Kwenda na mambu ke na kati

Kwenda na tansi ya malongi

 KITINI 8

Ntangu Bampasi Me Bwa

Ntangu Bampasi Me Bwa

“Beno kele na kiese mingi, ata mimekamu ya mutindu na mutindu pesaka beno mawa sambu na ntangu fioti.”—1 Piere 1:6

Ata beno sala ngolo nki mutindu sambu na kuvanda ti makwela mpi dibuta ya kiese, mambu ya kukonda kukana lenda sala nde beno tanina ve kiese na beno. (Longi 9:11) Nzambi ke sadisaka beto na zola yonso ntangu beto ke kutana ti bampasi. Kana nge ke zitisa minsiku ya Masonuku ya ke landa, nge ti dibuta na nge ta nunga bampasi, ata yo vanda ya nki mutindu.

 1 TUDILA YEHOWA NTIMA

MAMBU YINA BIBLIA KE TUBAKA: “Beno ke losila yandi basusi na beno yonso, sambu yandi ke kudibanzaka sambu na beno.” (1 Piere 5:7) Yibuka ntangu yonso nde Nzambi kele ve na kisina ya bampasi na beno. (Yakobo 1:13) Kana nge kwenda pene-pene na yandi, yandi ta sadisa nge na mutindu mosi ya mbote. (Yezaya 41:10) Biblia ke tuba nde: “Beno songa yandi bampasi yonso ya ntima na beno.”—Nkunga 62:9.

Diaka, nge ta baka kikesa kana nge ke tanga mpi ke longuka Biblia konso kilumbu. Kana nge sadila mambu yai, nge ta mona mutindu Yehowa “ke lembikaka beto na bampasi na beto yonso.” (2 Bakorinto 1:3, 4; Baroma 15:4) Yandi ke sila na kupesa nge “ngemba ya Nzambi yina me luta mambu yonso yina bantu lenda bakisa.” —Bafilipi 4:6, 7, 13

MAMBU YA NGE LENDA SALA:

  • Samba Yehowa sambu yandi sadisa nge na kuvanda ve ntima zulu-zulu mpi kuyindula mbote

  • Tadila diaka balukanu na nge mpi pona nzila ya kuluta mbote

2 LUNGISA BAMPUSA NA NGE MPI YA DIBUTA NA NGE

MAMBU YINA BIBLIA KE TUBAKA: “Ntima ya muntu ya ngangu ke bakaka nzayilu, mpi dikutu ya bantu ya mayele ke sosaka nzayilu.” (Bingana 18:15NW) Zaba mawi mpi bampusa ya konso muntu na dibuta na nge. Solula ti bo mpi widikila bo.—Bingana 20:5.

Inki nge ta sala kana muntu ya nge ke zolaka me fwa? Kuwa ve boma na kumonisa mawi na nge. Kuvila ve nde ata Yezu “basisaka mansanga.” (Yoane 11:35; Longi 3:4) Yo kele mfunu na kupema mpi kulala mingi. (Longi 4:6) Diambu yai ta sadisa nge na kununga bampasi.

MAMBU YA NGE LENDA SALA:

  • Vanda ti kikalulu ya kusolula ti dibuta na nge na ntwala nde bampasi kubwa. Kana bo me kutana ti makambu, bo ta songa nge kukonda mpasi

  • Solula ti bantu ya nkaka yina me kutanaka ti diambu ya mutindu mosi

 3 SOSA LUSADISU YINA NGE KE NA YO MFUMU

MAMBU YINA BIBLIA KE TUBAKA: “Nduku ya kieleka ke zolaka konso ntangu, mpi yandi kele mpangi yina me butukaka sambu na bantangu ya mpasi.” (Bingana 17:17NW) Banduku na nge ta zola kusadisa nge, kansi bo lenda zaba ve nki mambu bo fwete sala. Kubuya ve na kuzabisa bo mambu ya nge kele na yo mfunu. (Bingana 12:25) Diaka, sosa lusadisu ya kimpeve na bantu yina ke bakisaka Biblia. Lutwadisu ya Biblia yina bo lenda pesa ta sadisa nge.—Yakobo 5:14.

Nge ta baka lusadisu ya nge kele na yo mfunu kana nge ke vukana mbala na mbala ti bantu ya ke kwikilaka na Nzambi mpi ya ke tudilaka balusilu na yandi ntima. Nge ta baka mpi kikesa mingi kana nge ke sadisa bantu ya nkaka yina kele ti mfunu ya kikesa. Zabisa bo lukwikilu na nge na Yehowa mpi na balusilu na yandi. Kudipesa mingi na kusadisa bantu ya nkaka yina kele na mfunu ya lusadisu, mpi kudikabula ve ti bantu yina ke zolaka nge mpi ke kudibanzaka sambu na nge.—Bingana 18:1; 1 Bakorinto 15:58.

MAMBU YA NGE LENDA SALA:

  • Zabisa nduku na nge ya ngolo na kusadisa nge

  • Zabisa yandi bampusa na nge mbote-mbote mpi na masonga yonso