muntu yina ke waka makasi nswalu ve kele mbote kuluta muntu ya ngolo.” (Bingana 16:32NW) Vanda ti luswasukusu mpi sadisa yandi kana yandi kele ti mfunu ya lusadisu.Bingana 14:29.

MAMBU YA NGE LENDA SALA:

  • Bakala: Sadisa nkento na nge na kukeba mwana ata na mpimpa. Tula bandilu na ntangu yina nge ke lutisa na bisalu ya nkaka sambu nge lutisa ntangu ya mingi ti nkento mpi mwana na nge

  • Nkento: Kana bakala na nge ke sosa kusadisa nge na kukeba mwana, ndima lusadisu na yandi. Kana bakala na nge ke zaba ve mutindu ya kukeba mwana mbote-mbote, kuvweza yandi ve, kansi zabisa yandi mutindu ya kusala yo na mawete yonso

 2 BENO KUMISA BANGWISANA NA BENO NGOLO

MAMBU YINA BIBLIA KE TUBAKA: “Bo ta kuma muntu mosi.” (Kuyantika 2:24) Ata beno me kuma ti muntu ya nkaka na dibuta na beno, kuvila ve nde nge ti nkwelani na nge kele kaka “muntu mosi.” Beno sala bikesa ya mingi sambu na kukumisa bangwisana na beno ngolo.

Nkento, monisa ntonda na lusadisu ya bakala na nge. Ntonda yina nge ke monisila bakala na nge lenda ‘belula.’ (Bingana 12:18) Bakala, monisa nkento na nge nde ke zolaka yandi mingi mpi nge ke bakaka yandi na mbalu. Kumisa yandi na mutindu yandi ke lungisa mikumba na dibuta.—Bingana 31:10, 28.

Biblia ke tuba nde: “Bika nde konso muntu kulanda na kusosa, mambote na yandi mosi ve, kansi ya muntu ya nkaka.” (1 Bakorinto 10:24) Ntangu yonso, sala mambu ya kuluta mbote sambu na nkwelani na nge. Sambu beno kele bankwelani, beno baka ntangu ya kusolula, ya kusikisa mpi ya kuwidikila konso muntu. Kuvanda ve bwimi na mambu ya me tala kuvukisa nitu. Tula dikebi na bampusa ya nkwelani na nge. Biblia ke tuba nde: “Beno kudiyimina ve, katula kaka kana beno me wakana sambu na ntangu fioti.” (1 Bakorinto 7:3-5) Yo yina, beno tadila diambu yai na masonga yonso. Kana beno kele ntima-nda mpi ke bakisa mambu, bangwisana na beno ta kuma ngolo.

MAMBU YA NGE LENDA SALA:

  • Beno lutisa ntangu beno zole

  • Sala mambu ya fioti-fioti yina ke monisa nkwelani na nge nde nge ke zolaka yandi, mu mbandu kusonikila yandi ka noti to kupesa yandi dikabu

 3 BENO LONGA MWANA NA BENO

MAMBU YINA BIBLIA KE TUBAKA: “Yantika bumwana nge me zaba masonama ya santu, yina lenda kumisa nge mayele sambu na kubaka luguluku.” (2 Timoteo 3:15) Yidika mambu yina nge ta longa mwana na nge. Yandi kele ti makuki ya kulonguka, ata nkutu na ntwala nde yandi butuka. Ntangu mwana kele na divumu, yandi lenda zaba ndinga na nge mpi kusala mambu na kuwakana ti mawi na nge. Tangila yandi mikanda ntangu yandi kele ntete mwana ya fioti. Ata yandi lenda bakisa ve mambu yina nge ke tanga, yo lenda sadisa yandi na kusepela ti kutanga ntangu yandi ta yela.

Mwana na nge kele ve ya ndendi sambu na kuwa mambu yina nge ke tuba sambu na Nzambi. Samba Yehowa ti yandi sambu yandi wa mambu yina nge ke tuba. (Kulonga 11:19) Ata ntangu nge ke sakana ti yandi, tubila yandi bima yina Nzambi me salaka. (Nkunga 78:3, 4) Ntangu mwana na nge ke yela, yandi ta bakisa nde nge ke zolaka Yehowa mpi ta longuka na kuzola yandi mpi.

MAMBU YA NGE LENDA SALA:

  • Samba Nzambi sambu yandi pesa nge mayele ya kulonga mwana na nge

  • Tubila mwana na nge mbala na mbala bangogo mpi bangindu ya mfunu sambu yandi yantika kulonguka tuka bumwana